Hulda Ekwanilisha Colinga Cake
KUTI mwenzeko na mwai woluta ku cisumbu ca Sangir Besar ca ku Indonesia vyaka vitontho kuvuli, payakine sembe mweona azilongosi atatu oseŵenzela pamozi m’mbali mwa m’mana. Azilongosi aŵa oziŵika ngako cifukwa ca khama yao pa nchito yolalikila. Koma pa nthawi iyi, enzocita nchito iyakine yosiyanako.
Cisumbu ca Sangir Besar kumpoto kwa Indonesia
Coyamba, azilongosi aŵa enzotola miyala mu m’mana na kuyoika kumtunthu. Iyakine mwa miyala iyi, yenzonkhala ikulu monga ni bola. Caciŵili, ove enzophwanya miyala iyi na nsando apo n’kuti ankhala pa tumipando topangiwa na vimiti. Pavuli pake, enzotola miyala iyi noika mu mabaketi noluta nayo ku ng’anda. Posilizhyila pake, enzolonga miyala iyi m’vyola vikulu-vikulu noikwezekesha mu mathilaki ndipo yenzoseŵenzeshewa popanga miseu.
Hulda otola miyala m’mbali mwa m’mana
M’mozi mwa azilongosi aŵa enze Hulda. Yove enzonkhala na nthawi ikulu yophwanya miyala kupambana ayake. Nchito iyi yenzomuyavya kupeza ndalama zogulila zofunikila za banja yake. Koma pa nthawi iyi, enze na colinga ciyakine. Enzofuna kugula thabuleti na colinga cakuti aikemo JW Library. Hulda enzoziŵa kuti mavidyo na zinthu ziyakine zupezeka pa JW Library, zingamuyavye pa nchito yolalikila na kuti aimvwishe bwino Baibo.
Hulda ekata nchito yophwanya miyala kuti azuzhye thilaki itontho kwa mwezi umozi na hafu. Yove enzokata nchito iyi m’mawa mulimonse kwa maawazi aŵili. Posilizhyila pake, ekwanisha kupeza ndalama zogulila thabuleti.
Hulda ali na thabuleti yake
Hulda elaŵila kuti, “Olo kuti nchito iyi yenzoniŵeŵesha ngako ndipo necita vithuza, pavuli pakuti nagula thabuleti neluŵa mavuto yonse yenekumana nayo. Zenze teti cifukwa thabuleti iyi yeniyavya kulalikila mokata mtima koma soti kukonzekela misonkhano mosavuta.” Elaŵila soti kuti thabuleti iyi yemuyavya kuti akolumikizhya ku misonkhano nosogoza maphunzilo a Baibo pa nthawi ya mlili wa COVID-19. N’zosangalasa ngako kuti Hulda ekwanilisha colinga cake.
