Mwezi uliwonse, tuyembekezela mwacidwi kuti tionelele mavidyo yamene yotilimbikisha notisisimula mwauzimu pa JW Broadcasting. Koma anyinji mwa akwasu na azilongosi ku Africa ovutika kuti apindule na mapulogilamu aŵa. Ndaŵa yanji?

M’vyalo vinyinji mu Africa, intaneti yuvuta ngako ndipo kumadela ayakine network yukata lini. Vuto iyakine ni yakuti mabando a pa intaneti ni odula ngako. Mwacisanzo, woyanganila dela muyakine ku Madagascar enzofuna kucita daunilodi JW Broadcasting. Tetyo, eganiza za kuyocitila daunilodi pa malo popezeka intaneti, ndipo emuchaja ndalama zokwanila madola 16. Iyi ni ndalama ikulu ngako cifukwa yupambana ndalama zaangapeze ayakine pavuli poseŵenza kwa wiki imozi! *

Mosasamala kanthu za mavuto yatatomola, lomba ŵanthu mamiliyoni mu Africa okwanisha kuonelela JW Broadcasting, osati kupitila pa intaneti. Kansi izi zukwanishika tyani?

Kuyambila mu 2017, ŵanthu onkhala m’vyalo va kumm’wela kwa Africa okwanisha kuonelela JW Broadcasting kupitila pa chanelo ya JW yamene yupezeka pa TV. Ubwino wake ni wakuti ofunika lini kulipila ndalama iliyonse kuti akokwanisha kuonelela mapulogilamu pa chanelo iyi. Kuyangizhyila apo, mapulogilamu aŵa otambishiwa kwa siku yonse koma soti wiki yonse m’vilaŵilo 16.

Kuti izi zikwanishike, a Mboni za Yehova olipila ndalama zokwanila madola 12,000 mwezi uliwonse kuli makampani youlusa mapulogilamu pa tv. Izi zacitisha kuti ŵanthu onkhala m’vyalo 35 va kum’mwela kwa Africa ankhale na mwai wopindula na mapulogilamu auzimu. Ndipo nthawi ziyakine, a Mboni za Yehova olipila machanelo ayakine kuti auluse mapulogilamu apadela monga misonkhano yacigao na kuyendela kwa wopanamila likulu.

Ŵanthu anyinji, kuyangizhyilapo ŵala amene ni Mboni lini, ankhala na mwai woonelela mapulogilamu youlusiwa pa chanelo ya JW ku mang’anda kwao. Koma akwasu ayakine aliye ma TV, zamene zucitisha kuti cinkhale covuta kuti akoonelela mapulogilamu aya. Pofuna kuŵayavya, m’Mang’anda a Ufumu opitilila 3,670 mweikiwa ma TV kuti akwasu na azilongosi akokwanisha kuonelela JW Broadcasting. Tetyo, gulu yasu yuseŵenzesha ndalama pafupifupi madola 530 kuti paguliwe zofunikila zonse kuti akwasu akotamba pulogilamu iyi pa Ng’anda ya Ufumu. Koma ngati mpingo uli kale na TV olo pulojekita, gulu yuseŵenzesha ndalama pafupifupi madola 70 kuti paguliwe zofunikila ziyakine.

Akwasu na azilongosi oyamikila ngako makonzedwe aŵa. Mkwasu muyakine, wamene ni mkulu ku Cameroon, elaŵila kuti: “Monga banja, tusangalala ngako na makonzedwe aŵa. Ndipo tuona chanelo iyi monga mana yeenzopasiwa Aisiraeli m’cipululu.” Mkwasu Odebode wa ku Nigeria, elaŵila kuti: “Pa banja yasu, tuonelela mapulogilamu a pa chanelo ya JW katatu pa wiki. Ŵana ŵasu osangalala ngako na zakuonelela cakuti nthawi zinyinji otisenga kuti tiike ku chanelo ya JW.” Kalongosi Rose, wamene naye onkhala ku Nigeria, elaŵila kuti, “N’ne wokondwela ngako cifukwa lomba nuonelela chanelo ya JW m’malo moonelela machanelo otambisha nyuzi. Nthawi zinyinji, nenzokhumudwa ngako na zenenzotamba pa nyuzi cakuti BP yenzokwela. Koma mapulogilamu onse yanutamba pa JW Broadcasting ni yolimbikisha koma soti yosisimula. Paliye chanelo yanukonda monga ni mwanukondela chanelo ya JW. Ni daliso ikulu ngako yofumila kwa Yehova.”

Woyanganila dela muyakine wa ku Mozambique efotokoza kuti mipingo ili mu dela yake ili na ma TV koma soti mapulojekita. Tetyo, ofalisa oluta ku Ng’anda ya Ufumu kukali awala imozi kuti misonkhano iyambe na colinga cakuti aonelele JW Broadcasting pa chanelo yasu ya pa TV.

Pa msonkhano wacigao wa vyalo vosiyanasiyana wamene wecitikila ku Johannesburg, South Africa mu 2019, nkhani zikulu-zikulu koma soti nkhani zelaŵiliwa na mkwasu wa m’Bungwe Yolamulila, zeulusiwa ku mbali zokwanila 9 kupitila pa chanelo ya JW. Mkwasu Sphumelele wamene otumikila ku dipatimenti ya Local Broadcasting pa ofesi ya msambo ku South Africa, elaŵila kuti: “Kuti nikale, sembe teulusa nkhani izi kupitila pa intaneti. Koma sembe mavidyo yojamajama cifukwa ca kuvuta kwa intaneti. Kuyangizhyila apo, sembe teseŵenzesha ndalama zinyinji kuti tikwanishe kuulusa mapulogilamu aŵa. Koma cifukwa ca chanelo ya JW, tiliyoseŵenzeshe ndalama zinyinji ndipo mavidyo yenzojamajama lini cifukwa ca kuvuta kwa intaneti.”

Cifukwa ca zopeleka zamupanga, lomba akwasu na azilongosi ku Africa opindula kuonelela pulogilamu ya JW Broadcasting pa TV. Tukuyamikilani ngako cifukwa ca mzimu wawanzi wamuonesha mwa kupanga zopeleka poseŵenzesha njila zupezeka pa mbali yakuti donate.pr418.com.