Masiku ŵano, ŵanthu anyinji ocita zinthu motaya ulemu. Mwacisanzo, olwala okalipila madokota, makasitomala okalipila ogulisa vakulya m’malesitilandi, mapasenja a m’ndeke okalipa noniata oyendisha, ŵana aliye ulemu onyoza, kuŵaopseza noniata matica ŵao, ndipo anyandale anyinji ocita vinthu vozitaila ulemu pamene anyandale ayakine ozitamanda kuti ana ulemu ngako.

 Baibo yufotokoza cifukwa cake ŵanthu ocita vinthu m’njila yosoŵa ulemu teti. Yufotokoza soti cifukwa cake nkhalidwe iyi niyowanda masiku ŵano.

 Pacalo conse, ŵanthu anyinji aleka kuonesha minkhalidwe yabwino m’zocita koma soti m’zokamba zamene zucitisha kuti akozitaila ulemu.

•   Kafukufuku walombapano wecitiwa na kabungwe ka ku America koitiwa kuti Gallup weonesha kuti mankhalidwe abwino mu United States acepelatu kupambana na mwezenzele vyaka 22 vapita.

•   Kafukufuku uyakine weonesha kuti 65 pelesenti ya ŵanthu opitilila pa 32,000 m’vyalo vokwana 28, ekamba kuti pa umoyo wao onse, enze akaliyeonapo kusoŵekela kwa nkhalidwe yaulemu monga ni mwakulili masiku ŵano.

 Baibo yeloselelatu za minkhalidwe iipa yatuona masiku ŵano.

•   Masiku osilizhya ikankhale nthawi yapadela koma soti yovuta. Ŵanthu akankhale ozikonda, okonda ndalama, ozitama, ozikweza onyoza osamvwila makolo, osayamika, . . . osazilesha koma soti oyofya.”—2 Timoteyo 3:1-3.

 Kuti muziŵe zinyinji zokhuza ulosi uyu na mwaukwanilishiwila, ŵelengani nkhani yakuti “Kodi Baibulo Linaneneratu za Mmene Anthu Adzidzaganizira ndi Kuchitira Zinthu Masiku Ano?”

 M’calo ici mwamene ŵanthu anyinji oonesha lini ulemu, ŵanthu mamiliyoni apeza kuti nicanzelu kuseŵensha Baibo kuti ankhale na mankhalidwe abwino. Malangizo wake odalilika “ankhalepo mpaka kalekale.” (Salimo 111:8) onani visanzo ivi:

•   Zayukamba Baibo: “Vinthu vonse . . . Vamufuna kuti ŵanthu akucitileni, namwe muŵacitile zamene izo.”—Mateyo 7:12.

   Tanthauzo yake: Tufunika kucita zinthu mwacifundo koma soti mwaulemu na ayakine , monga ni mwatufunila seo kuti akocitila nase zinthu.

•   Zayukamba Baibo: “Tetyo, ponkhala kuti lomba mwataya cinyengo, aliyense wa mweo akolaŵila cendi kwa muyake, cifukwa nise ziwalo zolumikizhyana”—Aefeso 4:25.

   Tanthauzo yake: Tufunika kunkhala acilungamo pali zatulaŵila olo zatucita.

 Kuti muziŵe zinyinji zokhuza nkhani iyi, ŵelengani:

•   Nsanja Ya Mulonda ya mutu wakuti “Cabwino na Ciipa—Malangizo Yamungadalile.”

•   Nkhani yakuti “Kulolela—Kansi Baibo Ingatiyavye Tyani? .”