NKHALANI MENSO!
2022: Caka ca Masoka—Kansi Baibo Yukambapo Kuti Tyani?
M’caka ca 2022, nkhani zinyinji pa nyuzi zenzokamba za nkhondo, mavuto a zacuma na masoka a cilengedwe. Ni Baibo tyala yamene yufotokoza tanthauzo yeneyene ya zocitika izi.
Tanthauzo yeneyene ya zocitika za mu 2022
Zocitika za m’caka casila zupeleka umboni woyangizhyilika wakuti tunkhala m’masiku amene Baibo yuita kuti “masiku osilizhya.” (2 Timoteyo 3:1) Nthawi iyi yeyamba m’caka ca 1914. Onani mwamene zocitika za lombapano zukwanilishila ulosi wa m’Baibo masiku ŵano.
“Nkhondo.”—Mateyu 24:6.
“2022 Ni Caka Camene Nkhondo Yewelela Soti Ku Europe.” a
Onani nkhani yakuti “Russia Athila Nkhondo Ukraine.”
“Njala.”—Mateyu 24:7.
“2022: Caka ca Njala Yosaneneka.” b
Onani nkhani yakuti “Nkhondo ya ku Ukraine Iwonjezela Njala Padziko Lonse.”
“Milili.”—Luka 21:11.
“Matenda oyambukila okuya opakilapakila, ndipo ŵanthu ali pa ngozi ikulu. Talaŵila teti cifukwa matenda monga polio yeyamba soti. Kweyamba soti matenda a monkeypox, ndipo matenda a COVID-19 akalupitilizhya kuvutisha ŵanthu.” c
Onani nkhani yakuti “Ŵanthu Okwanila 6 Miliyoni Afwa na Mlili wa COVID-19.”
“Kukaoneke vinthu voyofya.”—Luka 21:11.
“Kupya kwa zuŵa, cilala, mulilo na kusefukila kwa manzi. Kupya kwa mu 2022 kukaluŵike lini cifukwa kweononga vinthu vinyinji. Ŵanthu anyinji emwalila ndipo anyinji aliye malo onkhala.” d
Onani nkhani yakuti “Masiku Ŵano ni Kwakupya Ngako Pacalo Conse.”
“Vipolowe.”—Luka 21:9.
“Mu 2022 ŵanthu anyinji ecita vioneselo pozuzula boma cifukwa ca mavuto a zacuma, makamaka kukwela mitengo kwa vinthu.” e
Onani nkhani yakuti “Kukwela Mitengo Kwa Vinthu Pacalo Conse.”
Kansi caka cikuza kukaŵe zotyani?
Paliye angaziŵe kuti m’caka ca 2023 mukacitike zotyani. Koma catuziŵa n’cakuti lombapano Ufumu wa Mulungu wamene ni boma ya kululu, ukaloŵelelepo pa zocitika za m’calo. (Danieli 2:44) Boma iyi ikacosepo vinthu vonse vucitisha kuti ŵanthu akovutika. Pa nthawi iyi cifunilo ca Mulungu cikacitike pacalo.—Mateyu 6:9, 10.
Tukulimbikishani kukonkha malangizo a Yesu Khristu akuti “nkhalani menso” kuti mukoona mwamene zocitika zukwanilishila maulosi a m’Baibo. (Maliko 13:37) Tilembeleni kuti muphunzile zinyinji zokhuza mwamene Baibo ingakuyavyileni pali lomba na mwaingayavyile mweo na banja yanu kunkhala na ciyembekezo cenecene ca vinthu va msogolo.
a AP Nyuzi ya December 8, 2022. “M’caka ca 2022 Niye Pamene Soka ya Nkhondo Yewelela Soti ku Europe,” molingana na zecilaŵila Jill Lawless.
b “Njala ya Pacalo Conse.” Molingana na World Food Programme.
c JAMA Health Forum ya September 22, 2022. “Tunkhala m’Nthawi ya Milili—Kwewela COVID-19, Monkeypox, Polio na matenda ya X,” molingana na zecilaŵila Lawrence O. Gostin, JD.
d Earth.Org ya October 24, 2022. “Kansi n’Cinji Cucitisha Kupya Kwa m’Caka ca 2022?” molingana na zecikonsha Martina Igini.
e Cikalata Cofuna Mtendele wa Vyalo Vonse ca pa December 8, 2022. “Mavuto a Zacuma Ndiye Yecitisha Vioneselo Vokwiila Maboma Pacalo Conse mu 2022,” molingana na zecikamba Thomas Carothers and Benjamin Feldman.
Ziyakine Zamungakonde
ESSENTIAL BIBLE TEACHINGS
Kansi Ufumu wa Mulungu n’Cinji?
Penzocita ulaliki wake pacalo, Yesu ephunzisa ngako za Ufumu wa Mulungu kupambana nkhani iliyonse. Kwa vyaka vinyinji, okonkha ŵake ankhala opemphela kuti Ufumu wa Mulungu uwele.
ZIPHUNZISO ZOFUNIKA NGAKO ZA M’BAIBO
Ufumu wa Mulungu Weyamba Kulamulila mu 1914
Vyaka pafupifupi 2,600 vapita, Mulungu ecitisha mfumu iyakine kuona mesomphenya ya ulosi wamene ukwanilishika masiku ŵano.
ZOKHUZA SEO
Sengani Phunzilo ya Baibo
Phunzilani yankho iliyonse yamungankhale nayo ya m’Baibo, olo phunzilani zokhuza Mboni za Yehova.
