1. Kansi akwasu na azilongosi acikulile angaziikile colinga cotyani?

 PATUKULUKAZHYA, tingankhale na nkhaŵa kuti tikokwanisha lini kucita zinyinji potumikila Yehova monga ni mwetenzocitila petenze alumbwana. Olo kuti lomba tukwanisha lini kucita zetenzocita kale potumikila Yehova, tingaseŵenzeshe nzelu na maluso ŵasu polimbikisha acilumbwana kuti ayenelele kucitako mautumiki ayakine m’gulu ya Mulungu. Mkwasu muyakine wamene ni mkulu mumpingo ndipo ni wacikulile elaŵila kuti, “Penezindikila kuti nukwanisha lini kucita zinyinji cifukwa ca ukulukazi, nesangalala kuti penze kale akwasu acilumbwana amene enze oyenelela bwino kupitilizhya kucita mautumiki yenenzocita.”

2. Kansi tilaŵizhyane cinji m’nkhani ino?

² M’nkhani yapita, tephunzila mwamene acilumbwana angapindulile ngati onkhala pa ushamwali na acikulile. Koma m’nkhani ino, tione mwamene minkhalidwe monga kulicefya, kuyamikila na wanzi ingayavyile Akhristu acikulile kuseŵenzela pamozi na acilumbwana. Tione soti madaliso yonkhalapo ngati acikulile oyesayesa kuonesha minkhalidwe iyi.

3. Molingana na Afilipi 2:3, 4, kansi munthu wolicefya ofunika kucita cinji, ndipo izi zingamuyavye tyani?

³ Akhristu acikulile ofunika kunkhala olicefya kuti akwanishe kuyavya akwasu na azilongosi acilumbwana. Munthu wolicefya oona ayakine kunkhala omupambana. (Ŵelengani Afilipi 2:3, 4.) Acikulile amene oonesha nkhalidwe iyi, ozindikila kuti tingaseŵenzeshe njila zosiyanasiyana pokwanilisha utumiki olo mbali iyakine mumpingo. Tetyo, oyumilila lini maganizo ŵao olo kuyembekezela kuti aliyense akocita vinthu monga ni mweenzocitila  ove peenze acilumbwana. (Mla. 7:10) Ove angalimbikishe Akhristu acilumbwana mwa kuŵauzhya mweenzocitila mautumiki ayakine m’gulu ya Mulungu. Koma ofunika kuzindikila kuti “zocitika za pacalo zucinja,” ndipo angafunike kunkhala olicefya nolola kuti acilumbwana aŵaphunzise njila zalomba zocitilamo utumiki.​—1 Akor. 7:31.

4. Kansi oyanganila a madela otolela tyani cisanzo ca Alevi?

⁴ Akhristu acikulile amene ni olicefya, ovomelezhya mfundo yakuti angakwanishe lini kucita zinyinji monga ni mweenzocitila kale cifukwa ca ukulukazi. Mwacisanzo, oyanganila a madela akakwanisha vyaka 70, oleka kutumikila m’dela ndipo opasiwa utumiki uyakine. Koma kucita izi ni kupepu lini. Talaŵila tetyo cifukwa akwasu aŵa oukonda ngako utumiki wao ndipo onkhala ofunishisha kuti apitilizhye kulimbikisha mipingo. Koma ozindikila kuti pangankhale zofumapo ziweme ngako ngati akwasu acilumbwana angapitilizhye kucita utumiki uyu. Akwasu aŵa otolela cisanzo ca Alevi amene enzoleka kutumikila pa cihema akakwanisha vyaka 50. Alevi enzopitilizhya kutumikila Yehova mokhulupilika ndipo enzoyamikila nchito iliyonse yenzopasiwa akakwanisha vyaka 50. Ove enzocita zilizonse zangakwanishe pocita mautumiki ŵao noyavya Alevi acilumbwana. (Num. 8:25, 26) Olo kuti oyanganila a madela oleka kuyendela mipingo akakwanisha vyaka 70, opitilizhya kucita zilizonse zangakwanishe potumikila Yehova nolimbikisha akwasu na azilongosi a mumpingo mwao.

5. Kansi mwaphunzilapo cinji pa cisanzo ca mkwasu Dan na kalongosi Katie?

 ⁵ Ganizilani cisanzo ca mkwasu Dan wamene etumikila m’dela kwa vyaka 23. Pecikwanisha vyaka 70, yove na mkazi wake Katie, eŵatuma kuti akatumikile monga apainiya apadela. Ove elandila utumiki uyu na manja aŵili. Kansi epeza madaliso otyani? Mkwasu Dan elaŵila kuti lomba oona kuti ocita zinyinji potumikila Yehova kupambana mwenzocitila kale. Mwacisanzo, mkwasu uyu osamalila maudindo a mumpingo, oyavya akwasu kuti ayenelele kunkhala atumiki oyavya ndipo ophunzisa ayakine mwaangacitile ulaliki wa patuŵa na mwangalalikilile ku jele. Cisanzo ca mkwasu uyu, cutiphunzisa kuti acikulile angapitilizhye kulimbikisha ayakine mosasamala kanthu kuti ali mu utumiki wanthawi zonse olo yai. Angacite izi mwa kucita utumiki walomba mwakhama noika maganizo ŵao pa zinthu zangakwanishe kucita.

6. Fotokozani cisanzo cuonesha ubwino wa kulicefya.

⁶ Munthu wolicefya ozindikila kuti pali zinthu ziyakine zamene angakwanishe lini kucita. (Miy. 11:2) Izi zumuyavya kuti akonkhala wokhutila na zakucita ndipo onkhala wacimwemwe nthawi zonse. Munthu wolicefya tingamulinganizhye na kolo yamene ili pa ulwendo na mwana mtontho. Kuti mwana uyu asaŵeŵe, kolo yufunika lini kuyenda mokwanyula. N’cendi kuti izi zingacitishe kuti asafwike kamangu kwakuya, koma zingayavye kuti akafwikile pamozi. Molingana na izi, ngati acikulile ni olicefya, ocita zinthu modekha ndipo onkhala okonzeka kucinja kuti akwanishe kutumikila pamozi na acilumbwana. Izi zingayavye kuti onse apitilizhye kutumikila Yehova mokatizhyana.​—Afil. 4:5.

7. Kansi Barizilai eonesha tyani kuti enze wolicefya?

⁷ Ganizilani cisanzo ca Barizilai wamene otomolewa m’Baibo. Peenze na vyaka 80, mfumu Davide emusenga kuti akonkhala naye ku ng’anda yacifumu. Koma cifukwa cozindikila kuti enze wacikulile, Barizilai ekana mwai uyu ndipo esenga Davide kuti m’malo mwa yove, atole mwana wake, Chimamu. (2 Sam. 19:35-37) Molingana na Barizilai, Akhristu acikulile masiku ŵano ozindikila kuti angakwanishe lini kucita zinyinji cifukwa ca ukulukazi. Tetyo, molicefya olola kuti Akhristu acilumbwana apitilizhye kucita mautumiki yeenzocita.

8. Kansi mfumu Davide eonesha tyani mzimu wolicefya?

⁸ Naye mfumu Davide eonesha cisanzo cabwino pa nkhani yolicefya. Yove enzofunishisha ngako kuti amange kacisi wa Yehova. Koma Yehova pecimuuzhya kuti esankha Solomo kuti amumangile kacisi, Davide aliyokhumudwe. Ndipo epeleka zinthu zosiyanasiyana kuti ziyavye pa nchito iyi. (1 Mbi. 17:4; 22:5) Davide aliyoganize kuti yove niye enze woyenelela kumanga kacisi osati Solomo wamene enze “mtontho ndipo enzoziŵa lini zinyinji.” (1 Mbi. 29:1) M’malomwake, ezindikila kuti nchito yomanga kacisi sembe yekwanishika cifukwa ca thandizo ya Yehova, osati cifukwa ca nzelu olo msinkhu wa munthu esankhiwa kuti asogolele. Molingana na Davide, Akhristu acikulile opitilizhya kutumikila Yehova mwakhama olo pavuli pakuti aleka kucita mautumiki yaankhala ocita kwa nthawi itali. Ndipo ocilikiza Akhristu acilumbwana na mtima wonse poziŵa kuti Yehova aŵayavye kukwanilisha mautumiki ŵao monga ni mweciŵayavyila ove.

9. Kansi mkwasu Shigeo eonesha tyani mzimu wolicefya?

⁹ Tusangalala ngako kutumikila pamozi na akwasu na azilongosi acikulile amene ni olicefya. Ganizilani cisanzo ca mkwasu Shigeo. Mu 1976 apo n’kuti ali na vyaka 30, yove eyamba kutumikila m’Komiti ya Msambo, ndipo mu 2004 eikiwa kunkhala mgwilizanisi wa Komiti ya Msambo. Pavuli potumikila kwa vyaka, mkwasu uyu ezindikila kuti enzokwanisha lini kucita zinyinji cifukwa ca ukulukazi. Yove  eipemphelela nkhani iyi, ndipo eganizila za madaliso yangankhalepo ngati angasankhe mkwasu wacilumbwana kunkhala mgwilizanisi wa Komiti ya Msambo. Ndipo niye zecicita. Olo kuti lomba otumikila lini monga mgwilizanisi, yove osangalala ngako kutumikila pamozi na akwasu ayakine a m’Komiti ya Msambo. Monga ni mwataonela pa cisanzo ca Barizilai, Mfumu Davide, na mkwasu Shigeo, Akhristu acikulile amene ni olicefya oika maganizo ŵao pa zinthu zakucita bwino acilumbwana osati pa zofooka zao. Ndipo oona acilumbwana kunkhala daliso mumpingo osati monga ŵanthu amene ofuna kuŵalonda maudindo.​—Miy. 20:29.

10. Kansi acikulile oŵaona tyani Akhristu acilumbwana?

¹⁰ Acikulile oona kuti Akhristu acilumbwana ni mphaso yofumila kwa Yehova. Paakuona kuti mphamvu zayamba kucepa cifukwa ca ukulukazi, oyamikila ngako poona kuti acilumbwana ozipeleka kuti apitilizhye kucita mautumiki yeenzocita ove.

11. Molingana na Rute 4:13-16, kansi acikulile angapindule tyani ngati olandila thandizo kufumila kuli acilumbwana?

¹¹ Naomi wamene otomolewa m’Baibo, ni cisanzo ciweme ngako ca ŵanthu amene elandila thandizo kucokela kuli acilumbwana. Pavuli pakuti mwana wake wamwalila, yove elimbikisha Rute wamene enze mpongozi wake kuti awelele kwao. Koma Rute ekana, ndipo elutila pamozi na Naomi ku Betelehemu. Pavuli pake, Naomi esangalala ngako kuti Rute elutila naye pamozi ndipo eyamikila thandizo yake. (Rute 1:7, 8, 18) Ndipo izi zecitisha kuti onse aŵili alandile madaliso yamene enzoyayembekezela lini. (Ŵelengani Rute 4:13-16.) Akhristu acikulile amene ni olicefya, otolela cisanzo ca Naomi.

12. Kansi mtumwi Paulo eonesha tyani kuti enzoyamikila thandizo yofumila kuli ayakine?

¹² Mtumwi Paulo enzoyamikila ngako thandizo yenzolandila kufumila kuli Akhristu ayake.  Mwacisanzo, eyamikila Akhristu a ku Filipi cifukwa ca mphaso zecimutumizhyila. (Afil. 4:16) Yove eyamikila soti Timoteyo cifukwa comuyavya m’njila zosiyanasiyana. (Afil. 2:19-22) Ndipo eyamikila Mulungu cifukwa ca Akhristu amene emuyembekezela kwa nthawi itali kuti amulimbikishe peenzokuya ku Roma monga mkaidi. (Mac. 28:15) Paulo enze na mphamvu ndipo enzokwanisha kuyenda misenga itali-itali kuyolimbikisha mipingo. Koma enze wolicefya ndipo enzolandila thandizo yofumila kuli akwasu na azilongosi.

13. Kansi acikulile angaoneshe tyani kuti oyamikila thandizo yofumila kuli acilumbwana?

¹³ Kansi acikulile angaoneshe tyani kuti oyamikila thandizo yofumila kuli acilumbwana? Angacite izi m’njila zosiyanasiyana. Mwacisanzo, ngati wacilumbwana wazipeleka kuti aŵanyamuleko pa njinga, m’motoka, kuyoŵagulila vinthu olo kuŵayavya m’njila ziyakine, ofunika lini kukana. Acikulile, mukokumbukila kuti thandizo ya acilumbwana ni imozi mwa njila zakuseŵenzesha Yehova pofuna kukuoneshani kuti okukondani. Tetyo, mukoyamikila ciliconse cangakucitileni. Ndipo kucita izi kukuyavyeni kuti munkhale nao pa ushamwali wotang’a. Kuyangizhyila apo, mukoŵalimbikisha kuti ankhale pa ushamwali wotang’a na Yehova noŵasimikizhyila kuti musangalala ngako na zakucita mumpingo. Ndipo mukopeza nthawi yotandala nao, noŵauzhyako madaliso yamwapeza cifukwa cotumikila Yehova. Ngati mucita izi, ‘muonesha kuti muyamikila’ Yehova cifukwa cokupasani mwai wotumikila pamozi na acilumbwana mumpingo.​—Akol. 3:15; Yoh. 6:44; 1 Ates. 5:18.

14. Kansi mfumu Davide eonesha tyani mzimu wawanzi?

¹⁴ Mfumu Davide ni cisanzo cabwino ngako cuonesha kuti acikulile ofunika kunkhala awanzi. Yove epeleka cuma cake kuti acilikize cimango ca kacisi wa Yehova. (1 Mbi. 22:11-16; 29:3, 4) Ecita izi olo kuti enzoziŵa kuti kacisi ikasila kumangiwa ikoitiwa kuti kacisi wa Solomo. Kansi tuphunzilapo cinji? Olo kuti tingakwanishe lini kutolako mbali mu nchito za cimango cifukwa ca ukulukazi, tingacilikize mwa kutwala cuma casu kulingana na mwazilili zinthu pa umoyo wasu. Ndipo tingalimbikishe acilumbwana mwa kuŵaphunzisako maluso yatili nayo.

15. Kansi Paulo eonesha tyani mzimu wawanzi kuli Timoteyo?

¹⁵ Mtumwi Paulo ni cisanzo soti ciweme pa nkhani yoonesha wanzi. Yove enzotola Timoteyo pa maulwendo a umishonale osiyanasiyana. Ndipo enzomuphunzisa mwangalalikilile nophunzisa ŵanthu mokata mtima. (Mac. 16:1-3) Izi zeyavya Timoteyo kuti ankhale mphunzisi waluso ndipo enzokwanisha kulalikila ŵanthu a mitundu yosiyanasiyana. (1 Akor. 4:17) Cifukwa cakuti Paulo emuphunzisa maluso yosiyanasiyana, Timoteyo enzokwanisha kuphunzisa nolimbikisha Akhristu a m’mipingo yosiyanasiyana.

16. Ni cinji celimbikisha mkwasu Shigeo kuphunzisako ayakine?

¹⁶ Akhristu acikulile masiku ŵano onkhala lini na maganizo akuti angooneka kuti ni atyalatyala ngati aphunzisa acilumbwana kuti apitilizhye kucita mautumiki yeenzocita ove. Mwacisanzo, mkwasu Shigeo watatomola koyambilila enzoyesayesa kuphunzisa akwasu acilumbwana a m’Komiti ya Msambo mwangacitile mbali zosiyanasiyana za utumiki. Enzocita izi cifukwa enzofuna kuti nchito yolalikila ipitilizhye kuluta pasogolo m’calo mwakutumikila. Tetyo, pecileka kutumikila monga mgwilizanisi wa Komiti ya Msambo cifukwa ca ukulukazi, cenze cosavuta kupeza mkwasu wacilumbwana wamene epitilizhya kutumikila pa udindo uyu. Mkwasu Shigeo watumikila m’Komiti ya Msambo kwa vyaka vopitilila 45, ndipo opitilizhya kuseŵenzesha  maluso ŵake pophunzisa acilumbwana. Ni daliso ikulu ngako kutumikila pamozi na acikulile oteti m’gulu ya Mulungu.

17. Molingana na Luka 6:38, kansi acikulile angaoneshe tyani mzimu wawanzi?

¹⁷ Tuyamikila ngako kutumikila pamozi na mweo akwasu na azilongosi acikulile. Cisanzo canu cutionesha kuti tingapeze madaliso anyinji ngati tutumikila Yehova mokhulupilika. Tikakuonani, tunkhala osimikizhya kuti kuseŵenzesha mfundo za m’Baibo niye kungatiyavye kunkhala na umoyo watanthauzo koma soti wacimwemwe. Olo kuti muziŵa zinyinji, muyumilila lini kuti vinthu vonse vukocitika monga ni mwevenzocitikila kale. Koma munkhala okonzeka kucinja nophunzila njila zalomba. Nangu mweo acikulile amene mwephunzila cendi calombapano, ziŵani kuti pali zinyinji zamungacite kuti mulimbikishe acilumbwana. Mwacisanzo, mungaŵauzhyeko madaliso yamwapeza olo kuti mwephunzila cendi mwakulukazhya kale. Akhristu acilumbwana oyamikila ngako ngati muŵauzhyako zokumana nazo zanu na madaliso yamwapeza. Yehova akudaliseni ngako ngati nimwe “opasa” mwa kuuzhyako ayakine zinthu zamuziŵa.​—Ŵelengani Luka 6:38.

18. Kansi ponkhala madaliso otyani ngati acikulile na acilumbwana oseŵenzela pamozi mokatizhyana?

¹⁸ Ngati acikulile oyesayesa kunkhala pa ushamwali na Akhristu acilumbwana, onse opindula ngako. (Aro. 1:12) Acikulile ali na nzelu ndipo oziŵa zinyinji cifukwa atumikila Yehova kwa nthawi itali. Ndipo Baibo yulaŵila kuti mphaso ya acilumbwana ni mphamvu zao. Tetyo, ngati oseŵenzela pamozi mokatizhyana, otwala ulemelelo kuli Ausuwasu akululu ndipo mpingo upindula ngako.