Molingana na 1 Akorinto 15:8, Paulo elaŵila kuti: “Posilizhyila pake eonekela kuli neo monga lucece yovyalika masiku akaliyokwana.” M’nthawi zakuvuli, tenze tefotokoza kuti cuoneka kuti Paulo enzonena zecikumana nazo peciona mensomphenya yokhuza Yesu mu ulemelelo wakululu. Tetyo, zenze monga kuti epasiwa mwai wovyalika olo kuukishiwa kuti ankhale na moyo wauzimu, kukali vyaka vinyinji kuti kuukishiwa koteti kuyambe kucitika. Koma pavuli pofufuza mosamala vesi iyi, taona kuti ni pofunikila kumvwikisha bwino tanthauzo ya vesi iyi.

N’cendi kuti apa Paulo enzotanthauza zecitika pecitembenuka. Koma kansi etanthauzanji pecilaŵila kuti ‘evyalika masiku akaliyokwana’? Pali vifukwa vinyinji vamene payakine niye vem’pangisha kuti alaŵile teti.

Kutembenuka kwake kwecitika mofulumila koma soti mosayembekezeleka. Kuti mwana avyalike masiku akaliyokwana, zukonda kucitika mosayembekezeleka. Saulo (wamene pavuli pake ecizoziŵika kuti Paulo) enze pa ulwendo woluta ku Damasiko kuti akanzunze Akhristu. Pa ulwendo uyu enzoyembekezela lini kuti angaone mensomphenya okhuza Yesu wamene eukishiwa. Izi zuonesha kuti kutembenuka kwa Paulo kwenze kosayembekezeleka osati tyala kuli yove, koma na kwa Akhristu ŵeenzofuna kuyonzunza mumzinda uyu. Kuyangizhyila apo, cocitika ici cenze codabwisa cakuti nthawi yamene iyo eleka kulolesha kwa kanthawi.​—Mac. 9:1-9, 17-19.

Etembenuka pa “nthawi yolakwika.” Mau Acigiliki amene emasuliliwa kuti “lucece yovyalika masiku akaliyokwana,” angatanthauze soti “kuvyalika pa nthawi yolakwika.” Baibo yoitiwa kuti The Jerusalem Bible pa mau aŵa, yefotokoza kuti: “Zenze monga kuti nevyalika pa nthawi yakuti paliye aliyense wamene enzoyembekezela.” Paulo etembenuka apo n’kuti Yesu waluta kale kululu. Mosiyana na ŵanthu ŵecitomola m’mavesi akuvuli, yove aliyomuoneko Yesu peenze pafupi kuluta kululu. (1 Akor. 15:4-8) Olo kuti Yesu eonekela kwa Paulo mosayembekezeleka, izi zepasa Paulo mwai woona Yesu pavuli pakuti waukishiwa olo kuti zeoneka monga kuti penze “pa nthawi yolakwika.”

Enzolaŵila molicefya. Akaswili ayakine okamba kuti mau yeciseŵenzesha Paulo apa, yoonesha kuti enzoziona mosayenelela. Ngati umu niye mwazilili, niye kuti enzoziona kuti enze wosayenelela kunkhala mtumwi. Yove epitilizhya kulaŵila kuti: “Neo niye mtontho ngako pa atumwi onse, ndipo n’ne wosayenelela kuitiwa kuti mtumwi, cifukwa nenzosausha mpingo wa Mulungu. Koma kupitila m’kuwama mtima kukulu kwa Mulungu, nenkhala mwanilili.”​—1 Akor. 15:9, 10.

Tetyo, cuoneka kuti Paulo enzotanthauza kuti etembenuka pa nthawi yolakwika, enzoziona kuti enze wosayenelela kunkhala mtumwi na kuti Yesu eonekela mosayembekezeleka kuli yove. Mulimonse mwazilili, n’zoonekelatu kuti Paulo enzoona kuti cocitika ici cenze cofunika ngako. Cemusimikizhyila kuti Yesu eukishiwa cendi. Niye cifukwa cake nthawi zinyinji enzofotokoza za cocitika ici polalikila kuli ayakine zokhuza kuukishiwa kwa Yesu.​—Mac. 22:6-11; 26:13-18.