Masiku ŵano, ŵanthu anyinji ofalisa nokamba nkhani zosiyanasiyana ziliye umboni. Kansi izi zakucitishani kuti mukovutika kuziŵa kuti zamukumvwa n’zacendi olo ni zawenye? Ŵanthu anyinji okhulupilila zinthu ziyakine, tyala cifukwa ca zakuganiza na mwaakumvwila osati cifukwa cakuti zinthu izo n’zacendi. Pacalo conse, ŵanthu okhulupilila lini kuti n’zokwanishika kupeza cendi.

 Maganizo oteti ni yacilwendo lini. Vyaka 2,000 vapita, Bwanamkubwa waciroma Pontyo Pilato ekonsha Yesu kuti: “Kansi cendi n’cinji?” (Yohane 18:38) Olo kuti Pilato aliyoyembekeze kuti Yesu ayankhe, konsho yake yenze yofunika ngako. Baibo yupeleka yankho yokhutilisha ya konsho iyi. Yankho iyi ingakuyavyeni kunkhala osimikizhya kuti n’zokwanishika kupeza cendi m’calo ici camene anyinji oganiza kuti kuliye cendi.

Kansi cendi cikalupezeka masiku ŵano?

 Eee. Baibo yuseŵenzesha mau akuti “cendi” pokamba za zinthu zenezene, zili na umboni koma soti zolondola. Yutiuzhya kuti Yehova a Mulungu niye gwelo ya cendi ndipo yumuita kuti “Mulungu wacendi.” (Salimo 31:5) M’Baibo mupezeka cendi. Cendi ici cili monga ni lambi yamene ingatiyavye kuyenda m’calo ici ca mfinzi.—Salimo 43:3; Yohane 17:17.

Mungacitenji kuti mupeze cendi?

 Mulungu ofuna lini kuti tikovomelezhya cendi mwacimbulimbuli. M’malomwake, otilimbikisha kuti tikofufuza, poseŵenzesha luso yasu yoganiza m’malo modalila maganizo ŵasu. (Aroma 12:1) Ofuna kuti timuziŵe nomukonda na “mtima wasu wonse” ndipo otilimbikisha kuti tufunika kusimikizhya ngati zatamvwa n’zacendi poseŵenzesha Baibo.—Mateyu 22:37, 38; Machitidwe 17:11.

Nanga ni ŵani eyambisha wenye?

 Baibo yukamba kuti wenye weyambishiwa na mdani wa Mulungu, Satana Maleŵania, wamene oziŵika kuti “tata wa wenye.” (Yohane 8:44) Etala wenye ponena za Mulungu ku ŵanthu oyamba kulengewa. (Genesis 3:1-6, 13, 17-19; 5:5) Kuyambila nthawi yamene iyo, Satana wapitilizhya kufalisa wenye nofisa cendi conena za Mulungu.—Chivumbulutso 12:9.

Ndaŵa yanji ŵanthu anyinji okonda kutala wenye masiku ŵano?

 M’nthawi ino yatilimo, Satana osokoneza ŵanthu noŵasoŵesha m’maganizo kupambana kale. Ŵanthu anyinji otala wenye pofuna kukata m’menso ayao noŵalyela masuku pamutu. (2 Timoteyo 3:1, 13) Comvwisha cisoni n’cakuti wenye woteti upezeka soti na m’machechi anyinji masiku ŵano. Monga ni mweyeloselela Baibo, ŵanthu “ozipezela aphunzisi kuti amvwe zuŵakondwelesha m’matu mwao,” ndipo “okana kumvwishila ku cendi.”—2 Timoteyo 4:3, 4.

Ndaŵa yanji cendi n’cofunika?

 Ŵanthu okhulupilila munthu wamene olaŵila cendi. Ngati tukamba lini cendi, zukwanishika lini kuti tinkhale okatizhyana m’banja koma soti m’malo osiyanasiyana yatunkhala. Baibo yukamba kuti Mulungu ofuna kuti kulambila kwasu kukonkhala kozikiwa pa cendi. Yukamba kuti: “Onse amene olambila [Mulungu] ofunika kumulambila mosogolelewa na mzimu na cendi.” (Yohane 4:24) Kuti muziŵe mwamene Baibo ingakuyavyileni kuziŵa cipembezo cawenye nopewa kukhulupilila wenye wacuphunzisa, ŵelengani nkhani ya m’Chichewa yakuti “Mabodza Amene Amalepheletsa Anthu Kukonda Mulungu.”

Ndaŵa yanji Mulungu ofuna kuti niphunzile cendi?

 Mulungu ofuna kuti mukapulumuke. Kuti mukapulumuke mufunika kuphunzila cendi cokhuza yove. (1 Timoteyo 2:4) Mungankhale pa ushamwali na Mulungu ngati mungaphunzile nokonkha malamulo ŵake okhuza ciweme na ciipa. (Salimo 15:1, 2) Pofuna kuyavya ŵanthu kuphunzila cendi, Mulungu etuma Yesu pacalo. Yove ofuna kuti tikonkhala mokatizhyana na zeciphunzisa Yesu.—Mateyu 17:5; Yohane 18:37.

Kansi Mulungu akafumyepo wenye?

 Eee. Mulungu okhumudwa ngako akaona kuti ŵanthu otala wenye nolyela masuku pamutu ŵanthu ayakine. Walonjeza kuti ŵanthu onse amene opitilizhya kutala wenye akaŵacosepo pacalo. (Salimo 5:6) Akayocita izi, Mulungu akakwanilishe soti ulosi uyakine wa m’Baibo wakuti: “Mlomo wa cendi niye wati unkhazikike mpaka kale-kale.”—Miyambo 12:19.