1-2. (a) Kansi tilaŵizhyane makonsho otyani? (b) N’cinji cuonesha kuti Yehova ni wofunishisha kutiyavya?

 YEHOVA otiyavya kupilila mavuto yatukumana nayo koma soti kunkhala acimwemwe patumutumikila. Kansi otiyavya tyani? Nanga tingapindule tyani mokwanila na thandizo yakupeleka? Makonsho aŵa ayankhiwe m’nkhani ino. Koma coyamba, tiyeni tilaŵizhyane konsho iyi: Kansi Yehova ni wofunishisha cendi kutiyavya?

² Mau yeciseŵenzesha mtumwi Paulo m’kalata yake yecilembela Akhristu aciheberi, yangatiyavye kupeza yankho. Paulo elemba kuti: “Yehova ni mthandizi wangu, niyope lini. Munthu anganicite cinji?” (Aheb. 13:6) Buku iyakine yofotokoza Baibo, yelaŵila kuti mau akuti “mthandizi” yamene yeseŵenzeshewa pa vesi iyi, yotanthauza munthu wamene outukila munthu muyakine wamene olilila thandizo kuti amuyavye. Umu niye mwakucitila Yehova. Izi zuonesha kuti yove ni wofunishisha kutiyavya tikakumana na mavuto. Tetyo, moyavyiwa na Yehova tingakwanishe kupilila mwacimwemwe mavuto yatukumana nayo.

3. Ni vinthu vitatu votyani vakucita Yehova pofuna kutiyavya kupilila mavuto mwacimwemwe?

³ Kansi ni m’njila ziyakine zotyani zakutiyavyilamo Yehova kupilila mavuto mwacimwemwe? Kuti tiyankhe konsho iyi, tiyeni tilaŵizhyane mbali iyakine ya buku ya Yesaya. Ndaŵa yanji? N’cifukwa cakuti anyinji mwa maulosi ouzhyiliwa yecilemba Yesaya, yokata soti nchito kuli atumiki a Mulungu masiku ŵano. Kuyangizhyila apo, Yesaya efotokoza zokhuza Yehova m’njila yosavuta kumvwa. Mwacisanzo, mu caputa 30  Yesaya eseŵenzesha visanzo vocitisha cidwi pofotokoza vinthu vitatu vakucita Yehova pofuna kuyavya atumiki ŵake. Vinthu ivi ni (1) kumvwishila mwachelu noyankha mapemphelo ŵasu, (2) kupeleka cisogozo, na (3) kutidalisa pali lomba koma soti msogolo. Lomba, tiyeni tilaŵizhyane mosamala vinthu vitatu ivi.

4. (a) Kansi Yehova efotokozanji zokhuza Ayuda a m’nthawi ya Yesaya, ndipo n’cinji cecilola kuti ciŵacitikile? (b) Kansi n’ciyembekezo cotyani camene Yehova epasa atumiki ŵake okhulupilika? (Yesaya 30:18, 19)

⁴ M’mau oyambilila a m’caputa 30 ca buku ya Yesaya, Yehova efotokoza kuti Ayuda enze “ŵana osamvwa” amene “enzoyangizhyila cimo pa cimo.” Epitilizhya kulaŵila kuti: “Ni ŵanthu opondoka, . . . amene ofuna lini kumvwa cilamulo ca Yehova.” (Yes. 30:1, 9) Cifukwa cakuti ŵanthu aŵa aliyomvwile, Yesaya elosela kuti Yehova akalole kuti akumane na mavuto. (Yes. 30:5, 17; Yer. 25:8-11) Izi ndiye zeŵacitikila. Ove etolewa kuluta ku ukapolo ku Babulo. Olo n’tetyo, penze Ayuda ayakine amene enze okhulupilika ndipo Yesaya enze na uthenga wa ciyembekezo wakuti aŵauzhye. Yove eŵauzhya kuti siku iyakine Yehova akaŵalole kuti awelele soti ku Yerusalemu. (Ŵelengani Yesaya 30:18, 19.) Ndipo izi niye zecitika. Yehova eŵamasula ku ukapolo. Koma aliyoŵamasule pa nthawi yamene iyo. Mau akuti “Yehova oyembekezela moleza mtima kuti akuwamileni mtima,” yeonesha kuti penze kuzopita nthawi kuti ŵanthu okhulupilika amasuliwe. Aisiraeli enkhala akapolo kwa vyaka 70 ku Babulo. Pavuli pake, emasuliwa ndipo ayakine mwa ove ewelela ku Yerusalemu. (Yes. 10:21; Yer. 29:10) Tetyo, peciwelela ku Yerusalemu esangalala ngako cakuti efwika mpaka poponesha misozi.

5. Kansi lemba ya Yesaya 30:19 yutisimikizhyila cinji?

⁵ Masiku ŵano, tingalimbikishiwe na mau aŵa akuti: “Akakuwamile mtima akayokumvwa kulila kwako.” (Yes. 30:19) Yesaya otisimikizhyila kuti Yehova akomvwishila noyankha mapemphelo ŵasu tikamusenga thandizo. Yesaya eyangizhyilapo kuti: “Akakuyankhe nthawi yamene iyo.” Mau aŵa otisimikizhyila kuti Ausuwasu ni wofunishisha kuyavya ŵanthu amene omusenga thandizo. Kuziŵa izi kutiyavya kuti tikwanishe kupilila mwacimwemwe.

6. Kansi mau yecilaŵila Yesaya yoonesha tyani kuti Yehova omvwishila mapemphelo ya aliyense wa seo payeka?

⁶ Kansi vesi iyi yutiphunzisa soti cinthu ciyakine cotyani cokhuza mapemphelo ŵasu? Yutiphunzisa kuti Yehova omvwishila mosamala pemphelo ya aliyense wa seo payeka. Ndaŵa yanji talaŵila teti? M’Baibo ya Cizungu, mbali yoyamba ya Yesaya caputa 30 tupezamo mau akuti “weo.” Mau aŵa otanthauza lini munthu m’mozi. M’malo mwake, otanthauza ŵanthu anyinji. Koma m’vesi 19, mau akuti “weo” yeseŵenzeshewa ponena za munthu m’mozi. Yesaya elemba kuti: “Ukalile lini soti”; “akakuwamile mtima”; “akakuyankhe nthawi yamene iyo.” Monga Ausuwasu acikondi, Yehova ouzhya lini mwana wake munalume olo munakazi kuti, “Ukonkhala wotang’a monga mkwako.” M’malo mwake, osamala za aliyense wa seo payeka ndipo omvwishila mapemphelo ŵasu.​—Sal. 116:1; Yes. 57:15.

7. Kansi zecifotokoza Yesaya na Yesu zuonesha tyani kufunika kopitilizhya kupemphela?

⁷ Ngati tapemphela kwa Yehova nomuuzhya mavuto ŵasu m’pemphelo, cinthu coyamba caangacite ni kutipasa  mphamvu kuti tikwanishe kupilila. Ngati mavuto yatukumana nayo yosila lini pa nthawi yetenzoyembekezela, tufunika kumusenga mowelezhyawelezhya kuti atipase mphamvu zamene zingatiyavye kuti tipilile. Ndipo ndiye zakufuna Yehova kuti tikocita. Izi niye zecitanthauza Yesaya pecilemba kuti: “Musaleke kumukumbusha [Yehova].” (Yes. 62:7) Kansi izi zutanthauzanji? Tufunika kupemphela kwa Yehova mowelezhyawelezhya, zamene zili monga ni kusaleka kumukumbusha. Zecifotokoza Yesaya zutikumbusha za mafanizo a Yesu okhuza pemphelo amene opezeka pa Luka 11:8-10, 13. Apa Yesu otilimbikisha kuti tufunika kupemphela “mowelezhyawelezhya” koma soti ‘kupitilizhya kusenga’ mzimu utuŵa. Tingasenge soti Yehova kuti atiyavye kupanga zosankha zanzelu.

8. Kansi mau opezeka pa Yesaya 30:20, 21 ekwanilishiwa tyani m’nthawi zakuvuli?

⁸ Ŵelengani Yesaya 30:20, 21. Masoja acibabulo pecizungulila mzinda wa Yerusalemu kwa caka cimozi na hafu, ŵanthu anyinji ecita nkhaŵa ngako. Koma molingana na vesi 20 koma soti 21, Yehova elonjeza Ayuda kuti ngati angalape nocinja, yove aŵapulumuse. Pofotokoza za Yehova monga “Mlangizi Mkulu,” Yesaya elonjeza Ayuda kuti Yehova enze kuzoŵaphunzisa mwaangamulambilile m’njila yovomelezhyeka. Mau aŵa ekwanilishiwa Ayuda pecimasuliwa ku ukapolo. Yehova eonesha kuti ni Mlangizi wao Mkulu. Ndipo mosogolelewa na yove, atumiki ŵake ekwanisha kunkhazikisha kulambila kutuŵa. Nase masiku ŵano, tusangalala ngako cifukwa Yehova niye Mlangizi wasu Mkulu.

9. Kansi ni m’njila imozi yotyani yatulandililamo malangizo a Yehova?

⁹ M’mavesi aŵa, Yesaya elaŵila kuti tili monga ni ŵana a sukulu amene ophunzisiwa na Yehova m’njila ziŵili. Yoyamba, Yesaya elaŵila kuti: “Ukaone Mlangizi wako Mkulu na menso ŵako.” M’fanizo iyi, Yesaya elaŵila kuti Mlangizi wapanama kusogolo kwa ophunzila ŵake. Kulaŵila cendi, tili na mwai ukulu ngako wophunzisiwa na Yehova masiku ŵano. Kansi otiphunzisa tyani? Otiphunzisa kupitila m’gulu yake. Tuyamikila ngako cifukwa cakuti tulandila malangizo omvwika bwino kufumila ku gulu ya Yehova. Ndipo malangizo yatulandila pa misonkhano ya mpingo, ya dela, ya cigao, m’zofalisa, m’pulogilamu ya Broadcasting na m’njila ziyakine, yotiyavya  kuti tikwanishe kupilila mwacimwemwe m’nthawi zovuta.

10. Kansi tukumvwa tyani mau a Mulungu “kuvuli [kwasu]”?

¹⁰ Yesaya efotokoza njila yaciŵili yakutilangizilamo Yehova. Yove elaŵila kuti: “Matu ŵako akamvwe mau kuvuli kwako.” Apa Yesaya enzotanthauza kuti Yehova ali monga ni mlangizi wachelu wamene ali kuvuli kwa ophunzila ŵake kuti aŵasogolele mwa kuŵauzhya njila yakufunika kuyendamo. Masiku ŵano, tukumvwa mau a Mulungu kuvuli kwasu. Motyani? Mau ouzhyiliwa opezeka m’Baibo, elembewa ni kale ngako seo tikaliyonkhalako. Tetyo, ngati tuŵelenga Baibo zunkhala monga tukumvwa mau a Mulungu kuvuli kwasu.​—Yes. 51:4.

11. Kansi tufunika kucitanji kuti tikwanishe kupilila mwacimwemwe, ndipo ndaŵa yanji?

¹¹ Kansi tingapindule tyani mokwanila na malangizo yakutipasa Yehova kupitila m’gulu yake koma soti m’Mau ŵake? Kumbukilani kuti Yesaya efotokoza vinthu viŵili. Coyamba, “njila ni iyi.” Caciŵili, “yendani mwamene umo.” (Yes. 30:21) Izi zuonesha kuti kuziŵa tyala “njila” n’kosakwanila. M’malo mwake, tufunika soti ‘kuyendamo.’ Tetyo, kupitila m’Mau ŵake koma soti gulu yake, tuphunzila zakufuna Yehova kuti tikocita koma soti mwatingaseŵenzeshele zatuphunzila. Kuti tikwanishe kupilila mwacimwemwe patutumikila Yehova, tufunika kucita zinthu izi ziŵili zatafotokoza. Ngati tucita izi, tingankhale osimikizhya kuti Yehova atidalise.

12. Molingana na Yesaya 30:23-26, kansi Yehova enze kuzoŵadalisa tyani ŵanthu ŵake?

¹² Ŵelengani Yesaya 30:23-26. Kansi ulosi uyu wekwanilishiwa tyani kwa Ayuda amene ewelela ku Isiraeli pavuli pakuti afuma ku ukapolo ku Babulo? Yehova eŵapasa vinthu vinyinji vamene veŵayavya kuti apitilizhye kunkhala na moyo koma soti kuti apitilizhye kumutumikila. Mwacisanzo, yove eŵapasa vakulya vinyinji. Kupambana zonse, eŵapasa vinthu vonse veenzofunikila kuti apitilizhye kunkhala pafupi na yove koma soti kuti ayambe soti kumulambila m’njila yovomelezhyeka. Pa nthawi iyi, atumiki a Mulungu elandila madaliso anyinji ngako kupambana kale. Molingana na vesi 26, Yehova eyangizhyila kuwala. Izi zutanthauza kuti Yehova eŵayavya kuti amvwishishe Mau ŵake. (Yes. 60:2) Madaliso yeciŵapasa, yeŵayavya kuti apitilizhye kumutumikila mwacimwemwe “cifukwa conkhala na cimwemwe mumtima.”​—Yes. 65:14.

13. Kansi ulosi wokhuza kuwezhyeleshewa kwa kulambila kutuŵa ukwanilishiwa tyani masiku ŵano?

 ¹³ Kansi ulosi wokhuza kuwezhyeleshewa kwa kulambila kutuŵa utikhuza tyani masiku ŵano? Kuyambila mu 1919 C.E., ŵanthu mamiliyoni anyinji ankhala omasuka ku ukapolo wa Babulo Mkulu, wamene ni vipembezo vonse vawenye. Ove ankhala oloŵa m’paladaiso wauzimu yamene ni malo abwino ngako kupambana Calo Colonjezewa ca Aisiraeli. (Yes. 51:3; 66:8) Kansi paladaiso wauzimu n’cinji?

14. Kansi paladaiso wauzimu n’cinji, ndipo ni ŵani ali m’paladaiso wamene uyu masiku ŵano? (Onani Tanthauzo ya Mau Ayakine.)

¹⁴ Kuyambila mu 1919 C.E., Akhristu ozozewa ankhala osangalala kunkhala m’paladaiso wauzimu. b M’kuluta kwa nthawi, ŵala amene ali na ciyembekezo cakuyonkhala na moyo pacalo, amene ni a “mbelele ziyakine” nao eloŵa m’calo ici cauzimu. Ndipo osangalala na madaliso anyinji yakupeleka Yehova.​—Yoh. 10:16; Yes. 25:6; 65:13.

15. Kansi paladaiso wauzimu opezeka kuni?

¹⁵ Kansi paladaiso wauzimu opezeka kuni masiku ŵano? Atumiki a Yehova opezeka pacalo conse. Tetyo, paladaiso wauzimu, opezeka pacalo conse. Mosasamala kanthu kuti tunkhala kuni, tingankhale mbali ya paladaiso wauzimu malinga ngati tucilikiza kulambila kwacendi.

16. N’cinji cingatiyavye kuti tipitilizhye kuona kukongola kwa paladaiso wauzimu?

¹⁶ Kuti tipitilizhye kunkhala m’paladaiso wauzimu, tufunika kukulisha ciyamikilo casu pa mpingo wasu wacikhristu wa pacalo conse. Kansi tingacite tyani zamene izi? Tingacite izi mwa kuika maganizo ŵasu pa kukongola kwa paladaiso wauzimu, osati pa kusoŵa ungwilo kwa akwasu na azilongosi. (Yoh. 17:20, 21) Ndaŵa yanji kucita izi n’kofunika? Ganizilani cisanzo ici. Ngati mwaluta m’paki, muyembekezela kuona vimiti vosiyanasiyana. Molingana na izi, mu mipingo mwasu muli ŵanthu osiyanasiyana amene tingaŵalinganizhye  na vimiti. (Yes. 44:4; 61:3) Tetyo, tufunika kuoneshesha kuti tupitilizhya kuika maganizo ŵasu pa kukongola kwa paladaiso wauzimu, osati pa kusoŵa ungwilo kwa akwasu na azilongosi. Tufunika lini kulola kusoŵa ungwilo kwasu olo kwa ayakine mumpingo, kutikangisha kuona kukongola kwa paladaiso wauzimu wa pacalo conse.

17. Kansi aliyense wa seo angacitenji kuti acilikize mtendele mumpingo?

¹⁷ Kansi aliyense wa seo angacitenji kuti acilikize mtendele mumpingo? Tingacite izi mwa kunkhala oleta mtendele. (Mat. 5:9; Aro. 12:18) Nthawi zonse tikacitapo kanthu kuti ticilikize mtendele, tuyangizhyila kukongola kwa paladaiso wauzimu. Tufunika kukumbukila kuti Yehova niye eyavya aliyense wa seo kuti tinkhale mbali ya paladaiso wauzimu na colinga cakuti ticilikize kulambila kutuŵa. (Yoh. 6:44) Ganizilani tyala mwakusangalalila Yehova akaona kuti aliyense wa seo oyesayesa kucilikiza mtendele na mgwilizano pakati pa atumiki ŵake amene ni amtengo wapatali.​—Yes. 26:3; Hag. 2:7.

18. Kansi tufunika kusinkhasinkha pa cinji nthawi zonse, ndipo ndaŵa yanji?

¹⁸ Kansi tingapindule tyani mokwanila na madaliso yatulandila monga atumiki a Mulungu? Tingacite izi mwa kuphunzila nosinkhasinkha pa Mau a Mulungu koma soti zofalisa zamene ni zozikiwa pa Baibo. Kuphunzila na kusinkhasinkha kutiyavya kukulisha minkhalidwe yacikhristu yamene yutiyavya kuti tikoonesha ‘cikondi ca paukwasu’ mumpingo. (Aro. 12:10) Ngati tusinkhasinkha pa madaliso yatili nayo pali lomba, ushamwali wasu na Yehova utang’ileko. Ndipo ngati tuganizila pa zinthu zabwino zawatilonjeza Yehova msogolo, zitiyavye kuti tipitilizhye kumutumikila mwacimwemwe.

19. (a) Molingana na Yesaya 30:18, kansi tingankhale osimikizhya za cinji? (b) N’cinji cingatiyavye kupilila mwacimwemwe mavuto?

¹⁹ Yehova “akanyamuke” m’malo mwasu kuti aononge calo cino ciipa. (Yes. 30:18) Nise osimikizhya kuti Yehova wamene ni “Mulungu wacilungamo” akalole lini kuti calo ca Satana cipitilizhye kunkhalapo. (Yes. 25:9) Tuyembekezela moleza mtima pamozi na Yehova siku ya cipulumuso casu. Pali lomba, nise okonzeka kupitilizhya kuyamikila mwai wa pemphelo, kuphunzila Mau a Mulungu, kuseŵenzesha zinthu zatuphunzila koma soti kusinkhasinkha pa madaliso yatili nayo. Ngati tucita izi, Yehova atiyavye kupilila mwacimwemwe mavuto yatukumana nayo patumulambila.