CAKA ciliconse, ŵanthu anyinji amene enze ecosewa mumpingo, owelela m’gulu ya Yehova. Ganizilani ‘cimwemwe cunkhala kululu’ ngati munthu olo m’mozi wayamba soti kutumikila Yehova. (Luka 15:7, 10) Ngati mwenze mwecosewa, ziŵani kuti Yesu, angelo na Yehova ni osangalala ngako cifukwa mweyamba soti kukatizhyana na mpingo. Koma pamuyesayesa kunkhala soti pa ushamwali na Yehova, pali mavuto ayakine yamungakumane nayo. Kansi ni mavuto yotyani? Ndipo mungacitenji kuti muyagonjese?

Anyinji mwa akwasu na azilongosi amene enze ecita cimo ikulu, opitilizhya kuziimba mlandu olo pavuli pakuti awezhyeleshewa mumpingo. Izi n’zosadabwisa cifukwa pa nthawi iyakine, olo Mfumu Davide ecimvwa cimozimozi. Pavuli pakuti Yehova wamukhululukila macimo ŵake, yove elaŵila kuti: “Zolakwa zangu ni zinyinji ngako.” (Sal. 40:12; 65:3) Kalongosi Isabelle * wamene enkhala kunja kwa mpingo kwa vyaka vopitilila 20 elaŵila kuti, “Cenze covuta kuti nikhulupilile kuti Yehova enikhululukila cendi.” Maganizo yoteti yangakupangisheni kuti mufooke mwauzimu. Ndipo m’kuluta kwa nthawi mungayambe kuganiza kuti n’zosakwanishika kunkhala soti pa ushamwali na Yehova. (Miy. 24:10) Musalole kuti zoteti zikucitikileni.

Ayakine ocita nkhaŵa kuti payakine angakwanishe lini kucita zonse zofunikila kuti ankhale soti pa ushamwali wotang’a na Yehova. Pavuli pakuti wawezhyeleshewa mumpingo, mkwasu Antoine elaŵila kuti: “Nenzoona monga neluŵilatu mwenenzocitila zinthu mumpingo koma soti mu utumiki.” Cifukwa ca maganizo oteti, ayakine oona kuti angakwanishe lini kuyamba soti kutumikila Yehova mwacimwemwe.

Mwacisanzo, ngati ng’anda ya munthu yapona cifukwa ca cimphepo camkuntho, yove angafooke poganizila za nthawi, mphamvu na khama yangafunike kuikapo kuti aimange soti. Molingana na izi, ngati ushamwali wanu na Yehova weonongeka cifukwa mwecita cimo ikulu, payakine mungafooke poganiza kuti mufunikila kucita zinyinji kuti muukonze. Koma musataye mtima, cifukwa Yehova ofunishisha kukuyavyani.

Yehova otisenga mwacikondi kuti, “Welani, tiyeni  tikambilane ndipo nikuyavyeni kuti munkhale soti pa ushamwali uweme na neo.” (Yes. 1:18) Khama yemwecita kuti muwelele mumpingo, ni umboni wakuti mufunishisha kunkhala soti pa ushamwali na Yehova. Ndipo yove ni osangalala ngako cifukwa zemwecita zemuyavya kuti ayankhe Satana wamene omutonzhya.—Miy. 27:11.

Pemwewelela mumpingo, mwevwendela pafupi na Yehova. Ndipo naye olonjeza kuti avwendele pafupi na mweo. (Yak. 4:8) Mwecita bwino ngako kuwelela mumpingo. Koma pali soti zinthu ziyakine zamufunika kucita. Mufunika kupitilizhya kukulisha cikondi canu pa Yehova kuti muyambe soti kumuona monga Shamwali wanu koma soti Ausuwanu acikondi. Kansi mungacite tyani zamene izi?

Yesayesani kupanga zolinga zamene mungazikwanilishe. Mwacisanzo, ngati ng’anda yagumuka cifukwa ca cimphepo ca mkuntho, kanyinji-kanyinji cuonongeka ni cipupa, koma faundeshoni yuonongeka lini. N’cimozimozi na mweo, olo kuti mwenze mwecosewa mumpingo, payakine mukalukumbukila mfundo zemwephunzila zokhuza Yehova na malonjezo ŵake. Koma monga ni mwazunkhalila kuti mwineco wa ng’anda angafunike kumanga soti cipupa, namwe mufunika soti kupanga ndandanda yocita zinthu zauzimu monga kulalikila, kupezeka pa misonkhano nopatula nthawi yotandala na akwasu na azilongosi. Onani ziyakine mwa zolinga zamugaziikile.

Mukolaŵila na Yehova nthawi na nthawi. Ausuwanu akululu oziŵa kuti ngati mupitilizhya kuziimba mlandu cifukwa ca vinthu viipa vemwecita, cingankhale covuta kuti mukolaŵila naye m’pemphelo. (Aro. 8:26) Ndiye cifukwa cake okulimbikishani kuti mufunika ‘kulimbikila kupemphela’. Ndipo mukomuuzhya kuti mufuna soti kunkhala pa ushamwali wotang’a na yove. (Aro. 12:12) Pofotokoza mweenzomvwila peciwelela soti mumpingo, mkwasu Andrej elaŵila kuti, “Nenzoziimba mlandu ndipo nenzokumvwa nsoni cifukwa ca vinthu viipa venecita. Koma nthawi zonse nikapemphela, nenzopeza mtendele wa m’maganizo.” Ngati muziŵa lini zamungalaŵile m’mapemphelo ŵanu, mungaoneko zecilaŵila Davide pavuli pakuti walapa, pa Salimo 51 na 65.

Mukophunzila Baibo nthawi zonse. Kucita izi kungakuyavyeni kuti munkhale na cikhulupililo cotang’a nokulisha cikondi canu pa Yehova. (Sal. 19:7-11) Mkwasu Felipe elaŵila kuti, “Cifukwa nenzeve ndandanda yoŵelenga Baibo nthawi zonse, nefooka mwauzimu ndipo m’kuluta kwa nthawi necita cimo. Tetyo, penewelela mumpingo, neyamba kuphunzila Baibo nthawi zonse cifukwa nenzofuna lini kuti nimukhumudwishe soti Yehova.” Namwe tukulimbikishani kucita cimozimozi. Ngati mufuna kuziŵa nkhani za m’Baibo zingakuyavyeni kutang’isha soti ushamwali wanu na Yehova, mungasenge Akhristu acikulile mwauzimu kuti akuyavyeni.

Yesayesani kunkhala soti pa ushamwali wotang’a na akwasu na azilongosi. Ayakine amene ewezhyeleshewa mumpingo onkhala na nkhaŵa yakuti Akhristu ayakine angoŵaona m’njila yosayenelela. Kalongosi Larissa elaŵila kuti: “Nenzokumvwa nsoni ndipo nenzoziimba mlandu cifukwa nenzoona kuti zenecita zeipisha mbili ya mpingo. Maganizo aya yenivutisha kwa nthawi itali.” Ngati umu niye mwamumvwila, musataye mtima. Nkhalani osimikizhya kuti akulu koma soti Akhristu ayanu ni ofunishisha kukuyavyani kuti munkhale soti pa ushamwali uweme na Yehova. (Onani kabokosi kakuti “ Zangacite Akulu”) Tonse nise osangalala ngako kuti mwewelela mumpingo ndipo tufuna kuti namwe mukokumvwa cimozimozi.—Miy. 17:17.

Kansi mungacitenji kuti munkhale soti pa ushamwali na akwasu na azilongosi mumpingo? Mukopezeka pa misonkhano nthawi zonse. Ndipo mukoyesayesa kulaŵizhyana nao misonkhano ikaliyoyamba olo ikasila nolutila nao pamozi mu ulaliki. Kansi izi zingakuyavyeni tyani? Mkwasu Felix elaŵila kuti, “Akwasu na azilongosi mumpingo enzofunishisha kuti niwelele soti m’gulu ya Yehova. Ndipo penewelela, enilandila na manja aŵili. Izi zenipangisha kuzimvwa kuti n’ne wofunika m’gulu ya Mulungu. Zenicitisha soti kukhulupilila kuti Yehova enikhululukila noona kuti ningapitilizhye kum’tumikila mwacimwemwe.”—Onani kabokosi kakuti “ Zamungacite”

Satana apitilizhye kucitisha mavuto osiyanasiyana kuti akukangisheni kunkhala soti pa ushamwali wotang’a na Yehova. (Luka 4:13) Koma musafooke, nkhalani okonzeka kugonjesa mavuto aŵa mwa kucita zilizonse zamungakwanishe kuti mutang’ishe cikhulupililo canu.

Ponena za mbelele zake, Yehova olonjeza kuti: “Mbelele zamene zesoŵa nikazisakile, zomwazhyika nikazizhyoshe, yotyoka kwendo nikaimange kukwendo yamene iyo ndipo yolwala nikaitang’ishe.” (Ezek. 34:16) Yehova wayavya ŵanthu anyinji amene enze ecita macimo akulu-akulu kuti ankhale soti pa ushamwali wotang’a na yove. Tetyo, nkhalani osimikizhya kuti namwe akuyavyeni.