Caka ciliconse, Mboni za Yehova pamozi na ŵanthu ayakine okumana kamozi kuti akumbukile imfwa ya Yesu pokonkha lamulo yake. (Luka 22:19) Cocitika ici cutiyavya kuyamikila zeciticitila Yesu pecipeleka moyo wake kuti aombole ŵanthu. Cuonesha soti mwamene nsembe yake yutipindulishila pali lomba koma soti msogolo.​—Yohane 3:16.

 Mungapindule tyani na nsembe ya Yesu mosasamala kanthu kuti mukapezeke pa cikumbuso caka cino olo yai? Yesu ekamba kuti tufunika kucita vinthu viŵili vofunika ngako:

1.  1. Mukophunzila zokhuza Mulungu na Yesu. Peenzopemphela kwa Ausuwake akululu, Yesu ekamba kuti: “Moyo wosasila akaupeze keno ophunzila noziŵa za mweo, Mulungu yeka wacendi na Yesu Khristu wemwetuma.”​—Yohane 17:3.

2.  2. Mukoseŵenzesha zamuphunzila. Yesu egogomezela kuti tufunika kuseŵenzesha ziphunziso zake. Mwacisanzo, kosilizhyila kwa Ulaliki Wake Wapalupili eyamikila ŵanthu amene “akumvwa mau [ŵake] noŵacita.” (Luka 6:46-48) Pa nthawi iyakine ekamba soti mau olingana na aŵa. Eciti: “Ngati izi muziziŵa, nimwe odala ngati muzicita.”​—Yohane 13:17.

 Kansi mungakonde kuphunzila zinyinji zokhuza Mulungu na Yesu? Kansi mungakonde kukuyavyani kuti mukoseŵenzesha zamuphunzila? Onani ziyakine mwa njila zingakuyavyeni.

 Kuphunzila Baibo mahala m’njila yolaŵizhyana kwayavya ŵanthu anyinji kuseŵenzesha mfundo zakuphunzila.

•  Kuti muziŵe zinyinji zokhuza pulogilamu iyi, lutani pa peji ya m’Chichewa yakuti Kuphunzila Baibulo Mothandizidwa ndi Munthu Wina.

•  Onelelani vidyo yakuti Takulandilani ku Phunzilo ya Baibo kuti muone mwayucitikila phunzilo iyi.

 Mboni za Yehova zusonkhana kaŵili wiki iliyonse pa malo ŵao olambilila amene oitiwa kuti Ng’anda ya Ufumu. Pa misonkhano iyi, tulaŵizhyana mfundo za m’Baibo na mwatingaziseŵenzeshele mu umoyo wasu.

 Munthu aliyense angapezekepo pa misonkhano iyi olo ŵala amene ni Mboni lini. Kulingana na mwazilili zinthu, mungasankhe kupezeka pa misonkhano iyi mwacindunji olo kupitila pa vidyokonfalensi.

•  Kuti muziŵe zucitika pa misonkhano iyi, onelelani vidyo ya mutu wakuti Kansi n’Cinji Cucitika ku Ng’anda ya Ufumu?

•  Kuti muziŵe malo yocitila misonkhano yamene yali kufupi na kwamunkhala, lutani pa peji yakuti Misonkhano ya Mpingo ya Mboni za Yehova.

 Nkhani zinyinji na mavidyo yamene yopezeka pa webusaiti iyi, zingakuyavyeni kuphunzila zinyinji zokhuza zeciphunzisa Yesu na mwamungapindulile na imfwa yake.

 Mwacisanzo, kuti muphunzile mwamene imfwa ya munthu m’mozi yupindulishila ŵanthu anyinji, ŵelengani nkhani yakuti, “Kodi Yesu Amapulumutsa Motani?” na yakuti N’cifukwa Ciani Yesu Anavutika Ndi Kufa? olo onelelani vidyo yakuti Ndaŵa Yanji Yesu Ecifwa?