Caka ciliconse akwasu na azilongosi amene ali mu utumiki wapadela otiwa kuti akaloŵeko Sukulu ya Giliyadi Yophunzisa Baibo yamene yucitikila ku Likulu ya Maphunzilo ku Watchtower Educational Center ku Patterson, New York. * Pa sukulu iyi, akwasu na azilongosi aŵa ophunzila zinthu zaangacite kuti akocita bwino mautumiki yao yosiyanasiyana yakupasiwa m’gulu ya Yehova. Maphunzilo aŵa oŵayavya kutang’isha maofesi ya m’sambo na mipingo nocitisha kuti zinthu zikoyenda bwino m’mipingo na m’maofesi ya msambo pacalo conse.

Ŵanthu amene oloŵa Sukulu ya Giliyadi ocokela m’vyalo vosiyanasiyana. Mwacisanzo, kilasi ya namba 147 yamene yecitika mu 2019, yenze na ophunzila okwanila 56 ofumila m’vyalo 29. Akwasu na azilongosi eloŵa sukulu iyi ni ŵala amene ocita kale utumiki wapadela monga kutumikila pa Beteli, kuyanganila dela, umishonale, olo upainiya wapadela.

Kukonzekela sukulu iyi kutola nthawi ikulu ngako. Mwacisanzo, Dipatimenti Yoona za Maulwendo ku Likulu Yasu yugula matiketi ya ndeke ya akwasu na azilongosi amene aitiwa kusuku iyi. Pa avaleji, wophunzila aliyense wa kilasi ya namba 147 enzofunikila ndalama zokwanila madola 1,075 a ku America kuti alute ku Patterson nowelela kwao. Akwasu na azilongosi enzofumila ku Solomon Islands ekwela mandeke 4 kuti afwike ku Patterson ndipo ekwela soti ndeke zitatu powelela kwao. Eyenda msenga wa makilomita opitilila 35,400. Ndipo wophunzila aliyense wamene efumila m’calo ici emulipilila tiketi ya ndalama zokwanila madola 2,300 ya ku America. Pofuna kuti asaononge ndalama zinyinji, Dipatimenti Yoona za Maulwendo ku Likulu Yasu yuseŵenzesha pulogilamu iyakine ya pakompyuta pofufuza matiketi a mtengo wochipa. Pulogilamu iyi yupitilizhya kufufuza kwa mawiki kapena miyezi kuti aone ngati pali matiketi a mitengo yochipako. Dipatimenti iyi yuseŵenzesha soti mapointi yakupeleka akwasu na azilongosi ayakine ku gulu kuti agulile matiketi.

Ophunzila anyinji ofunika kutola visa monga cilolezo coloŵela mu United States. Ndipo a mu Dipatimenti ya Zamalamulo ku Likulu Yasu oyavya ophunzila aŵa kuti atole maviza. Pa avaleji, kuti munthu aliyense alembeshe notola visa iyi pofunika ndalama zokwanila madola 510 a ku America.

Kansi tupindula tyani na maphunzilo yakulandila ophunzila aŵa? Mkwasu Hendra Gunawan, wamene ni mkulu mu mpingo uyakine ku Southeast Asia, ali mu mpingo umozi na banja yamene yesilizhya maphunzilo ya Giliyadi. Elaŵila kuti: “Poyamba mumpingo mwasu mwenzeve mpainiya aliyense wanthawi zonse. Koma pavuli ponkhala na banja yamene yesilizhya maphunzilo ya Giliyadi, mzimu wao wozipeleka koma soti khama yao pa nchito yolalikila, zayavya akwasu na azilongosi anyinji kuti nao ayambe kucita upainiya. M’kuluta kwa nthawi, kalongosi m’mozi wa mumpingo mwasu efwika na poloŵako Sukulu ya Alengezi a Ufumu.”

Mkwasu Sergio Panjaitan, wamene otumikila pa Beteli ku Southeast Asia, pamozi na akwasu na azilongosi esilizhya maphunzilo ya Giliyadi, ekamba kuti: “Maphunzilo yecilandi ni yopindulisha lini ŵeve ŵeka koma oyavya soti seo. Ephunzila zinthu zinyinji ngako. Koma m’malo moziona kuti ni ofunika ngako kupambana seo, ofotokozelako ayakine zeciphunzila. Izi zutilimbikisha ngako, ndipo nase tulimbikishako ayakine.”

Kansi gulu yasu yutola kuni ndalama zatuseŵenzesha pa Sukulu ya Giliyadi? Ndalama izi zufumila pa zopeleka za nchito ya pacalo conse, ndipo akwasu na azilongosi anyinji opeleka poseŵenzesha donate.pr418.com. Tukuyamikilani ngako cifukwa ca zopeleka zanu. Zopeleka izi zuyavya kuti akwasu na azilongosi pacalo conse akoloŵako sukulu iyi.