1. Kansi tuziŵa tyani kuti Yehova ofuna kuti tinkhale naye pafupi?

 YEHOVA ofuna kuti tinkhale pafupi na yove. (Yak. 4:8) Ofuna kuti ankhale Mulungu wasu, Ausuwasu koma soti Shamwali wasu. Yove oyankha mapemphelo ŵasu notiyavya pa nthawi zovuta. Kuyangizhyila apo, otiphunzisa kupitila m’gulu yake ndipo otiteteza. Koma kansi tingacitenji kuti tivwendele pafupi na yove?

2. Kansi tingavwendele tyani pafupi na Yehova?

² Tingavwendele pafupi na Yehova mwa kupemphela, kuŵelenga Mau ŵake nosinkhasinkha. Patucita izi, cikondi na ciyamikilo casu pa Yehova zikulileko. Kuyangizhyila apo, tusonkhezelewa kuti tikomumvwila koma soti kumutamanda. (Chiv. 4:11) Ngati tamuziŵa bwino Yehova, zitiyavye kuti tikomukhulupilila koma soti kukhulupilila gulu yawatipasa kuti ikotiyavya.

3. Kansi Maleŵania ocitanji pofuna kutikangisha kutumikila Yehova, koma n’cinji cingatiyavye kuti tisasiye Mulungu wasu na gulu yake? (Salimo 31:13, 14)

³ Maleŵania oyesayesa kuticitisha kuti timusiye Yehova, makamaka ngati tukumana na mavuto. Kansi ocita tyani zamene izi? Patontho-patontho, oyesa kufookesha cikhulupililo casu pa Yehova na gulu yake. Olo n’tetyo, tingakwanishe kupewa mayeselo ya Maleŵania. Ngati cikhulupililo casu pa Yehova n’cotang’a, tingasiye lini Mulungu wasu na gulu yake.​—Ŵelengani Salimo 31:13, 14.

4. Kansi tilaŵizhyane cinji m’nkhani ino?

⁴ M’nkhani ino, tilaŵizhyane mavuto yatingakumane nayo kunja kwa mpingo, ndipo vuto iliyonse ingacitishe kuti cikhulupililo casu pa Yehova na gulu yake cifooke. Kansi mavuto  aŵa angatikangishe tyani kutumikila Yehova? Ndipo tingacitenji kuti tigonjese mayeselo a Satana?

5. Kansi mavuto yangafookeshe tyani cikhulupililo casu pa Yehova na gulu yake?

⁵ Nthawi ziyakine, tukumana na mavuto monga kusushiwa na abanja ŵasu olo kusila kwa nchito. Kansi mavuto oteti angafookeshe tyani cikhulupililo casu pa Yehova na gulu yake? Ngati tankhala tukumana na mavuto kwa nthawi itali, tingafooke notaya mtima ndipo Satana angatolelepo mwai pofuna kuticitisha kuti tiyambe kukaikila kuti Yehova otikonda. Maleŵania ofuna kuti tikoganiza kuti Yehova olo gulu yake niye ocitisha mavuto yatukumana nayo. Zoteti niye zecitikila Aisiraeli ayakine peenze ku Iguputo. Poyamba, enze ekhulupilila kuti Yehova esankha Mose na Aroni kuti aŵamasule mu ukapolo. (Eks. 4:29-31) Koma pavuli pakuti Farao wacitisha kuti umoyo wao unkhale wovuta, ove eyamba kuimba mlandu Mose na Aroni mwa kuŵauzhya kuti: “Mwatinunkhisha pamenso pa Farao na atumiki ŵake ndipo mwaŵapasa cipula m’manja mwao kuti atipaye.” (Eks. 5:19-21) N’zomvwisha cisoni kuti eimba mlandu atumiki a Mulungu okhulupilika. Ngati mwankhala mupilila mavuto kwa nthawi itali, kansi n’cinji cingakuyavyeni kupitilizhya kunkhala na cikhulupililo cotang’a pa Yehova na gulu yake?

6. Kansi tuphunzilapo cinji pa cisanzo ca Habakuku pa nkhani yopilila mavuto? (Habakuku 3:17-19)

⁶ Mukomuuzhya Yehova mavuto ŵanu m’pemphelo nomusenga kuti akuyavyeni. Mneneli Habakuku ekumana na mavuto anyinji ndipo cuoneka kuti pa nthawi iyakine eyamba kukaikila ngati Yehova enzosamala za yove. Tetyo, euzhya Yehova mweenzomvwila kupitila m’pemphelo. Yove elaŵila kuti: “Mweo Yehova, kansi nililile thandizo yanu koma mweo osanimvwa mpaka lini? . . . Ndaŵa yanji mulekelela kukandikizhyana?” (Hab. 1:2, 3) Yehova eyankha pemphelo yofumila pansi pa mtima ya mtumiki wake wokhulupilika. (Hab. 2:2, 3) Pavuli posinkhasinkha mwamene Yehova eyavyila atumiki ŵake, mneneli Habakuku enkhala soti wacimwemwe. Yove enkhala wosimikizhya kuti Yehova omusamala na kuti amuyavye kupilila mayeselo yaliyonse. (Ŵelengani Habakuku 3:17-19.) Kansi tuphunzilapo cinji? Ngati tukumana na mavuto, tufunika kupemphela kwa Yehova nomuuzhya mwatumvwila ndipo tufunika kumudalila kuti atiyavye. Ngati tucita izi, tinkhale osimikizhya kuti Yehova atipase mphamvu zatufunikila kuti tipilile. Ndipo tikaona kuti Yehova waticilikiza, cikhulupililo casu cutang’ilako.

7. Kansi mkwake wa kalongosi Shirley enzoyesa kumusimikizhyila cinji, ndipo n’cinji cemuyavya kuti apitilizhye kukhulupilila Yehova?

⁷ Pitilizhyani kucita zinthu zauzimu. Ganizilani zecitikila kalongosi Shirley pecikumana na mavuto. Kalongosi uyu onkhala ku Papua New Guinea. b Banja yao yenze yosauka ndipo nthawi ziyakine enzovutika kuti apeze vakulya. Mkwake eyesayesa kuti amufookeshe cikhulupililo cake pa Yehova. Yove elaŵila kuti: “Ulaŵila kuti mzimu utuŵa ukuyavya, koma kansi thandizo ili kuni? Banja ikali yosauka. Utaya nthawi na kulalikila.” Kansi izi zemukhuza tyani kalongosi Shirley? Yove elaŵila kuti: “Nezikonsha kuti: ‘Kansi Mulungu osamala za seo olo yai?’ Nthawi yamene iyo, nepemphela kwa Yehova nomuuzhya zonse za mumtima mwangu. Kuyangizhyila apo, nepitilizhya kuŵelenga Baibo na zofalisa zasu, kulalikila koma soti kupezeka pa misonkhano.” Pakaliyopita nthawi itali, kalongosi Shirley ezindikila kuti Yehova  enzosamalila banja yake. Ove aliyolalepo njala ndipo enze osangalala. Kalongosi Shirley elaŵila kuti: “Neona kuti Yehova eyankha mapemphelo ŵangu.” (1 Tim. 6:6-8) Ngati mupitilizhya kucita zinthu zauzimu, namwe mungalole lini kuti mavuto olo kukaikila kukukangisheni kutumikila Yehova.

8. Kansi akwasu amene osogolela m’gulu ya Mulungu nthawi ziyakine angakumane na mavuto otyani?

⁸ Adani ŵasu ankhala olaŵila nkhani zawenye zokhuza akwasu amene osogolela m’gulu ya Mulungu kupitila pa mawailesi, TV koma soti pa intaneti. (Sal. 31:13) Ayakine mwa akwasu emangiwa nopasiwa mlandu wakuti ni anyankapondo. Nao Akhristu a m’vyaka 100 voyambilila, ekumana na vuto yolinganako, pamene mtumwi Paulo enze epasiwa mlandu wawenye nomangiwa. Kansi ove ecitanji?

9. Kansi Akhristu ayakine ecitanji mtumwi Paulo pecimangiwa?

⁹ Akhristu ayakine a m’vyaka 100 voyambilila, eleka kumuyavya mtumwi Paulo pavuli pakuti waikiwa m’jele ku Roma. (2 Tim. 1:8, 15) Ndaŵa yanji? Kansi ove ecita naye nsoni cifukwa cakuti ŵanthu anyinji enzomuona monga ni nyankapondo? (2 Tim. 2:8, 9) Olo kansi enzoyopa kuti nao anganzunziwe? Mulimonse mwezenzele, ganizilani mwecimvwila Paulo. Yove epilila mavuto anyinji ndipo eika moyo wake pa ngozi cifukwa ca ove. (Mac. 20:18-21; 2 Akor. 1:8) Tufunika kupewa kunkhala monga ni ŵanthu amene ekana kuyavya Paulo pa nthawi yeenzofunikila thandizo. Kansi tufunika kukumbukila cinji ngati akwasu amene osogolela m’gulu ya Mulungu onzunziwa?

10. Kansi tufunika kukumbukila cinji ngati akwasu amene osogolela m’gulu ya Mulungu onzunziwa, ndipo ndaŵa yanji?

¹⁰ Mukokumbukila cifukwa cake tunzunziwa na wamene ocitisha kuti tikonzunziwa. Lemba ya 2 Timoteyo 3:12 yulaŵila kuti: “Onse ofuna kunkhala moyo wozipeleka kwa Mulungu mwa Khristu Yesu nao akanzunziwe.” Tetyo, tufunika lini kudabwa tikaona kuti Satana  oukila makamaka akwasu amene osogolela m’gulu yasu. Yove ofuna kuti akwasu aŵa aleke kunkhala okhulupilika kwa Yehova na kuti seo ticite wowa.​—1 Pet. 5:8.

11. Kansi tuphunzilapo cinji pa cisanzo ca Onesiforo? (2 Timoteyo 1:16-18)

¹¹ Pitilizhyani kucilikiza akwasu nonkhala nao pafupi. (Ŵelengani 2 Timoteyo 1:16-18.) Paulo pecimangiwa, Mkhristu muyakine wa m’vyaka 100 voyambilila wa zina yakuti Onesiforo, ecita zinthu mosiyanako na Akhristu ayakine. “Yove aliyocite nsoni na macheni ya [Paulo].” M’malo mwake, Onesiforo esakila Paulo. Ndipo pecimupeza, emuyavya kupeza zinthu zeenzofunikila. Mwa kucita izi, Onesiforo eika moyo wake pa ngozi. Kansi tuphunzilapo cinji? Tufunika lini kulola wowa kutikangisha kucilikiza akwasu ngati onzunziwa. M’malo mwake, tufunika kuŵayavya noŵateteza. (Miy. 17:17) Ove ofunikila cikondi koma soti cicilikizo casu.

12. Kansi tuphunzilapo cinji pa cisanzo ca akwasu na azilongosi a ku Russia?

¹² Ganizilani mwamene akwasu na azilongosi ku Russia oyavyila okhulupilila ayao amene emangiwa. Ngati ayakine oimbiwa mlandu ku khoti, akwasu na azilongosi anyinji oluta kuyoŵacilikiza. Kansi tuphunzilapo cinji? Ngati akwasu amene osogolela onenezewa, amangiwa olo kunzunziwa, tufunika lini kucita wowa. M’malo mwake, tufunika kuŵapemphelela, kusamalila abanja ŵao koma soti kusakila njila ziyakine zatingaŵayavyilemo.​—Mac. 12:5; 2 Akor. 1:10, 11.

13. Kansi kunyozewa kungafookeshe tyani cikhulupililo casu pa Yehova na gulu yake?

¹³ Nthawi ziyakine, abanja ŵasu amene ni osakhulupilila, ayasu a ku nchito koma soti a ku sukulu, angatinyoze cifukwa colalikila nokonkha malamulo a Yehova. (1 Pet. 4:4) Ove angalaŵile kuti: “Nukukonda mwaulili koma cipembezo cako cukosesha ngako zinthu ndipo cucita zinthu zacikale.” Ayakine angatinyoze poona mwatucitila zinthu na ŵanthu ocosewa mwa kulaŵila kuti: “Teti mungalaŵile kuti muli na cikondi?” Zoteti zingaticitishe kuti tiyambe kuona kuti malamulo a Yehova ali lini bwino. Tingayambe kuzikonsha kuti: ‘Kansi Yehova oyembekezela kuti nikocita zinthu zamene ningazikwanishe lini? Kansi gulu yake yukosesha ngako malamulo?’ Ngati mukumana na mavuto oteti, kansi n’cinji cingakuyavyeni kupitilizhya kunkhala pafupi na Yehova koma soti gulu yake?

14. Kansi tufunika kucitanji ngati ŵanthu ayakine otinyoza cifukwa cakuti tukonkha malamulo a Yehova? (Salimo 119:50-52)

¹⁴ Nkhalani osimikizhya kupitilizhya kukonkha malamulo a Yehova. Yobu enzokonkha malamulo a Yehova mosasamala kanthu kuti enzonyozewa cifukwa cocita izi. M’mozi mwa ashamwali ŵake awenye, eyesa kumucitisha kukhulupilila kuti Mulungu enzosamala lini ngati yove enzokonkha malamulo ŵake olo yai. (Yobu 4:17, 18; 22:3) Koma Yobu ekana kumvwila wenye uyu. Yove eziŵa kuti malamulo a Yehova okhuza cabwino na ciipa ni abwino ndipo enze wofunishisha kuyakonkha. Tetyo, aliyolole ayakine kumukangisha kunkhala wokhulupilika kwa Yehova. (Yobu 27:5, 6) Kansi tuphunzilapo cinji? Tufunika lini kulola kunyozewa kuticitisha kuyamba kukaikila malamulo a Yehova. Ganizilani zinthu zamene zankhala zucitika pa umoyo wanu. Payakine mwaona kuti kukonkha malamulo a Yehova kwacitisha kuti munkhale na umoyo watanthauzo. Tetyo, nkhalani osimikizhya mtima kucilikiza gulu ya Yehova yamene yukonkha malamulo  aŵa. Ndipo mosasamala kanthu kuti munyozewe tyani, musaleke kutumikila Yehova.​—Ŵelengani Salimo 119:50-52.

15. Ndaŵa yanji kalongosi Brizit enzonyozewa?

¹⁵ Ganizilani zecitikila kalongosi Brizit wa ku India. Yove enzonyozewa na abanja ŵake cifukwa ca cikhulupililo cake. Nthawi itontho pavuli pakuti wabatizika mu 1997, mulume wake wamene enze lini Mboni ecosewa nchito. Tetyo, mulume wake eganiza kuti akuke pamozi na banja yao noyamba kunkhala na makolo ŵake amene enzonkhala mu mzinda uyakine. Izi zecitisha kuti kalongosi Brizit akumane soti na mavuto ayakine. Cifukwa cakuti mulume wake enzoseŵenza lini, yove enzofunika kuseŵenza siku yonse kuti acilikize banja yao. Kuyangizhyila apo, Ng’anda ya Ufumu yenze pa msenga wa makilomita pafupifupi 350. Comvwisha cisoni n’cakuti abanja ya mulume wake enzomususha cifukwa ca cikhulupililo cake. Izi zecitisha kuti banja ya kalongosi Brizit ikuke soti. Ndipo mosayembekezeleka mulume wake emwalila. Pavuli pake, mwana wao umozi naye emwalila na matenda a khansa peenze tyala na vyaka 12. Kuyangizhyila apo, abululu ŵake ŵa kalongosi Brizit eyamba kumuimba mlandu kuti niye ecitisha kuti akumane na mavuto oteti. Enzolaŵila kuti sembe aliyonkhale wa Mboni za Yehova, sembe aliyokumane na mavuto oteti. Olo n’tetyo, yove epitilizhya kunkhala wokhulupilika kwa Yehova koma soti gulu yake.

16. Kansi kalongosi Brizit edalisiwa tyani cifukwa conkhala wokhulupilika kwa Yehova na gulu yake?

¹⁶ Pofwana kuti kalongosi Brizit enzonkhala kutali na Ng’anda ya Ufumu, woyanganila dela emulimbikisha kuti akolalikila ku malo kweenzonkhala nocitila misonkhano mu ng’anda yake. Poyamba, enzoona kuti angakwanishe lini kucita izi. Olo n’tetyo, ekonkha malangizo yecipasiwa. Enzolalikila uthenga uweme, kucita misonkhano mu ng’anda yake koma soti enzopatula nthawi yocita kulambila kwa pa banja na ŵana ŵake. Kansi penkhala zofumapo zotyani? Kalongosi Brizit enzosogoza maphunzilo a Baibo ndipo anyinji mwa ŵanthu ŵeenzophunzila nao Baibo ebatizika. Mu 2005, eyamba kutumikila monga  mpainiya wanthawi zonse. Yove edalisiwa cifukwa conkhala wokhulupilika kwa Yehova na gulu yake. Ŵana ŵake otumikila Yehova mokhulupilika ndipo lomba ku dela kwao kuli mipingo iŵili. Kalongosi Brizit ni wosimikizhya kuti Yehova emupasa mphamvu kuti akwanishe kupilila mavuto yeenzokumana nayo.

17. Kansi tufunika kusimikizhya kucita cinji?

¹⁷ Satana ofuna kuti tikokhulupilila kuti Yehova otiyavya lini tikakumana na mavuto na kuti kupitilizhya kunkhala m’gulu yake kucitisha kuti umoyo wasu unkhale wovuta. Yove ofuna kuti tikocita wowa tikaona kuti akwasu amene osogolela onenezewa, kunzunziwa olo kuikiwa m’jele. Ndipo ofuna kuti tileke kukhulupilila Yehova na gulu yake cifukwa conyozewa. Olo n’tetyo, tuziŵa bwino misampha yake ndipo tingasoŵeshewe lini. (2 Akor. 2:11) Tiyeni tinkhale osimikizhya kukana wenye wa Satana nonkhala okhulupilika kwa Yehova na gulu yake. Tikokumbukila kuti Yehova angatisiye lini. (Sal. 28:7) Tetyo, tisalole ciliconse kutikangisha kutumikila Yehova.​—Aro. 8:35-39.

18. Kansi tikalaŵizhyane cinji m’nkhani yokonkhapo?

¹⁸ M’nkhani ino, taphunzila mavuto yatingakumane nayo kufumila kunja kwa mpingo. Koma nthawi ziyakine cikhulupililo casu pa Yehova na gulu yake cingayesewe kupitila m’mavuto yatingakumane nayo mkati mwa mpingo. Kansi n’cinji cingatiyavye kulimbana na mavuto oteti? Izi niye zati tikalaŵizhyane m’nkhani yokonkhapo.