Nchito yolalikila peyepita pasogolo, akwasu na azilongosi enzofunikila mabuku anyinji. Olo kuti akwasu pa Beteli ya ku Brooklyn enzokwanisha kupanga magazini, ove enzodalila makampani ayakine kuti apange mabuku ya vikuto vokosa. Koma pavuli pake, kwa miyezi makampani aya yenzopanga lini mabuku yokwanila yoseŵenzesha pa nchito yolalikila. Cifukwa ca izi, mkwasu Rutherford ekonsha mkwasu Robert Martin wamene enzoyanganila nchito yopanga mabuku, ngati zingankhale zokwanishika kuti ayambe kupanga ŵeka mabuku yao.

Mkwasu Martin elaŵila kuti, “Iyi yenze lingalilo iweme ngako cifukwa yenzotanthauza kuti tenzofunikila kusegula fakitale yasu-yasu yopangilamo mabuku.” Akwasu ecita lendi malo ayakine m’mbali mwa mseu wa 18 Concord ku Brooklyn, ndipo egula mamashini onse amene enze ofunikila pa nchito iyi.

Ni ŵanthu lini onse amene ekondwela na lingalilo yakuti akwasu ayambe kupanga ŵeka mabuku yao. Pulezidenti wa kampani yamene yenzopanga mabuku ŵasu, eluta kuyoona fakitale yasu. Yove elaŵila kuti: “Muli na mamashini odula opangila mabuku, koma pakati panu paliye aliyense oziŵa moyaseŵenzeshela. Tetyo, pavuli tyala pa miyezi 6, mamashini yonse yaonongeke.”

Mkwasu Martin elaŵila kuti: “Zecikamba pulezidenti uyu zeoneka monga zenze zacendi. Koma tenzoziŵa kuti Yehova atiyavye, ndipo etiyavya cendi.” Zecilaŵila mkwasu Martin zenze zacendi. Pakaliyopita nthawi itali, fakitale yasu yeyamba kupanga mabuku 2,000 siku iliyonse.

Kuyangizhyila pa kupanga ŵeka mabuku ŵao, atumiki a Yehova eyamba kuseŵenzesha wailesi polalikila uthenga uweme. Pa Sondo mcingulo, pa February 26, 1922, mkwasu Rutherford elaŵila nkhani pa wailesi kwa nthawi yoyamba. Ekamba nkhani ya mutu wakuti: “Ŵanthu Mamiliyoni Anyinji  Amene Ali na Moyo Akafwe Lini” pa wailesi ya KOG ku Los Angeles, California, U.S.A.

Ŵanthu pafupifupi 25,000, emvwishila ku pulogilamu iyi. Ayakine mwa ŵanthu aŵa elemba makalata oonesha kuyamikila cifukwa ca pulogilamu iyi. Imozi mwa makalata, yefumila kwa Willard Ashford wamene enzonkhala ku Santa Ana, California. Yove eyamikila mkwasu Rutherford cifukwa ca nkhani yake “yosangalasa koma soti yocitisha cidwi.” Eyangizhyilapo kuti: “Pa ng’anda pasu penze ŵanthu atatu olwala. Tetyo, sembe tiliyokwanishe kuwela kuzomvwishila ku nkhani yanu olo kuti sembe mweikambila pafupi na pa ng’anda pasu.”

M’mawiki okonkhapo, nkhani zinyinji zeyamba kulaŵiliwa pa wailesi. Pofwika kosilizhyila kwa caka ca 1922, Nsanja ya Mulonda iyakine yelaŵila kuti “ŵanthu pafupifupi 300,000 elandila uthenga uweme kupitila pa wailesi.”

Poona kuti ŵanthu anyinji eonesha kuti eyamikila makonzedwe aŵa, Ophunzila Baibo eganiza zopanga wailesi yao-yao ku Staten Island pafupi na Beteli ya ku Brooklyn. M’vyaka vokonkhapo, Ophunzila Baibo eyamba kuseŵenzesha wailesi iyi ya WBBR, polalikila uthenga uweme m’madela osiyanasiyana.

Nsanja ya Mulonda ya June 15, 1922, yepeleka cilengezo cakuti kukaŵe msonkhano ku Cedar Point, Ohio, kuyambila pa September 5 mpaka 13, 1922. Ophunzila Baibo esangalala ngako pecifwika pa malo a msonkhano.

M’nkhani yake yoyamba, mkwasu Rutherford euzhya ŵanthu epezeka pa msonkhano kuti: “N’ne wosimikizhya kuti Asikulu . . . adalise msonkhano uno nopangisha kuti ucitile umboni mokwanila pacalo conse kupambana kale.” Ndipo okamba nkhani pa msonkhano uyu mowelezhyawelezhya elimbikisha akwasu na azilongosi kutolako mbali pa nchito yolalikila.

Pa Cisanu pa September 8, ŵanthu pafupifupi 8,000 eloŵa m’malo ocitila msonkhano ndipo enzoyembekezela mwacidwi kumvwishila ku nkhani ya mkwasu Rutherford. Ove enzoyembekezela kumvwa tanthauzo ya vilembo vakuti “ADV” vamene venze volembewa pa tumapepa twaciitano. Mosakaikila, anyinji peenzosakila  malo onkhala, eona cikwangwani copeteka camene cenze kusogolo kwa pulatifomu. Mkwasu Arthur Claus wamene epezekapo pa msonkhano uyu, ndipo efumila ku Tulsa, Oklahoma, U.S.A., epeza malo abwino onkhala kuti akokwanisha kumvwishila bwino, cifukwa pa nthawi iyi kwenzeve vokuzhyila mau.

Kuti pa msonkhano uyu pasankhale msokonezo, cheyamani epeleka cilengezo cakuti paliye munthu wati alolewe kuloŵa m’malo a msonkhano mkwasu Rutherford akayamba kukamba nkhani. Pa nthawi ya 9:30 m’mawa, mkwasu Rutherford eyamba kukamba nkhani yake mwa kukata mau a Yesu opezeka pa Mateyu 4:17, akuti: “Ufumu wakululu wasala patontho.” Pofotokoza mwamene ŵanthu enze kuzomvwila za uthenga wa Ufumu, yove elaŵila kuti: “Yesu elaŵila kuti m’nthawi ya kunkhalapo kwake, akakate nchito yowezhya. Pa nthawi iyi enze kuzosonkhanisha ŵanthu okhulupilika.”

Mkwasu Arthur wamene enze enkhala m’malo ocitilamo msonkhano elaŵila kuti: “Tenzomvwishila mau onse mosamala.” Koma mosayembekezeleka, mkwasu uyu elwala ndipo efuma panja mokwinyilila cifukwa enzoziŵa kuti alolewe lini soti kuloŵa mkati.

Pavuli pa nthawi itontho, emvwako bwino. Yove elaŵila kuti peenzowelela ku malo a msonkhano, ecimvwa ŵanthu otota m’manja mwacisangalalo. Izi zemucitisha kuti ankhale na cidwi ngako. Tetyo, eganiza zokwela pamtenje kuti amvwishile ku nkhani iyi yokata mtima. Pecifwika pafupi na windo, eyamba kumvwishila bwino nkhani yonse. Pa nthawi iyi mkwasu Claus enze na vyaka 23.

Koma ni mkwasu Arthur lini yeka enze ekwela palulu. Ayakine mwa ashamwali ŵake nao enze ekwela palulu. M’mozi mwa ashamwali ŵake aŵa enze mkwasu Frank Johnson. Yove eutukila mkwasu Arthur nomukonsha kuti: “Kansi uliko na kacipula katontho konola?”

 Mkwasu Arthur eyankha kuti: “Eee, nili nako.”

Mkwasu Frank elaŵila kuti: “Niwe yankho ya pemphelo yasu. Waciona ici? Ni cikwangwani ndipo ni comangilila ku misomali iyi. Umvwishile mosamala kuli Woweluza. a Akalaŵila kuti, ‘lengezani, lengezani,’ weo utende nthambo izi 4.”

Mkwasu Arthur ekata cipula cake m’manja ndipo yove pamozi na ayake eyembekezela mwacidwi kuti mkwasu Rutherford aŵapase cizindikilo cakuti atende nthambo. Pakaliyopita nthawi itali, nkhani ya mkwasu Rutherford yefwika pa cimake. Mwamphamvu yove elaŵila kuti: “Nkhalani okhulupilika nocitila umboni za Asikulu. Niatani nkhondo mpaka vipembezo vonse vawenye vionongewe. Lalikilani uthenga kulikonse. Calo cufunika kuziŵa kuti Yehova ni Mulungu ndipo Yesu Khristu ni Mfumu ya mafumu na Asikulu ŵa asikulu. Ino ni nthawi yofunika ngako m’mbili yonse ya ŵanthu. Mfumu yulamulila. Muli na udindo wouzhya ŵanthu onse za nkhani iyi. Tetyo, lengezani, lengezani, lengezani za Mfumu na Ufumu wake!”

Mkwasu Arthur elaŵila kuti yove na akwasu ayakine etenda nthambo ndipo cikwangwani cetambuluka bwino-bwino. Mokatizhyana na vilembo vakuti “ADV,” pa cikwangwani apa penze polemba kuti: “Lengezani Mfumu na Ufumu.”

Msonkhano wamene wecitikila ku Cedar Point weyavya akwasu kuika maganizo ŵao pa nchito yofunika ngako, yamene ni kulalikila za Ufumu wa Mulungu. Ndipo ŵala amene enze ofunishisha, etolako mbali pa nchito iyi. Kopotala muyakine (lomba oziŵika kuti mpainiya) wa ku Oklahoma, U.S.A., elemba kuti: “Tenzolalikila m’gao mwamene ŵanthu anyinji enzoseŵenza m’maini ya malasha, ndipo enze osauka.” Yove elaŵila kuti nthawi zinyinji ŵanthu aŵa akamvwa mau a m’magazini ya the Golden Age, “enzoponesha misozi.” Elaŵila soti kuti, “Yenze daliso kutonthoza ŵanthu aŵa.”

Ophunzila Baibo enzoziŵa kufunika kwa mau yecilaŵila Yesu yopezeka pa Luka 10:2, akuti: “Nchito yowezhya ni ikulu, koma anchito ni atontho.” Pofwika kosilizhyila kwa caka, ove enze osimikizhya kulengeza uthenga wa Ufumu kulikonse.