1. Kansi tukumvwa tyani ngati munthu watukonda wacosewa mumpingo?

 CUTIKHUMUDWISHA ngako ngati wabanja wasu wacosewa mumpingo. Kalongosi Hilda * elaŵila kuti, “Mulume wangu pecimwalila, cenze covuta kupilila cifukwa tenkhala m’cikwati kwa vyaka 41. Koma mwana wangu pecileka kutumikila Yehova, nosiya mkazi wake na ŵana, cenivuta ngako kuti nipilile. Iyi yenze vuto ikulu ngako kupambana mavuto yonse yenekumanapo nayo.”

2-3. Molingana na Salimo 78:40, 41, kansi Yehova akumvwa tyani ngati mtumiki wake waleka kum’tumikila?

² Yehova ekhumudwa ngako pamene angelo ayakine em’pandukila. (Yuda 6) Enzokumvwa soti caipa pamene Aisiraeli enzom’pandukila mowelezhyawelezhya. (Ŵelengani Salimo 78:40, 41.) Izi zutisimikizhyila kuti Yehova okhuziwa ngako ngati munthu watukonda waleka kum’tumikila. Yove omvwishisha cisoni catunkhala naco ndipo otilimbikisha noticilikiza.

³ M’nkhani ino, tiphunzile zatufunika kucita kuti Yehova atiyavye kulimbana na nkhaŵa ngati munthu watukonda wacosewa mumpingo. Tiphunzile soti zatingacite kuti tiyavye Akhristu amene wabanja wao ecosewa mumpingo. Koma coyamba, tiyeni tilaŵizhyane zatufunika kupewa.

4. Kansi makolo akumvwa tyani ngati mwana wao waleka kutumikila Yehova?

⁴ Ngati mwana wacosewa mumpingo, makolo anyinji okonda kuziimba mlandu kuti aliyocite zinyinji kuti amuyavye kupanga cendi kunkhala cake-cake. Mwacisanzo, pavuli pakuti mwana wake wacosewa, mkwasu Luke elaŵila kuti, “Nenzoziimba mlandu cifukwa nenzoona kuti nekangiwa kukwanilisha udindo wangu monga kolo. Izi zenzonivutisha maganizo cakuti nenzolila nthawi zinyinji, ndipo tulo nenzotuona lini.” Kalongosi Elizabeth naye ekumana  na vuto imozimozi. Yove elaŵila kuti: “Neona kuti niliyocite zinyinji kuti niphunzise mwana wangu kukonda Yehova.”

5. Ndaŵa yanji tufunika lini kuziimba mlandu ngati wabanja wasu waleka kutumikila Yehova?

⁵ Tikokumbukila kuti Yehova epasa munthu aliyense ufulu wosankha. Izi zutanthauza kuti aliyense ali na ufulu wosankha kumutumikila olo yai. Ŵana ayakine oonesha cisanzo ciweme ngako. Olo kuti ekulila m’banja mwamene makolo ŵao enzokonda lini zinthu zauzimu, ekwanisha kuphunzila cendi ndipo opitilizhya kutumikila Yehova mokhulupilika. Koma n’zomvwisha cisoni kuti ŵana ayakine oleka kutumikila Yehova olo kuti ekulila m’banja mwamene makolo ŵao ecita zilizonse zangakwanishe kuti aŵayavye kutumikila Mulungu. Izi zuonesha kuti mosasamala kanthu za m’banja mwetekulila, tufunika kupanga cosankha pa seo seka, kaya kutumikila Yehova olo yai. (Yos. 24:15) Tetyo, makolo mukopewa kuziimba mlandu ngati mwana wanu waleka kutumikila Yehova.

6. Kansi ŵana okhuziwa tyani ngati kolo yaleka kutumikila Yehova?

⁶ N’zomvwisha cisoni kuti makolo ayakine oleka kutumikila Yehova nosiya banja yao. (Sal. 27:10) Ngati zoteti zacitika, ŵana okhumudwa ngako cifukwa oyembekezela kuti makolo ŵao akoŵasamalila noŵaonesha cisanzo ciweme. Kalongosi Esther wamene ausuwake ecosewa mumpingo elaŵila kuti, “Nthawi zinyinji, nenzolila nikaganizila kuti atata esankha kuleka kutumikila Yehova. Nuŵakonda ngako atata. Tetyo, pecicosewa mumpingo, nenzodela nkhaŵa za umoyo wao wauzimu. Ndipo izi zenzonivutisha maganizo.”

7. Kansi Yehova oŵaona tyani ŵana amene makolo ŵao eleka kum’tumikila?

⁷ Ŵanamwe, ziŵani kuti nase cutiŵaŵa ngako ngati m’mozi wa makolo ŵanu waleka kutumikila Yehova. Tufuna kukusimikizhyilani kuti Yehova oziŵa mwamumvwila. Yove, kuyangizhyilapo akwasu na azilongosi, okukondani ngako ndipo osangalala kuti mupitilizhya kum’tumikila mokhulupilika. Ndipo mukokumbukila kuti ni mweo lini mwecitisha kuti makolo ŵanu aleke kutumikila Yehova. Monga ni mwataonela, Yehova epasa munthu aliyense ufulu wosankha kum’tumikila olo yai. Tetyo, Mkhristu aliyense wamene ezipeleka kwa Yehova nobatizika, “ofunika kunyamula katundu wake.”​—Aga. 6:5.

8. Kansi tufunika kucitanji patuyembekezela kuti wokondeka wasu awelele mumpingo? (Onani soti kabokosi kakuti “ Welelani kwa Yehova.”)

⁸ Ngati munthu watukonda waleka kutumikila Yehova, tunkhala na ciyembekezo cakuti siku iyakine akawelele mumpingo. Koma patuyembekezela nthawi iyi, tufunika kucita zilizonse zatingakwanishe kuti titang’ishe cikhulupililo casu. Ngati tucita izi, tuonesha cisanzo cabwino kuli abanja ŵasu kuyangizhyilapo na munthu wamene ecosewa. Kucita izi kungatiyavye soti kupeza mphamvu kuti tikwanishe kupilila. Lomba, tiyeni tilaŵizhyane zatingacite kuti tipitilizhye kunkhala na cikhulupililo cotang’a.

9. Kansi mungacitenji kuti mupitilizhye kunkhala na cikhulupililo cotang’a? (Onani soti kabokosi kakuti “ Malemba Yamene Yangakulimbikisheni Ngati Wokondeka Wanu Waleka Kutumikila Yehova.”)

⁹ Ngati munthu wamukonda waleka kutumikila Yehova, mufunika kucita zilizonse zamungakwanishe kuti mutang’ishe cikhulupililo canu na ca  abanja ŵanu. Kansi mungacite tyani zamene izi? Mukoŵelenga Baibo, kusinkhasinkha, nopezeka pa misonkhano nthawi zonse. Mukoyesayesa kucita izi, cifukwa ni ziyakine mwa njila zangaseŵenzeshe Yehova pokulimbikishani. Kalongosi Joanna wamene ausuwake koma soti mkulu wake eleka kutumikila Yehova, elaŵila kuti: “Nutonthozewa ngako nikaŵelenga nkhani za ŵanthu otomolewa m’Baibo monga Abigayeli, Esitere, Yobu, Yosefe, na Yesu. Visanzo vao vunilimbikisha noniyavya kuti nikoona zinthu m’njila yoyenelela. Nulimbikishiwa soti ngako nikamvwishila ku nyimbo za m’gulu iyakine.”

10. Kansi Salimo 32:6-8 ingatiyavye tyani kuti tipilile ngati tili na nkhaŵa?

¹⁰ Mukomuuzhya Yehova nkhaŵa zanu zonse. Ndipo mukomusenga kuti akuyavyeni kuona zinthu m’njila yoyenelela na kuti ‘akupaseni nzelu nokulangizhyani njila yakuti muyendemo.’ (Ŵelengani Salimo 32:6-8.) N’cendi kuti nthawi ziyakine cingokuvutani kuuzhya Yehova mwamumvwila. Koma ziŵani kuti okumvwishishani ndipo oziŵa mavuto yamupitamo. Yove okukondani ngako ndipo ofuna kuti mupitilizhye kumutulila nkhaŵa zanu zonse.​—Eks. 34:6; Sal. 62:7, 8.

11. Molingana na Aheberi 12:11, ndaŵa yanji tulaŵila kuti kucosa munthu mumpingo ni makonzedwe acikondi a Yehova? (Onani soti kabokosi kakuti “ Kucosa Munthu Mumpingo ni Makonzedwe Acikondi a Yehova.”)

¹¹ Ngati wokondeka wanu wacosewa mumpingo, mukocilikiza cigamulo ca akulu. Kucosa munthu wamene ecita cimo ikulu, ni makonzedwe acikondi a Yehova, ndipo kuteteza mbili ya mpingo noyavya munthu ecosewa kuti aongolele nkhalidwe yake. (Ŵelengani Aheberi 12:11.) Ngati munthu muyakine wacosewa mumpingo, ofalisa ayakine okonda kuimba mlandu akulu kuti aliyosamalile bwino nkhani yake. Koma ŵanthu olaŵila teti oiziŵa lini bwino nkhani yonse ndipo kanyinji-kanyinji okamba lini vinthu viipa vecicita wocosewa. Tetyo, tufunika kunkhala na cidalilo cakuti akulu amene enze m’komiti ya ciweluzo,  eseŵenzesha mfundo za m’Baibo posamalila nkhani iyi. Ndipo eiweluza mokatizhyana na cifunilo ca Yehova.​—2 Mbi. 19:6.

12. Kansi ayakine epindula tyani cifukwa cocilikiza makonzedwe a Yehova ocosa munthu mumpingo?

¹² Kucilikiza cigamulo ca akulu ngati munthu watukonda wacosewa mumpingo, kungamuyavye kuti awelele kamangu m’gulu ya Yehova. Kalongosi Elizabeth watatomola koyambilila elaŵila kuti, “Mwana wasu pecicosewa mumpingo, cenze lini cipepu kuti tileke kuyanjana naye. Koma peciwezhyeleshewa, etiuzhya kuti akulu enze ecita bwino kum’cosa mumpingo ndipo ephunzilapo kanthu. Izi zenicitisha kusimikizhyila mfundo yakuti kucosa munthu mumpingo ni makonzedwe acikondi ofumila kwa Yehova.” Mkwasu Mark wamene ni mulume wa kalongosi uyu elaŵila kuti, “Pavuli pa nthawi itali kufumila pamene mwana wasu ecosewa mumpingo, eniuzhya kuti ofuna kuwelela mumpingo cifukwa tenzoyanjana lini naye. N’ne wosangalala ngako cifukwa Yehova etiyavya kukonkha malangizo ŵake.”

13. Kansi mufunika kucitanji mukankhala na nkhaŵa?

¹³ Mukankhala na nkhaŵa, mukouzhyako Akhristu acikulile mwauzimu amene angakulimbikisheni kuti mupitilizhye kutumikila Yehova mokhulupilika. (Miy. 12:25; 17:17) Kalongosi Joanna watomolewa koyambilila elaŵila kuti, “Nthawi zinyinji, nenzozimvwa kuti nili neka-neka. Koma kuuzhyako Akhristu ayakine mwenenzomvwila kweniyavya kuti nikwanishe kugonjesa maganizo aŵa.” Nanga mungacitenji ngati ŵanthu ayakine mumpingo okuuzhyani zinthu zofookesha?

14. Ndaŵa yanji tufunika ‘kupitilizhya kulolelana nokhululukilana na mtima wonse’?

¹⁴ Ngati wabanja wanu wacosewa mumpingo, mukonkhala woleza mtima cifukwa ni ofalisa lini onse amene angakuuzhyeni mau olimbikisha. (Yak. 3:2) Izi zili teti cifukwa tonse tiliye ungwilo. Tetyo, n’zosadabwisa kuti mosazindikila ayakine angalaŵile mau yamene yangatikhumudwishe. Ngati zoteti zakucitikilani, mukokumbukila mau a mtumwi Paulo akuti, “Pitilizhyani kulolelana na kukhululukilana na mtima wonse, olo kuti muyakine ali na cifukwa codandaulila pa muyake.” (Akol. 3:13) Kalongosi muyakine wamene wabanja wake enze ecosewa mumpingo, elaŵila kuti: “Yehova eniyavya kukhululukila akwasu na azilongosi amene enzofuna kunilimbikisha, koma mau ŵao enzonifookesha.” Kansi ofalisa mumpingo angacitenji kuti alimbikishe Akhristu amene wabanja wao ecosewa?

15. Kansi tingacitenji kuti tilimbikishe Akhristu amene wabanja wao ecosewa mumpingo?

¹⁵ Mukoonesha cifundo koma soti mzimu waubwenzi kuli Akhristu amene wabanja wao ecosewa mumpingo. Kalongosi Miriam ecita nkhaŵa kuluta ku misonkhano pavuli pakuti mlongosi wake wacosewa mumpingo. Yove elaŵila kuti, “Nenze na nkhaŵa poganiza kuti payakine ŵanthu akaniuzhye mau ofookesha. Koma peneluta, nelimbikishiwa ngako kuona kuti akwasu na azilongosi ekhuzika na zecitika ndipo aliyoniuzhye mau alionse ofookesha. Nuŵayamikila  ngako cifukwa mzimu waubwenzi wecinionesha, weniyavya kuti nikwanishe kupilila.” Kalongosi muyakine elaŵila kuti, “Mwana wasu pecicosewa mumpingo, akwasu na azilongosi ewela kuzotitonthoza. Ayakine etiuzhya kuti ekhuzika ngako cakuti enzoziŵa lini zangakambe kuti atilimbikishe. Ayakine efwika mpaka na polila potionesha cisoni ceenze naco. Ndipo akwasu na azilongosi ayakine etilembela makalata acilimbikiso. Zecicita zenilimbikisha ngako soti.”

16. Kansi ofalisa angacitenji kuti alimbikishe Akhristu amene wabanja wao ecosewa mumpingo?

¹⁶ Ngati munthu muyakine wacosewa mumpingo, tolelamponi mwai woonesha cikondi kuli abanja ŵake amene akalutumikila Yehova. Talaŵila teti cifukwa ni pa nthawi yamene iyi pamene ofunikila ngako cilimbikiso kupambana kale. (Aheb. 10:24, 25) Koma nthawi ziyakine, Akhristu amene wabanja wao ecosewa ozindikila kuti ayakine mumpingo oleka kuyanjana nao olo kuŵalaŵizhya monga kuti nao ni ocosewa. Tufunika kupewa kucita izi cifukwa zingaŵafokeshe. M’malomwake, tikoyesayesa kuyamikila acilumbwana amene makolo ŵao eleka kutumikila Yehova noŵalimbikisha kuti asafooke. Kalongosi Maria wamene mulume wake ecosewa mumpingo nocoka pa ng’anda elaŵila kuti, “Ayangu ayakine enzowela kuzotandala nane ku ng’anda. Ndipo enzoniyavya kupika vakulya nocita phunzilo ya Baibo na ŵana ŵangu. Akwasu na azilongosi aŵa enzomvwishisha mavuto yenenzopitamo cakuti ayakine enzofwika mpaka na polila. Ŵanthu ayakine peenzonilaŵilila nkhani zawenye, ashamwali aŵa enzoniteteza. Cikondi cecinionesha, cenilimbikisha kuti nisaleke kutumikila Yehova.”​—Aro. 12:13, 15.

17. Kansi akulu angacitenji kuti atonthoze ŵala amene wabanja wao ecosewa mumpingo?

¹⁷ Akulu, mukoyesayesa kuseŵenzesha mpata uliwonse kuti mulimbikishe ofalisa amene wabanja wao ecosewa mumpingo. Yehova okudalilani ngako ndipo ekupasani udindo wakuti mukotonthoza akwasu na azilongosi amene akumana na vuto yoteti. (1 Ates. 5:14) Tetyo, mukopeza nthawi yolaŵila nao misonkhano ikaliyoyamba olo pavuli pake. Mukopatula nthawi yakuyoŵatandalila ku mang’anda kwao, kupemphela nao, kuluta nao mu utumiki noŵaitako kuti akapezekepo pa kulambila kwa pa banja yanu. Kuyangizhyila apo, mukomvwishila mosamala  ngati okuuzhyani mavuto yakupitamo, ndipo mukoŵaonesha cifundo na cikondi.​—1 Ates. 2:7, 8.

18. Molingana na 2 Petulo 3:9, kansi Mulungu ofuna kuti ŵala onse amene eleka kum’tumikila acitenji?

¹⁸ Yehova “ofuna lini kuti munthu aliyense akaonongewe, koma ofuna kuti ŵanthu onse alape.” (Ŵelengani 2 Petulo 3:9.) Olo kuti munthu angacite cimo ikulu, Yehova opitilizhya kuona kuti moyo wake ni wamtengo wapatali. Tikokumbukila kuti Yehova epeleka Mwana wake wokondeka kuti afwile ŵanthu onse, kuyangizhyilapo na ŵala amene ecita macimo akulu-akulu. Tetyo, yove ofunishisha kuti ŵala amene ecosewa mumpingo awelele soti m’gulu yake monga ni mwecicitila mwana woloŵelela wa m’fanizo ya Yesu. (Luka 15:11-32) N’zolimbikisha kuti anyinji amene enze ecosewa mumpingo ewelela soti. Ndipo akwasu na azilongosi eŵalandila na manja aŵili. Kalongosi Elizabeth watatomola koyambilila, ekondwela ngako mwana wake peciwelela mumpingo. Yove elaŵila kuti, “N’ne woyamikila ngako cifukwa akwasu na azilongosi etilimbikisha kuti tisataye mtima.”

19. Ndaŵa yanji tufunika kupitilizhya kudalila Yehova?

¹⁹ Ngati wokondeka wasu wacosewa mumpingo, tingakwanishe kupitilizhya kutumikila Yehova mokhulupilika. Nthawi zonse, yove otipasa malangizo yamene yotipindulisha. Ni Mulungu wacifundo koma soti wawanzi ndipo okonda ngako ŵanthu onse amene omutumikila mokhulupilika. Tetyo, nise osimikizhya kuti Yehova angakangiwe lini kutilimbikisha pa nthawi yovuta. (Aheb. 13:5, 6) Mkwasu Mark watatomola koyambilila elaŵila kuti, “Yehova aliyotisiye ndipo opitilizhya kutitonthoza notilimbikisha pa nthawi ya mavuto.” Tetyo, musataye mtima, Yehova apitilizhye kukupasani “mphamvu yopambana yacibadwa.” (2 Akor. 4:7) Kulaŵila cendi, tingakwanishe kunkhala okhulupilika ngati wabanja wasu waleka kutumikila Yehova.