1921—Vyaka 100 Vapita
MU NSANJA YA MULONDA ya January 1, 1921 mwenze konsho yakuti, “Kansi tuyembekezela kucita nchito yotyani caka cino?” Poyankha konsho iyi, m’nkhani iyi mwenze lemba ya Yesaya 61:1, 2 yamene ikuti, “Yehova wanizoza kuti nikalalikile uthenga wabwino ku ŵanthu ofasa, na kuti nikalengeze za caka ca Yehova cowamila ŵanthu mtima na za siku yowezhyela ya Mulungu wasu.” Lemba iyi, yekumbusha ophunzila Baibo za nchito yeenzofunika kucita yamene ni kulalikila uthenga wabwino.
ALALIKI OTANG’A MTIMA
Kuti akwanishe kucita nchito iyi, ophunzila Baibo enzofunika kunkhala otang’a mtima. Izi zili teti cifukwa enzofunika lini tyala kulalikila “uthenga uweme” ku ŵanthu ofasa, koma enzofunika soti kulalikila uthenga “wowezhyela ku ŵanthu aipa.”
Mkwasu J. H. Hoskin wa ku Canada elalikila motang’a mtima olo kuti enzosushiwa. Peenzolalikila mu 1921, ekumana na msogoleli wa cipembezo ca Methodist. Mkwasu uyu eyamba makambilano mwa kulaŵila kuti: “Olo kuti tingasiyane pa zinthu zatukhulupilila, nusenga kuti tilaŵizhyane mwamtendele. Ndipo izi zicitishe kuti makambilano yasu yayende bwino.” Koma makambilano aya yaliyosile mwamtendele. Mkwasu Hoskin elaŵila kuti: “Petelaŵizhyanako kwa maminesi atontho, msogoleli wa cipembezo uyu evala ciseko mwamphamvu cakuti neganiza kuti gilasi ya pa ciseko iphwanyike.”
Msogoleli uyu elaŵila mwamphamvu kuti, “Nkhoyani mukalalikile ŵanthu asaziŵa Mulungu.” Mkwasu Hoskin aliyoyankhe ciliconse, koma edabwa kuti msogoleli uyu ecita zinthu monga kuti enzoziŵa lini Mulungu.
Siku yokonkhapo peenzolalikila m’chechi mwao, msogoleli uyu elaŵila ziipa zokhuza mkwasu Hoskin. Euzhya mamembala a m’chechi mwake kuti mkwasu Hoskin enze munthu wawenye ngako cakuti enzofunika kupaiwa. Koma mkwasu uyu aliyofooke ndipo epitilizhya kulalikila motang’a mtima. Yove elaŵila kuti: “Nenzosangalala ngako kulalikila m’gao iyi. Ŵanthu ayakine enzoniuzhya kuti tuziŵa kuti ucita nchito ya Mulungu ndipo enzonisenga kuti nikoŵauzhya ngati pali zilizonse zaningafunikile pa umoyo.”
PHUNZILO YA PAŴEKA NA PHUNZILO YA PA BANJA
Pofuna kuyavya ŵanthu kumvwishisha zayuphunzisa Baibo, ophunzila Baibo enzofalisa makonsho m’magazini yamene lomba yuitiwa kuti Galamuka! M’magazini aya mwenzopezeka makonsho yamene makolo enzofunika kuseŵenzesha pophunzisa ŵana ŵao. Makolo enzokonsha ŵana ŵao makonsho aŵa ndipo enzoŵayavya kupeza mayankho ŵake m’Baibo. Mwacisanzo, mwenzopezeka makonsho akuti: “Kansi m’Baibo muli mabuku angani?” “Kansi Mkhristu aliyense ofunika kukumana na cinzunzo?” Makonsho oteti enzoyavya ŵana kuziŵa mfundo za m’Baibo noŵakonzekelesha kuti akankhale alaliki otang’a mtima.
Mwenze soti makonsho na mayankho a m’Baibo yamene yepangiwila ŵanthu amene enzoziŵako kale zinyinji zokhuza Baibo. Mayankho aŵa enzopezeka mu voliyumu 1 ya buku yakuti Studies in the Scriptures. Ŵanthu anyinji amene enzoŵelenga magazini iyi, ephunzila mfundo zinyinji kufumila pa makonsho aŵa. Koma mu Galamuka! ya December 21, 1921 mwenze cilengezo cakuti makonsho aŵa yaleke kufalisiwa. Ndaŵa yanji?
BUKU YALOMBA
Buku yakuti Zeze wa Mulungu
Kakhadi koonesha peenzofunika kuŵelenga ophunzila
Kakhadi ka makonsho
Akwasu amene enzosogolela gulu ya Mulungu pa nthawi yamene iyo, ezindikila kuti ŵanthu enzofunika kuphunzila Baibo mwadongosolo. Tetyo mu November 1921, efalisa buku yakuti Zeze wa Mulungu. Munthu akaonesha cidwi niye penzopasiwa buku iyi ndipo enzoyamba kuiphunzila pa yove yeka. Buku iyi yeyavya ŵanthu kuziŵa colinga ca Mulungu cakuti ofuna kuti ŵanthu akankhale na moyo kosasila. Lomba kansi enzophunzila tyani?
Munthu akalandila buku iyi, enzopasiwa soti kakhadi komuonesha peenzofunika kuŵelenga. Wiki yokonkhapo enzopasiwa kakhadi kayakine kamene kenzonkhala na makonsho okhuza zeciŵelenga. Kosilizhyila kwa kakhadi kwenzoonesha mbali yamene wophunzila enzofunika kuŵelenga wiki yokonkhapo.
Wiki iliyonse, mpingo wenzotumizhya kakhadi ka makonsho kuli wophunzila Baibo, ndipo enzocita izi kwa mawiki 12. Nthawi zinyinji, enzotwala makhadi amene aŵa ni ofalisa amene enzokwanisha lini kucita ulaliki wa ng’anda na ng’anda cifukwa ca ukulukazi olo matenda. Mwacisanzo, kalongosi Anna K. Gardner wa ku United States, elaŵila kuti: “Buku yakuti Zeze wa Mulungu peyefalisiwa, yecitisha kuti mkwangu Thayle wamene ni wolemala ankhale na zocita zinyinji, cifukwa enzokwanisha kupeleka makhadi ya makonsho wiki iliyonse.” Munthu akasilizhya kuphunzila buku iyi payeka, wofalisa muyakine mumpingo enzomuyendela kuti akamuyavye kuphunzila zinyinji za m’Baibo.
Kalongosi Thayle Gardner wankhala pa kanjinga ka ŵanthu olemala
ENZE AKALI NA NCHITO IKULU YENZOFUNIKA KUCITA
Kosilizhyila kwa caka camene ico, mkwasu J. F. Rutherford etumizhya kalata ku mipingo yonse. M’kalata iyi, yove elaŵila kuti: “Caka cino talalikila ŵanthu anyinji kupambana vyaka vonse vakuvuli.” Ndipo epitilizhya kulaŵila kuti: “Koma pakali nchito ikulu yofunika kucita. Tetyo, limbikishani ayakine kuti nao atoleko mbali pa nchito iyi.” N’zoonekelatu kuti ophunzila Baibo ecimvwa malangizo ŵake. Talaŵila teti cifukwa mu 1922, elalikila ŵanthu anyinji kupambana mwecicitila m’vyaka vonse vakuvuli.
