Onani mwamene Baibo yuyankhila makonsho aya.

Lemba ya Machitidwe 24:15 yulaŵila kuti kukankhale “kuuka kwa olungama na osalungama.” Olungama ni ŵala amene enzomvwila Mulungu peenze akaliyokufwa, ndipo mazina yao yelembewa m’buku ya moyo. (Mal. 3:16) Koma osalungama ni ŵala amene enzeve mwai wophunzila za Yehova peenze akaliyokufwa, ndipo mazina yao yaliyolembewe m’buku ya moyo.

Lemba ya Yohane 5:28, 29 yufotokoza za magulu aŵili otomolewa pa Machitidwe 24:15. Yesu elaŵila kuti ŵala amene “ecita vinthu vabwino akauke kuti alandile moyo, ndipo ŵala amene ecita viipa akauke kuti aweluziwe.” Olungama ni ŵala amene ecita vinthu vabwino peenze akaliyokufwa ndipo akauke kuti alandile moyo cifukwa mazina yao yalimo kale m’buku ya moyo. Koma osalungama ni ŵala amene ecita viipa peenze akaliyokufwa, ndipo mazina yao muliye m’buku ya moyo. Tetyo akaukishiwe kuti aweluziwe. Izi zutanthauza kuti Yesu akoŵayanganila kuti aone nchito zao. Pa nthawi yamene iyo, akankhale na mwai wophunzila za Yehova na kuti mazina yao yakalembewe m’buku ya moyo.

Lemba ya Chivumbulutso 20:12, 13 yufotokoza kuti onse oukishiwa akafunike kukonkha “zinthu zolembewa m’mipukutu,” kutanthuza malamulo yalomba yati tikapasiwe m’calo calomba. Ŵala ati akakane kumvwila, akaonongewe.​—Yes. 65:20.

Lemba ya Danieli 12:2 yelosela kuti ayakine mwa ŵanthu amene elala mu imfwa akauke “kuti alandile moyo wosasila. Koma ayakine akalandile citonzo ndipo akazondewe mpaka kale-kale.” Vesi iyi, yunena za ciweluzo cosilizhyila cokhuza ŵala ati akaukishiwe. Ayakine akaukishiwe kuti alandile “moyo wosasila” ndipo ayakine akaukishiwe kuti “akazondewe mpaka kale-kale.” Tetyo, cakosilizhyila kwa vyaka 1,000, ayakine akalandile moyo wosasila, koma ayakine akaonongewe.​—Chiv. 20:15; 21:3, 4.

Ganizilani cisanzo ici. Magulu aŵili a ŵanthu ati akaukishiwe olinganizhyiwa na ŵanthu amene ofuna kunkhala m’calo ciyakine monga alwendo. Olungama ali monga ni ŵala amene apasiwa citupa cakuti ankhale m’calo ici kwa nthawi itali. Koma osalungama ali monga ni ŵala amene apasiwa citupa cakuti ankhalemo tyala kwa nthawi itontho. Onse alwendo aŵa ofunika kuonesha mwa zocita zao kuti ofuna cendi kunkhala m’calo ici. Molingana na izi, osalungama ati akaukishiwe, akafunike kukonkha malamulo a Yehova noonesha kuti ni okhulupilika kuti akalolewe kunkhala m’Paladaiso. Tetyo, mosasamala kanthu kuti ŵanthu aŵa peenzoloŵa m’calo ici enze epasiwa citupa cakuti ankhalemo kwa nthawi itali olo ifupi, onse ofunika kulemekeza nomvwila malamulo a m’calo ici kuti alolewe kunkhala nzika. Koma ngati angakangiwe kucita izi, niye kuti angatumizhyiwe kwao. Tetyo kuti ŵanthu aŵa alolewe kunkhala nzika olo yai, zudalila pa zocita zao koma soti nkhalidwe yakuonesha m’calo camene ici. Molingana na izi, ciweluzo cosilizhyila kuli onse ati akaukishiwe cikadalile pa cikhulupililo na nkhalidwe yao m’calo calomba.

Yehova ni Mulungu wacifundo koma soti wacilungamo. (Deut. 32:4; Sal. 33:5) Yove akaoneshe cikondi cake mwa kuukisha olungama na osalungama. Olo n’tetyo, yove ofunishisha kuti onse akokonkha mfundo zake zokhuza coyenela na cosayenela. Ŵala ati akamumvwile nocita cifunilo cake, akalolewe kupitilizhya kunkhala m’calo calomba.