1. Kansi Yehova tufunika kumuona tyani?

 YEHOVA ali na banja ikulu ngako. Ndipo banja yake yuyangizhyilapo Yesu Khristu wamene ni “woyamba kuvyalika wa cilengedwe conse,” na gulu ikulu ya angelo. (Akol. 1:15; Sal. 103:20) Peenze pacalo, Yesu eyavya ŵanthu kumvwishisha mfundo yakuti n’zokwanishika kuona Yehova kunkhala Atata wamene tingamudalile monga ni mwatucitila na ausuwasu aumunthu. Peenzolaŵila na ophunzila ŵake, Yesu ekamba kuti Yehova ni “Atata koma soti Ausuwanu.” (Yoh. 20:17) Tetyo, tikazipeleka kwa Yehova nobatizika, tusangalala kunkhala mbali ya banja yake yauzimu pamozi na akwasu na azilongosi.​—Mko. 10:29, 30.

2. Kansi tiphunzile cinji m’nkhani ino?

² Ŵanthu ayakine ovutika kuona Yehova monga ni Ausuwao wacikondi. Ndipo ayakine oziŵa lini zangacite kuti akoonesha cikondi kuli akwasu na azilongosi. M’nkhani ino, tione mwecitiyavyila Yesu kuti tikoona Yehova monga Ausuwasu wamene otikonda ndipo tingankhale naye pa ushamwali. Tione soti zatingacite kuti titolele cisanzo ca Yehova poonesha cikondi kuli akwasu na azilongosi.

3. Kansi pemphelo ya cisanzo yutiyavya tyani kuvwendela pafupi na Yehova?

³ Yehova ni Ausuwasu acikondi. Ndipo Yesu ofuna kuti tikoona Yehova monga Atata wacikondi wamene tingalaŵile naye nthawi iliyonse, osati monga munthu wokosesha malamulo. Yesu eonesha mfundo iyi, peenzophunzisa ophunzila ŵake mopemphelela. Yove eyamba pemphelo ya cisanzo na mau akuti, “Ausuwasu.” (Mat. 6:9) Yesu sembe etiuzhya kuti tikopemphela kwa Yehova poseŵenzesha mazina ŵake audindo monga “Wamphamvuzonse,” “Nyamalenga” olo “Mfumu yamuyaya.” Kucita izi, sembe kwenzeve vuto iliyonse cifukwa Baibo yuseŵenzesha mazina aŵa  pofotokoza za Yehova. (Gen. 49:25; Yes. 40:28; 1 Tim. 1:17) M’malomwake, Yesu etiphunzisa kuti tikoita Yehova kuti “Ausuwasu.”

4. Kansi tuziŵa tyani kuti Yehova ofuna kuti tinkhale naye pa ushamwali wotang’a?

⁴ Ayakine a seo tingovutika kuona Yehova kunkhala Ausuwasu acikondi cifukwa tekulila m’banja mwamene ausuwasu enzotionesha lini cikondi. Koma tulimbikishiwa ngako poziŵa mfundo yakuti Yehova oziŵa mwatumvwila na cifukwa cake tukumvwa teti. Yove ofuna kunkhala pa ushamwali wotang’a na seo. Niye cifukwa cake Baibo yutilimbikisha kuti: “Vwendelani pafupi na Mulungu, ndipo naye avwendele pafupi na mweo.” (Yak. 4:8) Yehova otikonda ngako. Yove ofuna kuti tikomuona kunkhala Ausuwasu amene ni acikondi ndipo otisamalila kupambana ausuwasu aumunthu.

5. Molingana na Luka 10:22, kansi Yesu angatiyavye tyani kunkhala pa ushamwali wotang’a na Yehova?

⁵ Yesu angatiyavye kunkhala pa ushamwali wotang’a na Yehova. Izi zili teti cifukwa yove omuziŵa bwino ngako Yehova, ndipo otolela ndendende minkhalidwe yake cakuti efwika pokamba kuti: “Waona neo, waona soti Atata.” (Yoh. 14:9) Monga mwana woyamba kuvyalika wa Yehova, Yesu otiphunzisa zatingacite kuti tikoonesha ulemu kuli Ausuwasu nopewa kucita vinthu vakuzonda. Izi zingatiyavye kuti tinkhale naye pa ushamwali. Ndipo peenze pacalo, Yesu etiyavya kumvwishisha kuti Yehova ni Mulungu wacikondi koma soti wacifundo. (Ŵelengani Luka 10:22.) Lomba, tiyeni tione mwamene Yehova eoneshela minkhalidwe iyi.

6. Fotokozani cisanzo cuonesha kuti Yehova enzomvwishila mapemphelo a Yesu.

⁶ Yehova omvwishila mapemphelo a ŵana ŵake. Ganizilani mwamene emvwishila mapemphelo a Mwana wake woyamba kuvyalika peenze pacalo. (Luka 5:16) Yove enzomvwishila pamene Yesu enzomusenga kuti amuyavye kupanga zosankha zofunika ngako monga peenzosankha atumwi 12. (Luka 6:12, 13) Yove enzomvwishila soti mapemphelo yecipeleka Yesu peenze na nkhaŵa ngako. Pekwesala patontho kuti Yudasi amupeleke, Yesu epemphela kwa Ausuwake kuti amuyavye kupilila mavuto yeenze kuzokumana nayo. Yehova emvwishila  mapemphelo a Yesu ndipo etuma mngelo kuti amulimbikishe.​—Luka 22:41-44.

7. Kansi mukumvwa tyani poziŵa kuti Yehova oyankha mapemphelo ya atumiki ŵake?

⁷ Monga ni mwecicitila kwa Yesu, Yehova omvwishila mapemphelo ŵa atumiki ŵake ndipo oyankha pa nthawi yoyenelela. (Sal. 116:1, 2) Kalongosi muyakine wa ku India eona umboni wakuti Yehova oyankha cendi mapemphelo ŵasu. Kalongosi uyu enzovutika na nkhaŵa yopitilila malile ndipo enzopemphela kwa Yehova kuti amuyavye kugonjesa vuto iyi. Yove elaŵila kuti: “Yehova eyankha mapemphelo ŵangu kupitila mu JW Broadcasting^® ya May 2019. Pulogilamu iyi, yenzokamba zatingacite kuti tigonjese vuto ya nkhaŵa. Ndipo yewela pa nthawi yake kwa neo.”

8. Kansi Yehova eonesha tyani kuti okonda Yesu?

⁸ Yehova otikonda notisamalila monga ni mweenzocitila kuli Yesu peenzocita utumiki wake pacalo. (Yoh. 5:20) Yove eyavya Yesu kupitilizhya kunkhala na cikhulupililo cotang’a, enzomulimbikisha akankhala na nkhaŵa ndipo enzomupasa zofunikila za pa umoyo. Kuyangizhyila apo, Yehova emusimikizhyila Mwana wake kuti enzomukonda ngako na kuti enzokondwela naye. (Mat. 3:16, 17) Yesu enzoziŵa kuti Ausuwake enze naye pafupi nthawi zonse. Izi zenzomucitisha kuti osati akozimvwa kuti ali yeka.​—Yoh. 8:16.

9. Kansi pali umboni wotyani uonesha kuti Yehova otikonda?

⁹ Molingana na Yesu, nase taona umboni woonesha kuti Yehova otikonda. Mwacisanzo, Yehova otiyavya kuti tinkhale naye pa ushamwali. Ndipo watipasa akwasu na azilongosi amene otiyavya tikakumana na mavuto. (Yoh. 6:44) Yehova otipasa soti cakulya cauzimu, ndipo izi zutiyavya kunkhala na cikhulupililo cotang’a. Kuyangizhyila apo, yove otipasa zofunikila za pa umoyo. (Mat. 6:31, 32) Tetyo, tikaganizila mwakutikondela Yehova, zutipangisha kuti tikomukonda ngako.

10. Kansi tuphunzilapo cinji tikaona mwamene Yehova ooneshela cikondi kuli akwasu na azilongosi?

¹⁰ Yehova oŵakonda ngako akwasu na azilongosi. Koma nthawi ziyakine cingotivuta kuti tikoonesha kuti tuŵakonda cifukwa cosiyana cinkhalidwe na kwetekulila. Kuyangizhyila apo, tonse tiliye ungwilo ndipo nthawi ziyakine tucita zinthu olo kulaŵila mau yamene yokhumudwisha ayakine. Olo n’tetyo, tingakwanishe kuonesha cikondi kuli akwasu na azilongosi ngati tutolela cisanzo ca Ausuwasu akululu. (Aef. 5:1, 2; 1 Yoh. 4:19) Lomba, tiyeni tione zatingaphunzile pa cisanzo ca Yehova.

11. Kansi Yesu etolela tyani cisanzo ca Yehova poonesha cifundo cikulu ku ŵanthu?

¹¹ Yehova oonesha “cifundo cikulu” ku ŵanthu onse. (Luka 1:78) Munthu wacifundo okhuzika ngati ŵanthu ayakine akumana na mavuto ndipo oyesayesa kupeza njila yaangaŵayavyilemo noŵatonthoza. Peenze pacalo, Yesu etolela cisanzo ca Yehova mwa kuonesha cifundo ku ŵanthu osiyanasiyana. (Yoh. 5:19) Mwacisanzo, peciona gulu ikulu ya ŵanthu amene enze ofunishisha kumvwishila kwa yove, Yesu “eŵamvwila cisoni cifukwa enze ovutika koma soti otaika monga ni mbelele ziliye mciŵeta.” (Mat. 9:36) Yesu enzopelela lini tyala m’kulaŵila kuti ocitila cifundo ŵanthu ovutika, koma enzocitapo kanthu kuti asilizhye mavuto yao. Mwacisanzo, yove enzopolesha olwala, ndipo enzosisimula ŵanthu amene ‘enzokata nchito yoŵeŵesha.’​—Mat. 11:28-30; 14:14.

12. Kansi tingaoneshe tyani cifundo kuli akwasu na azilongosi?

¹² Kuti tikwanishe kuonesha cifundo kuli akwasu na azilongosi, tufunika kuziŵa mavuto yakukumana nayo. Yelekezelani kuti mumpingo mwanu muli kalongosi wamene ali na vuto ya  thanzi. Olo kuti payakine kalongosi uyu angonkhalila lini kudandaula cifukwa ca vuto yake, yove angayamikile ngako ngati mungacitepo kanthu kuti mumuyavye. Mwacisanzo, mungamuyavye kupeza zofunikila za banja yake, kumupikilako cakulya olo kumupyelelako m’ng’anda. Nanga mungacitenji ngati mwazindikila kuti mkwasu muyakine emucosa nchito? Kulingana na mwazilili zinthu pa umoyo wanu, mungamupaseko ndalama zamene zingamuyavye kupeza zofunikila za banja yake pakuyembekeza kuti apeze nchito iyakine.

13-14. Kansi tingatolele tyani cisanzo ca Yehova pa nkhani yoonesha wanzi?

¹³ Yehova ni Mulungu wawanzi. (Mat. 5:45) Mwacisanzo, yove owalisha zuŵa pa munthu aliyense, kuyangizhyilapo na ŵala amene omutumikila lini. Ndipo tucita lini kumusenga kuti acite izi. Yehova oonesha soti kuti otikonda mwa kutipasa zofunikila za pa umoyo. Tumukonda ngako cifukwa ni wacifundo koma soti wawanzi. Nase tingaoneshe kuti tutolela cisanzo ca Yehova mwa kunkhala okonzeka kuyavya akwasu na azilongosi nthawi iliyonse. Ndipo tufunika lini kuyembekezela kuti acitotisenga.

¹⁴ Ni mwai ukulu ngako kutumikila pamozi na akwasu na azilongosi amene otolela cisanzo ca Yehova pa nkhani yoonesha wanzi. Mwacisanzo, mu 2013, ku Philippines kwecitika cimphepo coitiwa kuti Super Typhoon Haiyan camene ceononga vinthu vinyinji. Ndipo mang’anda na katundu unyinji wa akwasu na azilongosi weonongeka. Koma kamangu-kamangu, akwasu na azilongosi pacalo conse ecitapo kanthu kuti aŵayavye mwa kupeleka ndalama olo kuzipeleka kuti amange soti mang’anda ŵao. Izi zecitisha kuti m’caka tyala cimozi, mang’anda pafupifupi 750 yakonzewe olo kumangiwa soti. Ndipo pa nthawi ya mlili wa COVID-19, Mboni za Yehova pacalo conse zezipeleka kuti ziyavye akwasu na azilongosi amene ekhuziwa na matenda aya. Ngati tucitapo kanthu mwamsanga kuti tiyavye Akhristu ayasu, tuonesha kuti tuŵakonda.

15-16. Molingana na Luka 6:36, kansi tingaoneshe tyani kuti tutolela cisanzo ca Yehova ngati ayakine atilakwila?

¹⁵ Yehova ni Mulungu wacifundo koma soti wokhululukila. (Ŵelengani Luka 6:36.) Ndipo siku iliyonse, Ausuwasu akululu otikhululukila macimo yatucita. (Sal. 103:10-14) Ophunzila  a Yesu enzeve ungwilo ndipo nthawi zinyinji enzolakwisa zinthu. Koma Yesu enzoŵamvwila cifundo noŵakhululukila. Yove efwika na popeleka moyo wake kuti macimo ŵasu akhululukiwe. (1 Yoh. 2:1, 2) Kansi izi zufunika lini kutipangisha kutang’isha ushamwali wasu na Yehova koma soti Yesu?

¹⁶ Cikondi casu pa akwasu na azilongosi cukulilako ngati ‘tukhululukilana na mtima wonse.’ (Aef. 4:32) Koma cifukwa cosoŵa ungwilo, nthawi ziyakine tingovutika kukhululuka ŵanthu ayakine akatilakwila. Tetyo, tufunika kucita khama kuti tikokwanisha kucita izi. Kalongosi muyakine eyavyiwa ngako peciŵelenga nkhani yakuti “Muzikhululukilana Ndi Mtima Wonse” mu Nsanja ya Olonda ya November 15, 2012 pa mapeji 26-30. Yove elaŵila kuti: “Nkhani iyi yeniyavya kuziŵa madaliso yaningapeze ngati nukhululukila ŵanthu ayakine. Yeniyavya soti kuzindikila mfundo yakuti kukhululukila ayakine kutanthauza lini kuti wesangalala na vinthu viipa vecikucitila olo kukulaŵilila. Koma kutanthauza kuleka kuŵasungila cakumkosi, ndipo izi zutiyavya kunkhala na mtendele wa m’maganizo.” Ngati tukhululukila akwasu na azilongosi na mtima wonse, tuonesha kuti tuŵakonda. Ndipo kupambana zonse, tutolela cisanzo ca Ausuwasu akululu, Yehova.

17. Molingana na Mateyu 5:16, kansi tingacitenji kuti tiyavye ŵanthu kuti ayambe kutumikila Yehova?

¹⁷ Ni mwai ukulu ngako kunkhala m’gulu ya Yehova ya pacalo conse. Ndipo tufuna kuyavya ŵanthu anyinji kuti awele m’gulu iyi kuti nao ayambe kulambila Yehova. Tetyo, tufunika kupewa kucita ciliconse camene cingaipishe zina ya Yehova olo gulu yake. M’malomwake, tufunika kucita zilizonse zatingakwanishe kuti tikoonesha minkhalidwe iweme. Izi zingacitishe kuti ayakine aphunzile cendi noyamba kutumikila Yehova.​—Ŵelengani Mateyu 5:16.

18. N’cinji cingatiyavye kulalikila motang’a mtima?

¹⁸ Nthawi ziyakine, ŵanthu ayakine angotisusha olo kutinzunza cifukwa ca cikhulupililo casu. Nanga tingacitenji ngati tucita wowa kuuzhyako ayakine zinthu zatukhulupilila? Tufunika kudalila Yehova na Mwana wake kuti atiyavye. Yesu euzhya ophunzila ŵake kuti  enzofunika lini kucita nkhaŵa kuti akalaŵilenji. Yove eŵauzhya kuti, “Mukapasiwe nthawi yamene iyo zati mukalaŵile, cifukwa mukankhale lini mweka polaŵila, koma mzimu wa Ausuwanu ukalaŵile kupitila mwa mweo.”​—Mat. 10:19, 20.

19. Fotokozani cisanzo ca mkwasu wamene elalikila motang’a mtima.

¹⁹ Ganizilani cisanzo ca mkwasu Robert wa ku South Africa. Peciyamba tyala kuphunzila Baibo, mkwasu uyu ekumana na ciyeso. Boma yelamula kuti aloŵe usoja, koma yove ekana. Izi zecitisha kuti akaonekele pamenso pa khoti. Motang’a mtima, mkwasu uyu efotokozela oweluza a m’khoti kuti ekana kuloŵa usoja cifukwa cokonda akwake. Mwaukali, woweluza emukonsha kuti, “Kansi akwako ni ŵani?” Mkwasu Robert enzoyembekezela lini kuti angamukonshe konsho iyi. Koma mwamsanga ekumbukila lemba ya siku yamene iyo. Lemba iyi yenze Mateyu 12:50 yamene yulaŵila kuti: “Aliyense wamene ocita cifunilo ca Atata akululu niye mkwangu, mlongosi wangu na amama.” Olo kuti pa nthawi iyi n’kuti mkwasu Robert wangoyamba calombapano kuphunzila Baibo, mzimu wa Yehova wemuyavya kuyankha konsho iyi na makonsho ayakine yamene enzoyayembekezela lini. Yehova esangalala ngako na zecicita mkwasu Robert. Ndipo osangalala soti ngako ngati tumudalila nolalikila motang’a mtima olo pa nthawi zovuta.

20. Kansi tufunika kunkhala osimikizhya za cinji? (Yohane 17:11, 15)

²⁰ Tiyeni tipitilizhye kuyamikila mwai wonkhala m’gulu ya Yehova. Tili na Atata koma soti akwasu na azilongosi amene otikonda ngako. Satana na ŵanthu amene ali ku mbali yake, ofuna kuti tikokaikila kuti Yehova otikonda. Ofuna soti kusokoneza mgwilizano watili nao pakati pasu. Koma Yesu etipemphelela kuti Ausuwake akotiyanganila na kuti atiyavye kupitilizhya kunkhala okatizhyana. (Ŵelengani Yohane 17:11, 15.) Ndipo Yehova oyankha pemphelo iyi. Tetyo, molingana na Yesu, tiyeni tinkhale osimikizhya kuti Yehova otikonda noticilikiza. Ndipo tiyeni tinkhale soti osimikizhya kukonda akwasu na azilongosi.