M’mawiki yatontho yakuza, kucitike mavoti m’vyalo vosiyanasiyana pacalo conse. Ŵanthu akafunike kupanga cosankha cofunika ngako cokhuza wati asankhe kunkhala msogoleli wao.

 Kansi Baibo yuphunzisanji?

 Baibo yutiululila malile yaali nayo asogoleli aumunthu.

•   “Musakhulupilile ŵanthu olemekezeka, kapena mwana wa munthu aliyense wofumila kulito wamene aliye cipulumuso. Mzimu wake ufuma ndipo yove owelela ku nthaka. Pa siku iyi, zonse zenzoganiza zusililatu.”​—Masalimo 146:3, 4

 Olo asogoleli amene olamulila bwino, mkuluta kwa nthawi omwalila. Kuyangizhyila apo, paliye cisimikizhyo ciliconse caakunkhala naco cakuti munthu wati akaŵaloŵe m’malo akapitilizhye kucita nchito zabwino zenzocita.​—Mlaliki 2:18, 19.

 Baibo yukambilatu kuti ŵanthu aliyopangiwe kuti akozilamulila ŵeka.

•   “Munthu woyenda aliye ulamulilo wosogolela mendo ŵake.”​—Yeremiya 10:23.

 Kansi niŵani angankhale msogoleli wabwino masiku ŵano?

 Baibo yukamba kuti Mulungu esankha msogoleli woyenelela koma soti wokhulupilika. Msogoleli uyu ni Yesu Khristu. (Masalimo 2:6) Yesu ni Mfumu ya Ufumu wa Mulungu. Ufumu wa Mulungu ni boma yati ikolamulila kufumila kululu.​—Mateyu 6:10.

 Kansi musankhe ulamulilo wa Yesu? Baibo yuonesha cifukwa cake cosankha ici ni cofunika ngako:

•   “Lemekezani mwana kuyopela kuti Mulungu angakalipe, ndipo mungaonongewe nocosewa pa njila iyi. Pakuti ukali wake ukwanisha kuyaka mofulumila ngako. Odala ni onse amene othaŵila kwa yove.”​—Masalimo 2:12.

 Lomba niye nthawi yofunika kupanga cosankha. Baibo yuonesha kuti Yesu eyamba kulamulila mu 1914 na kuti lombapano, Ufumu wa Mulungu ukaloŵe m’malo maboma onse aumunthu.​—Danieli 2:44.

 Kuti muziŵe zinyinji zokhuza mwamungasankhile usogoleli wa Yesu, ŵelengani nkhani yakuti “Sankhani Kucilikiza Ufumu wa Mulungu Pali Lomba!”