1. Kansi Yehova osenga atumiki ŵake kuti akocita cinji? (Onani soti cithunzithunzi.)

 KANSI ni ŵani watingasenge kuti atitonthoze notisogolela? Tuziŵa yankho ya konsho iyi. Tingasenge Yehova Mulungu kupitila m’pemphelo. Tuziŵa kuti Yehova ofuna kuti tikocita izi cifukwa Baibo yukamba kuti ‘tikopemphela mosalekezhya.’ (1 Ates. 5:17) Tingalaŵile naye mwaufulu kupitila m’pemphelo nomusenga kuti akotisogolela m’mbali zonse za umoyo wasu. (Miy. 3:5, 6) Pofwana kuti Yehova ni Mulungu wawanzi, otisenga kuti tikolaŵila naye kanyinji monga ni mwatingafunile.

2. Tilaŵizhyane cinji m’nkhani ino?

² Tuyamikila ngako Yehova cifukwa cotipasa mphaso ya pemphelo. Koma nthawi ziyakine tingovutika kuti tipeze nthawi yopemphela cifukwa tunkhala otangwanika. Kuyangizhyila apo, nthawi ziyakine tingaone kuti tufunika kuongolela mapemphelo ŵasu. Tuyamikila kuti tingalimbikishiwe nopeza cisogozo m’Malemba. M’nkhani ino, tilaŵizhyane zatingacite kuti tikopeza nthawi yopemphela mwa kukambisilana cisanzo ca Yesu. Tilaŵizhyane soti mwatingapelekele mapemphelo okonzewa bwino mwa kuikamo vinthu 5 vofunika ngako.

3. Kansi Yesu enzoziŵa cinji zokhuza pemphelo?

³ Yesu enzoziŵa kuti Yehova oona kuti mapemphelo ŵasu ni ofunika ngako. Vyaka vinyinji akaliyowela pacalo, enzoona mwamene Yehova enzoyankhila mapemphelo ya analume na  anakazi okhulupilika. Mwacisanzo, Yesu enzepo pamene Ausuwake enzoyankha mapemphelo ofumila pansi pa mtima a Hana, Davide, Eliya na atumiki ŵake ayakine anyinji okhulupilika. (1 Sam. 1:10, 11, 20; 1 Maf. 19:4-6; Sal. 32:5) Niye cifukwa cake Yesu elimbikisha ophunzila ŵake kupemphela kaŵili-kaŵili koma soti mwacidalilo.​—Mat. 7:7-11.

4. Kansi tuphunzilapo cinji pa mapemphelo a Yesu?

⁴ Kupitila m’mapemphelo yeenzotwala kwa Yehova, Yesu esiila ophunzila ŵake cisanzo kuti akokonkha. Pa nthawi yonse yeenzocita utumiki, Yesu enzopemphela mowelezhyawelezhya. Kuti akwanishe kucita izi, enzofunika kupatula nthawi cifukwa nthawi zinyinji enzonkhala wotangwanika koma soti wozunguliliwa na ŵanthu anyinji. (Mko. 6:31, 45, 46) Nthawi ziyakine enzouka m’mamawa ngako kuti apeze nthawi yonkhala yeka nopemphela. (Mko. 1:35) Pa nthawi iyakine, epemphela usiku wonse peenzofuna kupanga cosankha cofunika ngako. (Luka 6:12, 13) Ndipo Yesu epemphela mowelezhyawelezhya pa usiku wakuti mailo apaiwe kuti aike maganizo ŵake pa kusilizhya mbali yofunika ngako ya utumiki wake wa pacalo.​—Mat. 26:39, 42, 44.

5. Kansi tingatolele tyani cisanzo ca Yesu ngati tupemphela?

⁵ Cisanzo ca Yesu cutiphunzisa kuti mosasamala kanthu kuti tunkhala otangwanika tyani, tufunika kupatula nthawi yopemphela. Molingana na Yesu, tingapeze nthawi yopemphela mwa kuuka m’mamawa ngako olo kucelwako kuyona. Ngati tucita izi, tuonesha kuti tuyamikila Yehova cifukwa ca mphaso iyi yapadela. Kalongosi Lynne okumbukila mwecikhuziwila peciphunzila kwa nthawi yoyamba za mwai wa pemphelo. Elaŵila kuti, “Peneziŵa kuti ningakambe na Yehova nthawi iliyonse, zeniyavya kuti nikomuona monga Shamwali wangu wa pa mtima. Zeniyavya soti kuti ninkhale na cifuno coongolela mapemphelo ŵangu.” Mosakaikila, anyinji a seo tukumvwa cimozimozi. Tetyo, tiyeni tilaŵizhyane vinthu 5 vofunika ngako vatufunika kuika m’mapemphelo ŵasu.

6. Molingana na Chivumbulutso 4:10, 11, kansi Yehova ni woyenela kulandila cinji?

⁶ Mukotamanda Yehova. M’mensomphenya yocitisha cidwi, mtumwi Yohane eona  akulu 24 kululu apo n’kuti olambila Yehova. Enzotamanda Mulungu nolaŵila kuti ni woyenela “kulandila ulemelelo, ulemu na mphamvu.” (Ŵelengani Chivumbulutso 4:10, 11.) Nao angelo okhulupilika ali na vifukwa vinyinji votamandila Yehova. Ove ali kululu pamozi na Yehova ndipo efwika pomuziŵa bwino. Kuyangizhyila apo, okwanisha kuona minkhalidwe yake yamene yuonekela kupitila m’vinthu vakucita. Tetyo, akaona mwakucitila zinthu, zuŵasonkhezela kuti akomutamanda.​—Yobu 38:4-7.

7. Ni vifukwa votyani vufunika kutipangisha kutamanda Yehova?

⁷ Nase tufunika kutamanda Yehova m’mapemphelo ŵasu. Tingacite izi mwa kumuuzhya vinthu vatukonda vokhuza yove koma soti cifukwa cake tumulemekeza. Tetyo, ngati muŵelenga nophunzila Baibo, mukoyesayesa kuona minkhalidwe ya Yehova yamene yukucitishani cidwi. (Yobu 37:23; Aro. 11:33) Pavuli pake, mukomuuzhya mwamumvwila cifukwa ca minkhalidwe yake yamene iyo. Tufunika soti kutamanda Yehova cifukwa otiyavya noyavya akwasu na azilongosi pacalo conse. Nthawi zonse yove otisamalila notiteteza.​—1 Sam. 1:27; 2:1, 2.

8. Ni vifukwa viyakine votyani vatuyamikilila Yehova? (1 Atesalonika 5:18)

⁸ Mukoyamikila Yehova. Tili na vifukwa vinyinji vatufunikila kuyamikila Yehova m’pemphelo. (Ŵelengani 1 Atesalonika 5:18.) Tingayamikile Yehova cifukwa ca vinthu vonse vabwino vatili navo. Talaŵila teti cifukwa tuziŵa kuti mphaso iliyonse yabwino yufumila kuli yove. (Yak. 1:17) Mwacisanzo, tingayamikile Yehova cifukwa ca kukongola kwa calo koma soti vinthu vodabwisa va m’cilengedwe. Tingayamikile soti Yehova cifukwa cotipasa moyo, banja, ayasu na ciyembekezo. Tingamuyamikile soti cifukwa cotilola kunkhala naye pa ushamwali.

9. Ndaŵa yanji tufunika kukulisha mzimu woyamikila Yehova?

⁹ Tingafunike kuyesayesa mwakhama kuti tikwanishe kuganizila vifukwa vatufunikila kuyamikila Yehova seo paseka. Talaŵila teti cifukwa ŵanthu anyinji m’calo cino ni osayamikila. Mwacisanzo, ŵanthu anyinji okonda kuika maganizo ŵao pa vinthu vakufuna, osati pa zaangacite kuti aoneshe kuti oyamikila vinthu vaali navo. Ngati tingatolele kaganizidwe aka, niye kuti mapemphelo ŵasu nthawi zonse angonkhala osenga vinthu. Kuti tipewe izi, tufunika kupitilizhya kukulisha mzimu woyamikila pa vinthu vawaticitila Yehova.​—Luka 6:45.

10. Kansi kuyamikila kweyavya tyani kalongosi muyakine kuti akwanishe kupilila? (Onani soti cithunzithunzi.)

¹⁰ Mzimu woyamikila ungatiyavye kupilila mavuto osiyanasiyana. Ganizilani cokumana naco ca kalongosi Kyung-sook camene cupezeka mu Nsanja ya Olonda ya January 15, 2015. Yove emupeza na matenda a khansa ya ku mapwapwa. Elaŵila kuti: “Vuto iyi yenzonicitisha kunkhala wosasangalala. Nenzoona kuti  netaikiliwa vinthu vonse venenze navo ndipo nenzocita wowa.” Kansi n’cinji cemuyavya kuti akwanishe kupilila? Elaŵila kuti usiku ulionse akaliyolala, enzoluta palulu pa ng’anda yake nopemphela mokuwa noyamikila Yehova pa vinthu 5 vaamucitila pa siku yamene iyo. Kucita izi kwemuyavya kucepeshako nkhaŵa nomusonkhezela kuonesha cikondi cake pa Yehova. Ndipo eona mwamene Yehova oyavyila atumiki ŵake okhulupilika ngati okumana na mavuto akulu. Izi zemucitisha kuzindikila madaliso anyinji yawalandila pa umoyo wake yamene yopambana mayeselo yawakumana nayo. Molingana na kalongosi Kyung-sook, nase tili na vifukwa vinyinji vamene vufunika kutipangisha kuyamikila Yehova olo pa nthawi yatukumana na mayeselo. Tetyo, kuyamikila Yehova m’pemphelo pa vinthu vawaticitila, kungatiyavye kuti tikwanishe kupilila nopitilizhya kunkhala acimwemwe.

11. Ndaŵa yanji ophunzila a Yesu enzofunika kunkhala otang’a mtima pavuli pakuti Yesu wawelela kululu?

¹¹ Mukosenga Yehova kuti akuyavyeni kunkhala otang’a mtima mu utumiki. Akaliyowelela kululu, Yesu ekumbusha ophunzila ŵake za nchito yeciŵapasa yocitila umboni “mu Yerusalemu, ku Yudeya konse na ku Samariya mpaka kosilizhyila kwa calo.” (Mac. 1:8; Luka 24:46-48) Nthawi itontho pavuli pake, asogoleli aciyuda emanga mtumwi Petulo na Yohane noŵaleta pamenso pa Khoti Ikulu ya Ayuda. Ove eŵayofya noŵalesha kulalikila. (Mac. 4:18, 21) Kansi Petulo na Yohane ecitanji?

12. Molingana na Machitidwe 4:29, 31, kansi ophunzila a Yesu ecitanji?

¹² Poyankha asogoleli acipembezo aciyuda, Petulo na Yohane elaŵila kuti: “Weluzani mweka ngati ni koyenela m’menso mwa Mulungu kumvwila mweo kupambana Mulungu. Koma seo tileke lini kulaŵila za vinthu veteona na kumvwa.” (Mac. 4:19, 20) Petulo na Yohane pecimasuliwa, ophunzila a Yesu epemphela kwa Yehova kuti aŵayavye kucita cifunilo cake. Epemphela kuti: “Lolani kuti akapolo ŵanu apitilizhye kulaŵila mau ŵanu motang’a mtima.” Yehova eyankha pemphelo iyi yofumila pansi pa mtima.​—Ŵelengani Machitidwe 4:29, 31.

13. Kansi tingaphunzilepo cinji pa cisanzo ca mkwasu Jin-hyuk?

¹³ Tingatolele cisanzo ca atumwi mwa kupitilizhya kulalikila ngati akulu-akulu a boma atilamula kuti tileke kulalikila. Ganizilani cisanzo ca mkwasu Jin-hyuk wamene enze eikiwa m’jele cifukwa cokana kuloŵa usoja. Peenze m’jele, enze euzhyiwa kuti akosamalila akaidi ayakine amene enzonkhala kwaŵeka. Koma enze emulamula kuti akolaŵila nao tyala zokhuza kuŵasamalila, osati pa vinthu viyakine olo zokhuza Baibo. Yove epemphela kuti ankhale wotang’a mtima koma soti kuti akolalikila mosamala pa mpata ulionse ungapezeke. (Mac. 5:29) Elaŵila kuti: “Yehova eyankha mapemphelo ŵangu mwa kuniyavya kunkhala wotang’a mtima nonipasa nzelu kuti nikwanishe kuyambisha maphunzilo a Baibo anyinji amene nenzosogoza kwa maminesi 5 apo n’kuti nili pamlyango wa jele. Usiku nenzolemba makalata yamene nenzopasa akaidi pa siku yokonkhapo.” Nase tingankhale na cidalilo cakuti Yehova atiyavye kukwanilisha utumiki wasu. Molingana na mkwasu Jin-hyuk, tingasenge Yehova kuti atiyavye kunkhala otang’a mtima notipasa nzelu.

14. Tufunika kucita cinji ngati tukumana na mavuto? (Salimo 37:3, 5)

¹⁴ Mukosenga Yehova kuti akuyavyeni kulimbana na mavuto. Anyinji a seo tukumana na mavuto monga matenda, kutaikiliwa okondeka ŵasu mu imfwa, mavuto a m’banja, cinzunzo olo mavuto ayakine. Ayakine ovutika cifukwa ca milili na nkhondo. Ndipo izi  zucitisha kuti cinkhale covuta kuti akwanishe kupilila. Ngati mukumana na mavuto oteti, mufunika kumuuzhya Yehova mwamumvwila. Mukomuuzhya mwazilili zinthu monga ni mwamungauzhyile muyanu wa pa mtima. Mukonkhala osimikizhya kuti Yehova “acitepo kanthu.”​—Ŵelengani Salimo 37:3, 5.

15. Kansi pemphelo ingatiyavye tyani kuti tikwanishe ‘kupilila cisauso’? Fofotokozani cisanzo.

¹⁵ Ngati tulimbikila kupemphela, zitiyavye ‘kupilila tikakumana na cisauso.’ (Aro. 12:12) Yehova oziŵa mavuto yakukumana nayo atumiki ŵake ndipo “akumvwa kulila kwao kosenga thandizo.” (Sal. 145:18, 19) Mpainiya muyakine wa vyaka 29 wa zina yakuti Kristie eona kuti mfundo iyi ni yacendi. Yove elwala matenda akulu mosayembekezeleka. Izi zemucitisha kuti ayambe kuvutika maganizo. Pakaliyopita nthawi itali, amai ŵake eŵapeza na matenda akulu. Kalongosi Kristie elaŵila kuti: “Nenzopemphela kwa Yehova kuti akonipasa mphamvu zenenzofunikila siku iliyonse. Ndipo nenzoyesayesa kukonkha ndandanda yangu yocitila zinthu zauzimu mwa kupezeka pa misonkhano nocita phunzilo ya paneka.” Eyangizhyilapo kuti: “Pemphelo yeniyavya kuti nikwanishe kupilila pa nthawi yovuta. Nenzoziŵa kuti Yehova alipo kuti aniyavye. Mfundo iyi yeniyavya kuti nimvweko bwino. Olo kuti vuto ya thanzi yenenze nayo iliyosile nthawi yamene iyo, Yehova eyankha mapemphelo ŵangu mwa kunipasa mtendele wa mumtima noniyavya kunkhala wodekha.” Tetyo, nthawi zonse tikokumbukila kuti “Yehova oziŵa kupulumusa ŵanthu ozipeleka kwa yove akankhala pa mayeselo.”​—2 Pet. 2:9.

16. Ndaŵa yanji tufunikila thandizo ya Yehova kuti tikwanishe kulimbana na mayeselo?

¹⁶ Mukosenga Yehova kuti akuyavyeni kulimbana na mayeselo. Cifukwa cakuti tiliye ungwilo, nthawi zonse tufunika kuyesayesa kulimbana na mayeselo yakuti ticite cinthu colakwika. Satana oyesayesa kucita zonse zaangakwanishe  kuti zinthu zinkhale zovuta kuli seo. Njila imozi yakuseŵenzesha pofuna kusokoneza maganizo ŵasu ni kupitila mu zosangulusha ziipa. Zosangulusha zoteti zingaticitishe kuti tisankhale atuŵa m’menso mwa Yehova noticitisha kuti ticite cimo ikulu.​—Mko. 7:21-23; Yak. 1:14, 15.

17. Pavuli pakuti tapemphela, kansi tufunika kucitanji kuti tikwanishe kupewa mayeselo? (Onani soti cithunzithunzi.)

¹⁷ Tufunikila thandizo ya Yehova kuti tikwanishe kulimbana na mayeselo yakuti ticite vinthu viipa. Yesu efotokozapo mfundo iyi m’pemphelo ya cisanzo. Elaŵila kuti: “Musatiloŵeshe m’mayeselo, koma mutipulumuse kuli muipa.” (Mat. 6:13) Yehova ofunishisha kutiyavya, koma tufunika kumusenga. Tufunika soti kucita zinthu mokatizhyana na mapemphelo ŵasu. Tufunika kuyesayesa kucita zonse zatingakwanishe kuti tipewe kuŵelenga olo kumvwishila vinthu volakwika vamene ni vowanda m’calo cino ca Satana. (Sal. 97:10) Tingacite zinthu zosangalasa monga kuŵelenga nophunzila Baibo, kupezeka pa misonkhano notolako mbali m’nchito yolalikila. Zinthu izi zingatiyavye kuteteza maganizo ŵasu. Ngati tucita izi, Yehova olonjeza kuti atiyavye kuti osati tiyesewe kufwika pakuti tingakwanishe lini kupilila.​—1 Akor. 10:12, 13.

18. Ponena za pemphelo, kansi aliyense wa seo ofunika kucita cinji?

¹⁸ Aliyense wa seo ofunika kupemphela mowelezhyawelezhya kupambana kale, kuti akwanishe kupitilizhya kunkhala wokhulupilika kwa Yehova m’masiku ŵano osilizhya. Tufunika kupatula nthawi siku iliyonse kuti tipemphele kwa Yehova mofumila pansi pa mtima. Yehova ofuna kuti ‘tikomukhutulila za mumtima mwasu’ m’pemphelo. (Sal. 62:8) Tikomutamanda nomuyamikila pa vinthu vonse vabwino vawaticitila. Tikomusenga kuti atiyavye kunkhala otang’a mtima mu utumiki na kuti atiyavye kulimbana na mavuto koma soti mayeselo yatingakumane nayo. Osati mukolola munthu aliyense olo cinthu ciliconse kukukangishani kupemphela kwa Yehova nthawi zonse. Lomba kansi Yehova oyankha tyani mapemphelo ŵasu? Tikalaŵizhyane konsho iyi yofunika ngako m’nkhani yokonkhapo.