Ndaŵa Yanji Ŵanthu Aleka Kulemekeza Ayakine?
CIFUKWA CAKE KULEMEKEZA AYAKINE N’KOFUNIKA
Kulemekeza ayakine kucepesha mikangano ndipo kuyavya kuti zinthu zisafwike paipa.
-
Mwambi uyakine wa m’Baibo ukamba kuti: “Kuyankha modekha kuwezhya ukali, koma mau oŵaŵa oyambisha ukali.” (Miyambo 15:1) Kukamba kapena kucita vinthu vosaonesha ulemu kungankhale monga ni kusonkhela mulilo, ndipo kungankhale na zofumapo ziipa.
-
Yesu ekamba kuti: “Pakamwa polaŵila zili mumtima.” (Mateyu 12:34) Kusoŵa ulemu polaŵila kungaoneshe mwatumvwila olo mwatuganizila—pa ŵanthu ŵatusiyana nao mtundu olo kwetekulila.
Pa kafukufuku wecitika lombapano, pa ŵanthu 32,000 ocokela mu vyalo 28, 65 pesenti pa ŵanthu amene aŵa ekamba kuti kusoŵa ulemu kwayangizhyilika ngako masiku ŵano.
ZAMUNGACITE
Kaya muli ku nchito olo kusukulu, mukolemekeza ŵanthu ayakine olo kuti mukatizhyana lini na maganizo ŵao. Mukozindikila zinthu zamuona kuti mungakatizhyane nao. Kucita izi kungakuyavyeni kuti osati mukoŵaweluza olo kuŵapeza zifukwa.
Mukocitila ayakine zamungakonde kuti nao akucitileni. Ngati mucita zinthu zoonesha kuti muganizila ayakine, n’zoonekelatu kuti nao angocita namwe cimozimozi.
Mukokhululuka. Munthu muyakine akakukambilani olo kukucitilani vinthu viipa, mukovinyalanyaza.
ZATUCITA
Ku madela kwakunkhala a Mboni za Yehova, olimbikisha ŵanthu kulemekezana.
Tupeleka malangizo a m’Baibo mahala, koma tukakamizhya lini aliyense kukhulupilila zatukhulupilila olo kuyendela maganizo ŵasu. M’malomwake, tuyesayesa kukonkha malangizo a m’Baibo mwa kuuzhyako ayakine uthenga wasu “mofasa na mwaulemu.”—1 Petulo 3:15; 2 Timoteyo 2:24.
Tupewa sankho ndipo tulandila ŵanthu a vinkhalidwe vosiyanasiyana ku misonkhano yasu, amene ofuna kuphunzila cendi ca m’Baibo. Tuyesayesa kulolelana “noonesha ulemu ku ŵanthu onse.”—1 Petulo 2:17, New International Version.
Tulemekeza maboma a m’calo mwatunkhala. (Aroma 13:1) Tumvwila malamulo na kupeleka misonkho. Olo kuti tutolako lini mbali m’zandale, tulemekeza ufulu wa ayakine pa zosankha zangapange pa nkhani yokhuza ndale.
