Kulingana na kafukufuku, ŵanthu pafupifupi 5 biliyoni oonelela akaswili outuka ofumila m’vyalo 206, amene otolako mbali pa mpikisano woutuka wa pacalo conse wamene ucitika m’cisalo, caka cino ca 2024. Thomas Bach wamene ni Msogoleli wa Bungwe Yuyanganila za Mpikisano Woutuka Pacalo Conse ekamba kuti “Tili na mwai ukulu ngako wopezeka pa mpikisano wamene ucilikiza mtendele ndipo ugwilizanisa ŵanthu pacalo conse. Tiyeni tisangalale na mpikisano uyu mwaumozi koma soti mwamtendele mosasamala kanthu kuti nise a mtundu wanji olo tafumila kucalo canji.”

 Kansi mpikisano woutuka ungakwanilishe colinga ici? Kansi tingankhale na ciyembekezo cakuti pacalo pakankhale mtendele na mgwilizano wenewene?

 Pa mpikisano wa Olimpiki wa caka cino pankhala pocitika zinthu zinyinji osati tyala kuutuka. Pocitika vinthu vosiyanasiyana vamene vingagaŵanishe ŵanthu. Vinthu ivi vuyangizhyilapo kumenyela ufulu wacibadwidwe, kusankhana mitundu na kukangana cifukwa cosiyana vipembezo koma soti cinkhalidwe.

 Vocitika vapadela monga Mpikisano Woutuka wa pacalo conse vucitisha kuti ŵanthu asangalale. Koma pa vocitika vimozimozi, ŵanthu anyinji ocita vinthu vucilikiza mikangano na magaŵano m’malo mwa mtendele na mgwilizano.

 Baibo yenze yeloselelatu za minkhalidwe yuoneshewa masiku ŵano yamene yucitisha kuti cinkhale covuta kuti pacalo pankhale mgwilizano. (2 Timoteyo 3:1-5) Kuti muziŵe zinyinji zokhuza ulosi uyu wa m’Baibo, ŵelengani nkhani ya m’Chichewa yakuti “Kodi Baibulo Linaneneratu za Mmene Anthu Adzidzaganizira ndi Kuchitira Zinthu Masiku Ano?”

 Baibo yutipasa ciyembekezo cenecene cakuti pacalo pakankhale mgwilizano na mtendele. Yulonjeza kuti ŵanthu onse pacalo akankhale ogwilizana akayayoyamba kulamuliliwa na boma ya kululu yuziŵika kuti “Ufumu wa Mulungu.”—Luka 4:43; Mateyu 6:10.

 Mfumu ya Ufumu uyu, Yesu Khristu, akalete mtendele pacalo conse. Baibo yukamba kuti:

•   “Olungama akaphuke, ndipo pacalo pakankhale mtendele.”—Salimo 72:7.

•   “Akalondeshe wosauka wamene ofuula popempha thandizo . . . Akaŵaombole ku ciwawa na kupondelezewa.”—Salimo 72:12, 14.

 Olo masiku ŵano, ziphunziso za Yesu zagwilizanisa ŵanthu mamiliyoni anyinji m’vyalo vokwanila 239. Monga Akhristu, Mboni za Yehova pacalo conse zuyesesa kunkhala mwamtendele. Kuti muziŵe zaŵayavya kucita izi, ŵelengani Nsanja ya Mulonda ya m’Chichewa yamutu wakuti “Kodi N’zotheka Kuthetsa Chidani?.”