NKHANI YOPHUNZILA 41
Mwatingayavyile Maphunzilo a Baibo Kuluta Pasogolo Mpaka Kubatizika—Mbali 1
“Nimwe kalata yofumila kwa Khristu yolembewa na seo kupitila mu utumiki wasu.”—2 AKOR. 3:3.
NYIMBO 78 “Kuphunzisa Mau a Mulungu”
ZATI TIPHUNZILE *
Cunkhala cinthu cokondwelesha ngako ku mpingo wonse kuona wophunzila Baibo opita pasogolo nobatizika (Onani ndime 1)
1. Kansi 2 Akorinto 3:1-3 yutiyavya tyani kuyamikila mwai watili nao wosogoza maphunzilo a Baibo mpaka kubatizika? (Onani cithunzithunzi ca pacikuto.)
KANSI mukumvwa tyani kuona wophunzila Baibo wa m’gawo ya mpingo wanu obatizika? N’zosakaikisha kuti musangalala ngako. (Mat. 28:19) Ndipo ngati ni mweo mwenzophunzila naye, mungakondwele ngako kumuona obatizika. (1 Ates. 2:19, 20) Ophunzila Baibo amene abatizika lombapano ni “makalata oticitila umboni,” osati tyala kuli enzophunzila nao koma ku mpingo wonse.—Ŵelengani 2 Akorinto 3:1-3.
2. (a) Kansi tufunika kuzikonsha konsho yotyani, ndipo ndaŵa yanji? (b) Kansi phunzilo ya Baibo n’cinji? (Onani mau a m’nyansi.)
2 N’zosangalasa ngako kuti pa vyaka 4 vapita, akwasu na azilongosi pacalo conse esogoza maphunzilo a Baibo * pafupifupi 10,000,000 pa avaleji mwezi uliwonse. Pa vyaka vamene ivo, pa avaleji ŵanthu opitilila 280,000 enzobatizika caka ciliconse nonkhala ophunzila a Yesu Khristu. Kansi tingayavye tyani ŵanthu mamiliyoni amene ophunzila Baibo kuti abatizike? Nise ofunishisha kuyavya ŵanthu kuluta pasogolo kamangu nobatizika, malinga ngati Yehova apitilizhye kuleza mtima nolola ŵanthu kunkhala ophunzila a Khristu. Nthawi yatasala nayo ni itontho ngako!—1 Akor. 7:29a; 1 Pet. 4:7.
3. Tilaŵizhyane cinji m’nkhani ino pankhani yosogoza maphunzilo a Baibo?
3 Nchito yolalikila ni yofunika ngako makamaka masiku ŵano. Tetyo, Bungwe Yolamulila yesenga maofesi a msambo kuti atwale malingalilo okhuza zatingacite kuti tiyavye ŵanthu ŵatuphunzila nao kuti alute pasogolo nobatizika. M’nkhani ino na yokonkhapo tione zatingaphunzile pa zecilaŵila apainiya, amishonale na oyanganila madela. * (Miy. 11:14; 15:22) Efotokoza zamene mphunzisi na wophunzila Baibo ofunika kucita kuti akonkhala na phunzilo ya Baibo yatanthauzo. M’nkhani ino tiphunzile vinthu 5 vamene wophunzila Baibo aliyense ofunika kucita kuti alute pasogolo kamangu nobatizika.
MUKOPHUNZILA WIKI ILIYONSE
M’sengeni wophunzila kuti mukophunzila conkhala pansi (Onani ndime 4-6)
4. Kansi tufunika kuzindikila cinji pankhani ya maphunzilo a Baibo ocitiwa mwacidule pang’anda copanama?
4 Akwasu na azilongosi anyinji oyambisha maphunzilo a Baibo acidule pang’anda copanama. Nangu kuti iyi ni njila iweme yoyambishila maphunzilo a Baibo, makambilano oteti onkhala acidule ndipo okondocitika lini wiki iliyonse. Ofalisa ayakine pofuna kuti akulishe cidwi ca munthu, osenga namba ya foni yake nomutumila olo kumulembela meseji nolaŵizhyana naye mfundo ya m’Baibo mwacidule akaliyowelelako. Makambisilano oteti angapitilizhye kwa miyezi akaliyonkhazikisha phunzilo. Ngati wophunzila Baibo oikilako lini mtima *, zingankhale zovuta kuti azitwale kwa Yehova nobatizika.
5. Kansi mau a Yesu opezeka pa Luka 14:27-33 tingaŵaseŵenzeshe tyani poyavya maphunzilo a Baibo?
5 Panthawi iyakine, Yesu elaŵila zakufunika kucita munthu kuti ankhale wophunzila wake. Efotokoza za munthu wamene ofuna kumanga nsanja koma soti za mfumu yamene yufuna kuya ku nkhondo. Elaŵila kuti womanga nsanja ofunika “coyamba kunkhala pansi noŵelengela mtengo wake” kuti aone ngati angakwanishe kumanga nsanja. Mfumu nayo, yufunika “coyamba kunkhala pansi nokonshela” kuti ione ngati masoja ŵake angakwanishe kuchaya nkhondo. (Ŵelengani Luka 14:27-33.) Molingana na izi, Yesu enzoziŵa kuti munthu ofuna kunkhala wophunzila wake, ofunika kuzipenda noona zakufunika kucita. Tetyo, tufunika kulimbikisha ophunzila Baibo amene aonesha cidwi kuti tikophunzila nao wiki iliyonse. Kansi tingacite tyani zamene izi?
6. Kansi tufunika kucita cinji kuti tiyavye wophunzila kuluta pasogolo?
6 Yambani mwa kutalimphishako nthawi yamuseŵenzesha pocita phunzilo ya Baibo ya pang’anda copanama. Ngati poyamba mwenzolaŵizhyana tyala lemba imozi, mungayambe kulaŵizhyana naye yaŵili. Ngati wophunzila wayoŵelela kuphunzila Baibo copanama kwa kanthawi katali, m’sengeni ngati pali luweme kuti munkhale pansi nopitilizhya makambisilano. Zati ayankhe zioneshe ngati ali na cidwi cophunzila Baibo. Kuti alute pasogolo kamangu, mungamusenge kuti mukophunzila naye kaŵili pa wiki. Olo n’tetyo, pali soti zinyinji zamufunikila kucita.
MUKOKONZEKELA PHUNZILO ILIYONSE
Mukokonzekela luweme phunzilo noyavya wophunzila mwaangakonzekelele (Onani ndime 7-9)
7. Kansi mphunzisi angakonzekele tyani luweme phunzilo iliyonse?
7 Monga mphunzisi, mufunikila kukonzekela luweme nkhani iliyonse yamukuyophunzisa. Yambani mwa kuŵelenga nkhani yonse pamozi na malemba. Zindikilani mfundo zikulu-zikulu. Ganizilani mutu wa nkhani, tumitu tutontho-tutontho, makonsho, malemba olemba kuti “ŵelengani,”’ vithunzithunzi na vidyo iliyonse yamene ingayavye kumvwikisha nkhani yamukuyophunzisa. Muli na cithunzi ca wophunzila m’maganizo, sinkhasinkhani mwamungayofotokozela mfundo m’njila yosavuta kumvwa, kuti akakwanishe kuzimvwisha noona mwaangaziseŵenzeshele pa umoyo wake.—Neh. 8:8; Miy. 15:28a.
8. Kansi mau a Paulo opezeka pa Akolose 1:9, 10 otiphunzisa cinji pa nkhani yopemphelela ophunzila Baibo?
8 Pokonzekela, mukopemphela kwa Yehova notomola zosoŵa za wophunzila wanu. Mukosenga Yehova kuti akuyavyeni kuti mukophunzisa mfundo za m’Baibo mokata mtima. (Ŵelengani Akolose 1:9, 10.) Mukoganizila mfundo zamene wophunzila wanu angavutike kuzimvwisha nozikhulupilila. Mukokumbukila kuti colinga canu cikulu ni kumuyavya kuti apite pasogolo mwauzimu nobatizika.
9. Kansi mphunzisi angayavye tyani wophunzila mwaangakonzekelele? Fotokozani.
9 Nise osimikizhya kuti kucita phunzilo ya Baibo monkhazikika, kungayavye wophunzila kuyamba kuyamikila zamene Yehova na Yesu amucitila. Izi zingamucitishe kunkhala na cifuno cophunzila zinyinji. (Mat. 5:3, 6). Kuti wophunzila apindule mokwanila, ofunika kukonzekela na kuika maganizo ŵake pa zakuphunzila. Kuti akokwanisha kucita izi, mufunika kumufotokozela kuti akokonzekela luweme phunzilo iliyonse, noona mwaangaseŵenzeshele mfundo zamene izo pa umoyo wake. Kansi mungamuyavye tyani kukonzekela? Konzekelani naye pamozi kuti mumuoneshe mwatucitila. * Muyavyeni mwaangapezele mayankho noconga, zamene zingamuyavye kukumbukila. Pavuli pake mukonsheni kuti ayankhe m’mau ŵake-ŵake. Akacita teti, mukwanishe kuziŵa ngati omvwisha zamuphunzila. Koma pali soti cinthu ciyakine camufunika kulimbikisha wophunzila wanu kucita.
MUPHUNZISENI KUTI AKOLAŴILA NA YEHOVA SIKU ILIYONSE
Phunzisani wophunzila Baibo wanu mwaangalaŵilile na Yehova (Onani ndime 10-11)
10. Ndaŵa yanji wophunzila Baibo ofunika kuŵelenga Baibo siku iliyonse, ndipo ofunika kucitanji kuti akopindula ngako?
10 Kuyangizhyila pa kuphunzila Baibo wiki iliyonse na mphunzisi wake, wophunzila Baibo angapindule ngako mwa kucita vinthu viyakine payeka siku iliyonse. Ofunika kulaŵizhyana na Yehova. Motyani? Mwa kumvwishila nolaŵila na Yehova. Angamvwishile kwa Mulungu mwa kuŵelenga Baibo siku iliyonse. (Yos. 1:8; Sal. 1:1-3) Muonesheni moseŵenzeshela “Ndandanda Yoŵelenga Baibo” ili pa jw.org. * Kuti mumuyavye kupindula ngako na za kuŵelenga m’Baibo, mulimbikisheni kuti akosinkhasinkha pa za kuphunzila zokhuza Yehova. Mulimbikisheni soti kuti akoseŵenzesha za kuphunzila mu umoyo wake.—Mac. 17:11; Yak. 1:25.
11. Kansi wophunzila Baibo angaphunzile tyani kupemphela kufumila pansi pa mtima, ndipo ndaŵa yanji ofunika kupemphela nthawi zonse?
11 Limbikishani wophunzila wanu kuti akolaŵila na Yehova mwa kupemphela siku iliyonse. Mukopemphela mofumila pansi pa mtima poyamba na posilizhyila pa phunzilo iliyonse, ndipo mukomutomola m’mapemphelo. Pakumvwishila ku mapemphelo yanu, aphunzile mwangapelekele mapemphelo kufumila pansi pa mtima, ndipo akopeleka mapemphelo yake kwa Yehova Mulungu kupitila m’zina ya Yesu Khristu. (Mat. 6:9; Yoh. 15:16) Ganizilani mwamene kuŵelenga Baibo siku iliyonse (kumvwishila kwa Yehova) na kupemphela (kulaŵila na Yehova) kungayavyile wophunzila wanu kuvwendela pafupi na Mulungu. (Yak. 4:8) Ngati ocita izi siku iliyonse, zingamuyavye kuti azipeleke nobatizika.
MUYAVYENI KUKULISHA USHAMWALI WAKE NA YEHOVA
12. Kansi mphunzisi angayavye tyani wophunzila kuti akulishe ushamwali wake na Yehova?
12 Zakuphunzila wophunzila wanu zufunika lini tyala kukhuza maganizo, koma zufunika soti kukhuza mtima wake. Ndaŵa yanji? Mtima wasu wamene uyangizhyilapo zatulakalaka na mwatumvwila, utilimbikisha kuseŵenzesha zatuphunzila. Yesu ephunzisa ŵanthu vinthu vinyinji ndipo ŵanthu amene ao enzosangalala na veenzophunzila. Koma ŵanthu enzomukonkha cifukwa cakuti enzoŵafwika pa mtima. (Luka 24:15, 27, 32) Wophunzila Baibo wanu ofunika kuona Yehova monga Munthu wenewene, wamene angankhale naye pa ushamwali nomuona monga ni Ausuwake, Mulungu wake koma soti Shamwali wake. (Sal. 25:4, 5) Pamuphunzila, mukoyavya wophunzila wanu kuona minkhalidwe iweme ya Mulungu. (Eks. 34:5, 6; 1 Pet. 5:6, 7) Mukocita izi pa mutu uliwonse wamuphunzila. Mukoyavya wophunzila Baibo kuyamikila minkhalidwe iweme ya Yehova monga cikondi, kuwama mtima na cifundo. Yesu elaŵila kuti “lamulo ikulu ngako koma soti yoyamba” ni ‘kukonda Yehova Mulungu wako.’ (Mat. 22:37, 38) Yavyani wophunzila kuti akokonda ngako Yehova.
13. Fotokozani mwamungayavyile wophunzila wanu kuziŵa minkhalidwe iweme ya Yehova.
13 Pamulaŵizhyana na wophunzila wanu, mukomufotokozela cukucitishani kukonda Yehova. Izi zingayavye wophunzila wanu kuona kuti naye ofunika kukulisha ushamwali wake na Mulungu. (Sal. 73:28) Mwacisanzo, mungapeze ciganizo m’cofalisa camuseŵenzesha pophunzisa olo pa lemba, camene cufotokoza minkhalidwe ya Yehova monga cikondi, nzelu, cilungamo na mphamvu. Ngati ciganizo camene ico cakufwikani pa mtima, mufotokozeleni wophunzila wanu kuti aziŵe kuti ici ni cifukwa cimozi cukucitishani kukonda Ausuwasu akululu. Pali soti cinthu ciyakine cakufunika kucita wophunzila Baibo aliyense kuti apite pasogolo nobatizika.
MULIMBIKISHENI KUTI AKOPEZEKA PA MISONKHANO YA MPINGO
Limbikishani wophunzila wanu kuti ayambe kupezeka pa misonkhano (Onani ndime 14-15)
14. Kansi Aheberi 10:24, 25 yutiuzhyanji zokhuza misonkhano zamene zingayavye wophunzila Baibo kupita pasogolo?
14 Tonse tufuna kuti ophunzila ŵasu akopita pasogolo nobatizika. Njila imozi yatingaŵayavyile kucita zamene izi, ni mwa kuŵalimbikisha kupezeka pa misonkhano ya mpingo. Aphunzisi aluso olaŵila kuti wophunzila akayamba kupezeka pa misonkhano opita pasogolo kamangu. (Sal. 111:1) Aphunzisi ayakine ofotokozela wophunzila Baibo wao kuti angaphunzile zinyinji mwa kupezeka pa misonkhano. Ŵelengani Aheberi 10:24, 25 pamozi na wophunzila ndipo mufotokozeleni mapindu yangapeze ngati wapezeka pa misonkhano. Muonesheni vidyo ya mutu wakuti Kansi N’cinji Cucitika ku Ng’anda ya Ufumu? * Yavyani wophunzila wanu kuti akopezeka pa misonkhano sondo iliyonse.
15. Kansi tingacite tyani kuti tiyavye wophunzila wasu kuti ayambe kupezeka pa misonkhano nthawi zonse?
15 Kansi mungacitenji ngati wophunzila wanu akaliyoyamba kupezeka pa misonkhano olo ngati osonkhana lini nthawi zonse? Mwaubwenzi, muuzhyenkoni zemwephunzila pa msonkhano walombapano. Akaona mwamukondela misonkhano, angalimbikishiwe kuti ayambe kusonkhana. Mungamupase Nsanja ya Mulonda na Kabuku ka Misonkhano ya Umoyo na Utumiki kamuseŵenzesha. Muonesheni zati tikaphunzile sondo ikuza nomukonsha mbali yawakondwela nayo. Zati akaone na kumvwa pa msonkhano woyamba, zikankhale zosiyana ngako na zeciona na kumvwa ku vipembezo viyakine. (1 Akor. 14:24, 25) Akapezeko akwasu na azilongosi acisanzo ciweme amene angamuyavye kupita pasogolo nobatizika.
16. Kansi tingayavye tyani wophunzila kuti apite pasogolo nobatizika, ndipo tikaphunzile cinji m’nkhani yokonkhapo?
16 Kansi tingayavye tyani wophunzila kuti apite pasogolo nobatizika? Tufunika kuyavya wophunzila wasu kuti akoona kuti kuphunzila n’kofunika ngako. Tingacite izi mwa kumulimbikisha kuphunzila wiki iliyonse koma soti kukonzekela phunzilo iliyonse. Tufunika soti kumulimbikisha kuti akolaŵila na Yehova siku iliyonse nokulisha ushamwali wake na yove. Tingalimbikishe wophunzila kuti akopezeka pa misonkhano ya mpingo. (Onani bokosi ya mutu wakuti “ Zakufunika Kucita Wophunzila Kuti Apite Pasogolo Nobatizika.”) Tetyo, nkhani yokonkhapo ikafotokoze vinthu viyakine vokwanila 5 vakufunika kucita aphunzisi kuti ayavye ophunzila kuti abatizike.
NYIMBO 76 Ko Mukumvwa Tyani?
^ par. 5 Kuphunzisa munthu cinthu ciyakine kutanthauza kumuyavya kuyamba “kuganiza olo kucita vinthu m’njila yalomba.” Lemba ya Mateyu 28:19, yamene ni lemba ya caka ca 2020, yutikumbusha kufunika kophunzila Baibo na ŵanthu noŵayavya kunkhala ophunzila a Yesu Khristu. Mu nkhani ino koma soti yokonkhapo, tiphunzile mwatingakulishile luso yasu pa nchito yofunika ngako yamene iyi.
^ par. 2 TANTHAUZO YA MAU AYAKINE: Ngati munkhala na makambilano a m’Baibo nthawi zonse koma soti mwadongosolo, niye kuti musogoza phunzilo ya Baibo. Ngati mweonesha wophunzila mwatucitila phunzilo ya Baibo ndipo mwaphunzila naye kaŵili, mungacitile lipoti ngati mwasimikizhya kuti mupitilizhye kuphunzila.
^ par. 3 Nkhani izi zili na mutu wakuti “Kuchititsa Maphunziro a Baibulo Opita Patsogolo” zamene zupezeka mu Utumiki Wathu wa Ufumu wa Chichewa wa July 2004 mpaka May 2005.
^ par. 4 Mfundo iyi yukata nchito ku maphunzilo a Baibo analume olo anakazi.
^ par. 9 Onelelani vidyo ya maminesi 4 ya mutu wakuti Kuthandiza Maphunzilo Athu a Baibo Kukonzekela. Pa JW Library® m’Cinyanja lutani polemba kuti MEDIA > OUR MEETINGS AND MINISTRY > IMPROVING OUR SKILLS.
^ par. 10 M’Chichewa lutani polemba kuti ZIMENE BAIBULO LIMAPHUNZITSA > ZOKUTHANDIZANI POPHUNZIRA BAIBULO.
^ par. 14 Pa JW Library® m’Cizungu, lutani polemba kuti MEDIA > OUR MEETINGS AND MINISTRY > TOOLS FOR THE MINISTRY.
