Mboni za Yehova zucita nchito zosiyanasiyana zacipembezo koma soti zothandiza ŵanthu ayakine m’vyalo vopitilila 200. Koma ni m’vyalo tyala 35 mwamene akwasu na azilongosi okwanisha kupeleka zopeleka zosamalilila zofunikila zonse m’vyalo vao. Kansi zinthu zofunikila zusamaliliwa tyani m’vyalo mwamene zopeleka zunkhala zitontho, cakuti zingakwanishe lini kusamalilila zofunikila zonse?

Bungwe Yolamulila ya Mboni za Yehova yuona bwino-bwino zofunika zauzimu na nchito ya Mboni za Yehova pacalo conse. Yupanga bajeti ndipo ndalama zuseŵenzeshewa mwanzelu. Ngati ofesi ya msambo yalandila ndalama zinyinji kupambana zakufunikila, ndalama zapalulu ozitumizhya ku maofesi a msambo kwamene ndalama n’zopeleŵela. Izi n’zolingana na zenzocitika m’nthawi ya Akhristu oyambilila, amene enzoyavya Akhristu ayao pa zosoŵa zao. (2 Akorinto 8:14) Enzoseŵenzesha ndalama zapalulu kuti zithandizile pa zosoŵa za Akhristu ayao.

Kansi akwasu amene olandila ndalama kucokela ku maofesi ayakine a msambo akumvwa tyani? Mwacisanzo ku Tanzania, kwamene pafupifupi hafu ya ŵanthu onse m’calo ici opeza ndalama zosapitilila pa K40 pa siku, ndalama izi zeseŵenzeshewa pokonza soti Ng’anda ya Ufumu ya mpingo wa Mafinga. Mpingo uyu welemba kuti: “Kucokela peyekonzewa soti Ng’anda ya Ufumu, ciŵelengelo ca ŵanthu opezeka pa misonkhano cakwela ngako! Tuyamikila gulu ya Yehova na akwasu pacalo conse cifukwa ca wanzi wao. Zopeleka zao zacitisha kuti tinkhale na malo aweme olambililapo.”

Mlili wa COVID-19 wacitisha kuti akwasu ayakine ku Sri Lanka asankhale na vakulya vokwanila. Ayakine mwa akwasu na azilongosi aŵa ni Kalongosi Imara Fernando na mwana wake munalume, Enosh. Koma cifukwa ca zopeleka zocokela ku maofesi a msambo ayakine, alandilako thandizo ya vakulya. M’kalata yoyamikila, elemba kuti: “Tuyamikila akwasu amene ationesha cikondi pa nthawi iyi yovuta. Nise osangalala cendi cifukwa conkhala mbali ya banja iyi, ndipo tupitilizhya kupemphela kuti Yehova ayavye akwasu onse m’masiku ŵano osilizhya.”

Kulikonse kwakunkhala akwasu na azilongosi, opeleka zilizonse zaali nazo mocokela pansi pa mtima. Mwacisanzo, Enosh ezipangila kabokosi ka zopeleka kuti akoikamo zopeleka kuti zithandizile mabanja ayakine amene ofunikila thandizo. Guadalupe Álvarez oonesha mzimu umozimozi wopasa. Onkhala mumzinda uyakine ku Mexico kwamene ni ŵanthu tyala atontho amene olandilako kandalama katontho ndipo ayakine ovutika kupeza ndalama zogulila zofunikila za pa umoyo wao. Koma opeleka zilizonse zaangakwanishe. Elemba kuti: “Nuyamikila Yehova cifukwa ca ubwino wake na cikondi cake cokhulupilika. Zopeleka zangu ziyangizhyile pa zopeleka za ayakine ndipo ziyavye akwasu amene ofunikila thandizo.”

Nao maofesi a msambo amene otumizhya ndalama kumadela kufunikila thandizo osangalala. Mkwasu Anthony Carvalho, wamene otumikila mu Komiti ya Msambo ku Brazil, ekamba kuti: “Kwa vyaka vinyinji, tenzofunikila thandizo kucokela ku vyalo viyakine kuti nchito iyende bwino m’calo casu. Thandizo iyi yecitisha kuti ciŵelengelo ca ofalisa cikwele ngako m’calo casu. Koma pali pano, zacuma zuyendako bwino m’calo casu, ndipo nase tili na mwayi woyavyako akwasu ayakine. Akwasu oganizila za nchito yolalikila pacalo conse, ndipo oona mwaangayavyile ayakine kukwanilisha udindo uyu monga ophunzila a Yesu ozipeleka.”

Kansi njila yabwino ngako yatingathandizile akwasu na azilongosi amene ofunikila thandizo pacalo conse ni yotyani? Tingacite izi mwa kupeleka zopeleka ku nchito ya pacalo conse, osati mwa kutumizhya ndalama mwacindunji ku ofesi ya msambo ya ku calo ciyakine kwamene kufunikila thandizo. Tingacite izi mwa kuponya ndalama m’kabokosi kolemba kuti “Nchito ya Pacalo Conse” olo kupitila pa donate.pr418.com. Tuyamikila ngako zopeleka zonse izi.