Vyaka 30 vapita, ŵanthu anyinji enzoona kuti vyalo vinyinji vili pa mtendele ndipo ni vokatizhayana. Koma zinthu zankhala zucitika calombapano zuonesha kuti mfundo iyi ni yacendi lini.

•   “Ŵanthu anyinji ali na nkhaŵa poganiza kuti nkhondo ya ku Gaza ingakhuze soti vyalo viyakine vozungulila cifukwa cakuti masoja a ku Israel ayamba kuchaya nkhondo na masoja a Hezbollah pa boda ya ku Lebanon.”—Reuters, January 6, 2024.

•   “Masoja a ku Iran ayamba chipolowe m’mbali zosiyanasiyana ndipo calo ca Iran cayamba soti kupanga mabomba oyofya a nyukiliya. Kuyangizhyila apo, calo ca China na Russia vili pa mgwilizano na Iran. Izi zaleta ciopsezo cikulu ku vyalo va kumwela.”—The New York Times, January 7, 2024.

•   “Masoja a ku Russia apitilizhya kuononga mang’anda na malo osiyanasiyana ku Ukraine.”—UN News, January 11, 2024.

•   “Tikaona kucita bwino kwa calo ca China pa nkhani ya zacuma na ciŵelengelo cikulu ca masoja ŵaali nao, kuzitukumula kwa calo ca Taiwan kuti cingazipanamile paceka, koma soti mkangano ulipo pakati pa calo ca China na U.S.A, zutipangisha kuganiza kuti lombapano kungabuke mkangano.”—The Japan Times, January 9, 2024.

 Kansi Baibo yulaŵilamponji pa nkhani ya mgwedegwede watuona masiku ŵano? Kansi mgwedegwede uyu uyambishe nkhondo ya pacalo conse?

 Baibo iliyolosele za malo ŵeneŵene kwamene kucitika nkhondo masiku ŵano. Koma yelosela kuti m’madela osiyanasiyana mukocitika nkhondo zamene “zucosa mtendele pacalo.”—Chivumbulutso 6:4.

 Buku ya Danieli yelosela kuti “m’masiku osilizhya,” maulamulilo amphamvu pacalo conse “akoniatana,” kapena kuti kulimbilana kuti wamphamvu ngako ni ŵani. Ocita izi mwa kuzionesha kuti ali na gulu ya masoja a mphamvu ngako ni ŵani na kuti ni ŵani ali na ndalama zinyinji ngako.—Danieli 11:40, 42, 43.

 Baibo yuonesha kuti vinthu pacalo vipitilizhye kuipilaipila. Yesu elosela kuti “kukankhale cisauso cikulu camene cikaliyocitikapo kufumila pa ciyambi ca calo mpaka lelo.” (Mateyu 24:21) “Cisauso cikulu” ici cikayambishe nkhondo ya Aramagedo, yamene yuziŵika kuti “nkhondo ya siku ikulu ya Mulungu wamphamvu.”—Chivumbulutso 16:14, 16.

 Olo n’tetyo, nkhondo ya Aramagedo ikapulumuse ŵanthu, osati kuŵaononga. Poseŵenzesha nkhondo iyi, Mulungu akafumyepo ulamulilo wa ŵanthu wamene ucitisha kuti pacalo pakonkhala nkhodo. Kuti muziŵe mwati nkhondo ya Aramagedo ikaletele mtendele, ŵelengani nkhani izi:

•   “Kansi Aramagedo n’Cinji?”

•   “Aramagedo ni Nkhani Yokondwelesa!”