Molingana na lipoti ya United Nations:

•   Kufumila pa October 7 mpaka pa October 23, 2023, nkhondo yucitika ku Gaza-Israel, ŵanthu opitilila 6,400 apaiwa ndipo 15,200 ecitiwa. Anyinji mwa ŵanthu amene aŵa ni ŵanthu wamba. Kuyangizhyila apo, ŵanthu mahandiledi sauzande akakamizhyiwa kusiya mang’anda ŵao.

•   Pa September 24, 2023, nkhondo ili pakati pa Russia na Ukraine yapaya ŵanthu wamba 9,701 ndipo okwanila 17,748 ecitiwa ku Ukraine.

 Kansi Baibo yupeleka ciyembekezo cotyani kuli ŵala ovutika na nkhondo?

 Baibo yeloselelatu kuti Mulungu “akasilizhye nkhondo pacalo conse.” (Masalimo 46:9) Akaseŵenzeshe boma ya kululu olo ufumu kuti ukaloŵe m’malo mwa maboma yonse ya ŵanthu. (Danieli 2:44) Ufumu wa Mulungu ukamasule ŵanthu onse ku mavuto.

 Onani zati akacite Yesu Khristu, Mfumu ya Ufumu wa Mulungu:

•   “Akapulumuse ŵanthu osauka olilila thandizo, okandikizhyiwa koma soti ŵala ooneka monga aliye oŵathandiza. Akacitile cifundo ŵanthu okandikizhyiwa, osauka ndipo umoyo wa ŵanthu osauka ukapulumusiwe. Yove akapulumuse ŵanthu okandikizhyiwa nocitiliwa zinthu zaciwawa.”—Masalimo 72:12-14.

 Kupitila mu Ufumu wake, Mulungu akasilizhye mavuto onse owela cifukwa ca nkhondo na ciwawa.

•   “Yove akapukute misozi yonse m’menso mwa olila ndipo imfwa ikankhalepo lini soti, kukaŵeve kulila olo kumvwa voŵaŵa. Vakale vapita.”—Chivumbulutso 21:4.

 Lombapano ufumu wa Mulungu uloŵelelepo pa vocitika va m’calo. Baibo yeloselelatu za “nkhondo na mbili za nkhondo” zatuona kuti zucitika masiku ŵano. (Mateyu 24:6) Zocitika izi na ziyakine zuonesha kuti tunkhala “m’masiku osilizhya” a ulamulilo wa ŵanthu.—2 Timoteyo 3:1.