Paliye cifukwa coganizila kuti cifukwa cakuti ophunzila 70 penzeve Yesu peciyambisha mwambo wa Cakulya Camcingulo ca Asikulu, niye kuti ophunzila aŵa enze osavomelezhyeka olo kapena kuti enze emuthaŵa. Yesu enzofuna tyala kunkhala na atumwi ŵake pa cocitika ici.

Ophunzila ŵake 12 koma soti 70 enze ovomelezhyeka. Coyamba, Yesu esankha ophunzila ŵake 12 kufumila pa ophunzila ŵake anyinji ŵeenze nao ndipo eŵaita kuti atumwi. (Luka 6:​12-16) Yove enze ku Galileya “pecisonkhanisha atumwi 12,” ndipo “eŵatuma kuti akolalikila za Ufumu wa Mulungu koma soti kupolesha ŵanthu.” (Luka 9:​1-6) Pavuli pake, peenze mu Yudeya, Yesu “esankha ayakine 70 noŵatuma aŵili-aŵili.” (Luka 9:51; 10:1) Tetyo, Yesu enze na ophunzila m’madela osiyanasiyana amene enzolalikila zokhuza yove.

Cuoneka kuti Ayuda amene enkhala ophunzila a Yesu, epitilizhya kucita cikondwelelo ca Pasika pamozi na mabanja yao. (Eks. 12:​6-11, 17-20) Pekwesala patontho kuti apaiwe, Yesu na ophunzila ŵake eluta ku Yerusalemu. Olo n’tetyo, yove aliyosenge ophunzila ŵake onse ofumila ku Yudeya, Galileya na Pereya kuti awele kuzocitila pamozi cikondwelelo ca Pasika. N’zoonekelatu kuti Yesu enzofuna tyala atumwi wake pa cocitika ici. Yove euzhya atumwi wake kuti: “Nankhala nufunishisha kulya namwe Pasika uyu nikaliyoloŵa m’mayeselo.”—Luka 22:15.

Yove enze na cifukwa cabwino cocitila izi. Yesu enze esala patontho kufwa monga “Mwanawambelele wa Mulungu wamene ocosa ucimo wa calo.” (Yoh. 1:29) Izi zenze kuzocitikila mu Yerusalemu mwamene nsembe za Mulungu zenzopelekewa. Nsembe ya Pasika yenzokumbusha Aisiraeli kuti Yehova eŵapulumusa mwa kuŵacosa mu Iguputo. Kupitila mu nsembe yake, Yesu enze kuzocita zinyinji kupambana apa. Yove enze kuzomasula mtundu wa ŵanthu ku ucimo na imfwa. (1 Akor. 5:​7, 8) Cifukwa ca nsembe yecipeleka Yesu, atumwi ŵake 12 enze kuzonkhala mbali ya maziko a mpingo wacikhristu. (Aef. 2:​20-22) Cocitisha cidwi n’cakuti mzinda uyu utuŵa wa Yerusalemu wenze na “miyala yomangila maziko yokwana 12” ndipo pa miyala apa pelembewa “mazina 12 ya atumwi 12 a Mwanawambelele.” (Chiv. 21:​10-14) Tetyo, atumwi okhulupilika enze kuzocita mbali yofunika ngako pokwanilisha cifunilo ca Mulungu. Niye cifukwa cake n’pomvwika kuti Yesu enzofunishisha kuti ankhale nao pa cikondwelelo ca Pasika cosilizhyila koma soti pa Cakulya Camcingulo ca Asikulu camene cecitika pavuli pake.

Ophunzila a Yesu okwanila 70 koma soti ayakine, aliyonkhale naye pa cakulya ici. Olo n’tetyo, ophunzila onse amene eonesha kuti enze okhulupilika, enze kuzopindula na mwambo uyu wecinkhazikisha Yesu wamene ni Cakulya Camcingulo ca Asikulu. Atumwi ŵake onse amene m’kuluta kwa nthawi enkhala Akhristu ozozewa, enze kuzoloŵa m’pangano ya Ufumu yamene Yesu euzhya atumwi ŵake pa usiku wamene uyu.—Luka 22:​29, 30.