Mu 2020 mwacitika masoka anyinji acilengedwe. Kuyangizhyila apo, kwewela mlili wa COVID-19, wamene wakhuza ŵanthu pacalo conse. Kansi Mboni za Yehova zathandiza tyani pa vocitika ivi?

M’caka ca utumiki ca 2020, * Komiti ya Ogwilizanisa ya Bungwe Yolamulila yevomelezhya kuseŵenzesha ndalama zokwanila madola 28 miliyoni * popeleka thandizo ku akwasu na azilongosi okhuziwa. Ndalama izi zeseŵenzeshewa pothandizila ŵanthu amene akhuziwa na masoka acilengedwe opitilila pa 200—kuyangizhyilapo mlili wa COVID-19, vimphepo vamkuntho, kusefukila kwa manzi mu Africa, kucepekela kwa vakulya ku Venezuela, na cilala ku Zimbabwe. Ndalama zopelekewa zeseŵenzeshewa polipilila zinthu monga vakulya, manzi, malo onkhala, vovwala, mankhwala, koma soti nchito yomanga kapena kukonza soti mang’anda amene eonongeka. Onankoni tyala visanzo vitontho va thandizo yepelekewa.

Mlili wa COVID-19. Pacalo conse, mlili uyu wakhuza akwasu na azilongosi mwamuŵili, mwamaganizo na pa nkhani ya zacuma. Pofuna kupeleka thandizo ku akwasu na azilongosi okhuziwa, pepangiwa makomiti opeleka thandizo opitilila pa 800 pacalo conse. Makomiti aŵa enzoona thandizo yakufunikila akwasu ndipo yenzopeleka malipoti mofulumila ku Komiti ya Ogwilizanisa ya Bungwe Yolamulila kuti aone mwaangapelekele thandizo yofunikila.

Mkati mwa caka conse, makomiti aŵa ethandizila popeleka thandizo ya vakulya, manzi na mankhwala. M’madela ayakine, makomiti aŵa ethandizila akwasu kuti alandileko thandizo yocokela ku boma.

Nao ŵanthu asali Mboni aona nchito yatucita popeleka thandizo ku madela okhuziwa na masoka acilengedwe. Mwacisanzo, a Field Simwinga, amene ni a district commissioner ku boma ya Nakonde, m’Zambia, euzhya akwasu kuti: “Tuyamikila ngako thandizo yamwapeleka ku mabanja okhuziwa. Thandizo iyi yawela pa nthawi yake.”

Kucepekela kwa Vakulya ku Angola. Cifukwa ca mlili wa COVID-19, vakulya vesoŵa ku Angola ndipo mitengo ya vinthu yekwela modesa nkhaŵa. Cenze covuta kwa akwasu na azilongosi anyinji kuti agule vakulya.

Ofesi ya msambo ya Brazil yepemphewa kuti ipelekeko thandizo ya vakulya ku akwasu a ku Angola. Pofuna kuti pasaonongeke ndalama zinyinji, akwasu eona mosamala vakulya vaangagule na mwaangavitumizhyile ku Angola. Vakulya ivi evilonga m’makatoni ndipo katoni iliyonse yenzotola tyala madola 22 kugula notumizhya. M’katoni iliyonse mwenzolongewa na vinthu monga mpunga, binzi na saladi. Pofwika pano, kwatumizhyiwa makatoni okwanila 33,544, kapena kuti mathani 654 a vakulya na vinthu viyakine. Ŵanthu opitilila pa 50,000 epindula na vakulya vocokela ku Brazil, kuikapo na vakulya vesonkhewa mu Angola!

Kansi akwasu akumvwa tyani na thandizo yecipasiwa? A Alexandre, amene onkhala kumadela akuminzi ku Angola, ekamba kuti: “Nuona kuti uyu ni umboni wakuti Yehova onikonda, na kuti nili lini neka. Yehova oniona kuti n’ne munthu wamtengo wapatali m’gulu yake!” A Mariza, amama amene olela ŵeka ŵana, ekamba kuti: “Yehova ecimvwa kulila kwangu. Numuyamikila ndipo nuyamikila soti gulu yake!”

Cilala ku Zimbabwe. M’caka ca utumiki ca 2020, ku Zimbabwe kwenze cilala coyofya, cakuti ŵanthu mamiliyoni enze pa njala yazaoneni. Mboni masauzande ku Zimbabwe zenzeve cakulya cokwanila.

Pepangiwa makomiti opeleka thandizo okwanila 5 kuti ayanganile nchito yopeleka thandizo ya vakulya ku akwasu. Ofalisa mahandiledi ethandizila kulonga vakulya, ndipo ayakine enzoseŵenzesha mamotoka ŵao popeleka vakulya ku madela ofunikila. * M’caka ca utumiki ca 2020, peseŵenzeshewa madola 691,561 popeleka thandizo ya vakulya ku ŵanthu opitilila pa 22,700!

Ku madela ayakine, thandizo ya vakulya yenzofwika pa nthawi yakuti akwasu vakulya vaŵasililatu. Izi zecitisha kuti atamande Yehova. Ayakine eyamba noimba nyimbo za Ufumu.

Kudela kuyakine, azilongosi aŵili eciyopezekako pa miting’i yokambilana za thandizo ya vakulya kucokela ku kabungwe kayakine kasali ka boma (NGO). Koma azilongosi aŵa eona kuti vinyinji venzokambiwa ni vokhuza zandale. Tetyo, azilongosi aŵa eona kuti cingankhale lini bwino kulandilako thandizo ya vakulya vocokela ku kabungwe aka, ndipo engocokapo pa miting’i ila. Ŵanthu eyamba kuŵanyoza noŵauzhya kuti, “Musakawele kuzosenga vakulya!” Koma pavuli pa masondo tyala yaŵili, akwasu eleta thandizo ya vakulya kudela uku ndipo nao azilongosi aŵa elandilako thandizo iyi, apa n’kuti kala kabungwe kakaliyenoleta thandizo ya vakulya!

Thandizo iyi yacitila soti umboni wabwino mu Zimbabwe. Mwacisanzo, ganizilani za cokumana naco ca Prisca, wamene onkhala m’kamunzi katontho. Olo kuti kwenze njala, Prisca enzokuya mu utumiki pa Citatu na pa Cisanu paliponse, olo pa nthawi yakuti ŵanthu ayamba kukomola mbeu ku munda. Ŵanthu a m’munzi mwake eyamba kumunena nokamba kuti: “Upaishe ŵana na njala na kukonda kwako kulalikila.” Koma Kalongosi Prisca enzoyankha kuti: “Yehova angasiye lini atumiki ŵake.” Pakaliyopita nthawi, elandila thandizo ya vakulya kucokela ku gulu yasu. Izi zecitisha cidwi ŵanthu ayakine a m’munzi, ndipo eyamba kumuuzhya kuti: “Taona kuti Mulungu aliyokusiye cendi. Lomba tufuna timuziŵe bwino Mulungu wamene uyu.” Ŵanthu okwanila 7 eyamba kumvwishila ku misonkhano yasu yamene youlusiwa pa wailesi.

Patufwika kosilizhyila kwa cino calo, tipitilizhye kukhuziwa na masoka acilengedwe. (Mateyu 24:3, 7) Tuyamikila ngako zopeleka zanu zocilikizila nchito ya pacalo conse. Ayakine mupeleke zopeleka izi kupitila pa donate.pr418.com. Zopeleka izi zuthandizila soti akwasu na azilongosi amene akhuziwa na masoka acilengedwe.