PA NKHONDO Yaciŵili ya Pacalo Conse, mkulu wa cipani ca Nazi euzhya a Mboni za Yehova kuti, “Ngati aliyense wa mweo akane kuchaya nkhondo na calo ca France olo England, monse mupaiwe.” Olo kuti masoja a Nazi enze pafupi, paliye aliyense wa Mboni za Yehova wamene evomela kuphwanya lamulo ya Yehova. Akwasu aŵa eonesha kutang’a mtima. Zecicita zeonesha zatukhulupilila seo Mboni za Yehova pa nkhani ya nkhondo. Tutolako lini mbali mu nkhondo za cino calo. Olo kuti tingayofyewe kuti tipaiwe, tupitilizhya kusatolako mbali m’mikangano ya calo cino.

1. ATUMIKI ONSE A MULUNGU ENZONKHALA M’CALO CIMOZI

M’nthawi zakuvuli, atumiki onse a Yehova enzonkhala m’calo cimozi, camene ni calo ca Isiraeli. Yehova enzoona Aisiraeli kuti ni “cuma cake capadela pakati pa ŵanthu onse.” (Eks. 19:5) Kuyangizhyila apo, yove eŵapasa malo yonkhalapo. Tetyo ngati Aisiraeli ochaya nkhondo na mitundu iyakine, enzoniata lini olo kupaya olambila ayao. a

Masiku ŵano, olambila acendi ofumila “m’calo ciliconse, fuko iliyonse, mtundu ulionse na cilaŵilo ciliconse.” (Chiv. 7:9) Tetyo ngati atumiki a Mulungu atolako mbali mu nkhondo, angayambe kuniatana olo kupayana na olambila ayao.

 2. YEHOVA ENZE ELAMULA AISIRAELI KUTI AKOCHAYA NKHONDO

M’nthawi zakuvuli, Yehova niye enzogamula nthawi na cifukwa cake Aisiraeli enzofunika kuluta ku nkhondo. Mwacisanzo, Mulungu elamula Aisiraeli kuchaya nkhondo pofuna kupeleka ciweluzo kwa Akanani amene enzolambila viŵanda, enzocita ciwelewele koma soti enzopeleka ŵana nsembe. Yehova elamula Aisiraeli kuti aononge ŵanthu amene enzocita vinthu viipa m’Calo Colonjezewa pofuna kuti Aisiraeli asatoleleko nkhalidwe yao. (Lev. 18:24, 25) Pavuli pakuti Aisiraeli ankhazikika m’Calo Colonjezewa, nthawi ziyakine Mulungu enzoŵalola kuchaya nkhondo na colinga cakuti aziteteze kuli adani ŵao. (2 Sam. 5:17-25) Olo n’tetyo, Yehova enzoŵalola lini Aisiraeli kuzipangila ŵeka cosankha cakuti alute ku nkhondo. Ngati aluta ku nkhondo paliye cilolezo ca Yehova, nthawi zinyinji enzogonjesewa.​—Num. 14:41-45; 2 Mbi. 35:20-24.

Masiku ŵano, Yehova olamula lini ŵanthu kuluta ku nkhondo. Ŵanthu ochaya nkhondo pofuna kukhutilisha zofuna zao, osati za Mulungu. Ocita izi pofuna kunkhala na malo akulu, ndalama zinyinji koma soti cifukwa ca zandale. Lomba nanga tyani za ŵala amene onena kuti ochaya nkhondo pofuna kuteteza cipembezo cao olo kupaya adani a Mulungu? Yehova akateteze atumiki ŵake noononga adani ŵake pa nkhondo ya Aramagedo. (Chiv. 16:14, 16) Pa nkhondo iyi, masoja a Mulungu akankhale tyala zolengewa zauzimu, osati atumiki ŵake a pacalo.​—Chiv. 19:11-15.

3. AISIRAELI ENZOPAYA LINI ŴALA AMENE ENZOONESHA CIKHULUPILILO MWA YEHOVA

M’nthawi zakuvuli, masoja Aciisiraeli enzoonesha cifundo kuli ŵanthu amene enzoonesha cikhulupililo mwa Mulungu. Ndipo enzopaya tyala ŵala amene Yehova enzoŵaona kuti ni oyenelela kupaiwa. Ganizilani visanzo viŵili ivi. Olo kuti Yehova elamula kuti mzinda wa Yeriko uonongewe, Aisiraeli aliyopaye Rahabi na a m’banja mwake cifukwa ca cikhulupililo cake. (Yos. 2:9-16; 6:16, 17) M’kuluta kwa nthawi, mzinda wonse wa  Gibeoni uliyoonongewe cifukwa Agibeoni eonesha kuti enzoyopa Mulungu.​—Yos. 9:3-9, 17-19.

Masiku ŵano, vyalo vamene vuchaya nkhondo vusiya lini ŵala amene oonesha cikhulupililo. Ndipo nthawi ziyakine ŵanthu osalakwa opaiwa pa nkhondo izi.

4. AISIRAELI ENZOFUNIKA KUKONKHA MALAMULO A MULUNGU OKHUZA MOCHAILA NKHONDO

M’nthawi zakuvuli, Yehova enzofuna kuti masoja Aciisiraeli akokonkha malamulo ŵake pa nkhani yochaya nkhondo. Mwacisanzo, nthawi ziyakine Mulungu enzoŵalamula ‘kunkhazikisha mtendele’ na adani ŵao. (Deut. 20:10) Kuyangizhyila apo, Yehova enzofuna kuti masoja Aciisiraeli akonkhala atuŵa mwamuŵili koma soti kuti akokonkha malamulo ŵake okhuza minkhalidwe iweme. (Deut. 23:9-14) Olo kuti masoja a m’vyalo viyakine enzolala mwacikakamizo anakazi a m’vyalo vaagonjesa pa nkhondo, Yehova enzolola lini Aisiraeli kucita izi. Yove enzoŵalola kulungula anakazi amene atolewa ukapolo pavuli pa mwezi umozi.​—Deut. 21:10-13.

Masiku ŵano, m’vyalo vinyinji oika malamulo okhuza mochaila nkhondo. Ocita izi pofuna kuteteza ŵanthu amene ni masoja lini. Comvwisha cisoni n’cakuti ŵanthu a m’vyalo ivi okonkha lini malamulo okhuza mochaila nkhondo.

5. MULUNGU ENZOYAVYA AISIRAELI POCHAYA NKHONDO

M’nthawi zakuvuli, Yehova enzoyavya Aisiraeli pa nkhondo. Ndipo kanyinji-kanyinji, enzocita zozizwisa pofuna kuŵayavya kuti apambane. Mwacisanzo, Yehova eyavya Aisiraeli kugonjesa mzinda wa Yeriko. Kansi ecita tyani zamene izi? Molingana na zeciŵalamula Yehova, Aisiraeli pecikuwa, mpanda wa mzinda wepona. Izi zecitisha kuti cisankhale covuta kuti ove agonjese mzinda uyu. (Yos. 6:20) Yehova eyavya soti Aisiraeli kupambana peenzochaya nkhondo na Aamori. Kansi ecita tyani zamene izi? Yove “eŵaponeshela matalala akulu-akulu kufumila kululu. Ndipo ŵanthu amene epaiwa na matalala enze anyinji kupambana epaiwa na cipula.”​—Yos. 10:6-11.

AKHRISTU ACENDI OYESAYESA KUNKHAZIKISHA MTENDELE NA ŴANTHU AYAKINE

Monga ni mwataonela, zucitika masiku ŵano n’zosiyana na zocitika za m’nthawi ya Aisiraeli. Olo n’tetyo, zocitika izi niye lini tyala vifukwa vutipangisha kusatolamo mbali mu nkhondo. Pali soti vifukwa viyakine. Mwacisanzo, Mulungu elosela kuti m’masiku osilizhya atumiki ŵake “akaphunzisiwe lini nkhondo.” Izi zuonesha kuti ofunika lini kutolamo mbali mu nkhondo za m’calo. (Yes. 2:2-4) Kuyangizhyila apo, Khristu elaŵila kuti ophunzila ŵake ali lini mbali ya calo. Tetyo, ofunika lini kutolamo mbali m’mikangano ya m’vyalo.​—Yoh. 15:19.

Khristu elimbikisha soti ophunzila ŵake kucita zinthu ziyakine. Yove eŵalangiza kuti enzofunika kupewa kusungila ayakine cakumkosi, ukali olo kutolamo mbali mu nkhondo. (Mat. 5:21, 22) Kuyangizhyila apo, euzhya soti ophunzila ŵake kuti enzofunika ‘kucilikiza mtendele’ nokonda adani ŵao.​—Mat. 5:9, 44.

Kansi tingacite tyani zamene izi? N’zoonekelatu kuti tufuna lini kutolako mbali mu nkhondo. Koma kansi pali ŵanthu ayakine mumpingo ŵatuona kuti ni adani ŵasu? Ngati n’tetyo, tiyeni tipitilizhye kucosa maganizo oteti mumtima mwasu.​—Yak. 4:1, 11.

M’malo motolamo mbali m’mikangano ya pacalo, tufunika kulimbikisha mtendele na cikondi pakati pasu. (Yoh. 13:34, 35) Tiyeni tipitilizhye kusatolamo mbali mu nkhondo za m’calo patuyembekezela kuti Yehova akasilizhye nkhondo zonse mpaka kale-kale.​—Sal. 46:9.