NKHANI YOPHUNZILA 20
NYIMBO 67 “Lalikila Mau”
Lolani Kuti Cikondi Cikusonkhezeleni Kupitilizhya Kulalikila
“Coyamba, uthenga wabwino ufunika kulalikiliwa ku ŵanthu a mitundu yonse.”—MKO. 13:10.
ZATI TIPHUNZILE
Nkhani ino itiyavye kuona mwamene cikondi cutiyavyila kulalikila na mtima wonse koma soti mwacangu.
1. Kansi tephunzilanji pa msonkhano wa pacaka wa mu 2023?
PA MSONKHANO wa pacaka wa 2023, a tecimvwa kamvwidwe kasu kalomba pa vinthu viyakine vatukhulupilila ndipo tecimvwa soti vilengezo viyakine vosangalasa vokhuza utumiki wasu. Mwacisanzo, tephunzila kuti ŵanthu ayakine akankhale na mwai wonkhala ku mbali ya Yehova olo pavuli pakuti Babulo Mkulu waonongewa. Tephunzila soti kuti kuyambila mu November 2023, ofalisa akofunika lini kulemba lipoti yonse ya utumiki. Kansi masinthidwe aya yocitisha nchito yasu yolalikila kunkhala yosafunika ngako? Yai.
2. Ndaŵa yanji siku iliyonse yucitisha utumiki wasu kunkhala wofunika ngako? (Maliko 13:10)
2 Siku iliyonse yucitisha kuti nchito yasu yolalikila inkhale yofunika ngako. Ndaŵa yanji? N’cifukwa cakuti kwasala tyala nthawi itontho kuti masilizhyilo afwike. Ganizilani zecilosela Yesu zokhuza nchito yolalikila m’masiku ŵano osilizhya. (Ŵelengani Maliko 13:10.) Kulingana na zecilemba Mateyu, Yesu elaŵila kuti uthenga uweme ufunika kulalikiliwa pacalo conse “masilizhyilo” akaliyofwika. (Mat. 24:14) Mau aŵa otanthauza masilizhyilo a calo cino ca Satana. Yehova waika ‘siku na ola’ pamene zinthu izi zikacitike. (Mat. 24:36; 25:13; Mac. 1:7) Siku iliyonse yutivwendezhya pafupi na nthawi iyi. (Aro. 13:11) Tetyo, tufunika kupitilizhya kulalikila mpaka pa nthawi pati yakafwike masilizhyilo.
3. Kansi n’cinji cutisonkhezela kuti tikolalikila?
3 Tikaganizila nchito yolalikila, tingazikonshe kuti: Ndaŵa yanji tulalikila uthenga uweme? Yankho yacidule ni yakuti cikondi niye cutisonkhezela kulalikila. Zatucita polalikila, zuonesha cikondi casu pa uthenga uweme, ŵanthu koma soti kupambana zonse cikondi casu pa Yehova na zina yake. Lomba, tiyeni tilaŵizhyane zinthu izi ciliconse paceka.
TULALIKILA CIFUKWA TUKONDA UTHENGA UWEME
4. Kansi tukumvwa tyani tikamvwa nkhani yabwino?
4 Ganizilani mwemwemvwila pemwelandila uthenga wosangalasa pa umoyo wanu. Payakine munthu muyakine m’banja mwanu enkhala na mwana olo mwepeza nchito yemwenzofunishisha. Mosakaikila, mwenze ofunishisha kuuzhyako abanja ŵanu na ayanu zokhuza uthenga uyu. Kansi mwecimvwa cimozimozi pemwelandila uthenga wosangalasa ngako wamene ni uthenga uweme wokhuza Ufumu wa Mulungu?
5. Kansi mwecimvwa tyani pemwecimvwa cendi cupezeka m’Mau a Mulungu kwa nthawi yoyamba? (Onani soti vithunzithunzi.)
5 Ganizilani mwemwemvwila nthawi yoyamba pemwephunzila cendi cofumila m’Baibo. Mwephunzila kuti Ausuwanu akululu okukondani ndipo ofuna kuti munkhale mbali ya banja yake. Alonjeza kuti akasilizhye mavuto noukisha okondeka ŵasu ecifwa kuti akankhale soti na moyo m’calo calomba ndipo akacite zinthu ziyakine zinyinji. (Mko. 10:29, 30; Yoh. 5:28, 29; Aro. 8:38, 39; Chiv. 21:3, 4) Cendi ici cekusangalasani ngako. (Luka 24:32) Mwenzokonda zemwenzophunzila ndipo mwenzofunishisha kuuzhyako ayakine cendi ici.—Linganizhyani na Yeremiya 20:9.
Petephunzila cendi kufumila m’Baibo, tesangalala ngako ndipo tenzofuna kuuzhyako ayakine zokhuza cendi ici (Onani ndime 5)
6. Kansi mwaphunzilapo cinji pa cokumana naco ca mkwasu Ernest na kalongosi Rose?
6 Ganizilani cocitika ici. Mkwasu muyakine wa zina yakuti Ernest b wamene enze na vyaka 10 ausuwake peecifwa, elaŵila kuti: “Nenzozikonsha kuti: ‘Kansi atata aluta kululu? Olo kansi afwa ndipo akankhale lini soti na moyo?’ Nenzokumbwila ŵana ayakine amene ausuwao enze akali na moyo.” Kanyinji-kanyinji, Ernest enzokonda kuluta ku manda nogwada pa mtumbila wa ausuwake nopemphela kuti: “Conde Mulungu, nufuna kuziŵa kuli atata.” Vyaka 17 pavuli pakuti ausuwake amwalila, munthu muyakine emusenga kuti ayambe kuphunzila naye Baibo ndipo yove evomela. Esangalala ngako kuphunzila kuti akufwa oziŵa lini ciliconse na kuti zili monga kuti ali mtulo. Esangalala soti ngako kuziŵa kuti akufwa akaukishiwe. (Mla. 9:5, 10; Mac. 24:15) Posilizhyila pake, epeza mayankho pa makonsho yamene yenzomuvutisha kwa nthawi itali. Ernest esangalala ngako na cendi ca m’Baibo ceenzophunzila. Mkazi wake Rose naye eyamba kuphunzila Baibo ndipo esangalala ngako kuphunzila za uthenga wa Ufumu. Mu 1978 onse aŵili ebatizika ndipo mofunishisha enzouzhyako abanja ŵao, ashamwali ŵao koma soti munthu aliyense wamene enze wofunishisha kumvwa uthenga uweme. Cifukwa ca izi, Ernest na mkazi wake Rose ayavya ŵanthu opitilila 70 kuluta pasogolo nobatizika.
7. Kansi n’cinji cucitika ngati cikondi casu pa cendi ca m’Baibo cazika mizhyu mu mtima mwasu? (Luka 6:45)
7 Kulaŵila cendi, ngati cikondi casu pa cendi ca m’Baibo cazika mizhyu mu mtima mwasu, tingakwanishe lini kunkhala celele. (Ŵelengani Luka 6:45.) Tukumvwa monga ni mwecimvwila ophunzila a Yesu a m’vyaka 100 voyambilila amene elaŵila kuti: “Tingaleke lini kulaŵila za zinthu zeteona na kumvwa.” (Mac. 4:20) Tukonda ngako cendi cakuti nise ofunishisha kuuzhyako ŵanthu anyinji monga ni mwatingakwanishile.
TULALIKILA CIFUKWA TUKONDA ŴANTHU
8. Kansi n’cinji cutisonkhezela kuuzhyako ayakine uthenga uweme? (Onani kabokosi kakuti “ Kondani Ŵanthu—Pangani Ophunzila.”) (Onani soti cithunzithunzi.)
8 Molingana na Yehova na Mwana wake, tukonda ŵanthu. (Miy. 8:31; Yoh. 3:16) Tucitila cifundo ŵanthu amene “omuziŵa lini Mulungu” ndipo “aliye ciyembekezo.” (Aef. 2:12) Cifukwa ca mavuto ŵao, ove akumvwa monga kuti ali m’cisengu conoka. Koma seo tili na nthambo yamene ingatiyavye kuti tiŵacose. Nthambo iyi, ni uthenga uweme wa Ufumu wa Mulungu. Cifukwa cakuti tuŵakonda ndipo tuŵacitila cifundo, tufuna kucita zonse zatingakwanishe kuti tiŵauzhye uthenga uweme. Kumvwa uthenga uyu kungaŵapase ciyembekezo, kungaŵayavye kunkhala osangalala pali lomba ndipo kungaŵapase mwai wakuti siku iyakine akasangalale na “moyo wenewene,” wamene ni moyo wosasila m’calo calomba ca Mulungu.—1 Tim. 6:19.
Cikondi koma soti cifundo pa ŵanthu ayakine cutisonkhezela kucita khama kuti tiŵauzhye uthenga uweme (Onani ndime 8)
9. Kansi ni cenjezo yotyani yokhuza sogolo yatuuzhyako ŵanthu ayakine, ndipo ndaŵa yanji? (Ezekieli 33:7, 8)
9 Kukonda ŵanthu kutisonkhezela soti kuŵauzhyako zakuti calo cino cionongewe lombapano. (Ŵelengani Ezekieli 33:7, 8.) Tumvwila cifundo ŵanthu onse, kuyangizhyilapo na abanja ŵasu amene ni osakhulupilila. Anyinji oziŵa lini zati zicitike lombapano monga “cisauso cikulu camene cikaliyocitikapo kuyambila pa ciyambi ca calo mpaka lomba ndipo cikacitikepo lini soti.” (Mat. 24:21) Tufuna kuti ove aziŵe zati zikacitike pa nthawi ya ciweluzo. Mwacisanzo, tufuna aziŵe kuti coyamba, cipembezo cawenye cikaonongewe ndipo pavuli pake, calo conse ciipa cikaonongewe pa Aramagedo. (Chiv. 16:14, 16; 17:16, 17; 19:11, 19, 20) Pemphelo yasu ni yakuti ŵanthu anyinji amvwishile zatuŵauzhya na kuti asankhe kutumikila Yehova pamozi na seo pali lomba. Nanga tyani za ŵala amene okana kumvwishila ku uthenga wasu kuyangizhyilapo abanja ŵasu?
10. Ndaŵa yanji tufunikila kupitilizhya kucenjezhya ŵanthu?
10 Monga ni mwetefotokozela m’nkhani yapita, payakine ni cifunilo ca Yehova kuti ŵanthu amene akayambe kumukhulupilila pavuli poona kuti Babulo Mkulu waonongewa, apulumusiwe. Ngati zikankhale tetyo, niye kuti ni pofunikila ngako pali lomba kuti tipitilizhye kuŵacenjezhya. Ganizilani izi. Zatingaŵauzhye pali lomba payakine zingaŵapase cinthu ciyakine cati akakumbukile pa nthawi yamene iyo. (Linganizhyani na Ezekieli 33:33.) Payakine akakumbukile cenjezo yeteŵauzhya ndipo akasonkhezelewe kuti akatizhyane nase potumikila Yehova nthawi ikaliyosila. Molingana na wolonda jele muyakine wa ku Filipi wamene eyamba kukhulupilila Mulungu pavuli pakuti kwacitika “civomezi cikulu,” payakine ŵanthu amene okhulupilila lini Mulungu pali lomba, akayambe kumukhulupilila pavuli poona kuti Babulo Mkulu waonongewa.—Mac. 16:25-34.
TULALIKILA CIFUKWA TUKONDA YEHOVA NA ZINA YAKE
11. Kansi tupasa tyani Yehova ulemelelo, ulemu na mphamvu? (Chivumbulutso 4:11) (Onani soti vithunzithunzi.)
11 Cifukwa cikulu catulalikilila uthenga uweme n’cakuti tukonda Yehova na zina yake ituŵa. Tuona utumiki wasu monga njila yotamandilamo Mulungu wasu watukonda. (Ŵelengani Chivumbulutso 4:11.) Na mtima wonse tuvomelezhya kuti Yehova Mulungu wasu ni woyenela kulandila ulemelelo, ulemu na mphamvu. Tumupasa ulemelelo na ulemu ngati tuuzhyako ayakine za umboni wosimikizhyilika wakuti yove niye elenga zinthu zonse, kuyangizhyilapo na seo. Tumupasa mphamvu ngati tuseŵenzesha nthawi, mphamvu na cuma casu pocita zonse zatingakwanishe pa nchito yolalikila. (Mat. 6:33; Luka 13:24; Akol. 3:23) Mwacidule, tingalaŵile kuti tukonda kulaŵila za Mulungu watukonda. Tusonkhezelewa soti kuuzhyako ayakine za zina yake na minkhalidwe yake. Ndaŵa yanji?
Tupasa Yehova mphamvu zasu ngati tuseŵenzesha nthawi, mphamvu na cuma casu pocita zonse zatingakwanishe pa nchito yolalikila (Onani ndime 11)
12. Kansi tutuŵisha tyani zina ya Yehova mu utumiki?
12 Cikondi casu pa Yehova cutisonkhezela kutuŵisha zina yake. (Mat. 6:9) Tufuna kutolako mbali pa kutuŵisha zina yake ku wenye wa Satana. (Gen. 3:1-5; Yobu 2:4; Yoh. 8:44) Kupitila mu nchito yolalikila, tunkhala ofunishisha kunkhala ku mbali ya Mulungu nouzhya ŵanthu amene ni okonzeka kumvwishila zokhuza Mulungu na cendi cokhuza yove. Tufuna kuti aliyense aziŵe kuti nkhalidwe yake ikulu ni cikondi, ulamulilo wake ni wacilungamo na kuti lombapano Ufumu wake usilizhye mavuto noleta mtendele na cimwemwe ku ŵanthu. (Sal. 37:10, 11, 29; 1 Yoh. 4:8) Tikauzhyako ŵanthu zokhuza Yehova, tutuŵisha zina yake. Tunkhala soti osangalala cifukwa tuziŵa kuti tucita zatufunika kucita monga Mboni za Yehova. Motyani?
13. Ndaŵa yanji tuona kuti ni mwai ukulu kuitiwa kuti Mboni za Yehova? (Yesaya 43:10-12)
13 Yehova watisankha kuti tinkhale “Mboni” zake. (Ŵelengani Yesaya 43:10-12.) Vyaka vitontho kuvuli, kalata yofumila ku Bungwe Yolamulila yelaŵila kuti: “Mwai ukulu watili nao ni woitiwa kuti Mboni za Yehova.” c Ndaŵa yanji zili teti? Ganizilani cisanzo ici. Ngati mungafune munthu muyakine kuti ankhale mboni yanu pa mlandu ku khoti, mosakaikila mungasankhe munthu wamuziŵa, wamukhulupilila koma soti wamene ali na mbili iweme yamene ingacitishe kuti ŵanthu ayakine akhulupilile zaangalaŵile. Molingana na izi, Yehova pecitisankha kuti tinkhale Mboni zake, oonesha kuti otiziŵa bwino ndipo okhulupilila kuti tikouzhya ŵanthu kuti yove niye tyala Mulungu wacendi. Tuona kuti ni mwai ukulu ngako kunkhala Mboni zake ndipo tuseŵenzesha mwai ulionse watingapeze kuti tiziŵikishe zina yake nosusha wenye wa Satana. Mwa kucita izi, tucita zinthu mokatizhyana na zina yasu yakuti Mboni za Yehova.—Sal. 83:18; Aro. 10:13-15.
TIPITILIZHYE KULALIKILA MPAKA PA MASILIZHYILO
14. Kansi n’cinji catuyembekezela mwacidwi?
14 Tuyembekezela mwacidwi zinthu zati zicitike lombapano. Na daliso ya Yehova, tuyembekezela kuona ŵanthu anyinji okatizhyana nase cisauso cikulu cikaliyoyamba. Kuyangizhyila apo, tuyembekezela soti mwacidwi kuona ŵanthu anyinji ofuma m’calo ca Satana nokatizhyana nase potamanda Yehova olo pa nthawi yovuta ngako ya cisauso cikulu.—Mac. 13:48.
15-16. Kansi tipitilizhye kucita cinji, ndipo mpaka lini?
15 Lomba, pali nchito yofunika ngako yatufunika kucita. Nchito iyi ni yolalikila uthenga uweme wa Ufumu wa Mulungu pacalo conse. Pa nthawi imozimozi, tufunika kupitilizhya kucenjezhya ŵanthu za zinthu zati zicitike msogolo. Ŵanthu ofunika kuziŵa kuti masilizhyilo ya calo ca Satana yafwike lombapano. Ndipo nthawi iyi ya ciweluzo ikayofwika, akaziŵe kuti uthenga wetenzolalikila wenzofumila kwa Yehova Mulungu.—Ezek. 38:23.
16 Kansi nise osimikizhya kucita cinji? Mosonkhezelewa na cikondi casu pa uthenga uweme, ŵanthu koma soti kupambana zonse cikondi casu pa Yehova Mulungu na zina yake, tipitilizhye kulalikila mofunishisha, mwacangu koma soti mozipeleka mpaka pati Yehova akalaŵile kuti ‘kwasila.’
NYIMBO 54 “Njila ni Iyi”
a Msonkhano wa pa caka wecitika pa October 7, 2023 ku malo a msonkhano a Mboni za Yehova ku Newburgh New York, U.S.A. Pulogilamu yonse yeoneshewa pa JW Broadcasting®—Mbali 1 yeoneshewa mu November 2023 ndipo mbali 2 mu January 2024.
b Onani nkhani yakuti “Baibulo Limasintha Anthu—Ndinasangalala Ndi Mayankho Omveka Bwino a m’Baibulo” yamene yefalisiwa mu Nsanja ya Mulonda ya Cinyanja ya February 1, 2015.
c Onani Buku Lapacaka la Mboni za Yehova ya 2007 pa peji 3.