“Nankhala nuyembekezela izi kwa vyaka 19!” Kansi n’cinji cenzoyembekezela mkwasu uyu? Ni Baibulo la Dziko Latsopano la Malemba Opatulika m’cilaŵilo cao, cilaŵilo ca Cibengali. Ŵanthu anyinji niye mwakucitila Babulo la Dziko Latsopano ikafumyiwa m’cilaŵilo cao. Koma kansi mweganizilapo zofunikila kuti Mabaibo aŵa amasuliliwe nofumyiwa?

Coyamba, pofunika timu yomasulila moyanganiliwa na Komiti Yoyanganila Nchito Yolemba Mabuku ya Bungwe Yolamulila. Kansi timu yomasulila yutola nthawi itali tyani kuti isilizhye kumasulila Baibo? Mkwasu Nicholas Ahladis, wamene oseŵenzela ku dipatimenti yomasulila ku Warwick, New York, eciti: “Pali zinthu zinyinji zuloŵeshewamo kuti Baibo ifumyiwe. Izi zuyangizhyilapo kuzikonsha makonsho akuti, ‘Ni omasulila angani ofunika pa nchito iyi? Citundu ici culaŵiliwa m’madela angati? Nanga ŵanthu oŵelenga citundu ici ocimvwisha tyani cinkhalidwe ca ŵanthu atomolewa m’Baibo? Kansi citundu ici culaŵiliwa mosiyana mu vipembezo vosiyanasiyana?’ Pa avaleji, popita vyaka vitatu kuti amasulile tyala Malemba Acigiriki Acikhristu ndipo angatole vyaka 4 olo kupitililapo kuti amasulile Baibo yonse. Ngati ni cilaŵilo ca manja cumasuliliwa, vyaka vupakilako.”

Kumasulila Baibo kuloŵeshamo zinyinji, osati kupeza tyala timu yomasulila. Pofunika gulu ya akwasu na azilongosi acinkhalidwe cosiyanasiyana ndipo nthawi ziyakine pangafunike kuita akwasu na azilongosi a m’vyalo viyakine kuti azeone zamasuliliwa paliye malipilo alionse. Zokamba zao zuyavya omasulila kumasulila Baibo molondola, momvwika bwino koma soti mwatanthauzo. Mkwasu ku South Africa wamene ophunzisa akwasu na azilongosi omasulila zofalisa zasu elaŵila kuti, “omasulila oona kuti ali na udindo wofunika ngako kwa Yehova na ku ŵanthu oŵelenga Mau ŵake.”

Baibo ikasila kumasuliliwa, yufunika kupulintiwa ndipo mapeji onse oikiwa pamozi. Kuti izi zicitike, opulinta oseŵenzesha “zinthu” 10 zosiyanasiyana monga: mapepa, inki, zinthu zopangila cikuto, gluu, ma cover liners, silver leaf, maliboni, ma headbands, ma spine stiffeners, na capping material, zamene zuyavya kuti mapepa a m’Baibo amangiwe pamozi. Mu 2019, teseŵenzesha ndalama zokwanila madola 20 miliyoni a ku America kugulila zinthu zopangila Mabaibo. Akwasu na azilongosi opulinta eseŵenza kwa maawazi opitilila 300,000 kuti apange notumizhya Mabaibo aŵa.

Ndaŵa yanji tutaya nthawi ikulu teti na ndalama zinyinji teti pa nchito iyi? Joel Blue wamene oseŵenzela ku Dipatimenti Yopulinta ya Pacalo Conse (International Printing Department), ekamba kuti: “Cifukwa cakuti Baibo niye cofalisa cofunika ngako pa zofalisa zonse, tufuna kuti kaonekedwe kake kakopeleka ulemelelo kwa Mulungu watulambila na ku uthenga watulengeza.”

Kuyangizhyila pa Baibulo la Dziko Latsotpano, tufumya soti Mabaibo yapadela ya ŵanthu asalolesha. Mwacisanzo, Mabaibulo la Dziko Latsopano ya ŵanthu asalolesha yalipo m’vilaŵilo 10 vosiyanasiyana. Kuti asilizhye kupanga Baibo imozi tyala mum’pangidwe wa vilembo va ŵanthu asalolesha, pofunika maawazi 8. Ndipo kuti mapeji onse akwanile pofunika pepa ya mamita 2.3. Tufumya soti Baibo yapadela ya ŵanthu ali m’jele amene ololewa tyala kunkhala na mabuku apadela.

Baibulo la Dziko Latsopano yukhuza miyo ya ŵanthu oiŵelenga. Ganizilani za mpingo wa citundu ca Cikiluba wamene uli m’dela yoitiwa kuti Tombe, m’calo ca Democratic Republic of the Congo. Dela ya Tombe ili pa msenga wa makilomita opitilila pa 1,700 ngati muyenda pa mseu wofumila ku Kinshasa. Mumpingo uyu mwenze tyala Baibo imozi, ndipo Baibo iyi yenze yomasuliliwa m’citundu cakale ngako ca Cikiluba. Ndipo akwasu onse enzopasiwa nkhani mumpingo uyu enzozhyamikana Baibo iyi kuti akakonzeleleko nkhani yao. Koma kufumila mu August 2018, aliyense wa mumpingo wa citundu ca Cikiluba ali na Baibulo la Dziko Latsopano ya mu cilaŵilo camakono.

Ponena za Baibulo la Dziko Latsopano yamene yefumyiwa m’cilaŵilo cao, kalongosi wamene olaŵila citundu ca Cigerman eciti: “Lomba nulaŵila lini kuti nufunika kuŵelenga Baibo. M’malomwake, nuzikosha tyala kuti, ‘Ni nthawi yotyani yaningaŵelenge zinyinji?’” Kaidi muyakine elemba kuti: “Nepasiwa Baibulo la Dziko Latsopano, ndipo lomba umoyo wangu ucinja. Nenze nikaloyoŵelengapo Mau a Mulungu m’citundu cosavuta kumvwa monga ni ici pa umoyo wangu wonse. Nufuna kuziŵa zinyinji zokhuza Mboni za Yehova, ndipo nane nufuna kunkhala wa Mboni.”

Ŵanthu onse amene oŵelenga Baibulo la Dziko Latsopano oyamikila zopeleka zamene zucilikiza nchito yomasulila Baibo iyi. Zopeleka izi za nchito ya pacalo conse zupelekewa poseŵenzesha njila zupezeka pa donate.pr418.com. Tukuyamikilani ngako cifukwa ca wanzi wanu pocilikiza nchito iyi.