AKWASU na azilongosi anyinji amene enze ekukila ku vyalo volemela, ewelela soti ku vyalo vao. Cifukwa ca cikondi cao pa Yehova koma soti cifukwa cokonda ŵanthu, akwasu aŵa eluta ku malo kwamene kufunika ofalisa anyinji. (Mat. 22:37-39) Kansi ezitana cinji, nanga epeza madaliso otyani? Kuti tipeze mayankho, tiyeni tilaŵizhyane za akwasu amene ewelela soti ku Cameroon, calo ca kum’mwela kwa Africa.

Mu 1998, mkwasu Onésime ecoka m’calo ca Cameroon kwamene niye kwecibadwila noluta ku calo ciyakine. Enkhala ku calo uku kwa vyaka 14. Siku iyakine peenze pa misonkhano, mkwasu wamene enzolaŵila nkhani efotokoza cisanzo cokhuza nchito yolalikila. Wolaŵila nkhani eciti, “Ngati ashamwali aŵili okasha nsomba pa malo osiyana, ndipo m’mozi okasha ngako pa malo paali kupambana muyake, kansi ula okasha lini ngako angapitilizhye kunkhala pa malo pamozimozi olo angalute pali muyake kuti naye ayambe kukasha ngako?”

Cisanzo ici cecitisha kuti mkwasu Onésime ayambe kuganizila zowelela ku Cameroon, kuti akayavye ŵanthu anyinji ofuna kuphunzila Baibo. Koma enze na nkhaŵa. Enzokaikila ngati angakwanishe kuyojaila umoyo wa m’calo ca kwao pavuli ponkhala m’calo ciyakine kwa vyaka vinyinji. Kuti aziŵe ngati angakwanishe kujaila, mkwasu Onésime eciyotandala ku Cameroon kwa miyezi 6. Ndipo mu 2012, eciyonkhalilatu.

Mkwasu Onésime elaŵila kuti: “Nenzofunika kupilila nyengo yakupya nonkhala na umoyo wosalila zinyinji. M’ng’anda ya Ufumu nenzofunika kujaila kunkhala pa mabenchi.” Koma momwetulila, mkwasu Onésime elaŵila kuti “Nikayamba kumvwilila misonkhano, nukumbukila lini soti za mipando yapalulu yenenzonkhalapo ku calo kwenefuma.”

Mu 2013, mkwasu Onésime ekwatila kalongosi Géraldine, wamene ewelela ku Cameroon pavuli ponkhala ku France kwa vyaka 9. Kansi banja iyi yelondela madaliso otyani cifukwa coika zinthu zauzimu pa malo oyamba? Mkwasu Onésime elaŵila kuti: “Monga banja teloŵako Sukulu ya Alengezi a Ufumu notumikilako pa Beteli. Caka casila maphunzilo a Baibo okwanila 20 mu mpingo mwasu ebatizika. Lomba nuzimvwa kuti nili pa malo oyenelela ‘okashilapo nsomba.’” (Mko. 1:17, 18) Kalongosi Géraldine eyangizhyila kuti: “Nalondela madaliso anyinji ngako amene nenzoyayembekezela lini.”

Kalongosi Judith ekukila ku United States koma enzofunishisha kucita zinyinji mu utumiki. Elaŵila kuti: “Nthawi zonse nikaluta kuyotandala ku Cameroon, nenzolila ngako powelelamo cifukwa nenzosiya ŵanthu amene nenzoyamba kuphunzila  nao Baibo.” Olo n’tetyo, kalongosi Judith enzowayawaya kuwelela ku Cameroon. Enzoseŵenza nchito ya malipilo anyinji ndipo izi zenzomuyavya kusamalila ausuwake olwala ku Cameroon. Nangu n’tetyo, kalongosi Judith edalila Yehova ndipo ewelela ku Cameroon. Elaŵila kuti nthawi ziyakine enzoyewa umoyo wabwino weenze nao peenze ku calo ciyakine. Epemphela kwa Yehova kuti amuyavye kujaila ndipo elimbikishiwa ngako na woyanganila dela na mkazi wake.

Pokumbukila zakuvuli, kalongosi Judith elaŵila kuti, “Pa vyaka vitatu tyala, nesangalala kuyavya ŵanthu 4 kuphunzila cendi.” Kalongosi Judith eyamba kutumikila monga mpainiya wapadela. Lomba, kalongosi uyu otumikila m’dela pamozi na mulume wake Sam-Castel. Nanga zinthu zenkhala tyani kuli ausuwake a kalongosi Judith? Kalongosi uyu na a m’banja mwake, ekwanisha kupeza cipatala ku calo ciyakine camene cezipeleka kucita opaleshoni ya ausuwake. Ndipo mwamwai wanji, opaleshoni yao yeyenda tyala bwino.

Mkwasu Victor ekukila ku Canada. Pavuli poŵelenga nkhani yolaŵila za maphunzilo apalulu m’magazini, eyamba kuganizila za maphunzilo apalulu yeenzocita. Eleka maphunzilo ya ku yuniveziti noyamba kosi ya nthawi itontho yomuyavya kupeza zofunika za pa umoyo. Elaŵila kuti, “Kosi yenecita yeniyavya kupeza nchito kamangu, ndipo nekwanisha kuyamba utumiki wenenzofunishisha ngako wamene ni upainiya.” Pavuli pake, mkwasu Victor ekwatila kalongosi Caroline, ndipo eciyotandala ku Cameroon. Peenze ku Cameroon, eluta kuyoona ofesi ya msambo ndipo akwasu eŵalimbikisha kuti aganizilepo zakuzotomukila m’calo ici. Victor eciti: “Teona kuti penzeve cifukwa conyalanyazila cifukwa tenze na umoyo wosalila zinyinji. Tetyo, tevomelezhya ciitano ici.” Olo kuti kalongosi Caroline enze na vuto yokhuza thanzi, banja iyi yesankha kukukila ku Cameroon.

Kuti ayavye ŵanthu a m’gawo yao, mkwasu Victor na kalongosi Caroline eyamba kucita upainiya wanthawi zonse. Akaliyokuka, esungilatu ndalama zokwanila kuti zikaŵayavye kucita utumiki poyembekeza kuti apeze nchito iyakine. Pavuli pake, ewelela soti ku Canada ndipo eciyoseŵenzako kwa miyezi itontho. Izi zeŵayavya kuti awelele soti ku Cameroon nopitilizhya upainiya. Kansi epeza madaliso otyani? Eloŵa Sukulu ya Alengezi a Ufumu, pavuli pake eikiwa kunkhala apainiya apadela ndipo lomba otumikila m’cimango. Mkwasu Victor elaŵila kuti, “Kunkhala na umoyo wosalila zinyinji kwetiyavya kuti tikodalila Yehova nthawi zonse ndipo zetiyavya kukulisha minkhalidwe Yacikhristu.”

Mu 2002, mkwasu Alain, enzophunzila pa yuniveziti iyakine ku Germany peciŵelenga ka tirakiti kakuti Achinyamata​—Kodi Moyo Wanu Mudzaugwiritsa Ntchito Bwanji? Zeciŵelenga zemucitisha kucinja zolinga. Mu 2006, eloŵa Sukulu Yophunzitsa Utumiki ndipo etumiwa kuyotumikila kwao ku Cameroon.

Pecifwika, mkwasu uyu epeza nchito ya malipilo atontho. Pavuli pake ecizopeza nchito ya ndalama zinyinji, koma enze na nkhaŵa yakuti nchito iyi ingomukangisha kucita zinyinji mu utumiki. Tetyo, peciikiwa kunkhala mpainiya wapadela, evomelezhya nthawi yamene iyo. Olo kuti a bwana ŵake emuyangizhyilako malipilo, mkwasu Alain esankha kuleka nchito kuti akacite upainiya wapadela. Pavuli pake elungula kalongosi Stéphanie, wamene enkhala ku France vyaka vinyinji. Kansi kalongosi uyu ekumana na mavuto otyani peciluta ku Cameroon?

Kalongosi Stéphanie elaŵila kuti: “Nikaliyojaila  malo, nenzolwalalwala koma nekwanisha kupeza cithandizo ca mankhwala.” Banja iyi yepeza madaliso cifukwa copilila. Mkwasu Alain elaŵila kuti: “Peteluta kuyolalikila ku munzi uyakine wakutali woitiwa kuti Katé, tepeza ŵanthu anyinji amene enzofunishisha kuphunzila Baibo. Pavuli pake teyamba kuphunzila nao Baibo pa foni. Maphunzilo a Baibo aŵili ebatizika ndipo kwenkhazikishiwa kagulu ka ofalisa.” Kalongosi Stéphanie eyangizhyila kuti: “Paliye cinthu cingatipase cimwemwe kupambana kuyavya ŵanthu kulitwala kwa Yehova. Tapeza cimwemwe cikulu cifukwa cotumikila kuno.” Lomba, mkwasu Alain na kalongosi Stéphanie otumikila m’dela.

Kalongosi Gisèle ebatizika peenzocita kosi ya udokota ku Italy. Ecita cidwi na banja ya apainiya ayakine amene enzomuphunzisa Baibo ndipo naye enzofunishisha kucita zinyinji mu utumiki. Tetyo, kalongosi Gisèle eyamba upainiya wanthawi zonse penzosilizhya kosi yake.

Kalongosi uyu enzofunishisha kuwelela kwao ku Cameroon kuti akacite zinyinji mu utumiki, olo n’tetyo enze na nkhaŵa. Elaŵila kuti, “Nenzofunika kucoka ku Italy nosiyana na ayangu koma soti abanja ŵangu amene enze ku Italy.” Olo n’tetyo, mu May 2016 kalongosi Gisèle ewelela kwao ku Cameroon. M’kuluta kwa nthawi elunguliwa na mkwasu Léonce, ndipo ofesi ya msambo ya ku Cameroon yeŵatumizhya mtauni ya Ayos mwamene mwenzofunika ofalisa anyinji.

Kansi umoyo wenze tyani ku Ayos? Kalongosi Gisèle elaŵila kuti: “Masiku anyinji kwenzonkhala kuliye malaiti ndipo mafoni yasu yenzonkhala yosachajing’a. Nthawi zinyinji yenzonkhala yozima. Tetyo, nephunzila kupikila pankhuni ndipo usiku tenzoseŵenzesha mawilibala na matoci kuyotapa manzi kumchela, cifukwa niye pekwenzonkhala lini ngako ŵanthu.” N’cinji ceyavya banja iyi kupilila? Kalongosi Gisèle elaŵila kuti: “Mzimu wa Yehova, mulume wangu, cilimbikiso koma soti thandizo ya ndalama kufumila kuli abanja na ayasu niye zetiyavya kupilila.”

Kansi kalongosi Gisèle ecimvwa tyani peciwelela kucalo ca kwao? Esangalala ngako soti. Kalongosi uyu eciti, “Tenzokumanako na mavuto koma soti maganizo ofookesha, koma petepilila, tenzozimvwa kuti tecita zetenzofunikila kucita. Tenzodalila Yehova nozimvwa kuti tili pafupi ngako na yove.” Mkwasu Léonce na kalongosi Gisèle eloŵa Sukulu ya Alengezi a Ufumu, ndipo lomba otumikila monga apainiya apadela akanthawi.

Molingana na munthu okasha nsomba wamene onkhala otang’a mtima olo kuti okumana na mavuto anyinji pokasha nsomba, ŵala amene owelela kucalo cao mofunishisha oyavya ŵanthu amene ali na maganizo oyenelela kuti amvwishile uthenga wa Ufumu. Mosakaikila, Yehova akaluŵe lini kulitwala kwa atumiki aŵa na cikondi cakuonesha pa zina yake. (Neh. 5:19; Aheb. 6:10) Ngati munkhala kucalo ciyakine, ndipo m’calo canu mufunika ofalisa uthenga anyinji, kansi mungakonde kuwelela kucalo canu kuti mukayavye pa nchito yolalikila? Ngati mungacite tetyo, Yehova angakudaliseni ngako.​—Miy. 10:22.