Asogoleli a vwalo vosiyanasiyana koma soti mabungwe akangiwa kuleta mtendele pacalo. Masiku ŵano, mikangano na ciwawa zayangizhyilika ngako kungofumila peyecitika Nkhondo Yaciŵili ya Pacalo Conse. Ŵanthu pafupifupi 2 biliyoni, yamene ni hafu ya ciŵelengelo ca ŵanthu pacalo conse, onkhala m’malo mwamene mucitika mikangano na ciwawa.

 Ndaŵa yanji ŵanthu angakwanishe lini kuleta mtendele? Kansi Baibo yulaŵilanji?

1.  1. Ŵanthu anyinji m’calo ici ali na minkhalidwe iipa. Izi zucitisha kuti cinkhale covuta kuti akocita zinthu zingalete mtendele. Baibo yeloselelatu kuti m’masiku ŵasu ŵano, “ŵanthu akankhale ozikonda, okonda ndalama, ozitama, olikuzhya, . . . osakhulupilika, . . . osafuna kugwilizana na ayao, . . . osazilesha, oyofya, . . . osamvwa za ayao, ozitukumula cifukwa ca kumeka.”—2 Timoteyo 3:2-4.

2.  2. Ŵanthu onse, kaya payeka-payeka olo onse monga gulu, aliye mphamvu zokwanisha kusilizhya mavuto paliye thandizo ya Nyamalenga wao, Yehova a. Baibo yukamba kuti “munthu aliye ulamulilo wosankha yeka njila ya moyo wake.”—Yeremiya 10:23.

3.  3. Calo culamuliliwa na Satana Maleŵania wamene ni wankhanza ndipo “osoŵesha calo conse.” (Chivumbulutso 12:9) Pacalo pali nkhondo na mikangano cifukwa “calo conse cili m’manja mwa muipa.”—1 Yohane 5:19.

 Baibo yutiuzhya kuti Mulungu niye wati akalete mtendele, osati ŵanthu.

•   “‘Nuziŵa bwino zanuganiza zokhuza mweo. Nuganiza zokupasani mtendele osati masoka koma soti zokupasani sogolo yabwino na ciyembekezo cabwino.’”—Yeremiya 29:11.

 Kansi Mulungu akakwanilishe tyani lonjezo iyi? “Mulungu wamene opeleka mtendele akaphwanye Satana.” (Aroma 16:20) Mulungu akaseŵenzeshe boma yakululu yamene Baibo yuiita kuti “Ufumu wa Mulungu,” kuti akalete mtendele pacalo conse. (Luka 4:43) Pansi pa ulamulilo wa Yesu Khlistu wamene ni Mfumu ya Ufumu uyu, ŵanthu akaphunzisiwe mwangankhalile mwamtendele.—Yesaya 9:6, 7.

•   Kuti muziŵe zinyinji, ŵelengani nkhani ya m’Chichewa ya mutu wakuti “Kodi Ufumu wa Mulungu Udzacita Chiyani?”