1-2. Kansi n’cinji cupangisha atumiki a Mulungu kunkhala osangalala? (Yakobo 1:​22-25)

 YEHOVA na Mwana wake wokondeka ofuna kuti tikosangalala. Munthu wamene elemba Salimo 119:​2, elaŵila kuti: “Osangalala ni ŵanthu amene osunga zikumbuso zake, amene omusakilasakila na mtima wao wonse.” Naye Yesu elaŵila kuti: “Osangalala ni ŵanthu akumvwa mau a Mulungu noyasunga!”—Luka 11:28.

² Monga atumiki a Yehova, nise ŵanthu osangalala. Ndaŵa yanji? Tili na vifukwa vinyinji, koma cifukwa cimozi cofunika ngako n’cakuti tuŵelenga Mau a Mulungu nthawi zonse noyesayesa kuseŵenzesha zatuphunzila.—Ŵelengani Yakobo 1:​22-25.

 3. Kansi tupindula tyani ngati tuseŵenzesha zatuŵelenga m’Mau a Mulungu?

³ Tupindula m’njila zinyinji ngati ‘tucita zayolaŵila mau.’ Mwacisanzo, ngati tucita zatuphunzila m’Mau a Mulungu, tukondwelesha Yehova. Ndipo izi zuticitisha kunkhala osangalala. (Mla. 12:13) Ngati tuseŵenzesha zatuŵelenga m’Mau ouzhyiliwa a Mulungu, zutiyavya kunkhala pa ushamwali uweme na ŵanthu a m’banja yasu koma soti olambila ayasu. Payakine umu niye mwazilili zinthu pa umoyo wanu. Tetyo, tupewa kukumana na mavuto yakukumana nayo ŵanthu amene ofuna lini kumvwila malamulo a Yehova. Izi zukatizhyana na zecikamba Mfumu Davide. Pavuli pofotokoza za cilamulo, zigamulo na ziweluzo za Yehova m’nyimbo, esilizhya na mau akuti: “Munthu wamene osunga zigamulo zamene izo opeza mphoto ikulu.”—Sal. 19:​7-11.

 4. Ndaŵa yanji n’cinthu covuta kucita zayolaŵila Mau a Mulungu?

⁴ Kulaŵila cendi, ni cinthu lini cipepu kwa seo kucita zayolaŵila Mau nthawi zonse. Zili teti cifukwa cakuti tunkhala otangwanika. Olo n’tetyo, tufunika kupatula nthawi yoŵelenga nophunzila Baibo kuti tikwanishe kuziŵa zakufuna Yehova kuti tikocita. Lomba, tiyeni tione ziyakine mwa zinthu zingatiyavye  kuti tikoiŵelenga nthawi zonse. Tione soti zingatiyavye kuti tikoganizila zatuŵelenga noona njila mwatingaziseŵenzeshele mu umoyo wasu.

MUKOPATULA NTHAWI YOŴELENGA MAU A MULUNGU

 5. Kansi ni zinthu ziyakine zotyani zuticitisha kunkhala otangwanika?

⁵ Anyinji mwa atumiki a Yehova onkhala otangwanika. Tuseŵenzesha nthawi ikulu kusamalila maudindo ofunika ngako. Mwacisanzo, anyinji a seo tuseŵenza nchito zolembewa kuti tikozisamalila seka nosamalila mabanja yasu. (1 Tim. 5:8) Ayakine osamalila abululu wao olwala koma soti acikulile. Ndipo tonse tufunika kusamalila thanzi yasu, zamene zutola nthawi. Kuyangizhyila pa maudindo yatili nayo, tili soti na zinthu zofunika ngako zatufunika kucita mumpingo. Ndipo cimozi mwa zinthu izi, ni kutolamo mbali mokwanila mu nchito yolalikila. Pofwana kuti tili na maudindo aya, kansi tingapeze tyani nthawi yoŵelenga Baibo nthawi zonse, kusinkhasinkha noseŵenzesha zatuphunzila?

 6. Kansi mungacitenji kuti mukoŵelenga Baibo nthawi zonse? (Onani soti cithunzithunzi.)

⁶ Kuŵelenga Baibo ni cimozi mwa “zinthu zofunika ngako” kuli seo Akhristu. Tetyo, tufunika kucita zilizonse zatingakwanishe kuti tikoiŵelenga. (Afil. 1:10) Ponena za munthu wosangalala, Salimo yoyamba yukamba kuti: “Okonda ngako cilamulo ca Yehova, ndipo oŵelenga noganizila mosamala cilamulo camene ici mzuŵa na usiku.” (Sal. 1:​1, 2) Izi zutanthauza kuti tufunika kupatula nthawi yoŵelenga Baibo. Kansi ni nthawi yotyani yamene ingankhale yabwino kuŵelenga Baibo? Aliyense wa seo angasankhe nthawi yaangaŵelengelemo. Koma cofunika ngako ni kusankha nthawi yamene ingatiyavye kuŵelenga Baibo nthawi zonse. Mkwasu wa zina yakuti Victor elaŵila kuti: “Nukonda kuŵelenga Baibo m’mawa. Olo kuti nukonda lini kuuka m’mawa ngako, iyi niye nthawi yabwino cifukwa cakuti ponkhala zosokoneza zitontho cakuti nukwanisha kuika maganizo ŵangu pa zinthu zanuŵelenga.” Payakine umu niye mwazilili zinthu kuli mweo. Tetyo  mungazikonshe kuti, ‘Kansi ni nthawi yotyani ingankhale yabwino kuli neo kuti nikoŵelenga Baibo?’

MUKOSINKHASINKHA PA ZAMUŴELENGA

7-8. Kansi n’cinji cingacitishe kuti tisapindule mokwanila na zatuŵelenga? Fotokozani cisanzo.

⁷ Ngati mwapatula nthawi yoŵelenga Baibo, pali soti cinthu ciyakine camufunika kunkhala naco osamala. Kansi zekucitikilamponi kuti mwaŵelenga zinthu ziyakine koma pavuli pake osakumbukila zamwaŵelenga? Tonse zoteti zeticitikilapo. Ndipo zingaticitikile soti patuŵelenga Baibo. Mwacisanzo, payakine tingaziikile colinga coŵelenga macaputa ayakine a m’Baibo siku iliyonse. Kucita izi n’kwabwino. Koma tufunika kuziikila zolinga noyesayesa kuzikwanilisha. (1 Akor. 9:26) Olo n’tetyo, tufunika kucita zinyinji osati tyala kuŵelenga Baibo, ngati tufuna kupindula mokwanila na zatuŵelenga.

⁸ Ganizilani cisanzo ici: Mvula ni yofunika kuti vomela vipulumuke. Koma ngati mvula ingalokwe ngako m’kanthawi katontho, niye kuti nthaka ingacite loŵe. Ngati izi zingacitike, niye kuti vomela vingapindule lini. Tetyo, zunkhala bwino ngati mvula yulokwa patontho-patontho cifukwa niye pamene manzi yoloŵa bwino m’nthaka noyavya vomela kuti vikule. Molingana na izi, nase tufunika kupewa kuŵelenga Baibo mofulumila zamene zingacitishe kuti tisoŵe nthawi yosinkhasinkha, kukumbukila zataŵelenga noziseŵenzesha.—Yak. 1:24.

 9. Kansi tufunika kucita cinji ngati tazindikila kuti tuŵelenga Baibo mofulumila?

⁹ Kansi muona kuti nthawi ziyakine mukonda kuŵelenga Baibo mofulumila? Ngati n’tetyo, kansi mufunika kucita cinji? Mufunika kuŵelenga patontho-patontho kuti mukonkhala na nthawi yoganizila zamuŵelenga. Kucita izi ni kosavuta. Payakine mungafunike kutalimphishako nthawi yamucita phunzilo ya pamweka na colinga cakuti mukoganizilapo pa zamwaŵelenga. Olo payakine mungasankhe kuŵelenga mavesi yatontho noseŵenzesha nthawi yamwasala nayo kuganizila pa zamwaŵelenga. Mkwasu Victor watomolewa lombapano, elaŵila kuti: “Nuŵelenga tyala  caputa cimozi. Ndipo pofwana kuti nuŵelenga m’mawa, zuniyavya kuti nikoganizila pa zanaŵelenga kwa siku yonse.” Ziliye kanthu njila yamungasankhe kuŵelengelamo. Cofunika n’cakuti mukopindula mokwanila na zamuŵelenga.—Sal. 119:97; onani kabokosi kakuti “ Makonsho Ofunika Kuganizilapo.”

10. Fotokozani cisanzo coonesha mwamungaseŵenzeshele zamuphunzila. (1 Atesalonika 5:​17, 18)

¹⁰ Mosasamala kanthu za nthawi yamuŵelenga Baibo koma soti kukula kwa nthawi yamutola kuiŵelenga, mukonkhala osimikizhya kuona njila yamungaseŵenzeshelemo zamuŵelenga. Pamuŵelenga Mau a Mulungu, zikonsheni kuti, ‘Kansi ningaseŵenzeshe tyani zanaŵelenga pali lomba koma soti msogolo?’ Mwacisanzo, ganizilani kuti muŵelenga 1 Atesalonika 5:​17, 18. (Ŵelengani.) Pavuli poŵelenga mavesi aŵa, mungapaname nozikonsha kuti, ‘Kansi nupemphela kangani mofumila pansi pa mtima?’ Kuyangizhyila apo, mungaganizile vinthu vamufuna kuyamikila. Mwacisanzo, payakine mungasankhe kuyamikila Yehova pa vinthu vitatu vofunika ngako. Tetyo, olo kuti mungatole maminesi yatontho kuganizila pa vinthu vamwaphunzila m’Baibo, zingakuyavyeni kuti mukomvwishisha Mau a Mulungu nocita zayolaŵila. Ngati museŵenzesha zamuphunzila m’Mau a Mulungu nthawi zonse, m’kuluta kwa nthawi mungankhale mtumiki wa Yehova wabwino. Kansi mufunika kucita cinji ngati muona kuti pali mbali ziyakine zamufunika kuseŵenzelapo?

MUKOZIIKILA ZOLINGA ZAMENE MUNGAZIKWANILISHE

11. Ndaŵa yanji nthawi ziyakine tingakhumudwe? Fotokozani cisanzo.

¹¹ Pamuŵelenga Baibo, payakine mungakhumudwe pavuli pozindikila kuti pali mbali zinyinji zamufunika kuongolela. Mwacisanzo, ganizilani kuti siku iyakine pamuŵelenga Baibo mwapeza malangizo okhuza kukondela. (Yak. 2:​1-8) Ndipo mwaona kuti mufunika kucinja mwamucitila zinthu na ŵanthu ayakine. Tetyo mwaganiza zopanga masinthidwe. Kucita izi n’kofunika ngako! Siku yokonkhapo, muŵelenga mavesi yoonesha kufunika konkhala osamala na zamulaŵila. (Yak. 3:​1-12) Ndipo muzindikila kuti nthawi ziyakine mulaŵila mau okhumudwisha kuli ayakine. Tetyo, mwasimikizhya kuti mukonkhala osamala na kuti mukolaŵila mau olimbikisha kuli ŵanthu ayakine. Ndipo pa siku ya namba 3 pamuŵelenga Baibo, mupeza soti cenjezo yoonesha kufunika kopewa kunkhala mbali ya calo. (Yak. 4:​4-12) Muzindikila soti kuti mufunika kunkhala osamala ngako pamusankha zinthu zamufuna kuŵelenga, kuonelela nomvwishila. Pofwika pa siku ya namba 4,  payakine mungakhumudwe na zinthu zonse zamufunika kuongolela.

12. Ngati pamuŵelenga Baibo mwaona kuti pali mbali zinyinji zamufunika kucinja, ndaŵa yanji mufunika lini kukhumudwa? (Onani soti mau a m’nyansi.)

¹² Ngati muona kuti pali mbali zinyinji zamufunika kuongolela, mufunika lini kukhumudwa. Uyu ni umboni wakuti nimwe olicefya koma soti muli na zolinga zoyenela. Munthu wolicefya oŵelenga Malemba na colinga cakuti akoona mbali zakufunika kuongolela. a Mukokumbukila kuti tufunika kupitilizhya kuvwala “umunthu walomba.” (Akol. 3:10.) Kansi n’cinji cingakuyavyeni kupitilizhya kucita zayolaŵila Mau a Mulungu?

13. Kansi ni njila yabwino yotyani yatingaseŵenzeshelemo zataphunzila? (Onani soti cithunzithunzi.)

¹³ M’malo moyesa kuseŵenzesha zinthu zonse zamwaphunzila pa nthawi imozi, mungacite bwino kuziikila zolinga zamungakwanilishe. (Miy. 11:2) Mungayese kucita izi: Lembani m’ndandanda wa zinthu zamufuna kuseŵenzelapo ndipo sankhani cimozi olo viŵili kuti museŵenzelepo nosiya viyakine kuti mukaseŵenzelepo msogolo. Kansi mungayambile pani?

14. Kansi mungayambile na zolinga zotyani kuti muongolele mbali zamusacita bwino?

¹⁴ Mungasankhe kuyambila na colinga camene ni cosavuta kwa mweo kucikwanilisha. Olo payakine mungasankhe kuyambila na mbali yamuona kuti mufunika ngako kuongolela. Ngati mwazindikila mbali zamufunika kukatilapo nchito, mungacite bwino kufufuza mu zofalisa zasu, olo payakine mungaseŵenzeshe Watch Tower Publications Index olo Buku Lofufuzila Nkhani la Mboni za Yehova. Ndipo mukopemphela kwa Yehova, kuti  akupaseni “mtima wofuna kucita zinthu zamene yove ozikonda koma soti mphamvu zocitila zinthu zamene izo.” (Afil. 2:13) Pavuli pake, mukoyesa kuseŵenzesha zamwaphunzila. Ngati mwaona kuti mwakwanisha kupanga masinthidwe, zikulimbikisheni kuti mupitilizhye kucinja. Kuyangizhyila apo, zikonkhala zosavuta kuli mweo kuti mukopanga masinthidwe ayakine.

MUKOLOLA MAU A MULUNGU KUKATA “NCHITO MULI MWEO”

15. Kansi atumiki a Yehova osiyana tyani na ŵanthu anyinji amene oŵelenga Baibo? (1 Atesalonika 2:13)

¹⁵ Ŵanthu ayakine okamba kuti ankhala oŵelenga Baibo mowelezhyawelezhya. Koma kansi okhulupilila cendi zayulaŵila Baibo? Kansi oseŵenzesha zayulaŵila olo kuilola kuti icinje umoyo wao? Yai. Ŵanthu anyinji okonkha lini malangizo a m’Baibo. Koma atumiki a Yehova osiyana ngako na ŵanthu aŵa. Molingana na Akhristu a m’vyaka 100 voyambilila, seo tuona Baibo “monga Mau a Mulungu.” Niye cifukwa cake tucita zilizonse zatingakwanishe kuti tikoseŵenzesha malangizo a m’Baibo mu umoyo wasu.—Ŵelengani 1 Atesalonika 2:13.

16. Kansi n’cinji cingatiyavye kuti tikocita zayolaŵila Mau?

¹⁶ Ni cinthu lini cipepu nthawi zonse kuŵelenga noseŵenzesha Mau a Mulungu. Nthawi ziyakine tingavutike kuti tipeze nthawi yoŵelenga. Payakine tingoŵelenga mofulumila nokangiwa kuganizila pa zataŵelenga. Olo payakine tingakhumudwe na zinthu zonse zatufunika kuongolela. Olo kuti kucita izi kungankhale kovuta, tingakwanishe moyavyiwa na Yehova. Tiyeni tinkhale osimikizhya kulandila thandizo yake na kuti osati tikoluŵa zatuŵelenga, koma tikocita zayolaŵila Mau. Mosakaikila, ngati tuŵelenga nocita zayolaŵila Mau a Mulungu mu umoyo wasu, tikonkhala acimwemwe.—Yak. 1:25.