NKHANI YOPHUNZILA 49
Kansi Yehova Ayankhe Mapemphelo Ŵangu?
“Muite pali neo koma soti muwele nopemphela kuli neo ndipo nikumvwishileni.”—YER. 29:12.
NYIMBO 41 Mulungu Mvwani Pemphelo Yangu
ZATI TIPHUNZILE a
1-2. Ndaŵa yanji nthawi ziyakine tingaone monga kuti Yehova oyankha lini mapemphelo ŵasu?
“SANGALALA mwa Yehova ndipo akupase zofuna za mtima wako.” (Sal. 37:4) Kulaŵila cendi, iyi ni lonjezo yocitisha cidwi. Koma kansi tufunikila kuyembekezela Yehova kuti akotipasa zilizonse zatingamusenge nthawi yamene iyo? Ndaŵa yanji tufunika kuzikonsha konsho iyi? Ganizilani zocitika izi. Kalongosi wamene ni mbeta opemphela kuti aitiwe ku Sukulu ya Alengezi a Ufumu. Olo n’tetyo, vyaka vikungokuya koma oitiwa lini. Mkwasu wacilumbwana osenga Yehova kuti apole ku matenda ŵake na colinga cakuti acite zinyinji mumpingo, koma opola lini. Makolo acikhristu opemphelela mwana wao kuti apitilizhye kutumikila Yehova, koma yove oleka kumutumikila.
2 Payakine namwe pa nthawi iyakine mwesenga Yehova cinthu ciyakine koma na lomba mukaliyolandila. Pemweona izi, payakine mweyamba kuganiza kuti Yehova oyankha mapemphelo ya ayakine osati yanu. Olo payakine mweyamba kuganiza kuti pali cinthu ciyakine colakwika cemwecita. Kalongosi wa zina yakuti Janice b emvwako teti. Yove na mulume wake epemphela kwa Yehova cifukwa enzofunishisha kuti akatumikile pa Beteli. Elaŵila kuti: “Nenze wosimikizhya kuti lombapano tiyambe kutumikila pa Beteli.” Koma vyaka venze kungokuya enzoitiwa lini. Kalongosi Janice elaŵila kuti: “Nevutika ngako maganizo cakuti neyamba kuganiza kuti payakine pali cenemulakwila Yehova. Nkhani yoluta ku Beteli neipemphelela mowelezhyawelezhya. Koma ndaŵa yanji aliyoyankhe pemphelo yangu?”
3. Kansi tilaŵizhyane cinji m’nkhani ino?
3 Nthawi ziyakine, tingayambe kukaikila ngati Yehova omvwishila mapemphelo ŵasu. Olo atumiki a Yehova okhulupilika a m’nthawi zakuvuli emvwako cimozimozi. (Yobu 30:20; Sal. 22:2; Hab. 1:2) Kansi n’cinji cingakusimikizhyileni kuti Yehova oyankha mapemphelo ŵanu? (Sal. 65:2) Kuti tipeze yankho ya konsho iyi, tiyeni tilaŵizhyane makonsho aŵa: (1) Kansi tingayembekezele cinji kwa Yehova? (2) Kansi Yehova oyembekezela cinji kuli seo? (3) Ndaŵa yanji nthawi ziyakine tingafunikile kucinja zinthu zatupemphelela?
KANSI TINGAYEMBEKEZELE CINJI KWA YEHOVA?
4. Molingana na Yeremiya 29:12, kansi Yehova olonjeza kucita cinji?
4 Yehova olonjeza kuti akomvwishila mapemphelo ŵasu. (Ŵelengani Yeremiya 29:12.) Mulungu oŵakonda ngako atumiki ŵake okhulupilika. Tetyo, anganyalanyaze lini mapemphelo ŵao. (Sal. 10:17; 37:28) Olo n’tetyo, izi zutanthauza lini kuti akotipasa zilizonse zatingamusenge. Nthawi ziyakine, tingafunikile kuyembekezela mpaka tikaloŵe m’calo calomba kuti tikalandile zinthu ziyakine zatamusenga.
5. Kansi Yehova oganizila cinji akaliyoyankha mapemphelo ŵasu? Fotokozani.
5 Yehova oganizila mwamene pempho yasu yukatizhyilana na colinga cake. (Yes. 55:8, 9) Cimozi mwa zolinga zake n’cakuti calo conse cikazule na ŵanthu amene omumvwila monga wolamulila wao. Satana olaŵila kuti ŵanthu angankhale osangalala ngati angozilamulila ŵeka. (Gen. 3:1-5) Kuti Satana aoneke kuti ni wawenye, Yehova walola ŵanthu kuti akozilamulila ŵeka. Izi zacitisha kuti pacalo pankhale mavuto anyinji. (Mla. 8:9) Tuziŵa kuti Yehova aticosele lini mavuto yonse yatukumana nayo masiku ŵano. Talaŵila teti cifukwa cakuti ngati angacosepo mavuto, ayakine angayambe kuganiza kuti ŵanthu angakwanishe kuzilamulila ŵeka paliye vuto iliyonse.
6. Ndaŵa yanji tufunika kunkhala na cidalilo cakuti nthawi zonse Yehova oyankha mapemphelo ŵasu mwacikondi koma soti mwacilungamo?
6 Yehova angayankhe mapemphelo olingana, m’njila zosiyana. Mwacisanzo, Mfumu Hezekiya enze elwala ngako ndipo esenga Yehova kuti amupoleshe. Yehova eyankha pemphelo yake mwa kumupolesha. (2 Maf. 20:1-6) Koma mtumwi Paulo pecisenga Yehova kuti amucosele “munga m’muŵili” wamene payakine yenze vuto ya thanzi, Yehova aliyomucosele. (2 Akor. 12:7-9) Ganizilani soti cisanzo ca mtumwi Yakobo na Petulo. Mfumu Herode enzofuna kuŵapaya onse aŵili. Mpingo weŵapemphelela onse aŵili. Olo n’tetyo, Yakobo epaiwa koma Petulo epulumusiwa mozizwisa na mngelo. (Mac. 12:1-11) Payakine mungazikonshe kuti, ‘Ndaŵa yanji Yehova epulumusa Petulo koma Yakobo epaiwa?’ Baibo yufotokoza lini ciliconse pa mbali iyi. c Koma catuziŵa n’cakuti Yehova “ocita lini cosalungama.” (Deut. 32:4) Kuyangizhyila apo, Yehova enzoŵakonda onse aŵili Petulo na Yakobo. (Chiv. 21:14) Nthawi ziyakine, Yehova angayankhe lini mapemphelo ŵasu monga ni mwetenzoyembekezela. Koma cifukwa cakuti nise osimikizhya kuti Yehova nthawi zonse ocita zinthu mwacikondi koma soti mwacilungamo, tukaikila lini njila yaangasankhe poyankha mapemphelo ŵasu.—Yobu 33:13.
7. Kansi tufunika kupewa cinji, ndipo ndaŵa yanji?
7 Tufunika kupewa kulinganizhya mwazilili zinthu kuli seo na ayakine. Mwacisanzo, tingasenge Yehova kuti atiyavye pa mbali iyakine, koma pemphelo osayankhiwa. Pavuli pake, tingamvwe kuti muyakine esenga cinthu cimozimozi koma Yehova emuyankha. Kalongosi Anna ekumanako na zoteti. Yove enze epemphela kuti mulume wake Matthew apole matenda a khansa yeenzolwala. Pa nthawi imozimozi azilongosi aŵili acikulile nao enzolwala matenda a khansa. Tetyo, kalongosi Anna epemphelela mulume wake pamozi na azilongosi aŵili. Azilongosi epola, koma mulume wake Matthew emwalila. Poyamba, Anna ezikonsha kuti, ngati azilongosi epola cifukwa cakuti Yehova eŵayavya, ndaŵa yanji aliyoyankhe pemphelo yakuti mulume wangu apole? Kulaŵila cendi, tingaziŵe lini mwecipolela azilongosi aŵa. Koma catuziŵa n’cakuti Yehova akasilizhye mavuto yonse ndipo olakalaka kuukisha ashamwali ŵake amene ecifwa.—Yobu 14:15.
8. (a) Molingana na Yesaya 43:2, kansi Yehova otiyavya tyani? (b) Kansi pemphelo ingatiyavye tyani ngati tukumana na mayeselo? (Onani vidyo yakuti Pemphelo Yutiyavya Kulimbana na Mavuto.)
8 Yehova akotiyavya nthawi zonse. Monga Atata acikondi, Yehova ofuna lini kuti tikovutika. (Yes. 63:9) Olo n’tetyo, yove otiteteza lini ku mayeselo yonse yatingakumane nayo, yamene tingayalinganizhye na mimana olo mulilo. (Ŵelengani Yesaya 43:2.) Olo n’tetyo, otilonjeza kuti akotiyavya kupita pa zinthu izi. Kuyangizhyila apo, alole lini kuti mayeselo atikangishe kunkhala pa ushamwali wotang’a na yove. Yehova otipasa soti mzimu wake utuŵa kuti utiyavye kupilila. (Luka 11:13; Afil. 4:13) Cifukwa ca izi, tingankhale na cidalilo cakuti nthawi zonse akotipasa zatufunikila kuti tikwanishe kupilila nopitilizhya kunkhala okhulupilika kwa yove. d
KANSI YEHOVA OYEMBEKEZELA CINJI KULI SEO?
9. Molingana na Yakobo 1:6, 7, ndaŵa yanji tufunika kunkhala na cidalilo cakuti Yehova atiyavye?
9 Yehova oyembekezela kuti tikomudalila. (Aheb. 11:6) Nthawi ziyakine tingaone kuti mayeselo yatukumana nayo ni yovuta kuyapilila. Payakine tingafwike mpaka poyamba kukaikila ngati Yehova angatiyavye. Koma Baibo yutisimikizhyila kuti moyavyiwa na Mulungu, tingakwanishe ‘kukwela cipupa.’ (Sal. 18:29) M’malo molola cikaikilo kuti cikule mu mtima mwasu, tufunika kupemphela tili na cikhulupililo cakuti Yehova ayankhe mapemphelo ŵasu.—Ŵelengani Yakobo 1:6, 7.
10. Fotokozani cisanzo coonesha mwatingacitile zinthu mokatizhyana na mapemphelo ŵasu.
10 Yehova oyembekezela kuti tikocita zinthu mokatizhyana na mapemphelo ŵasu. Mwacisanzo, mkwasu angasenge Yehova kuti amuyavye kuti masiku ayakine osati akaseŵenze na colinga cakuti akapezeke pa msonkhano wacigao. Kansi Yehova angayankhe tyani pemphelo iyi? Yehova angayavye mkwasu uyu kuti ankhale wotang’a mtima kuti akalaŵile na abosi ŵake. Olo n’tetyo, mkwasu uyu angafunike mphela kuluta kuti akalaŵile nao. Payakine angafunike kusenga mowelezhyawelezhya. Olo payakine angafunike kusenga muyake kuti akamuseŵenzele pati akankhale ku msonkhano kuti akayowelako, akaseŵenze pa malo a muyake. Ngati n’zokwanishika, payakine angafunike kutola cuti olo kuti akapasiwe lini ndalama iliyonse.
11. Ndaŵa yanji tufunika kupemphelela zinthu zofunika mowelezhyawelezhya?
11 Yehova oyembekezela kuti tikopemphelela zinthu zofunika mowelezhyawelezhya. (1 Ates. 5:17) Molingana na zecilaŵila Yesu, zinthu ziyakine zatingasenge zingayankhiwe lini nthawi yamene iyo. (Luka 11:9) Olo n’tetyo, tufunika lini kutaya mtima. M’malo mwake, tufunika kupemphela mowelezhyawelezhya koma soti mofumila pansi pa mtima. (Luka 18:1-7) Tetyo, ngati tupitilizhya kupemphelela zinthu zatufuna, tuonesha Yehova kuti zinthu zamene izo n’zofunika ngako. Kuyangizhyila apo, tuonesha kuti tili na cikhulupililo cakuti atiyavye.
NDAŴA YANJI NTHAWI ZIYAKINE TINGAFUNIKILE KUCINJA ZINTHU ZATUPEMPHELELA?
12. (a) Kansi ni konsho yotyani yatufunika kuzikonsha pa zinthu zatusenga, ndipo ndaŵa yanji? (b) Kansi tingacitenji kuti mapemphelo ŵasu akolemekeza Yehova? (Onani kabokosi kakuti “ Kansi Zinthu Zanusenga Zuonesha Kuti Nulemekeza Yehova?”)
12 Ngati tiliyolandile zinthu zatasenga, tingacite bwino kuzikonsha makonsho atatu aŵa. Yoyamba, ‘Kansi nupemphelela zinthu zoyenelela?’ Kanyinji-kanyinji, tukonda kuganiza kuti tuziŵa bwino zinthu zatufunikila. Koma zinthu zatingasenge, payakine zingatiyavye lini kwenekwene. Mwacisanzo, ngati tupemphelela kuti aticoselepo vuto iyakine, payakine pangankhale njila iyakine yabwino ngako yatingasilizhyilemo vuto yamene iyo kupambana yatasenga. Ndipo payakine zinthu ziyakine zatingasenge, zingankhale zosakatizhyana na cifunilo ca Yehova. (1 Yoh. 5:14) Mwacisanzo, ganizilani cisanzo ca makolo ŵatafotokoza koyambilila. Enze esenga Yehova kuti mwana wao apitilizhye kutumikila Yehova. Iyi ingaoneke kuti ni pempho yoyenelela. Olo n’tetyo, Yehova okakamizhya lini aliyense kuti akomutumikila. Yove ofuna kuti seo tonse, kuyangizhyilapo ŵana ŵasu tikosankha seka kumutumikila. (Deut. 10:12, 13; 30:19, 20) Tetyo, makolo ofunika kusenga Yehova kuti akophunzisa ŵana ŵao moŵafwika pa mtima. Kucita izi, kungayavye ŵana ŵao kuti akokonda Yehova nonkhala naye pa ushamwali.—Miy. 22:6; Aef. 6:4.
13. Molingana na Aheberi 4:16, kansi Yehova otiyavya pa nthawi yotyani? Fotokozani.
13 Konsho yaciŵili ni yakuti, ‘Kansi ino ni nthawi yabwino yakuti Yehova ayankhe pemphelo yangu?’ Nthawi ziyakine tingaone kuti tufunikila yankho ya mapemphelo ŵasu nthawi yamene iyo. Koma zacendi n’zakuti Yehova oziŵa bwino nthawi yaangatiyavyilemo. (Ŵelengani Aheberi 4:16.) Ngati tiliyolandile yankho nthawi yamene iyo, nthawi ziyakine tingayambe kuganiza kuti yankho ya Yehova ni yakuti ‘Yai.’ Koma payakine yankho ingankhale yakuti ‘Yembekeza.’ Mwacisanzo, ganizilani za mkwasu wacilumbwana wamene enze esenga Yehova kuti apole matenda yeenzolwala. Kuti Yehova emupolesha mozizwisa, payakine Satana sembe elaŵila kuti mkwasu uyu opitilizhya kutumikila Yehova cifukwa cakuti emupolesha. (Yobu 1:9-11; 2:4) Yehova enkhazikisha kale nthawi pati akafumyepo matenda onse. (Yes. 33:24; Chiv. 21:3, 4) Tingayembekezele lini Yehova kuti atipoleshe mozizwisa. Tetyo, mkwasu uyu enzofunika kusenga Yehova kuti amupase mphamvu koma soti mtendele wa mu mtima kuti akwanishe kupilila matenda ŵake nopitilizhya kutumikila Yehova mokhulupilika.—Sal. 29:11.
14. Kansi mwaphunzilapo cinji pa cokumana naco ca kalongosi Janice?
14 Ganizilani cokumana naco ca kalongosi Janice, wamene enze epemphela kuti akatumikile pa Beteli. Pavuli pakuti papita vyaka 5, niye pecizindikila kuti Yehova eyankha mapemphelo ŵake, koma m’njila yosiyana na mweenzoyembekezela. Yove elaŵila kuti: “Yehova eseŵenzesha nthawi iyi kuti aniphunzise noniyenga. Cidalilo cangu pali yove cenzofunika kukula. Nenzofunika kuphunzila Baibo mwakhama. Kuyangizhyila apo, nenzofunika kupeza cimwemwe ca mu mtima camene cudalila lini pa mwazilili zinthu pa umoyo.” Pavuli pake, Janice na mulume wake esengewa kuti akatumikile m’dela. Poganizila zecitika kuvuli, kalongosi Janice elaŵila kuti: “Yehova eyankha mapemphelo ŵangu koma m’njila yosiyana na mwenenzoyembekezela. Zenitolela nthawi kuti nizindikile kuti yankho yecipeleka Yehova yenze mphaso yamtengo wapatali. N’ne woyamikila ngako kuti nankhala na mwai woona cikondi na kuwama mtima kwa Yehova.”
Ngati mwaona kuti Yehova aliyoyankhe pemphelo yanu, mungacite bwino kupemphelela zinthu ziyakine (Onani ndime 15) f
15. Ndaŵa yanji nthawi ziyakine tingafunikile soti kupemphelela zinthu ziyakine? (Onani soti vithunzithunzi.)
15 Konsho yacitatu ni yakuti, ‘Kansi nufunika kupemphelela soti cinthu ciyakine?’ Olo kuti ni cinthu cabwino kupemphelela cinthu ciyakine mwacindunji, nthawi ziyakine tingazindikile cifunilo ca Mulungu kuli seo mwa kusenga soti zinthu ziyakine. Ganizilani za kalongosi wamene enzopemphelela kuti akaloŵe Sukulu ya Alengezi a Ufumu. Yove enzofuna kuti akaloŵe sukulu na colinga cakuti akatumikile kudela kwamene kufunika alaliki anyinji. Tetyo, peenzopemphelela kuti akaloŵe sukulu, enzofunika kusenga Yehova kuti amuyavye kuzindikila mipata iyakine yaangayangizhyilemo utumiki wake. (Mac. 16:9, 10) Pavuli pake, enzofunika kucita zinthu mokatizhyana na pemphelo yake. Mwacisanzo, enzofunika kukonsha woyanganila dela ngati pali mpingo wapafupi kwamene kufunika apainiya anyinji. Kuyangizhyila apo, enzofunika kulemba kalata ku ofesi ya msambo kukonsha ngati kuli mpingo uyakine kwamene kufunikila alaliki anyinji. e
16. Kansi tingankhale osimikizhya za cinji?
16 Monga ni mwataphunzilila, tingankhale osimikizhya kuti nthawi zonse Yehova oyankha mapemphelo ŵasu mwacikondi koma soti mwacilungamo. (Sal. 4:3; Yes. 30:18) Nthawi ziyakine tingalandile yankho yosiyana na mwetenzoyembekezela. Koma zacendi n’zakuti Yehova onyalanyaza lini kuyankha mapemphelo ŵasu. Yove otikonda ngako ndipo angatisiye lini. (Sal. 9:10) Tetyo, nthawi zonse mukomudalila nopemphela mofumila pansi pa mtima.—Sal. 62:8.
NYIMBO 43 Pemphelo Yoyamikila Mulungu
a Nkhani ino, ifotokoze cifukwa cake tufunika kunkhala na cidalilo cakuti nthawi zonse Yehova oyankha mapemphelo ŵasu mwacikondi koma soti mwacilungamo.
b Mazina ayakine acinjiwa.
c Onani nkhani yakuti “Kansi Mukhulupilila Kuti Yehova Ocita Zinthu Zoyenela Nthawi Zonse?” mu Nsanja ya Mulonda ya February 2022 ndime 3-6.
d Kuti muziŵe zinyinji zokhuza mwakutiyavyila Yehova kuti tikwanishe kupilila mayeselo, onelelani vidyo ya mutu wakuti Pemphelo Yutiyavya Kulimbana na Mavuto pa jw.org.
e Kuti mupeze malangizo amene angakuyavyeni kuti muzipeleke kuyotumikila m’gao ya msambo uyakine, onani buku ya m’Cinyanja yakuti Gulu Lokhazikitsidwa Kucita Cifunilo ca Yehova, mutu 10, ndime 6-9.
f MAU OFOTOKOZA VITHUNZITHUNZI: Azilongosi aŵili opemphela akaliyoyamba kufiling’a fomu ya Sukulu ya Alengezi a Ufumu. Pavuli pake, m’mozi waitiwa koma muyakine aliyoitiwe. M’malo mokhumudwa, kalongosi wamene aliyoitiwe opemphela kuti Yehova amuyavye kuzindikila mipata iyakine yaangayangizhyilemo utumiki wake. Pavuli pake, olemba kalata ku ofesi ya msambo yoŵaziŵisha kuti ni wofunishisha kuyotumikila kudela kwamene kufunika alaliki anyinji
