Aŵa ni mau osilizhyila yokhuza nyengo yecikamba ofufuza pa nkhani yokhuza kucinja kwa nyengo. Ngati mukhulupilila kuti Nyamalenga osamala za mtundu wa ŵanthu, mau aŵa ŵecikamba asayansi otikumbusha mwamene Mulungu ekonzela calo m’njila yakuti cikozikonza ceka.

Koma cifukwa cakuti ŵanthu aciononga ngako calo, n’zosakwanishika kuti cizikonze ceka. Ndaŵa yanji tingankhale na cidalilo cakuti Mulungu akacitepo kanthu?

Onani malemba ali mu kabokosi yamene yotisimikizhyila kuti calo cinkhalepo mpaka kale-kale.

• Calo celengewa na Mulungu. “Pa ciyambi Mulungu elenga kululu na calo.”—Genesis 1:1

• Mulungu niye mwineco wa calo. “Calo na zonse zilimo  ani za Yehova.”—Salimo 24:1

• Mulungu elenga calo kuti cinkhalepo mpaka kale-kale. “Mwankhazikisha calo pa maziko otang’a. Cikagwedezeke lini mpaka kale-kale, mpaka muyaya.”—Salimo 104:5

• Mulungu walonjeza kuti calo cipitilizhye kunkhalapo mpaka kale-kale. “Mulungu wacendi wamene epanga calo, . . . wamene aliyocipange paliye colinga, wamene ecipanga kuti ŵanthu ankhalemo.”—Yesaya 45:18

• Mulungu walonjeza kuti ŵanthu ankhale pacalo mpaka kale-kale. “Olungama akalandile calo ndipo akankhalemo mpaka kale-kale.”—Salimo 37:29

Mulungu epanga calo na colinga cakuti ŵanthu akosangalala na umoyo osati kuciononga. Baibo yulosela kuti pa nthawi yake yoyenela, Yehova Mulungu akaononge onse amene oononga calo.—Chivumbulutso 11:18

Baibo yulonjeza kuti Mulungu akasandushe calo kunkhala paladaiso wokongola “ndipo akakhutilishe cofuna ca camoyo ciliconse.”—Salimo 145:16