Omasulila opitilila pa ciŵelengelo ca 60 peresenti oseŵenzela pa ofesi yomasulila (kapena kuti RTO), osati pa ofesi ya msambo. Ndaŵa yanji makonzedwe oseŵenzela pa ofesi yomasulila ni opindulisha? Ni zinthu zotyani zakuseŵenzesha omasulila kuti nchito ikoyenda bwino pa RTO? Nanga omasulila opindula tyani cifukwa coseŵenzela kudela kwamene ŵanthu okamba citundu cakumasulila?

Kunkhala na RTO kupangisha kuti omasulila akonkhala kudela kukambiwa cilaŵilo cakumasulila. Karin, wamene omasulila cilaŵilo ca Low German, efotokoza kuti: “Kucokela petekukila ku RTO kudela ya Cuauhtémoc, Chihuahua, ku Mexico, nthawi zonse tulaŵila cilaŵilo ca Low German—na omasulila ayasu koma soti na ŵanthu mu utumiki, olo pocita zinthu ziyakine monga kugula zinthu ku maketi. Tafwika pociziŵa bwino cilaŵilo casu. Tikumvwa mau yamene tenzoyamvwapo lini kuvuli ndipo pomasulila tuseŵenzesha mau yakuseŵenzesha ŵanthu polaŵila.”

James, wamene oseŵenzela pamozi na omasulila ayake ku Ghana, ekamba kuti nthawi ziyakine oyewa banja ya Beteli yecisiya ku ofesi ya msambo. Koma eyangizhyila kuti: “Kuseŵenzela ku RTO n’kwabwino ngako. Nukhuzika ngako mtima nikaona mwakukhuziwila ŵanthu ngati tuŵalalikila m’cilaŵilo catumasulila.”

Kansi akwasu oziŵa tyani kuti RTO yufunika kunkhalila kudela iyi? Mkwasu Joseph, wa m’Dipatimenti ya Worldwide Design/Construction ku Warwick, mumzinda wa New York, ku U.S.A., ekamba kuti: “Vuto imozi yunkhalapo ni yakuti kumadela kuyakine kuliye malaiti odalilika, intaneti na manzi abwino. Tetyo, posakila malo kwatingaikile RTO, tufunika kusakila malo angapo kwamene ŵanthu oseŵenzesha cilaŵilo camene ico, kwamene tingapeze malaiti odalilika, intaneti na manzi abwino.”

Njila ya mwamsanga koma soti yochipa yopezela malo omasulila ni kuika RTO pa Assembly Hall, Ng’anda ya Ufumu, olo pa ng’anda ya amishonale, ngati zilipo, ndipo omasulila angocitoyenda kuti akaseŵenze. Ngati paliye izi zinthu, akwasu angalolewe kugula mang’anda omangiwa kale kuti omasulila akonkhalamo noseŵenzelamo. Ngati pankhala kucinja kwa timu ya omasulila, mang’anda aŵa angagulisiwe ndipo ndalama zake zingaseŵenzeshewe pa zinthu ziyakine.

M’caka ca utumiki ca 2020, teseŵenzesha ndalama zokwanila madola 13 miliyoni (U.S.) posamalila ma RTO. Kuti aseŵenze bwino, omasulila ofunika makompyuta, zida zolekodela, intaneti na zinthu ziyakine zofunikila. Mwacisanzo, womasulila m’mozi angafunike kompyuta yamene ingaguliwe pa mtengo wa madola 750 (U.S.). M’makompyuta aŵa muikiwa mapulogilamu ayakine ocitogula. Muikiwa soti Watchtower Translation System (WTS), yamene ni pulogilamu yakuseŵenzesha omasulila pa nchito yao.

Omasulila opasiwa soti zida zolekodela. Zunkhala zida zosavuta kuziseŵenzesha, cakuti peweyamba mlili wa COVID-19, omasulila anyinji etola zida izi noyamba kuziseŵenzeshela ku mang’anda polekoda mavidyo na zofalisa zopulintiwa.

Ponkhala soti akwasu ozipeleka amene othandiza omasulila m’njila zosiyanasiyana, monga kupitamo m’zofalisa zaamasulila zikaliyofalisiwa kuti aone kuti mau yaaseŵenzesha yali tyala bwino. Othandiza soti pa nchito ziyakine monga kuyelesa nokonza pa ofesi. Cirstin, wamene otumikila pa ofesi yomasulila Ciafrikaans pa RTO mumzinda wa Cape Town, ku South Africa, ekamba kuti: “Ofalisa anyinji kuno ni apainiya a nthawi zonse ndipo ni ozipeleka kuseŵenzesha maluso ŵao.”

Ofalisa aŵa oyamikila ngako mwayi uyu. Kalongosi muyakine, wamene othandizila pa RTO, ekamba kuti kuseŵenzela pa ofesi yomasulila n’kosisimula ngako. Akwasu na azilongosi ayakine ozipeleka kuti akolekodewa. Juana, wamene omasulila Citotonac mumzinda wa Veracruz, ku Mexico, ekamba kuti: “Pofwana kuti lomba tunkhala kufupi na matauni kwamene kuli ŵanthu okamba cilaŵilo catumasulila, tuvutika lini kupeza akwasu na azilongosi ŵatingalekode m’mavidyo na m’zofalisa.”

Kansi kunkhala na ma RTO kwayavya tyani nchito yomasulila? Anyinji okamba kuti lomba mau omasuliliwa omvwika bwino ngako. Cédric, wamene oseŵenza na timu yomasulila Cikongo ku Democratic Republic of Congo, efotokoza kuti: “Akwasu na azilongosi ayakine enzokamba kuti Cikongo cetenzomasulila kale cenze cilaŵilo ca ‘Watch Tower,’ cifukwa cenzosiyana na mau yeenzoseŵenzesha ŵanthu polaŵila. Koma lomba, okamba kuti m’zofalisa zasu mupezeka Cikongo cakukamba ŵanthu masiku ŵano.”

Andile, wamene oseŵenza na timu yumasulila Cixhosa, ekamba kuti nao akwasu na azilongosi ku South Africa olaŵila cimozimozi. Ekamba kuti: “Anyinji otiuzhya kuti mau oseŵenzeshewa lomba m’zofalisa zasu omvwika bwino ngako. Olo ŵana amene kale enzokonda kuŵelenga zofalisa zasu m’Cizungu, lomba okonda kuŵelenga m’Cixosa. Makamaka akumvwa bwino ngako kamasulilidwe ka Baibulo la Dziko Latsopnao yokonzewa soti.”

Zopeleka zanu, zamene zupelekewa kuti zicilikize nchito yolalikila pacalo conse, koma soti kupitila pa donate.pr418.com, ndiye zuthandiza pomanga kapena kugula olo kucita lendi maofesi omasulila (ma RTO), kuyasamalila nosamalila atumiki ozipeleka amene oseŵenzela pa maofesi aŵa donate.pr418.com.