NKHALANI MENSO!
Masiku Ŵano ni Kwakupya Ngako Pacalo Conse—Kansi Baibo Yukambapo Kuti Tyani?
M’mwezi wa July 2022, malipoti yeonesha kuti kwenze kwakupya ngako pacalo conse:
“Kaciŵili m’mwezi uno, a boma ku China acenjeza ŵanthu kuti kunkhale kwakupya ngako m’mizinda pafupifupi 70.”—July 25, 2022, CNN Wire Service.
“Cifukwa cakuti mbali zinyinji za Europe ni kwakupya ngako, kucitika ngozi zinyinji za mulilo m’vyalo vinyinji.”—July 17, 2022, The Guardian.
“Pa Sondo m’mizinda inyinji ku United States kwenze kwakupya ngako kupambana kale ndipo mphepo yakupya yefwika kum’mawa na mbali ziyakine za kum’mwela koma soti ca kumcingulo.”—July 24, 2022, The New York Times.
Kansi izi zutanthauzanji? Kansi zutanthauza kuti posilizhyila pake calo cikocilikiza lini moyo? Kansi Baibo yukambapo kuti tyani?
Kansi kupya uku kukwanilisha ulosi wa m’Baibo?
Eee. Baibo yeloselelatu kuti m’masiku osilizhya zinthu zoteti zikocitika. Mwacisanzo, Yesu elosela kuti kukankhale “voyofya” olo “vizindikilo vodabwisa.” (Luka 21:11) Mosiyana na kale, lomba kukupya ngako pacalo conse. Izi zucitisha ŵanthu anyinji kunkhala na nkhaŵa poganiza kuti zocita za ŵanthu zicitishe kuti posilizhyila pake calo cileke kucilikiza moyo.
Kansi calo cileke kucilikiza moyo?
Yai. Mulungu elenga calo kuti ŵanthu ankhalemo mpaka kale-kale. (Salimo 115:16; Mlaliki 1:4) Yove alole lini ŵanthu kuti aononge calo. M’malo mwake, “akaononge ŵala amene oononga calo” monga ni mwecilonjezela.—Chivumbulutso 11:18.
Onani maulosi aŵili oonesha zinthu ziyakine zawatilonjeza Mulungu:
“Cipululu na malo yamene yaliye manzi, vikasangalale. Dela yacipululu ikakondwe ndipo ikacite maluŵa nonkhala yokongola monga liluŵa ya safironi.” (Yesaya 35:1) Mulungu alole lini kuti calo cileke kucilikiza moyo. M’malo mwake, akakonze mbali zonse zaononga ŵanthu.
“Mweo musamalila calo ndipo mucitisha kuti cinkhale na vitwalo vinyinji nocilemelesha.” (Salimo 65:9) Mulungu akapange calo kunkhala paladaiso.
Kuti muziŵe zinyinji zokhuza mwamene kucinja kwa nyengo kukwanilishila ulosi wa m’Baibo, onani nkhani yakuti, “Zomwe Baibulo Limanena pa Nkhani Yakusintha Kwa Nyengo Komanso Tsogolo Lathu.”
Kuti muziŵe zinyinji zokhuza lonjezo yonena mwati cikakonzewele soti calo, onani nkhani yakuti, “Kodi Ndi Ndani Amene Adzapulumutse Dzikoli?”
Ziyakine Zamungakonde
ESSENTIAL BIBLE TEACHINGS
Ndaŵa Yanji Mulungu Elenga Calo?
Calo ni cozula na zinthu zokongola. Yehova eciika pa mlingo woyenelela kucokela pali zuŵa, ndipo cuzunguluka pa luŵilo yoyenelela. Ndaŵa yanji Mulungu ecita khama teti polenga calo?
