M’mwezi wa July 2022, pacalo conse pecitika ciwawa copayana na mfuti cocitisha wowa. Onani visanzo ivi:

•   “Kupaiwa kwa wa zandale wochuka ku Japan wa zina yakuti Shinzo Abe [wamene enze Nduna Ikulu ya boma] kwekhumudwisha ŵanthu a m’calo ici ndipo kwedabwisa ŵanthu pacalo conse. Zili teti cifukwa cakuti m’calo ici mucitika lini ngako zaciwawa koma soti muli malamulo okosa pa nkhani yonkhala na mfuti.”—Nyuzipepa ya The Japan Times ya pa July 10, 2022.

•   “Ŵanthu ku Denmark ni odabwa ngako cifukwa ca munthu muyakine wamene epaya ŵanthu atatu na mfuti pa maketi ikulu ya Copenhagen.”—Nyuzi ya Reuters ya pa July 4, 2022.

•   “Ku South Africa: Ŵanthu 15 epaiwa pavuli poshutiwa na anyankapondo ayakine pa malo omwela walwa mu tauni ya Soweto.”—Nyuzipepa yakuti The Guardian ya pa July 10, 2022.

•   “Ŵanthu opitilila pa 220 epaiwa pavuli poshutiwa ku America. Ciwawa ici cecitika pa holide ya pa July 4.”—Nyuzi ya CBS ya pa July 5, 2022.

 Kansi ciwawa coshutana cikasile? Kansi Baibo yulaŵilapo kuti tyani?

 Baibo yukamba kuti tunkhala ‘m’masiku osilizhya.’ Niye cifukwa cake ŵanthu ni oyofya, a nkhanza koma soti anyankapondo. (2 Timoteyo 3:1, 3) Minkhalidwe iyi yucitisha ŵanthu kunkhala na wowa. (Luka 21:11) Olo n’tetyo, Baibo yulonjeza nthawi pamene ciwawa cikasile, ndipo “ŵanthu akankhale pa malo a mtendele koma soti otetezeka. Akankhale m’malo aliye congo koma soti a phee.” (Yesaya 32:18) Koma kansi ciwawa cikasile tyani?

 Mulungu akacosepo ŵanthu onse aipa ndipo akaononge zida zonse zankhondo.

•   “Koma ŵanthu aipa akacosewepo pacalo.”—Miyambo 2:22.

•   “[Mulungu] olesha nkhondo mpaka kosilizhyila kwa calo. Wathyola uta notendatenda mkondo ndipo washoka ngolo zankhondo.”—Salimo 46:9.

 Mulungu akacosepo zinthu zuyambisha ciwawa mwa kuphunzisa ŵanthu kunkhala mwamtendele.

•   “Zikacitane lini ngozi olo kuonongana m’lupili yangu yonse ituŵa, cifukwa calo conse cikazule na ŵanthu oziŵa Yehova monga ni mwamene manzi yozulila m’nyanja.”—Yesaya 11:9.

•   Olo masiku ŵano, Mulungu ophunzisa ŵanthu pacalo conse kuti aleke ciwawa noseŵenzesha zida za nkhondo. Izi zutanthauza kuti ‘ofula vipula vao kuti vinkhale milomo ya gejo na mikondo yao kuti inkhale voŵazila vimiti.’—Mika 4:3.

 Kuti muziŵe zinyinji zokhuza lonjezo ya m’Baibo yakuti pacalo pakankhale lini ciliconse cocitisha wowa, ŵelengani nkhani yakuti, “Kodi N’zotheka Kukhala Mopanda Mantha?”

 Kuti muziŵe zinyinji pa mfundo yakuti zaciwawa zikasililetu pacalo, ŵelengani nkhani yakuti, “Mtendele Udzabweradi Padziko Lapansi!”