Kupambana kale, zofalisa zinyinji za Mboni za Yehova lomba zupelekewa kupitila pa zipangizo zamakono. Koma m’madela anyinji, akwasu na azilongosi okwanisha lini kucita daunilodi zofalisa izi cifukwa cakuti intaneti ni yovuta ngako. Ndipo akwasu ayakine onkhala m’madela mwamene muliye intaneti.

Olo n’tetyo, lomba akwasu na azilongosi angacite daunilodi zofalisa za pa zipangizo zamakono paliye intaneti. Kansi zingakwanishike tyani?

JW Boksi ni kacipangizo katontho kamene kotumizhyiwa ku mipingo kwamene intaneti ni yovuta. M’kaboksi aka munkhala router yamene yuguliwa ku makampani. Akwasu a ku Dipatimenti ya makompyuta ku Beteli oikamo zofalisa na mavidyo zamene zili pa jw.org. Kaboksi kalikonse koguliwa pa mtengo wosacepekela pa $75 U.S.

Akwasu na azilongosi akafwika ku Ng’anda ya Ufumu, okwanisha kulumikizhya mafoni na mathabuleti ŵao ku JW Boksi mosavuta. Olo ŵala amene ni acikulile okwanisha kulumikizhya mosavuta. Olo kuti mpingo wanu uli m’dela mwamene muliye intaneti, mungacite daunilodi zofalisa mosavuta. Kansi JW Boksi yukwanisha tyani kunkhala na zofalisa zalombapano? Pakapita nthawi, akwasu a ku msambo otumizhya mafulashi yamene oikimo zofalisa na mavidyo alombapano kuti ziikiwe mu JW Boksi. Fulashi iliyonse yuguliwa pa mtengo wosacepekela pa $4 U.S.

Kansi JW Boksi yaŵayavya tyani akwasu na azilongosi? Mkwasu Nathan Adruandra wamene ni kolo ku Democratic Republic of Congo, efotokoza kuti: “Kucokela kale nankhala nuyesayesa kucita daunilodi sewelo ya mutu wakuti ‘Mulungu Wanga,  . . Cikhulupililo Canga Cili Mwanu” na yakuti Kumbukilani Mkazi wa Loti. Koma nenzokangiwa ndipo izi zenzonifookesha ngako. Lomba nukwanisha kucita daunilodi mavidyo aŵa pa foni yangu, ndipo izi zatiyavya seo makolo kuphunzisa bwino ŵana ŵasu.”

Mkwasu wamene oyavya mipingo ya ku Nigeria kuika kacipangizo aka ka JW Boksi elaŵila kuti: “Akwasu oona kuti JW Boksi ni mphaso yapadela yofumila kwa Yehova. Ni osangalala ngako cifukwa lomba okwanisha kucita daunilodi zofalisa zili pa mbali ya zofalisa zatuseŵenzesha pophunzisa ŵanthu.”

Zipangizo za JW Boksi zopitilila pa 1,700 zatumizhyiwa kale kuli akwasu a ku Africa, Oceania, na ku South America. Ndipo pali kale makonzedwe yakuti zipangizo izi zitumizhyiwe ku mipingo inyinji. Kansi ndalama zatucitila izi zufumila kuni? Zufumila mu tumabokosi twa zopeleka za pacalo conse ndipo zopeleka ziyakine zupelekewa kupitila pa donate.pr418.com. Tuyamikila ngako wanzi wanu pocilikiza nchito iyi.