Kulolela—Kansi Baibo Ingatiyavye Tyani?
Lipoti ya Declaration of Principles on Tolerance yocilikiziwa na kabungwe ka UNESCO ya mu 1995, yekamba kuti: “Ŵanthu ofunika kunkhala ololela kuti akwanishe kunkhala mwamtendele m’calo cino.”
Mosiyana na izi, ngati ŵanthu ni osalolela, zingacitishe kuti aleke kucitilana zinthu m’njila ya ulemu noyamba kuzondana. Angayambe soti kulaŵila mau onyoza, sankho na ciwawa.
Koma ŵanthu ali na maganizo osiyanasiyana ponena za tanthauzo ya kulolela. Ayakine oganiza kuti kulolela kutanthauza kuvomelezhya zilizonse zaangalaŵile ŵanthu ayakine olo kucita. Ayakine okatizhyana na zayulaŵila Baibo zakuti ŵanthu ololela, ofunika kulemekeza ufulu wosankha wa munthu aliyense pa nkhani yokhuza mfundo zaangayendele olo zaangakhulupilile. Ofunika kucita izi olo kuti ove okatizhyana nazo lini.
Kansi Baibo ingayavye ŵanthu kunkhala ololela masiku ŵano?
Zayulaŵila Baibo pa nkhani yololela
Baibo yulimbikisha nkhalidwe yololela. Yukamba kuti: “Ŵanthu onse aziŵe kuti nimwe ololela.” (Afilipi 4:5) Baibo yutilimbikisha kuganizila ŵanthu nocita nao zinthu m’njila yacikondi. Ŵala amene okonkha malangizo aŵa, okatizhyana lini olo kukonkha mfundo zaangayendele munthu muyakine. Koma omulesha lini kucita zinthu molingana na zosankha zake.
Olo n’tetyo, Baibo yulaŵila kuti Mulungu eika malamulo yamene ŵanthu ofunika kukonkha. Yulaŵila kuti: “Weo munthu ofumila ku lito, [Mulungu] ekuuzhya zinthu zamene ni zabwino.” (Mika 6:8) Baibo yufotokoza malangizo amene Mulungu wapasa ŵanthu pofuna kuti aŵayavye.—Yesaya 48:17, 18.
Mulungu aliyotipase udindo oweluza ŵanthu ayakine. Baibo yulaŵila kuti, “Wopeleka lamulo na Woweluza alipo m’mozi tyala . . . Lomba weo niwe ŵani kuti ukoweluza muyako?” (Yakobo 4:12) Mulungu wapasa munthu aliyense ufulu wosankha.—Deuteronomo 30:19.
Zayulaŵila Baibo pa nkhani ya ulemu
Baibo yulaŵila kuti ‘tufunika kulemekeza munthu aliyense.’ (1 Petulo 2:17) Tetyo, ŵanthu amene okonkha mfundo za m’Baibo olemekeza ŵanthu onse mosasamala kanthu za zinthu zakukhulupilila olo zakucita. (Luka 6:31) Izi zutanthauza lini kuti ŵala amene okonkha mfundo za m’Baibo okatizhyana na zakukhulupilila ŵanthu ayakine olo maganizo ŵao pa ciliconse. Kuyangizhyila apo, ocilikiza lini cosankha ciliconse caangapange ŵanthu ayakine. M’malo mocita zinthu m’njila ya ukali olo yosoŵa ulemu, ove otolela cisanzo ca Yesu pocita zinthu na ŵanthu ayakine.
Mwacisanzo, pa nthawi iyakine Yesu ekumana na munakazi muyakine wamene enze wa m’cipembezo cosiyana na cake. Munakazi uyu enzonkhala na munalume wamene enze lini mulume wake. Nkhalidwe iyi Yesu enzokatizhyana nayo lini. Olo n’tetyo, elaŵila naye mwaulemu.—Yohane 4:9, 17-24.
Molingana na Yesu, Akhristu onkhala okonzeka kuuzhyako ayakine zakukhulupilila ngati ni ofunishisha kumvwishila, ndipo ocita izi “mwaulemu ngako.” (1 Petulo 3:15) Baibo yukamba kuti Akhristu ofunika lini kukakamizhya ayakine kuyendela maganizo ŵao. Yukamba soti kuti okonkha a Khristu, “ofunika lini kukangana na ŵanthu, koma ofunika kunkhala odekha ku ŵanthu onse,” kuyangizhyilapo ŵala amene ali na zikhulupililo zosiyana na zao.—2 Timoteyo 2:24.
Zayulaŵila Baibo pa nkhani yozondana
Baibo yulaŵila kuti tufunika ‘kuyesayesa kunkhala mwamtendele na ŵanthu onse.’ (Aheberi 12:14) Munthu wamene oyesayesa kunkhala mwamtendele, opewa kuzonda ayakine. Yove ophwanya lini mfundo zakuyendela koma oyesayesa kuti ankhale mwamtendele na ayakine. (Mateyu 5:9) Baibo yulimbikisha Akhristu kukonda ŵanthu amene oŵazonda mwa kucita nao zinthu mwacikondi ngati oŵacitila vinthu viipa.—Mateyu 5:44.
N’cendi kuti Baibo yukamba kuti Mulungu “ozonda” ndipo onyansiwa na zocita zamene zutaila ulemu ŵanthu ayakine kapena kuŵaikisha m’mavuto. (Miyambo 6:16-19) oma pa Lemba iyi, Baibo yuseŵenzesha mau akuti “kuzonda” poonesha mwamene Yehova oonela minkhalidwe iipa. Baibo yuonesha kuti Mulungu ni wofunishisha kukhululukila, noyavya ŵanthu amene ofunishisha kucinja noyamba kukonkha mfundo zake.—Yesaya 55:7.
Mavesi a m’Baibo amene okamba za kunkhala ololela na aulemu
Tito 3:2: ‘Nkhalani ololela koma soti ofasa ku ŵanthu onse.’
Munthu wololela omvwishila modekha maganizo ya ŵanthu ayakine ndipo ocita zinthu zolimbikisha ulemu.
Mateyu 7:12: “Zinthu zonse zamufuna kuti ŵanthu ayakine akucitileni, namwe muŵacitile zamene izo.”
Tonse tuyamikila ngako ngati ŵanthu ayakine otilemekeza nocita zinthu motiganizila. Kuti muziŵe mwamungaseŵenzeshele lamulo yecitwala Yesu, onani nkhani yakuti “Kodi Yesu Anapereka Lamulo Lotani Lokhuza Kuchita Zinthu ndi Ena?”
Yoswa 24:15: “Sankhani lelo wamufuna kutumikila.”
Ngati tulemekeza ufulu wa ayakine wopanga zosankha, tulimbikisha mtendele.
Machitidwe 10:34: “Mulungu aliye sankho.”
Mulungu osankha lini ŵanthu kulingana na mtundu, cinkhalidwe, calo kwakunkhala, olo kwecikulila. Ŵanthu amene otolela cisanzo ca Mulungu olemekeza ŵanthu onse.
Habakuku 1:12, 13: “[Mulungu] angalekelele lini vinthu viipa.”
Kulolela kwa Mulungu kuli na malile. Alole lini kuti minkhalidwe iipa ipitilizhye mpaka kale-kale. Kuti muziŵe zinyinji, onelelani vidyo yakuti Ndaŵa Yanji Mulungu Olola Ŵanthu Kuvutika?
Aroma 12:19: “Siilani malo ukali wa Mulungu. Cifukwa Malemba okamba kuti: ‘Kuwezhyela ni kwangu,’ walaŵila tetyo Yehova.” a
Yehova Mulungu olola lini munthu aliyense kuwezhyela. Akaonesheshe kuti cilungamo cacitika pa nthawi yake. Kuti muziŵe zinyinji, ŵelengani nkhani yakuti “Kodi Zinthu Zopanda Chilungamo Zidzatha Padzikoli?”
a Yehova ni zina ya Mulungu. (Salimo 83:18) Ŵelengani nkhani yakuti “Kodi Yehova N’ndani?”
Ziyakine Zamungakonde
ZOKHUZA SEO
Sengani Phunzilo ya Baibo
Phunzilani yankho iliyonse yamungankhale nayo ya m’Baibo, olo phunzilani zokhuza Mboni za Yehova.
