Pacalo conse, ŵanthu akhuziwa na mavuto yamene yawela cifukwa ca kupya kopitilila muyeso kwamene kukaliyocitikapo m’mbili yonse ya ŵanthu. Mvwani yayakine mwa malipoti yatalandilako:

•   “Kufumila peyeyamba kucinja nyengo vyaka pafupifupi 174 vapita, ŵanthu enze akaliyomvwapo kupya koteti m’mwezi wa June.”—National Oceanic and Atmospheric Administration, U.S. Department of Commerce, July 13, 2023.

•   “Vyalo monga Italy, Spain, France, Germany na Poland vakhuziwa na kupya kopitilila muyeso ndipo tuyembekezela kuti pa visumbu va Sicily na Sardinia, tempulica ikwele kufwika pa 48°C. Iyi inkhale tempulica yakupya ngako yamene ikaliyocitikapo mu Europe monse.”—European Space Agency, July 13, 2023.

•   “Cifukwa ca kupya kopitilila muyeso uku, tuyembekezela kuti m’mbali zinyinji za pacalo, mukolokwa cimvula camphamvu. Izi zikacitishe soti vuto iyakine ya kusefukila kwa manzi.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

 Kansi malipoti aya yokhuza kupya kopitilila muyeso, yokucitishani kunkhala na nkhaŵa? Onani zayukamba Baibo pa nkhani iyi yofunika ngako.

 Eee. Kupya kopitilila muyeso na masoka ayakine a cilingedwe ni zimozi mwa zinthu zeyelosela Baibo kuti zikocitika m’masiku ŵano osilizhya. Mwacisanzo, Yesu elosela kuti m’masiku ŵano osilizhya tikoona “vinthu voyofya,” kapena kuti “vinthu dodabwisa koma soti vocitisha wowa.” (Luka 21:11) Kupya kopitilila muyeso kwacitisha kuti anyinji ankhale na wowa wakuti ŵanthu akwanishe kuononga calo kufwika pa mlingo wakuti paliye angankhalepo.

 Yai. Mulungu elenga calo kuti ŵanthu akonkhalapo mpaka kale-kale ndipo alole lini kuti ŵanthu aciononge. (Salimo 115:16; Mlaliki 1:4) Yove elonjeza kuti “akaononge ŵanthu onse amene oononga calo.”—Chivumbulutso 11:18.

 Baibo yuonesha kuti Mulungu angakangiwe lini kuteteza calo ku mphamvu zoononga zacilengedwe.

•   “[Mulungu] ocitisha mphepo yamkuntho kunkhala bata, cakuti mafunde a panyanja odekha.” (Salimo 107:29) Mulungu ali na mphamvu zokwanisha kulamulila mphamvu zoononga zacilengedwe. Yove akafumyepo mavuto alionse amene ocitisha kuti pacalo pakokupya mopitilila muyeso.

•   “Mwacungulukila calo kuti mucipase zinthu zinyinji, mwacilemelesha ngako soti.” (Salimo 65:9) Na daliso ya Yehova, calo conse cikankhale paladaiso.

 Kuti muziŵe zinyinji zokhuza zayulaŵila Baibo pa nkhani yokonza soti calo, onani nkhani ya pa Webuaiti yakuti “Kodi Ndi Ndani Amene Adzapulumutse Dzikoli? ya m’Chichewa.”