Pa May 24, 2022, ngozi ikulu yecitika m’tauni ya Uvalde, Texas ku U.S.A. Molingana na nyunzipepa yoitiwa kuti The New York Times, “nyankapondo muyakine eshuta ŵana asukulu okwanila 19 na matica aŵili pa sukulu ya Robb Elementary.”

 N’zomvwisha cisoni kuti zinthu zoteti zankhala zucitika mowelezhyawelezhya. Lipoti iyakine yefotokoza kuti caka casila mu United States tyala, “mwecitika ngozi za kushutiwa kwa ŵana asukulu zokwanila 249. Ndipo ciŵelengelo ici n’cikulu ngako kupambana viŵelengelo viyakine va kushutiwa kwa ŵana asukulu vamene vankhala vucitika kuyambila mu 1970.”

 Ndaŵa yanji zinthu zoteti zucitika? Kansi n’cinji cingatiyavye kupilila vinthu viipa voteti? Kansi paliko ciyembekezo ciliconse cakuti ciwawa cikasile? Baibo yupeleka mayankho.

•    Baibo yufotokoza kuti “m’masiku osilizhya” ŵanthu “akokonda lini enekwao” koma soti akankhale “oyofya.” Izi zutanthauza kuti akonkhala ankhanza koma soti aciwawa. Ŵanthu oteti “akaipileipile.” (2 Timoteyo 3: 1-5, 13) Kuti muziŵe zinyinji, ŵelengani nkhani yakuti “Kodi Baibulo Linaneneratu za Mmene Anthu Adzidzaganizira ndi Kuchitira Zinthu Masiku Ano?”

 Ŵanthu anyinji ozikonsha kuti, ‘Ndaŵa yanji Mulungu olola ngozi monga kupaiwa kwa ŵana asikulu?’ Kuti mupeze mayankho a m’Baibo, ŵelengani nkhani yakuti, “N’cifukwa Ciyani Anthu Abwino Nawonso Amakumana ndi Mavuto?”

•    “Vinthu vonse vamene velembewa kalekale, velembewa kuti vitilangize, kuti kupitila m’kupilila kwasu na citonthozo ca m’Malemba, tinkhale na ciyembekezo.”​—Aroma 15:4.

 Mfundo za m’Baibo zingakuyavyeni kupilila zinthu zaciwawa zamene zucitika m’calo. Kuti muziŵe zinyinji, onani Galamuka! ya Cizungu ya mutu wakuti “Will Violence Ever End?”

 Kuti muziŵe zinyinji zokhuza mwamene makolo angayavyile ŵana ŵao kupilila zinthu zoyofya zaangaone olo kumvwa, mungaŵelenge nkhani yakuti “Kodi Mwana Wanu Amaopa Akamva za Zimene Zacitika?”

•    “Akaombole miyoyo yao ku cinzunzo na ciwawa.”​—Salimo 72:14.

•    “Akafule vipula vao kuti vinkhale milomo ya gejo, mikondo yao kuti inkhale votendela vimiti. Mtundu wa ŵanthu ukanyamule lini vipula noyamba kuniatana na mtundu uyakine ndipo ŵanthu akaphunzile lini soti nkhondo.”​—Mika 4:3.

 Mulungu akacite zinthu zamene ŵanthu angakwanishe lini kucita. Ufumu wake wakululu ukaononge zida zonse nosilizhya ciwawa. Kuti muziŵe zinyinji zati ukacite Ufumu wa Mulungu, ŵelengani nkhani yakuti Mu Ufumu wa Mulungu, pa Dziko “Padzakhala Mtendele Woculuka.”