Patukonzekela kuphunzila Baibo, tingazikonshe kuti, ‘Kansi ni zinthu zotyani zanufuna kuphunzila?’ Olo n’tetyo, tufunika kukumbukila kuti olo tingaziŵe zinthu zenezene zatufuna kuphunzila, zutanthauza lini kuti paliye zinthu ziyakine zalomba zamene Yehova ofuna kuti tiphunzile. Kansi tingayese tyani kuphunzila zinthu zalomba patuphunzila Baibo?

Mukosenga nzelu. Mukosenga Yehova kuti akuyavyeni kumvwisha zinthu zamufuna kuphunzila pa nthawi yamene iyo. (Yak. 1:5) Tetyo osakhutila tyala na zinthu zamuziŵa kale.—Miy. 3:​5, 6.

Mukolola mphamvu ya Mau a Mulungu kukata nchito pa umoyo wanu. “Mau a Mulungu ni amoyo.” (Aheb. 4:12) Tetyo, nthawi iliyonse patuŵelenga Baibo tingaphunzile zinthu zalomba zamene zingatiyavye m’njila zosiyanasiyana mu umoyo wasu. Izi zingacitike, tyala ngati tuzindikila kuti tufunika kuphunzila zakutiphunzisa Mulungu.

Mukoyamikila zinthu zonse zakuseŵenzesha Yehova kuti atiphunzise. Cakulya cake cauzimu cili monga ni “phwando ya vakulya vabwino ngako.” (Yes. 25:6) Tetyo, mufunika lini kupewa kuŵelenga nkhani zamuganiza kuti mungasangalale lini nazo kuziŵelenga. Ngati mucita izi, mulole Mulungu kuti akuyavyeni kunkhala munthu wabwino. Ndipo mukosangalala pamuphunzila!