Kansi Baibo Yulaŵilanji pa Vuto ya Kucepekela Kwa Vakulya Kuliko Masiku Ŵano?
“Tisilizhye njala.” Ici niye colinga caziikila asogoleli anyinji pacalo conse pofuna kufumyapo vuto ya njala yamene yukhuza ŵanthu anyinji. Asogoleli aŵa ofuna kuoneshesha kuti munthu aliyense pacalo conse ali na cakulya cokwanila. a Kansi zingakwanishike kuti pacalo conse pakankhala paliye njala? Kansi Baibo yulaŵilanji?
Baibo yeloselelatu za vuto ya kucepekela kwa vakulya iliko masiku ŵano
Baibo yeloselelatu kuti “m’masiku ŵano osilizhya” kukankhale kucepekela kwa vakulya” (2 Timoteyo 3:1) Mulungu niye lini ocitisha kuti cakulya cinkhale cocepekela pacalo, koma enze eticenjezelatu kuti vuto iyi ikankhaleko m’sogolo. (Yakobo 1:13) Onani maulosi aŵili a m’Baibo.
“Kukankhale njala . . . m’malo osiyanasiyana.” (Mateyu 24:7) Ulosi uyu weloselelatu kuti kukankhale njala m’malo osiyanasiyana. Lipoti yalombapano yecipeleka ŵanthu amene ocita maphunzilo yokhuza mopangila vakulya na movigaŵila yekamba kuti: “Vuto ya njala pacalo conse yukuya yukulilakulila.” b Ŵanthu anyinji m’vyalo vosiyanasiyana okwanisha lini kupeza vakulya vokwanila. Comwisha cisoni n’cakuti izi zacitisha kuti ŵanthu anyinji amwalile.
“Penelolesha, neona hosi ifipa. Wokwelapo wake enze na sikelo m’manja mwake” (Chivumbulutso 6:5) Mu ulosi uyu, hosi yophiphilisila na wokwelapo wake, zupanamila vuto ya njala yamene iliko m’masiku ŵano osilizhya. c Masikelo ali m’manja mwa munthu ekwela pa hosi ni yopimila tu vakulya tutontho twakukwanisha kupeza ŵanthu masiku ŵano. Hosi iyi peyenzoyenda, wokwelapo wake eyamba kucenjeza ŵanthu mokuwa kuti kunkhale vuto ya kucepekela kwa vakulya ndipo ouzhya ŵanthu kuti asunge bwino vakulya vaali navo (Chivumbulutso 6:6) Ulosi uyu uonesha kuti m’masiku ŵano osilizhya, ŵanthu anyinji akovutika na njala.
Kansi vuto ya njala ikasile tyani?
Akaswili okamba kuti pacalo pali vakulya vinyinji ngako cakuti munthu aliyense angakwanishe kunkhala na cakulya cokwanila. Kansi n’cinji cucitisha kuti pacalo pankhale vuto ya kucepekela kwa vakulya? Nanga Baibo yukamba kuti Mulungu wasu Yehova, d akasilizhye tyani mavuto aŵa?
Vuto: Maboma angakwanishe lini kufumyapo umphawi na vuto ya zacuma yamene yucitisha kuti ŵanthu akonkhala na njala.
Mwati akaisilizhyile: Maboma ya ŵanthu aliye ungwilo akalowewe m’malo na boma yangwilo yamene ni Ufumu wa Mulungu. (Danieli 2:44; Mateyu 6:10) Masiku ŵano ŵanthu anyinji osauka ovutika kuti apeze ndalama zogulila vakulya, koma mu ulamulilo wa Ufumu wa Mulungu izi zikasile. Baibo yukamba kuti Yesu Khristu, Mfumu ya Ufumu wa Mulungu: “Akalondeshe wosauka wamene ofuula posenga thandizo, koma soti wosausika na aliyense aliye womuyavya. . . . Pacalo pakankhale tiligu unyinji. Palulu pa malupili pakankhale tiligu unyinji.”—Salimo 72:12, 16.
Vuto: Nkhondo zucitisha kuti pacalo pankhale vuto ya zacuma. Izi zucitisha soti kuti cinkhale covuta kuti ŵanthu onse ankhale na vakulya vokwanila.
Mwati akaisilizhyile: “[Yehova] olesha nkhondo mpaka kosilizhyila kwa calo. Wathyola uta notendatenda mkondo. Ndipo washoka magaleta ankhondo.” (Salimo 46:9) Mulungu akaonge zida zonse za nkhonda na ŵanthu onse otolamo mbali mu nkhondo. Izi zikayocitika, aliyense akopeza vakulya mwamtendele. Baibo yulonjeza kuti: “Wolungama akaphuke, ndipo pakankhale mtendele ukulu.”—Salimo 72:7.
Vuto: Kupya kopitilila muyeso na masoka acilengedwe vuononga mbeu nopaya viŵeto.
Mwati akaisilizhyile: Mulungu akalamulile mphamvu za cilengedwe za pacalo, izi zikacitishe kuti pacalo pankhale vakulya vokwanila. Baibo yulaŵila kuti: “[Yehova] ocitisha mphepo yamkuntho kunkha ziii; cakuti mafunde apanyanja odekha. . . . Osandusha cipululu kunkhala m’shambo wa manzi, Ndipo calo ciliye manzi ocicinja kunkhala nyenje za manzi. Kwamene uko onkhazikako ŵanthu anjala . . . Ofesa mbeu na kulima minda ya mphesa kuti ankhale na zokolola.”—Salimo 107:29, 35-37.
Vuto: Ŵanthu acigolo na aciphuphu oononga olo kubisa vakulya kuti ŵala ovifuna asavipeze
Mwati akaisilizhyile: Ufumu wa Mulungu ukafumyepo onse aliye cilungamo na a ciphuphu. (Salimo 37:10, 11; Yesaya 61:8) Baibo yukamba kuti Yehova Mulungu, “Ni wopeleka ciweluzo ku ŵanthu ocitiliwa cinyengo, Wopeleka cakulya ku ŵanthu anjala.”—Salimo 146:7.
Vuto: Caka ciliconse gao imozi pa magao atatu a vakulya pacalo conse yuonongeka olo kusoŵa.
Mwati akaisilizhyile: Mu Ufumu wa Mulungu vakulya vukogaŵiwa mwadongosolo. Peenze pacalo, Yesu enzopewa kuononga vakulya. Mwacisanzo, pa nthawi iyakine, mozizwisa elyesha ŵanthu opitilila 5,000. Pavuli pake, elamulila ophunzila ŵake kuti: “Sonkhanishani vonse vasala kuti pasaonongeke ciliconse.”—Yohane 6:5-13.
Cifukwa cakuti Ufumu wa Mulungu ukafumyepo cucitisha kuti pacalo pankhale njala, ŵanthu onse akasangalale na vakulya vamwana alilenji vupasa thanzi. (Yesaya 25:6) Kuti muziŵe pati Ufumu wa Mulungu ukakwanilishe izi, onani nkhani ya m’cinyanja ya mutu wakuti “Nanga Ufumu wa Mulungu Udzayamba Liti Kulamulila Dziko Lapansi?”
a Vitukuko veyezipangila vyalo vamene ni mamembala a bungwe ya United Nations mu 2015, kuti vikwanilishe cikaliyofwika caka ca 2030.
b Lipoti iyi yepelekewa na Cigao Coyanganila Vakulya na Zaulimu ca United Nations, Bungwe Yopitisha Zaulimi Pasogolo, Bungwe Yuyanganila pa Thandizo ya Ŵana ya United Nations, Bungwe Yuyanganila Vakulya Pacalo Conse ya United Nations na Bungwe Yuyanganila Zaumoyo Pacalo Conse.
c Kuti muziŵe zinyinji pa nkhani ya analume 4 enze ekwela pa mahosi otomolewa m’buku ya Chivumbulutso, onani nkhani ya m’Cinyanja yakuti “Kodi Amuna Anayi Okwela pa Mahosi N’ndani?”
d Yehova niye zina yeneyene ya Mulungu. (Salimo 83:18) Onani nkhani ya m’Cinyanja yakuti “Kodi Yehova N’ndani?”
Ziyakine Zamungakonde
ESSENTIAL BIBLE TEACHINGS
Kansi Ufumu wa Mulungu n’Cinji?
Penzocita ulaliki wake pacalo, Yesu ephunzisa ngako za Ufumu wa Mulungu kupambana nkhani iliyonse. Kwa vyaka vinyinji, okonkha ŵake ankhala opemphela kuti Ufumu wa Mulungu uwele.
