NKHANI YOPHUNZILA 40
‘Kuyavya Ŵanthu Anyinji Kunkhala Olungama’
“Amene oyavya ŵanthu anyinji kunkhala olungama, akawale monga ni nyenyezi mpaka kale-kale.”—DAN. 12:3.
NYIMBO 151 Akaŵaite
ZATI TIPHUNZILE a
1. Ni zinthu zosangalasa zotyani zatuyembekezela mu Ulamulilo wa Vyaka 1,000?
SIKU yati akayambe kuukishiwa ŵanthu akufwa pano pacalo, ikankhale yosangalasa ngako. Ŵanthu onse amene etaikiliwa okondeka ŵao mu imfwa ankhala oyembekezela mwacidwi kuyoonana nao soti. Naye Yehova oyembekezela mwacidwi kuŵaukisha. (Yobu 14:15) Ganizilani tyala mwati akasangalalile ŵanthu pacalo kuona okondeka ŵao oukishiwa. Monga ni mwetephunzilila m’nkhani yapita, “olungama” amene mazina ŵao elembewa m’buku ya moyo, “akauke kuti alandile moyo.” (Mac. 24:15; Yoh. 5:29) Ndipo payakine anyinji mwa okondeka ŵasu akankhale pa gulu ya ŵanthu ati akaukishiwe nthawi itontho pavuli pa nkhondo ya Aramagedo. b Kuyangizhyila apo, ŵanthu osalungama, monga ŵala amene enzeve mwai woziŵa Yehova olo kumutumikila mokhulupilika peenze akaliyokufwa, “akauke kuti aweluziwe.”
2-3. (a) Molingana na Yesaya 11:9, 10, kansi ni nchito yofunika ngako yotyani yati ikacitike yamene ikaliyocitikapo m’mbili yonse ya ŵanthu? (b) Kansi tilaŵizhyane cinji m’nkhani ino?
2 Ŵanthu onse ati akaukishiwe akafunike kuphunzisiwa. (Yes. 26:9; 61:11) Tetyo, pakankhale nchito ikulu yophunzisa ŵanthu yamene ikaliyocitikapo m’mbili yonse ya ŵanthu. (Ŵelengani Yesaya 11:9, 10.) Ndaŵa yanji? N’cifukwa cakuti osalungama akafunike kuphunzila zokhuza Yesu Khristu, Ufumu wa Mulungu, dipo na kufunika kwa zina ya Yehova koma soti ulamulilo wake. Olo olungama nao akafunikile kuphunzisiwa zinyinji zokhuza mwamene Yehova waphunzisila ŵanthu colinga cake cecilengela calo. Ayakine mwa atumiki a Yehova okhulupilika ecifwa ni kale ngako Baibo ikaliyosila kulembewa. Magulu onse aŵili, olungama na osalungama, akafunike kuphunzila zinthu zinyinji.
3 M’nkhani ino, tilaŵizhyane makonsho aŵa: ‘Kansi nchito iyi yophunzisa ŵanthu ikacitike tyani? Kansi zati akacite ŵanthu pavuli pophunzisiwa zikacitishe tyani kuti mazina ŵao alembewe kosasila m’buku ya moyo olo yai? Mayankho a makonsho aŵa, ni ofunika ngako kuli seo masiku ŵano. Monga ni mwati tionele, maulosi ocitisha cidwi ofotokozewa m’buku ya Danieli na Chivumbulutso, atiyavye kumvwisha kamvwidwe kasu kalomba kokhuza zati zikacitike akufwa akayoukishiwa. Coyamba, tiyeni tilaŵizhyane zocitika zeloselewa pa Danieli 12:1, 2.
“ŴALA ELALA M’LITO AKAUKE”
4-5. Kansi Danieli 12:1 yufotokoza cinji zokhuza masiku osilizhya?
4 Ŵelengani Danieli 12:1. Buku ya Danieli yufotokoza ndondomeko ya mwati zikacitikile zinthu m’masiku osilizhya. Mwacisanzo, Danieli 12:1 yufotokoza za Mikayeli wamene ni Yesu Khristu kuti “akapaname kuti ayavye ŵanthu a [Mulungu].” Mbali iyi ya ulosi, yeyamba kukwanilishiwa mu 1914 pamene Yesu eikiwa kunkhala Mfumu ya Ufumu wa Mulungu kululu.
5 Danieli euzhyiwa soti kuti Yesu “akapaname” pa “nthawi ya masauso yamene yakaliyocitikapo kuyambila pewenkhalapo mtundu wa ŵanthu mpaka pa nthawi yamene iyo.” “Nthawi ya masauso” iyi, yutanthauza “cisauso cikulu” cufotokozewa pa Mateyu 24:21. Yesu akapaname kapena kuti akateteze atumiki a Mulungu kosilizhyila kwa nthawi ya masauso, yamene ni pa nkhondo ya Aramagedo. Buku ya Chivumbulutso yufotokoza kuti atumiki a Mulungu aŵa niye gulu ikulu yati ‘ikafume m’cisauso cikulu.’—Chiv. 7:9, 14.
6. N’cinji cati cikacitike pavuli pakuti gulu ikulu yapulumuka cisauso cikulu? Fotokozani. (Kuti muziŵe zinyinji zokhuza ŵala ati akaukishiwe nonkhala na moyo pacalo, onani soti “Makonsho Ofumila Kuli Oŵelenga” m’magazini ino.)
6 Ŵelengani Danieli 12:2. Kansi n’cinji cati cikacitike pavuli pakuti gulu ikulu yapulumuka nthawi iyi ya masauso? Ulosi uyu utanthauza lini kuuka kophiphilisila olo kwauzimu kwa atumiki a Mulungu kwamene kucitika m’masiku ŵano osilizhya, monga ni mwetenzokhulupilila kale. c M’malo mwake, ulosi uyu utanthauza kuukishiwa kwa ŵanthu kwati kukacitike m’calo calomba. Ndaŵa yanji talaŵila teti? Mau akuti “lito” yokambiwa soti pa Yobu 17:16 ndipo yotanthauza soti “Manda.” Izi zuonesha kuti Danieli 12:2 yulaŵila za ciukililo cati cikacitike pavuli pa masiku osilizhya koma soti pavuli pa nkhondo ya Aramagedo.
7. (a) Kansi ŵanthu ati akaukishiwe akafunikile kucitanji kuti akalandile “moyo wosasila”? (b) Ndaŵa yanji ici cikankhale “ciukililo ciweme ngako”?
7 Kansi mau akuti ayakine akauke kuti “alandile moyo wosasila” opezeka pa Danieli 12:2, otanthauzanji? Otanthauza kuti m’vyaka 1,000, ŵala ati akaukishiwe nophunzila za Yehova olo kupitilizhya kuphunzila za yove, koma soti ati akomvwila Yehova na Yesu akalandile moyo wosasila. (Yoh. 17:3) Ici cikankhale “ciukililo ciweme ngako” kupambana ca ŵala eukishiwa m’nthawi zakuvuli. (Aheb. 11:35) Ndaŵa yanji talaŵila teti? N’cifukwa cakuti ŵala eukishiwa m’nthawi zakuvuli ecifwa soti.
8. Ndaŵa yanji ayakine akaukishiwe kuti ‘alandile citonzo nozondewa mpaka kale-kale’?
8 Koma ni ŵanthu lini onse ati akaukishiwe ati akavomele kuphunzisiwa na Yehova. Talaŵila teti cifukwa ulosi wa Danieli ulaŵila kuti ayakine akauke kuti “alandile citonzo ndipo akazondewe mpaka kale-kale.” Cifukwa cakuti akaoneshe mzimu wosamvwila, mazina ŵao akalembewe lini m’buku ya moyo ndipo akalandile lini moyo wosasila. M’malo mwake, akaonongewe. Tetyo, Danieli 12:2 yulaŵila zati zikacitikile ŵanthu ati akaukishiwe mokatizhyana na zati akacite pavuli poukishiwa. d (Chiv. 20:12) Ayakine akalandile moyo, koma ayakine akaonongewe.
‘KUYAVYA ŴANTHU ANYINJI KUNKHALA OLUNGAMA’
9-10. N’cinji ciyakine cati cikacitike pavuli pa cisauso cikulu, ndipo ni ŵani ati “akawale monga ni kuwala kwa kululu”?
9 Ŵelengani Danieli 12:3. Kansi n’cinji ciyakine cati cikacitike pavuli pa “nthawi ya masauso”? Kuyangizhyila pa zayulaŵila Danieli 12:2, vesi 3 yufotokoza soti cinthu ciyakine cati cikacitike pavuli pa cisauso cikulu.
10 Kansi ni ŵani ati “akawale monga ni kuwala kwa kululu”? Tupeza yankho ya konsho iyi pa mau yecilaŵila Yesu yopezeka pa Mateyu 13:43. Lemba iyi ikuti: “Pa nthawi yamene iyo, olungama akawale ngako monga ni zuŵa mu Ufumu wa Ausuwao.” Apa, Yesu enzokamba za “ŵana a Ufumu” amene ni Akhristu ozozewa. Ove akalamulile pamozi na Yesu mu Ufumu wa kululu. (Mat. 13:38) Tetyo, cuoneka kuti lemba ya Danieli 12:3 yulaŵila za Akhristu ozozewa na nchito yati akacite mu Ulamulilo wa Vyaka 1,000.
A 144,000 akaseŵenzele pamozi na Yesu posogolela pa nchito yophunzisa ŵanthu yati ikacitike m’vyaka 1,000 (Onani ndime 11)
11-12. Ni nchito yotyani yati akacite a 144,000 mu Ulamulilo wa Vyaka 1,000?
11 Kansi Akhristu ozozewa ‘akayavye tyani ŵanthu anyinji kunkhala olungama’? Ove akaseŵenzele pamozi na Yesu Khristu posogolela pa nchito yophunzisa ŵanthu yati ikacitike pano pacalo m’vyaka 1,000. A 144,000 akalamulile lini tyala monga mafumu, koma akatumikile soti monga ansembe. (Chiv. 1:6; 5:10; 20:6) Tetyo, ove akayavye pa nchito “yopolesha mitundu ya ŵanthu.” Ndipo patontho-patontho akayavye ŵanthu kunkhala soti angwilo. (Chiv. 22:1, 2; Ezek. 47:12) Iyi ikankhale nchito yosangalasa ngako kwa ozozewa.
12 Kansi ni ŵani ati akankhale mbali ya ‘ŵanthu anyinji ati akayavyiwe kunkhala olungama’? Ni ŵala ati akaukishiwe na ŵala ati akapulumuke nkhondo ya Aramagedo koma soti ŵana ati akavyalike m’calo calomba. Pofwika kosilizhyila kwa vyaka 1,000, ŵanthu onse pacalo akankhale angwilo. Koma kansi ni pa nthawi yotyani pamene mazina ŵao akalembewe m’buku ya moyo kosasila?
CIYESO COSILIZHYILA
13-14. Kansi ŵanthu onse angwilo ati akankhale pacalo akafunike kucita cinji kuti akalandile moyo wosasila?
13 Tufunika kukumbukila kuti kunkhala wangwilo kutanthauza lini kuti pamene apo munthu wankhala na moyo wosasila. Ganizilani za Adamu na Eva. Ove enze angwilo, koma enzofunikila kumvwila Yehova Mulungu kuti ankhale na moyo wosasila. Ndipo n’zomvwisha cisoni kuti ekangiwa kumumvwila.—Aro. 5:12.
14 Kansi zinthu zikaŵe tyani kwa ŵala ati akankhale pacalo pofwika kosilizhyila kwa vyaka 1,000? Onse akankhale angwilo. Koma kansi ni ŵanthu onse angwilo ati akacilikize ulamulilo wa Yehova mpaka kale-kale? Olo kansi ayakine akapandukile ulamulilo wa Yehova monga ni mwecicitila Adamu na Eva, mosasamala kanthu kuti enze angwilo? Makonsho aŵa akafunike kuyankhiwa. Motyani?
15-16. (a) Kansi ni lini pamene ŵanthu onse akapasiwe mwai woonesha kukhulupilika kwao kwa Yehova? (b) Kansi ciyeso cosilizhyila cikankhale na zofumapo zotyani?
15 Satana akamangiwe kwa vyaka 1,000. Pa nthawi iyi, akakwanishe lini kusokoneza munthu aliyense. Olo n’tetyo, kosilizhyila kwa vyaka 1,000, Satana akamasuliwe kuti ayese ŵanthu angwilo. Pa nthawi iyi, ŵanthu onse akaŵe na mwai woonesha kuti olemekeza zina ya Mulungu nocilikiza ulamulilo wake. (Chiv. 20:7-10) Zati akacite munthu aliyense payeka pavuli poyesewa na Satana niye zati zikacitishe kuti mazina ŵao alembewe m’buku ya moyo kosasila olo yai.
16 Baibo yulaŵila kuti ayakine akankhale osakhulupilika monga ni mwecicitila Adamu na Eva, ndipo akakane ulamulilo wa Yehova. Kansi n’cinji cati cikaŵacitikile? Lemba ya Chivumbulutso 20:15 yulaŵila kuti: “Aliyense wamene zina yake iliyopezeke m’buku ya moyo, eponyewa m’nyanja ya mulilo.” Ŵala ati akapandukile ulamulilo wa Yehova akaonongewe. Koma ŵanthu anyinji angwilo akapambane ciyeso cosilizhyila. Pa nthawi iyi, mazina ŵao akalembewe m’buku ya moyo kosasila.
“M’MASIKU OSILIZHYA”
17. Kansi mngelo euzhya Danieli kuti n’cinji cati cikacitike m’masiku osilizhya? (Danieli 12:4, 8-10)
17 N’zosangalasa ngako kuganizila zinthu zati zikacitike msogolo. Olo n’tetyo, mngelo euzhya soti Danieli zinthu ziyakine zofunika ngako zokhuza masiku ŵano, amene ni ‘masiku osilizhya.’ (Ŵelengani Danieli 12:4, 8-10; 2 Tim. 3:1-5) Mngelo euzhya Danieli kuti: “Ŵanthu akaziŵe zinthu zinyinji zacendi.” Kulaŵila cendi, atumiki a Mulungu enze kuzomvwishisha maulosi a m’buku ya Danieli. Mngelo eyangizhyilapo kuti “ŵanthu aipa akocita vinthu viipa, ndipo paliye munthu muipa wati akamvwishishe mau aŵa.”
18. N’cinji cati cicitikile ŵanthu aipa lombapano?
18 Pali lomba, zingaoneke monga kuti ŵanthu aipa olangiwa lini pa zinthu ziipa zakucita. (Mal. 3:14, 15) Koma lombapano, Yesu akaweluze ŵanthu aipa amene ali monga ni mbuzi, ndipo akaŵapatule pa ŵanthu abwino amene ali monga ni mbelele. (Mat. 25:31-33) Ŵanthu aipa akapulumuke lini pa cisauso cikulu olo kuukishiwa m’calo calomba. Ndipo mazina ŵao akalembewe lini “m’buku ya cikumbuso” yufotokozewa pa Malaki 3:16.
19. Kansi tufunika kucitanji pali lomba, ndipo ndaŵa yanji? (Malaki 3:16-18)
19 Ino niye nthawi yatufunika kuonesha kuti tili lini ku mbali ya ŵanthu aipa. (Ŵelengani Malaki 3:16-18.) Talaŵila teti cifukwa pali pano, Yehova osonkhanisha ŵala amene oŵaona kuti ni “cuma cake camtengo wapatali.” Kulaŵila cendi, tufunishisha kunkhala ku mbali ya ŵanthu amene Yehova oŵaona kuti ni amtengo wapatali.
Zikankhale zosangalasa ngako kuona Danieli, okondeka ŵasu na ŵanthu ayakine anyinji ‘oukishiwa’ kuti alandile gao yao m’calo calomba (Onani ndime 20)
20. Kansi ni lonjezo yosilizhyila yotyani yamene Yehova elonjeza Danieli, ndipo ndaŵa yanji muyembekezela mwacidwi kukwanilishiwa kwa lonjezo iyi?
20 Kulaŵila cendi, tunkhala m’nthawi yapadela pamene maulosi anyinji ocitisha cidwi okwanilishiwa. Koma tuyembekezela soti kukwanilishiwa kwa maulosi ayakine ocitisha cidwi ngako. Lombapano, ŵanthu onse aipa akaonongewe. Pavuli pa izi, tikaone soti kukwanilishiwa kwa lonjezo yamene Yehova elonjeza Danieli, yakuti: “Ukauke kuti ulandile gao yako kosilizhyila kwa masiku amene ao.” (Dan. 12:13) Kansi muyembekezela mwacidwi siku pamene Danieli koma soti okondeka ŵanu ‘akaukishiwe’? Ngati n’tetyo, ino niye nthawi pamufunika kuyesayesa kunkhala okhulupilika. Ngati mucita izi, munkhale osimikizhya kuti zina yanu ipitilizhye kunkhala yolembewa m’buku ya moyo ya Yehova mpaka kale-kale.
NYIMBO 80 “Laŵani Ndipo Muone Kuti Yehova ni Muweme”
a Nkhani ino yufotokoza kamvwidwe kasu kalomba kokhuza nchito ikulu yophunzisa yutomolewa pa Danieli 12:2, 3. Tiphunzile kuti ni lini pati ikacitike nchito iyi na kuti ni ŵanthu otyani ati akatoleko mbali. Tione soti mwamene nchito iyi, ikakonzekeleshele ŵanthu ati akankhale pacalo kukumana na ciyeso cosilizhyila. Kuyesewa uku kukacitike cakosilizhyila kwa Ulamulilo wa Khristu wa Vyaka 1,000.
b Payakine Yehova akayambile kuukisha ŵala amene ecifwa okhulupilika m’masiku osilizhya. Ndipo pavuli pake akoukisha ŵala ecifwa m’masiku akale mokonkha m’badwo na m’badwo. Ngati umu niye mwati zikacitikile, niye kuti m’badwo ulionse ukankhale na mwai wolandila ŵanthu ŵeenzoziŵana nao. Mulimonse mwati zikankhalile, Malemba olaŵila kuti ciukililo ca ŵala ali na ciyembekezo cakuyonkhala na moyo kululu, cucitika “mwadongosolo.” Tetyo, tingankhale osimikizhya kuti ciukililo ca ŵala ati akankhale pacalo naco cikacitike mwadongosolo.—1 Akor. 14:33; 15:23.
c Aka ni kamvwidwe kasu kalomba ndipo kosiyana na zefotokozewa m’buku ya Samalani Ulosi wa Danieli! caputa 17, na mu Nsanja ya Mulonda ya Cizungu ya July 1, 1987, mapeji 21-25.
d Mosiyana na izi, mau akuti “olungama” na “osalungama” amene opezeka pa Machitidwe 24:15 koma soti mau akuti “ŵala ecita vinthu vabwino” na “ŵala ecita viipa” opezeka pa Yohane 5:29, okamba za vinthu veenzocita ŵanthu ati akaukishiwe peenze akaliyokufwa.
