NKHANI YOPHUNZILA 45
Mwakutiyavyila Yehova Kuti Tikwanilishe Utumiki Wasu
“Akazi ŵe kuti pakati pao penze mneneli.”—EZEK. 2:5.
NYIMBO 67 “Lalikila Mau”
ZATI TIPHUNZILE a
1. N’cinji catuyembekezela patukata nchito yolalikila, ndipo tingankhale osimikizhya za cinji?
PATUKATA nchito yolalikila tuyembekezela kusushiwa. Ndipo kusushiwa uku kuyangizhyilike msogolo. (Dan. 11:44; 2 Tim. 3:12; Chiv. 16:21) Olo n’tetyo, tingankhale osimikizhya kuti Yehova atiyavye. Ndaŵa yanji? N’cifukwa cakuti yove wankhala oyavya atumiki ŵake kukwanilisha utumiki wao olo kuti uoneka kuti ni wovuta. Kuti tisimikizhyile mfundo iyi, tiyeni tiganizile zecitika pa umoyo wa mneneli Ezekieli wamene elalikila akapolo Aciyuda ku Babulo.
2. Kansi Yehova efotokozanji zokhuza ŵanthu a m’gao yeenzolalikilamo Ezekieli, ndipo tilaŵizhyane cinji m’nkhani ino? (Ezekieli 2:3-6)
2 Kansi ni ŵanthu otyani amene enzopezeka m’gao yeenzolalikilamo mneneli Ezekieli? Yehova efotokoza kuti ŵanthu aŵa enze “osamvwa,” “ayumu mitima” koma soti “opanduka.” Ove enze oyofya monga ni minga koma soti oyofya monga ni vinkhanila. Niye cifukwa cake mowelezhyawelezhya Yehova euzhya Ezekieli kuti: “Usayope”! (Ŵelengani Ezekieli 2:3-6.) Ezekieli ekwanilisha utumiki wake pa zifukwa izi: Coyamba, etumiwa na Yehova. Caciŵili, eyavyiwa na mzimu utuŵa. Ndipo cacitatu, eyavyiwa na Mau a Mulungu. Kansi vinthu vitatu ivi vemuyavya tyani Ezekieli? Nanga seo masiku ŵano vingatiyavye tyani?
EZEKIELI ETUMIWA NA YEHOVA
3. Kansi ni mau otyani elimbikisha mneneli Ezekieli, ndipo Yehova emusimikizhyila tyani kuti amuyavye?
3 Yehova euzhya Ezekieli kuti: “Nukutumizhya.” (Ezek. 2:3, 4) Mau aŵa yemulimbikisha ngako Ezekieli. Motyani? Mosakaikila, yove ekumbukila kuti Yehova eseŵenzesha mau amozimozi posankha Mose koma soti Yesaya kuti ankhale aneneli ŵake. (Eks. 3:10; Yes. 6:8) Ezekieli enzoziŵa soti kuti Yehova eyavya aneneli ŵake aŵili aŵa kukwanilisha utumiki wovuta. Kaŵili konse, Yehova euzhya Ezekieli kuti: “Nukutumizhya.” Tetyo, mneneli uyu enze na vifukwa vomvwika vokhulupilila Yehova. Kuyangizhyila apo, Ezekieli elemba mau akuti: “Yehova elaŵila nane.” (Ezek. 3:16) Mowelezhyawelezhya, yove elemba soti mau akuti: “Yehova epitilizhya kulaŵila nane.” (Ezek. 6:1) Kulaŵila cendi, Ezekieli esimikizhya kuti Yehova niye emutuma cifukwa cakuti monga mwana wa mneneli, cuoneka kuti ausuwake emuphunzisa kuti nthawi zonse Yehova enzolaŵila na aneneli ŵake pofuna kuŵasimikizhyila kuti enze nao. Mwacisanzo, Yehova euzhya Isaki, Yakobo na Yeremiya kuti: “Nili nawe.”—Gen. 26:24; 28:15; Yer. 1:8.
4. Kansi ni mau acitonthozo otyani amene elimbikisha mneneli Ezekieli?
4 Kansi Aisiraeli enze kuzoulandila tyani uthenga wa Ezekieli? Yehova efotokoza kuti: “Ng’anda ya Isiraeli ikakane kukumvwila, cifukwa ove ofuna lini kunimvwila.” (Ezek. 3:7) Mwa kukana Ezekieli, zeonesha kuti ekana Yehova. Mau aŵa yelimbikisha Ezekieli poziŵa kuti olo kuti ŵanthu ekana uthenga wake, ziliyotanthauze kuti ekangiwa monga mneneli. Yehova esimikizhyila Ezekieli kuti mau yaciweluzo yecilalikila yakayokwanilishiwa, ŵanthu “akaziŵe kuti pakati pao penze mneneli.” (Ezek. 2:5; 33:33) Mosakaikila, mau aŵa acitonthozo elimbikisha Ezekieli kukwanilisha utumiki wake.
MASIKU ŴANO YEHOVA OTUMA SEO
Molingana na Ezekieli, tingakumane na ŵanthu aliye cidwi koma soti osusha. Koma tuziŵa kuti Yehova ali nase (Onani ndime 5-6)
5. Kansi Yesaya 44:8 yutilimbikisha tyani kuti tipitilizhye kulalikila?
5 Nase tulimbikishiwa ngako poziŵa kuti Yehova niye etituma kuti tikokata nchito yolalikila. Tetyo, ni mwai ukulu ngako kunkhala “Mboni” zake. (Yes. 43:10) Monga ni mwamene Yehova elimbikishila Ezekieli kuti: “Usacite wowa,” nase otilimbikisha kuti: “Usacite wowa.” Ndaŵa yanji tufunika lini kuyopa osusha? Molingana na Ezekieli, nase tetumiwa na Yehova ndipo yove oticilikiza.—Ŵelengani Yesaya 44:8.
6. (a) Kansi Yehova otisimikizhyila tyani kuti akotiyavya? (b) N’cinji cutilimbikisha kuti tipitilizhye kulalikila?
6 Yehova otisimikizhyila kuti akotiyavya. Mwacisanzo, akaliyolaŵila mau akuti: “Nimwe Mboni zangu,” elaŵila kuti: “Ngati uyenda pa manzi, ninkhale nawe, ngati utauka mimana ukambile lini, ngati uyenda pa mulilo ukapye lini ndipo lawi ya mulilo ikakuŵaule lini.” (Yes. 43:2) Ngati tulalikila, nthawi ziyakine tingakumane na mavuto amene ali monga ni kusefukila kwa manzi koma soti tingakumane na mayeselo ovuta amene ali monga ni mulilo. Olo n’tetyo, Yehova otiyavya kupitilizhya kulalikila. (Yes. 41:13) Monga ni mwezenzele m’masiku a Ezekieli, olo masiku ŵano ŵanthu anyinji okana uthenga uweme. Izi zutanthauza lini kuti tulalikila lini bwino. Koma tulimbikishiwa poziŵa kuti Yehova okondwela ngako ngati tupitilizhya kulalikila mokhulupilika. Mtumwi Paulo ekamba kuti: “Aliyense akalandile mphoto yake mokatizhyana na nchito yake.” (1 Akor. 3:8; 4:1, 2) Mpainiya muyakine wamene watumikila kwa nthawi itali, elaŵila kuti: “Nusangalala ngako poziŵa kuti Yehova odalisa kuyesayesa kwasu.”
EZEKIELI EYAVYIWA NA MZIMU UTUŴA
Ezekieli oona mensomphenya a galeta ya Yehova ya kululu. Izi zumucitisha kunkhala wosimikizhya kuti Yehova amuyavye kukwanilisha utumiki wake (Onani ndime 7)
7. Kansi Ezekieli enzokumvwa tyani nthawi zonse akaganizila za mensomphenya yeciona? (Onani cithunzithunzi pacikuto.)
7 Zeciona Ezekieli m’mensomphenya, zemusimikizhyila kuti mzimu wa Mulungu ni wamphamvu. Zemusimikizhyila soti kuti mzimu utuŵa wenzoyavya angelo amphamvu nocitisha kuti mawilo ya galeta ya kululu yakoyenda. (Ezek. 1:20, 21) Kansi Ezekieli ecitanji? Yove elaŵila kuti, “Peneona izi, necita cidwi ngako cakuti negwada noŵelama mpaka pansi.” (Ezek. 1:28) Nthawi zonse Ezekieli akaganizila za mensomphenya yeciona yocitisha cidwi, zenzomupasa cidalilo cakuti mzimu wa Mulungu umuyavye kukwanilisha utumiki wake.
8-9. (a) N’cinji cecitika kwa Ezekieli pamene Yehova emulamula kuti apaname? (b) Kansi emukonzekelesha tyani kuti akwanishe kulalikila m’gao yovuta?
8 Yehova euzhya Ezekieli kuti: “Weo Mwana wa munthu, nyamuka kuti nilaŵile nawe.” Mau aŵa yemuyavya ngako Ezekieli kuti apeze mphamvu zeenzofunikila kuti apaname. Ezekieli elaŵila kuti: “Mzimu weloŵa muli neo ndipo wenicitisha kuti nipaname.” (Ezek. 2:1, 2) Kuyambila nthawi yamene iyo kuluta msogolo, enzosogolelewa na Mulungu. (Ezek. 3:22; 8:1; 33:22; 37:1; 40:1) Mzimu wa Mulungu weyavya Ezekieli kukwanilisha utumiki wake wolalikila ŵanthu a m’gao yake amene enze “ayumu.” (Ezek. 3:7) Yehova euzhya Ezekieli kuti: “Nacitisha cinso cako kunkhala cotang’a molingana na vinso vao koma soti mphumi yako kunkhala yotang’a monga ni mphumi zao. Nacitisha mphumi yako kunkhala yotang’a monga ni mwala wa dayamondi, wamene upambana mwala wa nsangalabwi. Usaŵayope olo kucita mantha na vinso vao.” (Ezek. 3:8, 9) Izi zenze monga kuti Yehova ouzhya Ezekieli kuti: ‘Usalole kuti kuyuma kwao kukufookeshe, neo nikucilikize.’
9 Mzimu wa Mulungu wetola Ezekieli noluta naye m’gao yeenzofunikila kulalikila. Elaŵila kuti: “Kwanja ya Yehova yenikata mwamphamvu.” Zemutolela wiki imozi kuti aphunzile nomvwishisha uthenga weenzofunikila kulalikila na colinga cakuti akalalikile motang’a mtima. (Ezek. 3:14, 15) Pavuli pake, Yehova emuuzhya kuti alute ku cigwa ndipo kwamene uku “mzimu wa Mulungu weloŵa muli [yove].” (Ezek. 3:23, 24) Kufumila pa nthawi yamene iyo, Ezekieli enze wokonzeka kuyamba utumiki wake.
NASE MASIKU ŴANO TUYAVYIWA NA MZIMU UTUŴA
Monga ni mwezenzele kwa Ezekieli, kansi n’cinji cutiyavya kukwanilisha utumiki wasu masiku ŵano? (Onani ndime 10)
10. N’cinji cingatiyavye kuti tipitilizhye kukata nchito yolalikila, ndipo ndaŵa yanji?
10 Kansi n’cinji cingatiyavye kuti tipitilizhye kukata nchito yolalikila? Kuti tiyankhe konsho iyi, tiyeni tiganizile zecitikila Ezekieli. Yove akaliyoyamba nchito yolalikila, mzimu wa Mulungu wemupasa mphamvu zeenzofunikila. Molingana na Ezekieli, nase masiku ŵano tukwanisha kucita nchito yolalikila cifukwa coyavyiwa na mzimu wa Mulungu. Zili teti cifukwa cakuti Satana otiukila na colinga cakuti tileke kulalikila. (Chiv. 12:17) Malinga ni kaonedwe ka umunthu, tingaone kuti n’zosakwanishika kugonjesa Satana. Koma kupitila mu nchito yolalikila, tukwanisha kumugonjesa. (Chiv. 12:9-11) Motyani? Ngati tutolamo mbali mu nchito yolalikila, tuonesha kuti tucita lini wowa na zoyesayesa za Satana. Nthawi zonse ngati talalikila, Satana ogonjesewa. Tukwanisha kupitilizhya kulalikila olo kuti adani ŵasu otisusha. Kansi izi zutisimikizhyila cinji? Zutisimikizhyila kuti Yehova otipasa mphamvu poseŵenzesha mzimu wake utuŵa.—Mat. 5:10-12; 1 Pet. 4:14.
11. Kansi mzimu wa Mulungu utiyavya tyani, ndipo tingacitenji kuti tipitilizhye kuulandila?
11 Kansi n’cinji ciyakine catuphunzilapo tikaganizila mwamene Yehova eyavyila Ezekieli kupeza mphamvu zeenzofunikila kuti akwanishe kulalikila? Mzimu wa Mulungu ungatiyavye kulimbana na mavuto alionse atingakumane nao mu utumiki. (2 Akor. 4:7-9) Koma kansi n’cinji catufunikila kucita kuti tipitilizhye kulandila mzimu wa Mulungu? Tufunika kupemphela mosalekezhya tili na cidalilo cakuti Yehova aamvwe pemphelo yasu. Yesu ephunzisa ophunzila ŵake kuti: “Pitilizhyani kusenga, . . . pitilizhyani kusakilasakila, . . . pitilizhyani kugogoda.” Pavuli pake, Yehova “apeleke mzimu wake kuli ŵanthu amene omusenga.”—Luka 11:9, 13; Mac. 1:14; 2:4.
EZEKIELI EYAVYIWA NA MAU A MULUNGU
12. Molingana na Ezekieli 2:9–3:3, kansi mpukutu wefumila kuni, ndipo n’cinji cenze mkati?
12 Ezekieli aliyoyavyiwe tyala na mzimu wa Mulungu kuti akwanishe kulalikila. Koma eyavyiwa soti na Mau a Mulungu. M’mensomphenya, eona kwanja yakatilila mpukutu. (Ŵelengani Ezekieli 2:9–3:3.) Kansi mpukutu uyu wefumila kuni? Kansi n’cinji cenze mu mpukutu uyu? Kansi wemuyavya tyani Ezekieli? Mpukutu uyu wefumila ku mpando wacifumu wa Mulungu. Ndipo cuoneka kuti Yehova eseŵenzesha m’mozi mwa angelo 4 ŵeciona Ezekieli poyamba kuti amupase mpukutu. (Ezek. 1:8; 10:7, 20) Mu mpukutu uyu, mwenze uthenga waciweluzo wamene Ezekieli enzofunika kulalikila kwa akapolo opanduka. (Ezek. 2:7) Ndipo uthenga uyu wenze wolembewa mbali zonse ziŵili za mpukutu.
13. Kansi Yehova euzhya Ezekieli kuti acitenji na mpukutu, ndipo ndaŵa yanji mpukutu uyu wenze wonzuna?
13 Yehova euzhya mneneli wake kuti “alye mpukutu uyu.” Ndipo molicefya Ezekieli ecilya mpukutu wonse. Kansi mbali iyi ya mensomphenya yutanthauzanji? Yutanthauza kuti enzofunika kumvwisha nokhulupilila uthenga weenzofunika kulalikila kuti akwanishe kulalikila mwacidalilo. Pavuli pakuti walya mpukutu uyu, pecitika cinthu ciyakine codabwisa. Ezekieli ezindikila kuti mpukutu uyu “wenze wonzuna monga ni uci.” (Ezek. 3:3) Ndaŵa yanji? N’cifukwa cakuti kwa yove, kuseŵenzeshewa na Yehova wenze mwai wapadela. (Sal. 19:8-11) Yove eyamikila ngako kuti Yehova emusankha kunkhala mneneli wake.
14. Ni cinji ceyavya Ezekieli kukwanilisha utumiki wake?
14 Pavuli pake, Yehova euzhya Ezekieli kuti: “Usunge mumtima mwako mau onse yanukuuzhya.” (Ezek. 3:10) Apa Yehova enzouzhya Ezekieli kuti akokumbukila mau onse olembewa mu mpukutu noyasinkhasinkha. Kucita izi kweyavya Ezekieli kutang’isha cikhulupililo cake. Kuyangizhyila apo, kwemuyavya kuuziŵa bwino uthenga weenzofunikila kulalikila. (Ezek. 3:11) Pecimvwisha nokhulupilila uthenga wa Mulungu, enkhala wokonzeka kukwanilisha utumiki wake ndipo eyamba nchito yolalikila.—Linganizhyani na Salimo 19:14.
NASE MASIKU ŴANO TUYAVYIWA NA MAU A MULUNGU
15. Kansi n’cinji catufunika ‘kusunga mumtima’ kuti tikwanishe kupilila mu utumiki?
15 Kuti tikwanishe kupilila mu utumiki, tufunika kupitilizhya kuyavyiwa na Mau a Mulungu. Molingana na Ezekieli, tufunika ‘kusunga mumtima’ mau onse yakutiuzhya Yehova. Masiku ŵano, Yehova olaŵila nase kupitila m’Mau ŵake Baibo. Kansi tingacite tyani kuti Mau a Mulungu akhuze maganizo ŵasu, mwatumvwila koma soti zocita zasu?
16. Kansi Mau a Mulungu angatiyavye tyani, ndipo tingacitenji kuti tikoyamvwishisha?
16 Monga ni mwamene cakulya cutiyavyila kunkhala otang’a mwamuŵili, kuphunzila Mau a Mulungu nosinkhasinkha kutiyavya kuti tinkhale otang’a mwauzimu. Izi niye zakufuna Yehova kuti tikocita. Koma kansi tingacite tyani zamene izi? Tingacite izi mwa kucita zinthu zitatu izi. Coyamba, kupemphela kwamene kukonzekelesha mitima yasu kuti tilandile Mau a Mulungu. Caciŵili, kuŵelenga ndipo cacitatu, kusinkhasinkha pa zataŵelenga. Kucita izi kungatiyavye kuti tikwanishe kumvwishisha Mau a Mulungu nonkhala na cikhulupililo cotang’a.
17. Ndaŵa yanji kusinkhasinkha pa zinthu zatuŵelenga m’Baibo n’kofunika?
17 Ndaŵa yanji kuŵelenga Baibo nosinkhasinkha n’kofunika? N’cifukwa cakuti kungatiyavye kuti tikwanishe kulalikila uthenga uweme pali lomba, koma soti kuti tikakwanishe kulalikila uthenga waciweluzo msogolo. Kuyangizhyila apo, ngati tusinkhasinkha pa minkhalidwe iweme ya Yehova, zingatiyavye kuti tinkhale pa ushamwali wotang’a na yove. Kucita izi kungatiyavye kunkhala okhutila koma soti kusangalala na mtendele.—Sal. 119:103.
TULIMBIKISHIWA KUTI TIKOPILILA
18. Kansi ŵanthu akazindikile cinji, ndipo ndaŵa yanji?
18 Mosiyana na Ezekieli wamene enze mneneli, seo nise lini aneneli. Olo n’tetyo, nise okonzeka kupitilizhya kulalikila uthenga uweme wa Ufumu wamene upezeka m’Baibo. Tipitilizhye kucita izi mpaka pa nthawi yamene Yehova akatiuzhye kuti lekani kulalikila. Nthawi ya ciweluzo ikayofwika, ŵanthu a m’gao yasu akalaŵile lini kuti aliyolandile uthenga uweme olo kunena kuti Mulungu eŵanyalanyaza. (Ezek. 3:19; 18:23) M’malo mwake, akazindikile kuti uthenga wetenzolalikila wefumila kwa Mulungu.
19. N’cinji cingatiyavye kuti tikwanilishe utumiki wasu?
19 Kansi n’cinji cingatiyavye kukwanilisha utumiki wasu? Ni zinthu zitatu zamene zeyavya Ezekieli. Tupitilizhya kulalikila cifukwa tuziŵa kuti tetumiwa na Yehova, tuyavyiwa na mzimu utuŵa wa Mulungu koma soti Mau ŵake. Cifukwa ca thandizo ya Yehova, nise okonzeka kukwanilisha utumiki wasu nopilila “mpaka posilizhyila.”—Mat. 24:13.
NYIMBO 65 Pitani Pasogolo!
a M’nkhani ino, tilaŵizhyane zinthu zitatu zamene zeyavya mneneli Ezekieli kukwanilisha utumiki wake wolalikila. Tiphunzile soti mwamene Yehova eyavyila mneneli wake noona mwamene izi zingatiyavyile kunkhala na cidalilo cakuti nase atiyavye kukwanilisha utumiki wasu.