Nevyalika mu 1934. Makolo ŵangu efumila ku Switzerland nakuyonkhala m’tauni ya Timmins ku Ontario, Canada. Ca m’ma 1939, amama eyamba kuŵelenga magazini ya Nsanja ya Mulonda nopezeka pa misonkhano ya Mboni za Yehova. Ove enzotitola tonse pamozi na akwangu 6 ndipo pavuli pa nthawi itontho, enkhala Mboni ya Yehova.

Atata aliyosangalale na cosankha cecipanga amama. Olo n’tetyo, amama epitilizhya kunkhala okhulupilika kwa Yehova. Ove ecita izi olo pa nthawi yakuti nchito ya Mboni za Yehova yenze yoleshewa ku Canada. Epitilizhya kucita zinthu mwacikondi na atata olo kuti enzonyozewa. Cisanzo cao cabwino ceniyavya neo na akwangu kuti tiyambe kutumikila Yehova. Cosangalasa n’cakuti m’kuluta kwa nthawi, atata ecinja nkhalidwe yao noyamba kucita nase zinthu mwacikondi.

Mu 1950, nepezeka pa msonkhano wadela wa mutu wakuti Kuyangizhyilika kwa Teokilasi mumzinda wa New York. Nesonkhezelewa kuti nicite zinyinji mu utumiki wa Yehova pavuli pokumana na akwasu na azilongosi ofumila m’mbali zosiyanasiyana pacalo conse. Kuyangizhyila apo, nemvwishila ku zokumana nazo zolimbikisha kufumila kuli akwasu na azilongosi amene esilizhya maphunzilo a Giliyadi. Kupambana kale yonse, nenkhala wosimikizhya kuyamba utumiki wanthawi zonse. Penewelela ku ng’anda, nekonshela utumiki uyu. Koma ofesi ya msambo ya ku Canada yenilembela kalata yoniuzhya kuti coyamba nenzofunika kubatizika, ndipo nebatizika pa October 1, 1950. Mwezi umozi pavuli pake, nenkhala mpainiya ndipo enituma kuti nikatumikile m’tauni ya Kapuskasing. Tauni iyi, yenze kutali ngako na kwetenzonkhala.

 Mu 1951, ofesi ya msambo yesenga Mboni zamene zenzokwanisha kulaŵila Cifulenci, ngati angakonde kuluta ku madela kwamene kwenzolaŵiliwa cilaŵilo ici mu Quebec. Kudela uku kwenzofunikila ofalisa anyinji. Pofwana kuti nenzoziŵa Cifulenci na Cizungu, nevomela kuti nikatumikile ku dela ya Rouyn. Ndipo kudela uku nenzoziŵana lini na aliyense. Tetyo, nenze tyala na adilesi monga ni mwanafotokozela poyamba. Koma zinthu zonse zeyenda bwino. Marcel na neo tenkhala ashamwali, ndipo nesangalala kutumikila ku Quebec kwa vyaka viyakine 4 monga mpainiya wapadela.

Penenze ku Quebec, nesangalala ngako penelandila ciitano coloŵa kilasi ya namba 26 ya Sukulu ya Giliyadi ku South Lansing, New York. Nesilizhya maphunzilo aya pa February 12, 1956, ndipo netumiwa ku malo kwamene lomba kuitiwa kuti Ghana, b dela yamene ili kum’cingulo kwa Africa. Nikaliyoluta ku calo ici, coyamba nenzofunika kuwelela ku Canada kuyembekezela kwa “mawiki atontho” mpaka natola mapepa yonse yacilolezo.

Nenkhala ku Toronto kwa miyezi 7 kuyembekezela mapepa aŵa. Pa nthawi iyi, nenzonkhala na banja ya mkwasu Cripps yamene yenilola kunkhala m’nganda yao, ndipo niye peneziŵana na mwana wao munakazi Sheila. Tekondana ngako na Sheila ndipo petenze pafupi kuti tikambilane zakuti tilungulane, niye penelandila mapepa yacilolezo. Sheila na neo tepemphelela nkhani iyi ndipo tepangana kuti nufunika kuluta ku utumiki wenetumiwa. Koma tepangana kuti tikokambilana noyembekeza ngati kuti msogolo tingayolungulana. Ici cenze lini cosankha cipepu, koma pavuli pake tezindikila kuti cenze cosankha coyenela.

Pavuli poyenda na tileni, maboti onyamula katundu na ndeke kwa mwezi umozi, nefwika ku Accra, Ghana. Penefwika, neyamba kutumikila monga woyanganila cigao. Izi zenzoyangizhyilapo kuyenda m‘madela osiyanasiyana mu Ghana koma soti ku Ivory Coast (kwamene  lomba kuziŵika kuti Côte d’Ivoire) na ku Togoland (kwamene lomba kuziŵa kuti Togo). Nthawi zinyinji nenzoyenda neka m’motoka ya msambo ndipo nenzosangalala ngako kuyendela akwasu na azilongosi.

M’ma wikendi nenzonkhala na mbali mu misonkhano ya dela. Tenzeve Malo Ocitilapo Misonkhano Ikulu-ikulu. Tetyo, akwasu enzomanga monkhala poseŵenzesha vimiti ndipo palulu pake enzoikapo vimiti va kanjeza kucitila zuŵa. Cifukwa cakuti mwenzeve mafiliji m’malo olyela, vinyama vamoyo enzovisungila pafupi na malo aŵa na colinga cakuti akopaya kuti ŵanthu owela ku msonkhano akonkhala na cakulya.

Pa misonkhano ya dela penzocitika zinthu zocitisha cidwi. Pa nthawi iyakine mkwasu Herb Jennings, c wamene naye enze m’mishonale, enzokamba nkhani ndipo eona ng’ombe yathaŵa kufumila ku malo kwenzoisungila nopanama pakati pa pulatifomu na ŵanthu. Mkwasu Herb eleka kulaŵila nkhani ndipo ng’ombe iyi yenzooneka monga yangazima. Koma akwasu 4 otang’a mtima ekwanisha kuiŵezhyela kweyenzonkhala.

Mkati mwa wiki nenzoonesha filimu ya mutu wakuti The New World Society in Action ku minzi ya pafupi. Kuti nikwanishe kucita izi, nenzomanga nyula ituŵa pakati pa vimiti viŵili, noonesha filimu iyi poseŵenzesha pulojekita. Ŵanthu a m’munzi eikonda ngako! Kwa anyinji, kwenze kuyamba kuonelelako vidyo. Ove enzoomba ngako m’manja akaona mbali ziyakine zenzoonesha ŵanthu obatizika. Vidyo iyi yeyavya ŵanthu aŵa kuzindikila kuti Mboni za Yehova n’zokatizhyana pacalo conse.

Pavuli potumikila mu Africa vyaka pafupifupi viŵili, mu 1958 nesangalala ngako kuyopezeka pa msonkhano wa vyalo mumzinda wa New York. Nesangalala ngako kuonana soti na Sheila, wamene efumila ku Quebec, kwamene enzotumikila monga mpainiya wapadela. Tenzolaŵizhyana kupitila m’makalata, koma pa nthawi iyi pofwana kuti tenze pamozi, nemukonshela ndipo yove evomela. Nelembela mkwasu Knorr d ndipo nemukonsha ngati Sheila angayoloŵa Sukulu ya Giliyadi kuti tikatumikile pamozi ku Africa. Yove evomela. Pavuli pake, Sheila eŵela ku Ghana. Ndipo pa October 3, 1959 telungulana ku Accra. Teona kuti Yehova etidalisa cifukwa comuika pasogolo mu umoyo wasu.

Mu 1961, etituma ku Cameroon. Cifukwa cakuti akwasu enze enisenga kuti niyavye kunkhazikisha ofesi ya msambo yalomba, nenzonkhala otangwanika ngako. Ndipo cifukwa cakuti nenze neikiwa kuti nikoyanganila nchito ku Cameroon, nenze na zinyinji zakuti niphunzile. Koma mu 1965 tezindikila kuti Sheila enze na vumo. N’cendi kuti kuganizila kunkhala makolo cenze lini cipepu ndipo zetitolela nthawi kuti tijaile. Koma petenzoganizila kuwelela ku Canada, pecitika cinthu ciyakine comvwisha cisoni.

Sheila epita mwatyala. Adokota etiuzhya kuti mwana uyu enze munalume. Olo kuti papita vyaka 50 kucoka pevecitika, tuluŵa lini zecitika. Olo kuti zinthu zecitika zetikhumudwisa ngako, tepitilizhya kucita utumiki wetenzokonda.

Ku Cameroon, akwasu na azilongosi enzonzunziwa mowelezhyawelezhya cifukwa cosatolamo mbali m’ndale. Cinzunzo ici cekulilako ngako pa nthawi yenzosankha msogoleli wa calo. Ndipo pa May 13, 1970, cinthu ciyakine camene tenzociyembekezela lini cecitika. Nchito ya Mboni za Yehova yeleshewa. Boma yelonda ofesi yasu ya msambo yamene yenze yengomangiwa calombapano. Mu wiki tyala imozi, amishonale onse kuyangizhyilapo Sheila na neo teuzhyiwa kuti ticoke m’calo ici. Ndipo cifukwa cakuti tenzoŵakonda ngako akwasu na azilongosi, tecita nkhaŵa poganizila zingaŵacitikile msogolo.

Tetumiwa ku ofesi ya msambo ya ku France kwa miyezi 6. Ndipo nepitilizhya kucita zonse zaningakwanishe kuti niyavye akwasu na azilongosi ku Cameroon. Mu December caka camene ico, neuzhyiwa kuti nikatumikile pa ofesi ya msambo ku Nigeria, yamene niye yenzoyanganila nchito yenzocitika ku Cameroon. Akwasu na azilongosi ku Nigeria etilandila mwacimwemwe, ndipo tesangalala kutumikila ku calo ici kwa vyaka vinyinji.

Mu 1973, tenzofunika kupanga cosankha ciyakine camene cenze covuta. Sheila enzokumana na mavuto ayakine athanzi. Tetyo petenze ku msonkhano ku New York, elaŵila kuti: “Ningakwanishe lini kupitilizhya kucita zanucita. N’ne woŵeŵa ndipo kanyinji-kanyinji nulwala.” Tankhala tutumikila pamozi kum’mwela kwa Africa kwa vyaka vopitilila 14. Nenzomuyamikila ngako cifukwa cotumikila mokhulupilika. Olo n’tetyo, tenzofunika kupanga masinthidwe. Pavuli polaŵizhyana nopemphela kufumila pansi pa mtima, teganiza zowelela ku Canada kuti tikasamalile bwino thanzi yake. Kusiya utumiki waumishonale koma soti utumiki wanthawi zonse, cenze cosankha covuta ngako cetenzofunika kupanga.

Petefwika ku Canada, muyangu muyakine wenenzoziŵana naye koma soti wamene enzocita bizinesi yogula nogulisa mamotoka mu tauni, kumpoto kwa Toronto enipezela nchito. Teyamba kucita lendi ng’anda, tegula katundu wakuti weseŵenzeshewako kale ndipo tekwanisha kuyamba umoyo walomba cosaloŵa m’nkhongole. Tenzofuna kupitilizhya kunkhala na umoyo wosalila zinyinji na colinga cakuti siku iyakine, tikayambe soti kucita utumiki wanthawi zonse. Tedabwa ngako  peteona kuti tekwanisha kucita izi pakaliyopita nthawi itali.

Neyamba kuyavyako nchito pa cimango comanga Malo Ocitilapo Misonkhano ku Norval, Ontario kosilizhyila kwa wiki iliyonse. M’kuluta kwa nthawi, neyamba kutumikila monga woyanganila Malo Ocitilapo Misonkhano. Ndipo thanzi ya Sheila peyeyamba kunkhalako bwino, teona kuti tingakwanishe kucita utumiki uyu walomba. Tetyo mu June 1974, teyamba kunkhala mu ng’anda yenze pa Malo Ocitilapo Misonkhano. Tesangalala ngako kuwelela soti mu utumiki wanthawi zonse.

N’zosangalasha kuti thanzi ya Sheila yepitilizhya kunkhala bwino. Pavuli pa vyaka viŵili, teyamba kutumikila m’dela. Dela iyi yenze ku mzinda wa Manitoba, ku Canada kwamene kuziŵika kuti nikozizila ngako. Olo n’tetyo, akwasu na azilongosi ni acikondi. Tetyo, tephunzila kuti ziliye kanthu kwatutumikila. Cinthu cofunika ngako ni kupitilizhya kutumikila Yehova kulikonse kwatingankhale.

Pavuli potumikila kwa vyaka m’dela, mu 1978 neuzhyiwa kuti nikatumikile pa ofesi ya msambo ku Canada. Pakaliyopita nthawi itali, nephunzila phunzilo yovuta koma yofunika ngako. Nenze nepasiwa nkhani ya ola imozi na hafu mu Cifulenci pa msonkhano wapadela ku Montreal. Comvwisha cisoni n’cakuti nkhani yangu yenze lini yokata mtima kwa omvwishila. Ndipo cifukwa ca izi, mkwasu wotumikila mu Dipatimenti ya Utumiki enipasa uphungu. Apa, nenzofunika kuvomelezhya kuti nenzeve mphaso yolaŵila. Koma niliyoulandile bwino uphungu uyu. Makambilano yasu yaliyosile bwino ndipo nekalipa poganiza kuti mkwasu uyu enze wovuta ngako ndipo aliyoniyamikile pa zabwino zenecita. Nesokoneza kuona uphungu uyu mosayenelela, tyala cifukwa coona mweciupelekela koma soti mwenenzoonela munthu eupeleka.

Masiku atontho pavuli pake, mkwasu wa m’Komiti ya Msambo elaŵila nane za nkhani iyi. Nevomelezhya kuti niliyoulandile bwino uphungu ndipo niliyocite bwino. Pavuli pake, nelaŵizhyana na mkwasu wamene enze enipasa uphungu. Ndipo yove enikhululukila mwacikondi. Cocitika ici ceniphunzisa kufunika konkhala olicefya, ndipo nikaluŵe lini. (Miy. 16:18) Nankhala nupemphelela nkhani iyi. Ndipo n’ne wosimikizhya kupewa maganizo olakwika ngati muyakine wanipasa uphungu.

Nankhala nutumikila pa ofesi ya msambo ya ku Canada kwa vyaka vopitilila 40. Ndipo kuyambila mu 1985, nankhala na mwai wotumikila m’Komiti ya Msambo. Mu February 2021, mkazi wangu wokondeka Sheila emwalila. Kuyangizhyila pa kuyewa mkazi wangu, nukumana soti na mavuto athanzi. Koma utumiki wa Yehova uniyavya kunkhala wotangwanika koma soti osangalala cakuti “nuona kuti masiku ya moyo wangu yoyenda kamangu ngako.” (Mla. 5:20) Olo kuti nankhala nukumana na mavuto yanyinji mu umoyo wangu, nankhala soti na zocitika zinyinji zamene zanicitisha kunkhala na cimwemwe. Kuika Yehova pasogolo mu umoyo wangu koma soti kunkhala mu utumiki wanthawi zonse kwa vyaka 70, cankhala cinthu cokhutilisha. Tetyo, nupemphelela akwasu na azilongosi acilumbwana kuti nao akoika Yehova pasogolo mu umoyo wao. N’ne wosimikizhya kuti nao, asangalale na moyo wokhutilisha koma soti wocitisha cidwi wamene ukwanishika, tyala cifukwa cotumikila Yehova.