Pofwana kuti ŵanthu masauzande anyinji obatizika caka ciliconse, tufunika kunkhala na malo anyinji olambililamo. Kuti izi zikwanishike, a mu Dipatimenti ya Local Design/Construction enzofuna kumanga olo kukonza soti malo olambilila opitilila 2,700 pacalo conse mu caka ca utumiki ca 2020. *

Koma izi ziliyokwanishike cifukwa ca mlili wa COVID-19. A Komiti Yoyanganila Nchito Yofalisa Mabuku ya Bungwe Yolamulila pofuna kuteteza akwasu na azilongosi a mu LDC, na kuti akonkhe malamulo a boma, epanamika nchito zinyinji zomanga malo ŵasu olambilila pacalo conse. Olo n’tetyo, mu caka ca utumiki ca 2020, mlili ukaliyoyamba, pemangiwa nokozewa soti malo olambilila opitilila 1,700. Kuyangizhyila apo, kusilizhya nchito zikulu-zikulu zomanga maofesi ya msambo opitilila 100. Onani mwaapindulila akwasu cifukwa cosilizhya kumanga maofesi aŵili a msambo.

Ofesi ya Msambo ya ku Cameroon. Ofesi yao yamene yenze ku dela ya Douala, yenze itontho ngako ndipo yenzofunikila kukonzewa soti mbali zinyinji. A Komiti Yoyanganila Nchito Yofalisa Mabuku enze evomelezhya zakuti ofesi iyi ikonzewe soti, koma penzofunikila ndalama zinyinji zamene zenze zolinganako na kumanga iyakine. Akwasu efufuza soti za ndalama zaangaseŵenzeshe kumanga ofesi iyakine olo kukonza soti yakale, koma epeza kuti zulinganako.

Akaluganizila zaangacite, ecimvwa kuti a boma ofuna kupanga mseu wamene wenzopitila pafupi na Assembly Hall yasu iyakine ya kumpoto kwa Douala. Eziŵa kuti mseu uyu ulete citukuko ku dela iyi. Ndipo eona soti kuti citukuko ici ni cimozi mwa ziyeneleso za ofesi ya msambo. Tetyo, Bungwe Yolamulila yevomelezhya zakuti ofesi ya msambo imangiwe pa malo ya Assembly Hall iyi.

Gulu yasu yebuking’a makontilakita kuti aseŵenzele pa cimango ici, zamene zecitisha kuti tisunge nthawi na ndalama. Ndipo posila kwa cimango ici, teseŵenzesha ndalama zopitilila pa madola 2 miliyoni (U.S.) Izi zenze ndalama zitontho tikalinganizhya na zetenzoyembekezela kuseŵenzesha! Banja ya Beteli ya ku Cameroon yekwanisha kukukila ku ofesi ya msambo iyi yanyowani ukaliyoyamba mlili wa COVID-19.

Akwasu a ku Cameroon amene oseŵenzela pa Beteli apindula ngako na ofesi iyi cifukwa oseŵenzela pa malo aweme, ndipo akwasu aŵa oona ofesi iyi ya msambo monga mphaso yofumila kwa Yehova. Banja iyakine yamene yuseŵenzela pa Beteli iyi yelaŵila kuti, “Tufuna kuseŵenza mwamphamvu ngako kuti tioneshe kuyamikila mphaso iyi.”

Ofesi Yomasulila Mabuku (RTO) ya Citojolabal, ku Mexico. Kwa vyaka vinyinji, omasulila cilaŵilo ca Citojolabal ankhala omasulilila ku ofesi ya msambo ya ku Central America, yamene ili mumzinda wa Mexico. Koma cilaŵilo ici culaŵiliwa na ŵanthu a kudela ya Altamirano na ku Las Margaritas—pafupifupi makilomita 1,000. Izi zenzocitisha kuti akwasu omasulila citundu ici akovutika kukumbukila mau na kalaŵilidwe kalomba ka cilaŵilo cao ca Citojolabal. Ndipo enzovutika kupeza akwasu na azilongosi oyenelela kuti aŵayave kumasulila cilaŵilo ici na kulekoda.

Cifukwa ca izi, Komiti Yoyanganila Nchito Yolemba Mabuku ya Bungwe Yolamulila yepanga zakuti akwasu aŵa alute kudela kuli ŵanthu olaŵila Citojolabal. Kuti izi zikwanishike, ofesi ya msambo yeganiza zogula ng’anda noikonza soti. Kucita izi kwenze kochipa kupambana kumanga ofesi olo kulenting’a ng’anda.

M’mozi mwa omasulila aŵa efotokoza kuti: “M’vyaka vonse 10 vanaseŵenzela pa ofesi ya msambo, niliyokumaneko na banja iliyonse yamene yenzolaŵila citundu cangu pafupi na ofesi ya msambo. Koma lomba, ofesi yomasulila ili pakati pa ŵanthu olaŵila citundu ca Citojolabal. Nulaŵila na ŵanthu okamba Citojolabal siku iliyonse. Izi zacitisha kuti nikolaŵila bwino citundu cangu ndipo zacitisha soti kuti nikulishe luso yocimasulila.”

Mu caka ca utumiki ca 2021, ngati zingakwanishike, pali mapulani yomanga maofesi yomasulila (RTO) okwanila 75 na malo ocitilamo Masukulu Ophunzisa Baibo. Ndipo nchito yomanga maofesi akulu-akulu 8 ipitilizhye. Vimango ivi vuyangizhyilapo cimango ca ku Ramapo, New York, nokukisha maofesi a msambo ya ku Argentina na Italy. Kuyangizhyila apo, pofunikila Mang’anda ya Ufumu yanyowani yopitilila 1,000, malo ocitilamo misonkhano opitilila 6,000 amene ofunika kukonzewa soti koma soti Mang’anda ya Ufumu okwanila 4,000 ofunika kukonzewa soti.

Kansi ndalama zomangila vimango vonse ivi na kukonza soti malo ŵasu olambilila zucokela kuni? Mkwasu Lázaro González, wa mu Komiti ya Msambo ku Central America, eyankha konsho iyi peenzofotokoza za cimango ca ofesi yomasulila mabuku ya cilaŵilo ca Citojolabal. Ekamba kuti: “Mu dela ya ofesi yasu ya msambo, tili na ndalama zitontho. Tetyo, paliye thandizo ya akwasu pacalo conse, zingakwanishike lini kumanga ofesi yasu yomasulila mabuku. Ndalama zakupeleka akwasu pacalo conse, zacitisha kuti omasulila ankhale pafupi na ŵanthu olaŵila citundu cakumasulila. Tuyamikila ngako akwasu pacalo conse pa wanzi wao pocilikiza nchito iyi.” Kulaŵila cendi, n’zokwanishika kusilizhya vimango vonse ivi cifukwa ca zopeleka zanu za nchito ya pacalo conse, ndipo zopeleka zinyinji zupezeka pa donate.pr418.com.