NKHANI YOPHUNZILA 37
NYIMBO 118 “Tiyangizhyileni Cikhulupililo”
Kalata Yamene Ingatiyavye Kupilila Mpaka Posilizhyila
“Zinthu zetenzodalila poyamba tazikata mwamphamvu mpaka posilizhyila.”—AHEB. 3:14.
ZATI TIPHUNZILE
Tiphunzile mwamene malangizo ali m’kalata yecilembela Akhristu aciheberi yangatiyavyile kupilila mokhulupilika mpaka posilizhyila pa cino calo.
1-2.(a) Kansi zinthu zenze tyani ku Yudeya pamene Paulo elembela kalata Akhristu aciheberi? (b) Kansi kalata youzhyiliwa iyi yenze tyani ya pa nthawi yake?
PAVULI pakuti Yesu wamwalila mu 33 C.E., Akhristu ku Yerusalemu na ku Yudeya ekumana na mavuto anyinji. Pa nthawi iyi, mpingo wacikhristu wepangiwa ndipo Akhristu enzonzunziwa mwankhanza. (Mac. 8:1) Vyaka 20 pavuli pake, ekumana soti na mavuto cifukwa ca kusoŵekela kwa vakulya na umphawi. (Mac. 11:27-30) Olo n’tetyo, ca m’ma 61 C.E., Akhristu enzonzunziwa lini ngako polinganizhya na cinzunzo ceenze kuzokumana naco msogolo. Pa nthawi iyi, Yehova euzhyila mtumwi Paulo kuti aŵalembele kalata. Ndipo malangizo yenze m’kalata iyi, niye yeenzofunikila kuti akonzekele zinthu zamene zenze zesala patontho kuti zicitike.
2 Kalata yecilembela Akhristu aciheberi yenze ya pa nthawi yake. Talaŵila teti cifukwa cakuti mtendele weenze nao Akhristu aŵa, wenze kuzopitilizhya lini kunkhalapo mpaka kale-kale. Niye cifukwa cake Paulo epeleka malangizo amene enze kuzoŵayavya kuti akapilile. Ndipo kuonongewa kwa dongosolo Yaciyuda kwecilosela Yesu kwenze pafupi kucitika. (Luka 21:20) N’cendi kuti Paulo olo Akhristu amene enzonkhala ku Yudeya enzoziŵa lini nthawi yeneyene pamene cionongeko ici cenze kuzocitika. Olo n’tetyo, Akhristu aŵa enzofunika kuseŵenzesha nthawi yosala kuti akulishe minkhalidwe monga cikhulupililo na cipililo.—Aheb. 10:25; 12:1, 2.
3.Ndaŵa yanji Akhristu masiku ŵano ofunika kucita cidwi na kalata yoluta kuli Akhristu aciheberi?
3 Lombapano, tikumane na cisauso cikulu kupambana cecikumana naco Akhristu aciheberi. (Mat. 24:21; Chiv. 16:14, 16) Lomba, tiyeni tione ayakine mwa malangizo yoyavya yamene Yehova epasa Akhristu aciheberi, yamene nase yangatiyavye.
‘MUKOYESAYESA MWAKHAMA KUTI MUKULE MWAUZIMU’
4.Kansi ni mavuto otyani yecikumana nayo Akhristu Aciyuda? (Onani soti cithunzithunzi.)
4 Ayuda amene enkhala Akhristu enzofunika kupanga masinthidwe akulu, ndipo kucita izi kwenze lini kupepu. Pa nthawi iyakine, Ayuda enze ŵanthu osankhiwa na Yehova. Kwa vyaka vinyinji, Yerusalemu yenze malo ofunika ngako. Mfumu yamene yenzopanamilako Yehova yenzolamulila mumzinda uyu. Ndipo niye soti mwenze kacisi weenzoseŵenzesha ŵanthu onse amene enzofuna kulambila Yehova. Ayuda onse okhulupilika enzokonkha Cilamulo ca Mose na malamulo yeenzoŵaphunzisa asogoleli acipembezo. Izi zenzoyangizhyilapo malamulo okhuza vakulya, mdulidwe koma soti mocitila zinthu na ŵanthu amene enze lini Ayuda. Koma pavuli pakuti Yesu wamwalila, Yehova eleka kulandila nsembe zenzopelekewa pa kacisi. Tetyo, cenze lini cipepu kwa Ayuda amene enze enkhala Akhristu kuti ayambe kulambila m’njila yosiyanako. (Aheb. 10:1, 4, 10) Olo Akhristu amene enze na cikhulupililo cotang’a monga mtumwi Petulo, evutika kuti apange masinthidwe aŵa. (Mac. 10:9-14; Aga. 2:11-14) Cifukwa ca vikhulupililo vao valomba, Akhristu aŵa eyamba kunzunziwa na asogoleli a cipembezo Caciyuda.
Akhristu enzofunika kupitilizhya kukhulupilila cendi copezeka m’Mau a Mulungu motang’a mtima nokana viphunziso vawenye va asogoleli a cipembezo Caciyuda amene enzoŵasusha (Onani ndime 4-5)
5.Kansi Akhristu enzofunika kusamala na cinji?
5 Akhristu aciheberi enzosushiwa na magulu aŵili a ŵanthu. Gulu yoyamba yenze ya asogoleli a cipembezo Caciyuda amene enzoŵaona monga ni ampatuko. Kuyangizhyila apo, enzosushiwa na ayakine mumpingo amene enzokamba kuti Akhristu enzofunika kukonkha Cilamulo ca Mose. Payakine ecita izi cifukwa cofuna kupewa kunzunziwa. (Aga. 6:12) Kansi n’cinji ceyavya Akhristu kupitilizhya kunkhala okhulupilika kwa Yehova?
6.Kansi Paulo elimbikisha okhulupilila ayake kucita cinji? (Aheberi 5:14–6:1)
6 M’kalata yake yecilembela Akhristu aciheberi, Paulo elimbikisha okhulupilila ayake kuphunzila nosinkhasinkha Mau a Mulungu. (Ŵelengani Aheberi 5:14–6:1.) Poseŵenzesha Malemba Aciheberi, eŵafotokozela cifukwa cake njila yeenzoseŵenzesha Akhristu polambila Yehova yenze iweme ngako kupambana yeenzoseŵenzesha Ayuda pomulambila. a Paulo elimbikisha Akhristu kuziŵa bwino nomvwisha cendi ca m’Malemba kuti akokwanisha kuzindikila viphunziso vawenye novikana.
7.Kansi ni mavuto yotyani yatukumana nayo masiku ŵano?
7 Molingana na Akhristu aciheberi, nase tukumana na ŵanthu amene ofalisa nkhani zawenye zamene zusushana na mfundo zolungama za Yehova. Ŵanthu ayakine okamba kuti Mboni za Yehova zukosesha zinthu pa nkhani yolalana, cifukwa cokonkha malamulo a m’Baibo. Kuyangizhyila apo, olaŵila kuti nise ankhanza cifukwa tulola lini kuti ŵanthu amene okonkha lini mfundo zolungama za Yehova apitilizhye kunkhala mumpingo. Kaganizidwe ka ŵanthu kakuya kosiyanilatu na kaganizidwe ka Yehova. (Miy. 17:15) Tetyo, tufunika kukulisha luso yasu yozindikila nopewa nkhani zawenye zakuseŵenzesha ŵanthu osusha pofuna kutifookesha olo kutisoŵesha.—Aheb. 13:9.
8.Kansi n’cinji cingatiyavye kuti tikule mwauzimu?
8 Tingacite bwino kukonkha malangizo amene Paulo epasa Akhristu aciheberi akuti apitilizhye kukula mwauzimu. Izi zuyangizhyilapo kuphunzila Baibo mosamala kuti tiziŵe bwino kaganizidwe ka Yehova. Tufunika kupitilizhya kucita izi olo pavuli pakuti tazipeleka nobatizika. Mosasamala kanthu kuti tankhala m’cendi kwa nthawi itali tyani, tonse tufunika kuŵelenga nophunzila Mau a Mulungu nthawi zonse. (Sal. 1:2) Kuphunzila Baibo nthawi zonse kutiyavye kutang’isha cikhulupililo casu, nkhalidwe yamene Paulo euzhya Akhristu aciheberi kuti enzofunika kunkhala nayo.—Aheb. 11:1, 6.
‘NKHALANI NA CIKHULUPILILO CAMENE CINGAKUYAVYENI KUYOPEZA MOYO’
9.Ndaŵa yanji Akhristu aciheberi enzofunika kunkhala na cikhulupililo cotang’a?
9 Akhristu aciheberi enzofunika kunkhala na cikhulupililo cotang’a kuti apulumuke cisauso camene cenze cesala patontho kucitika mu Yudeya. (Aheb. 10:37-39) Yesu enze ecenjeza ophunzila ŵake kuti Yerusalemu akayozunguliliwa na magulu a nkhondo, enzofunika kuthaŵila ku malupili. Onse enzofunika kuthaŵa mosasamala kanthu kuti enzonkhala mkati mwa mzinda olo kunja. (Luka 21:20-24) Ngati masoja awela kuti aononge, kanyinji-kanyinji ŵanthu amene enzonkhala kunja kwa mzinda enzoutukila mkati mwa mzinda cifukwa vipupa venzoŵateteza. Tetyo kuutukila ku malupili m’malo moutukila mkati mwa mzinda wa Yerusalemu, kwenze kweoneka kuti kwenze kosayavya. Niye cifukwa cake enzofunika kunkhala na cikhulupililo cotang’a kuti amvwile malangizo a Yesu.
10.Kansi cikhulupililo cotang’a cesonkhezela Akhristu kucita cinji? (Aheberi 13:17)
10 Akhristu aciheberi enzofunikila soti kukhulupilila ŵanthu amene Yesu enzoŵaseŵenzesha posogolela mpingo. Cuoneka kuti ŵala amene enzosogolela, enzopeleka malangizo acindunji okhuza nthawi yeenzofunika kuutuka na mwaangacitile izi. (Ŵelengani Aheberi 13:17.) Mau Acigiliki akuti “mukomvwila,” amene eseŵenzeshewa pa Aheberi 13:17 otanthauza munthu wamene osonkhezelewa kumvwila cifukwa cokhulupilila munthu wamene omupasa malangizo. Izi zuyangizhyilapo zinyinji, osati tyala kumvwila cifukwa cakuti munthu wapeleka malangizo ali na udindo wocita zamene izo. Tetyo, Akhristu aciheberi enzofunika kutang’isha cikhulupililo pali ŵala amene enzoŵasogolela olo cisauso cikaliyocitika. Ngati pa nthawi ya mtendele Akhristu enzomvwila malangizo yeenzoŵapasa ŵala enzoŵasogolela, niye kuti cenze kuzonkhala cosavuta kuli ove kucita izi pa nthawi yovuta.
11.Ndaŵa yanji Akhristu ofunika kunkhala na cikhulupililo cotang’a masiku ŵano?
11 Molingana na Akhristu aciheberi, nase tufunika kunkhala na cikhulupililo. Tunkhala m’nthawi yamene ŵanthu anyinji okana nonyoza cenjezo ya m’Baibo yokhuza masilizhyilo a cino calo. (2 Pet. 3:3, 4) Kuyangizhyila apo, olo kuti Baibo yuonesha zinthu zinyinji zokhuza mwati cikacitikile cisauso cikulu, pali zinthu zinyinji zatisaziŵa. Tetyo, tufunika kunkhala na cikhulupililo cotang’a cakuti masilizhyilo a cino calo akafwike pa nthawi yoyenela na kuti Yehova akatisamalile.—Hab. 2:3.
12.Kansi n’cinji cingatiyavye kuti tikapulumuke pa cisauso cikulu?
12 Masiku ŵano, tufunika soti kutang’isha cikhulupililo casu cakuti Yehova oseŵenzesha “kapolo wokhulupilika na wanzelu” potisogolela. (Mat. 24:45) Cisauso cikulu cikayoyamba, payakine tikalandile malangizo acindunji opulumusa moyo monga ni yecilandila Akhristu aciheberi, masoja Aciroma pecizungulila Yerusalemu. Lomba, niye nthawi yatufunika kutang’isha cidalilo casu pa malangizo yatulandila kufumila kuli ŵala osogolela m’gulu ya Yehova. Ngati pali lomba tukangiwa kumvwila malangizo yakutipasa, niye kuti cikankhale covuta kumvwila malangizo yati akatipase pa cisauso cikulu.
13.Ndaŵa yanji malangizo opezeka pa Aheberi 13:5 yenze yofunika ngako?
13 Peenzoyembekezela cizindikilo cakuti autuke, Akhristu aciheberi enzofunika kunkhala na umoyo wosalila zinyinji nopewa ‘kukondeshesha ndalama.’ (Ŵelengani Aheberi 13:5.) Ayakine ekumanako na mavuto monga njala na umphawi. (Aheb. 10:32-34) Olo kuti poyamba enze ofunishisha kupilila mavuto cifukwa ca uthenga wabwino, payakine ayakine enze eyamba kuika maganizo ŵao pa kusakilasakila cuma na colinga cakuti ciŵateteze ku ngozi na umphawi. Koma ndalama zenze kuzopulumusa lini miyoyo yao, Yerusalemu peenze kuzoonongewa. (Yak. 5:3) Kulaŵila cendi, aliyense wamene ekondeshesha cuma enze kuzociona kunkhala covuta kuthaŵa nosiya mang’anda koma soti katundu wao.
14.Kansi cikhulupililo casu cingakhuze tyani zosankha zasu masiku ŵano ponena za zinthu zamuŵili?
14 Ngati tili na cikhulupililo cakuti lombapano Yehova aononge cino calo, tikoganizila lini kuti kunkhala na ndalama zinyinji niye cinthu cofunika. Pa cisauso cikulu, ndalama zikakwanishe lini kupulumusa ŵanthu. Baibo yulaŵila kuti ŵanthu ‘akataye siliva wao mu mseu’ cifukwa akazindikile kuti “siliva wao olo golide wao ukakwanishe lini kuŵapulumusa pa siku yamene Yehova akaoneshe ukali wake ukulu.” (Ezek. 7:19) Tetyo, m’malo moika maganizo pa kupeza ndalama zinyinji, tufunika kupanga zosankha zamene zingatiyavye kutumikila Yehova nokwanisha kuzisamalila nosamalila banja yasu. Izi zuyangizhyilapo kupewa nkhongole zosayenelela olo kutaila nthawi ikulu posamalila katundu ŵasu. Tufunika soti kunkhala osamala kuti osati tikoona zinthu zamuŵili kuti niye zofunika ngako mu umoyo wasu. (Mat. 6:19, 24) Patufwika kosilizhyila kwa cino calo, tufunika kusankha kaya kudalila Yehova olo cuma casu.
“MUFUNIKA KUNKHALA OPILILA”
15.Ndaŵa yanji Akhristu aciheberi enzofunika kupilila?
15 Akhristu aciheberi enzofunika kupilila potumikila Yehova cifukwa vinthu mu Yudeya venzokuya vuipilaipila. (Aheb. 10:36) Olo kuti ayakine mwa Akhristu aŵa enze ekumanako na cinzunzo m’nthawi zakuvuli, anyinji evomelezhya Cikhristu pa nthawi yamene kwenzeko mtendele. Tetyo Paulo eŵakumbusha kuti enzofunika kunkhala okonzeka, cifukwa cinzunzo cenze kuzoyangizhyilika ndipo enzofunika soti kupitilizhya kunkhala okhulupilika mpaka imfwa, monga ni mwecicitila Yesu. (Aheb. 12:4) Ayuda anyinji ekhumudwa ngako cifukwa ŵanthu anyinji etembenuka nonkhala Akhristu. Vyaka vitontho izi zikaliyocitika, gulu ya ŵanthu yeukila Paulo peenzolalikila ku Yerusalemu. Ndipo Ayuda opitilila 40, ‘elumbila pocita kuzitembelela kuti alye lini olo kumwa ciliconse mpaka apaye Paulo.’ (Mac. 22:22; 23:12-14) Olo kuti enzozondewa olo kunzunziwa, Akhristu enzofunika kupitilizhya kusonkhana, kulalikila uthenga uweme nonkhala na cikhulupililo cotang’a.
16.Kansi kalata yamene Paulo elembela Akhristu aciheberi ingatiyavye tyani kuona cinzunzo moyenelela? (Aheberi 12:7)
16 Kansi n’cinji camene sembe ceyavya Akhristu aciheberi kupilila peenzonzunziwa? Paulo enzoziŵa kuti Akhristu aŵa enzofunika kunkhala na maganizo oyenelela ponena za mayeselo. Tetyo, efotokoza kuti Mulungu angalole Akhristu kukumana na mayeselo na colinga cakuti aŵaphunzise. (Ŵelengani Aheberi 12:7.) Ndipo izi zingayavye kuti Mkhristu aphunzile olo kukulisha minkhalidwe yokondwelesha Yehova. Tetyo, cenze kuzonkhala cosavuta kwa Akhristu aciheberi kupilila cifukwa coika maganizo ŵao pa zofumapo ziweme pa mayeselo.—Aheb. 12:11.
17.Kansi Paulo ephunzila cinji pa nkhani yopilila cinzunzo?
17 Paulo elimbikisha Akhristu aciheberi kuti enzofunika kunkhala otang’a mtima popilila mayeselo. Yove enze pa malo abwino oŵalembela izi cifukwa akaliyonkhala Mkhristu, enze enzunzapo Akhristu ndipo enzoona mweenzovutikila. Enzoziŵa soti mopililila cinzunzo cifukwa esushiwapo m’njila zosiyanasiyana pavuli ponkhala Mkhristu. (2 Akor. 11:23-25) Paulo enzoziŵa bwino ngako zeenzofunika kucita munthu kuti akwanishe kupilila. Tetyo, ekumbusha Akhristu aciheberi kuti paakupilila mayeselo, ofunika lini kuzidalila koma kudalila Yehova. Ove enze kuzonkhala otang’a mtima pokumbukila mau akuti: “Yehova niye oniyavya. Nicite lini wowa.”—Aheb. 13:6.
18.Ni zinthu zotyani zatufunika kuziŵa kuti zitiyavye kupilila cinzunzo?
18 Ayakine mwa akwasu na azilongosi okumana na cinzunzo pali lomba. Njila imozi yatingaoneshelemo cikondi, ni mwa kuŵapemphelela. Ndipo nthawi ziyakine tingaŵayavye mwa kuŵapasa zinthu zakufunikila. (Aheb. 10:33) Koma Baibo yulaŵila momvwika bwino kuti “onse ofuna kunkhala na umoyo wozipeleka kwa Mulungu mokatizhyana na Khristu Yesu, nao akanzunziwe.” (2 Tim. 3:12) Cifukwa ca izi, tonse tufunika kukonzekela za mavuto yati tikakumane nayo msogolo. Tetyo, tiyeni tipitilizhye kudalila Yehova na mtima wonse tili na cidalilo cakuti atiyavye kupilila ciyeso ciliconse catingakumane naco. Pa nthawi yoyenela, akalete mpumulo kuli atumiki ŵake onse okhulupilika.—2 Ates. 1:7, 8.
19.Kansi tingacitenji kuti tikonzekele cisauso cikulu? (Onani soti cithunzithunzi.)
19 Mosakaikila, kalata ya Paulo yecilembela Akhristu aciheberi yeyavya Akhristu a m’vyaka 100 voyambilila kuti akonzekele cisauso, camene enze kuzokumana naco. Paulo elimbikisha akwake kuti akophunzila Mau a Mulungu mosamala noyamvwishisha. Kucita izi kwenze kuzoŵakonzekelesha kuti akozindikila nokana viphunziso vamene sembe vefookesha cikhulupililo cao. Eŵalimbikisha soti kutang’isha cikhulupililo cao kuti akokwanisha kumvwila malangizo a Yesu pa nthawi yamene iyo koma soti ya ŵala amene enzosogolela mumpingo. Kuyangizhyila apo, eyavya Akhristu kutang’isha cikhulupililo cao mwa kunkhala na maganizo oyenelela ponena za mayeselo noyaona kuti ni mwai wakuti aphunzisiwe na Ausuwao acikondi. Nase tufunika kuseŵenzesha malangizo aŵa a m’Baibo. Ngati tingacite izi, niye kuti tikwanishe kupilila mpaka posilizhyila.—Aheb. 3:14.
Akhristu okhulupilika edalisiwa cifukwa copilila. Pavuli poutuka mu Yudeya, epitilizhya kusonkhana pamozi. Kansi tingaphunzilepo cinji? (Onani ndime 19)
NYIMBO 126 Nkhalani Menso, Nkhalani Otang’a, Nkhalani Amphamvu
a Mu caputa tyala coyambilila, Paulo ekata mau m’Malemba Aciheberi maulwendo 7 pofuna kuonesha kuti njila yeenzoseŵenzesha Akhristu polambila yenze iweme ngako kupambana yeenzoseŵenzesha Ayuda.—Aheb. 1:5-13.
