Mavidyo ya msonkhano wacigao yotikhuza ngako ndipo yotiyavya kumvwisha bwino mfundo za m’Baibo. Msonkhano wacigao wa 2020 wa mutu wakuti “Kondwelani Nthawi Zonse”! uli na mavidyo 114 kuyangizhyilapo nkhani 43 zokambiwa na akwasu a m’Bungwe Yolamulila na othandiza ŵao. Kansi mweganizilapo kuti penze nchito ikulu tyani na kuti peseŵenzeshewa ndalama zingati kuti maviyo aŵa apangiwe?

Akwasu na azilongosi pafupifupi 900 pacalo conse eseŵenzesha nthawi yao na maluso ŵao kuti pulogilamu iyi ipangiwe. Akwasu aŵa eseŵenza maawazi pafupifupi 100,000 m’vyaka viŵili kuti asilizhye kupanga pulogilamu yonse. Kupanga sewelo ya m’Baibo ya maminesi 76 ya mutu wakuti Nehemiya: ‘Cimwemwe Cakupeleka Yehova ni Malo Acitetezo’ kweŵatolela maawazi 70,000.

Kuti nchito iyi ikwanishike, peseŵenzeshewa ndalama zinyinji ngako. Akwasu amene ezipeleka kuseŵenza nchito iyi enzofunika malo na zida zonse zofunikila.

Mkwasu Jared Gossman, wa m’Dipatimenti ya Audio/Video Services, ekamba kuti: “A Komiti Yoyanganila Nchito Yophunzisa ya Bungwe Yolamulila ofuna kuti m’mavidyo mukopezeka ŵanthu a zinkhalidwe zosiyanasiyana. Zili tetyo cifukwa tili pa ukwao wa pacalo conse. Tetyo n’zofunika kuti mavidyo aŵa akoonesha zinkhalidwe zonse. Kuti izi zikwanishike, pepangiwa matimu 24 ocokela m’vyalo 11 amene eseŵenzela pamozi. Kuti ŵanthu ocokela m’vyalo vosiyanasiyana aseŵenzele pamozi, pofunika ndalalama zinyinji, kulinganizhya bwino zinthu na kukatizhyana kwabwino.”

Mavidyo yasu yanyinji yofuna zida zapadela kuti yapangiwe. Mwacisanzo, popanga vidyo ya mutu wakuti Nehemiya: ‘Cimwemwe Cakupeleka Yehova ni Malo Acitetezo,’ akwasu emangilako vipupa viyakine mkati mwa studyo ya ku Mt. Ebo, yamene ili kufupi na ku Patterson, mumzinda wa New York, ku U.S.A. Pofuna kuti aseŵenzeshe bwino ndalama zupelekewa, akwasu emanga tuvipupa tosalila ndalama zinyinji, koma toonesha mwewenzoonekela Yerusalemu wakale. Izi zecitisha kuti filimu iyi ioneke monga ni ya m’nthawi zakale cendi. Cipupa ciliconse enzocipanga na mapulanga a mamita 6 kutalimpha kwake, yamene yenzopentewa kuti yakooneka monga ni mwala. Epanga “vipupa” ivi m’njila yakuti vikoyenda m’malo osiyanasiyana pokopa vocitika vosiyanasiyana va mu filimu. Izi zecitisha kuti acepesheko namba ya vipupa venzofunika kumangiwa. Olo n’tetyo, penzofunika ndalama pafupifupi $100,000 (U.S.) kuti timangile vipupa vopangilamo tyala sewelo iyi. *

Ciyamikilo casu pa msonkhano uyu wacigao cakula ngako, makamaka apa pataziŵako zitontho zecitika kuti pulogilamu ya msonkhano uyu ipangiwe. Nise osimikizhya kuti nchito yonse yecitika popanga pulogilamu ya msonkhano uyu icitishe kuti ŵanthu a pacalo conse atamande Yehova. Zikomo pa zopeleka zamupeleka poseŵenzesha donate.pr418.com na njila ziyakine. Zopeleka izi zucilikiza nchito ya pacalo conse.